“Mɔgɔ minw tun ye hakɛ kɛ fɔlɔfɔlɔ, a ma olu jalaki”

An ka jurumuw be se ka yafa kunmabɔsara dɔrɔn lo sababu la, Yezu y’o min di a joli barika la (Efɛz. 1:7). Nka, Bibulu b’a fɔ Ala koo la ko: “Mɔgɔ minw tun ye hakɛ kɛ fɔlɔfɔlɔ [o kɔrɔ, sanni Yezu ka kunmabɔsara di], a ma olu jalaki.” O kɔrɔ ko a yafara u ma (Ɔrɔm. 3:25). Jehova sera k’o kɛ cogo di ani o wagati kelen na ka koow kɛ ka kɛɲɛ n’a ka tilenninya dafanin ye?

Minw tun bena limaniya Jehova la ani ka la a ka layiduw la, a tun ye layidu ta ko a bena “deen” wala bɔnsɔn dɔ di min bena olu kisi. Kabi wagati min na Jehova y’o layidu ta, ale fɛ a tun be i n’a fɔ kunmabɔsara dira ka ban (Zɛnɛzi 3:15; 22:18). A tun lanin b’a la kosɔbɛ ko ale ka wagati latigɛnin na, a Dencɛ kelenpe bangelen tun bena sɔn ka kunmabɔsara di (Gal. 4:4; Eburuw 10:7-10). Ka Yezu to dugukolo kan, Jehova tun ye see di a ma a ka mɔgɔw ka jurumuw yafa, hali k’a sɔrɔ kunmabɔsara tun ma di fɔlɔ. Mɔgɔ minw tun limaniyanin lo Yezu la, mun na a tun be se k’u ka jurumuw yafa? A tun be se k’o kɛ sabu a tun b’a lɔn ko a tun bena kunmabɔsara min di, o bena u ka jurumuw datugu.—Mat. 9:2-6.