Nafolofɛnw ɲini Bibulu kɔnɔ ani u sira tagama

Bibulu kalantɔ, an be se ka nafolofɛnw ɲini a kɔnɔ an kɛtɔ ka sɛgɛsɛgɛri kɛ. Nka, an be se ka nafa sɔrɔ o la bɛrɛbɛrɛ cogo di?

A ɲini ka dɔ lɔn tugun Bibulu ka maanaw koo la. Misali la, a ɲini k’a lɔn mɔgɔ min y’o maana sɛbɛ, a be kumana mɔgɔ min fɛ ani a y’o sɛbɛ tuma min na. A y’a sɛbɛ koo jumanw lo sen fɛ, koo jumanw lo kɛra o ɲɛ ani o kɔ??

A ɲini ka kalanw sɔrɔ, i kɛtɔ k’i yɛrɛ ɲininga ko: “Mɔgɔ minw kofɔra, u dusukunnako ye mun lo ye? U ye jogo jumanw lo yira? Mun na n’ ka ɲi k’o jogow ladegi wala ka n’ yɛrɛ tanga u ma?”

I ye kalan minw sɔrɔ, u sira tagama. N’a sɔrɔ i be se k’o kɛ waajuli la wala n’i be koow kɛra ni tɔɔw ye. N’i b’o kɛ, i b’a yira ko i ye hakilitigi wala kolɔnbaga ye i ko Bibulu b’a fɔ cogo min na ko: “Kolɔnbaga k’o koow kɔlɔsi kosɔbɛ.”—Zab. 107:43.

• I be se k’o kɛ cogo min na: A kɔrɔsi an ka Lajɛnsɛbɛ yɔrɔ nin be sinsin vɛrisew sira tagamacogo kan cogo min na: Nafolofɛnw Ala ka Kuma kɔnɔ. O yɔrɔ la, ɲiningaliw be yen an be se k’an yɛrɛ ɲininga minw na, miiriya dɔw fana be yen an be se ka jatiminɛ kɛ minw kan ani jaa dɔw, an be se ka minw lajɛ.