A to kanuya k’i lasun i ka to ka waajuli kɛ!

1. Saan 2023, Watch Tower tɔɔn ka lajɛn na, an ye kunnafoni juman lo sɔrɔ?

SAAN 2023, Watch Tower tɔɔn ka lajɛn na,a an ka faamuyali gwɛra an ka lannako dɔw koo la ani o diyara an ye kosɔbɛ. An ye kibaro diiman dɔw mɛn fana an ka waajuli baara koo la. Misali la, an y’a faamu ko hali Babilonɛba halakinin kɔ, n’a sɔrɔ mɔgɔ dɔw bena sababu sɔrɔ ka fara Jehova sagokɛlaw kan. U y’an lalɔnniya fana ko k’a ta saan 2023 novanburukalo ma, Masaya waajulikɛlaw ye baara min kɛ waajuli la, u tɛna o bɛɛ sɛbɛ u ka rapɔɔriw kan tugun. Yala o yɛlɛmaniw kɔrɔ ko waajuli baara kɔrɔtanin tɛ ani kɔrɔtɔko tɛ tugun wa? Ayi, o tɛ!

2. Loon o loon mana tɛmɛ, mun na an ka waajuli baara be kɛ kɔrɔtɔko ye ka tɛmɛ fɔlɔ kan? (Mariki 13:10).

² Loon o loon mana tɛmɛ, an ka waajuli baara be kɛ kɔrɔtɔko ye ka tɛmɛ fɔlɔ kan. Mun na do? Sabu an be gwɛrɛla laban loon na kosɔbɛ. An k’a filɛ Yezu ye min fɔ waajuli baara koo la laban loonw na (Mariki 13:10 kalan). Matiyo ka Evanzili kɔnɔ, Yezu y’a fɔ ko kibaro diiman bena fɔ duniɲa yɔrɔ bɛɛ la “laban” be sɔrɔ ka se (Mat. 24:14). Laban min kofɔra, o ɲɛsinna Sutana ka duniɲa juguman nin halakili koo lo ma. Koo minw bena kɛ yanni dɔɔni, Jehova y’o “loon n’o waati” latigɛ ka ban (Mat. 24:36; 25:13; Kɛw. 1:7). Loon o loon mana tɛmɛ, an be surunya laban loon na kosɔbɛ (Ɔrɔm. 13:11). Yanni o cɛ, a ka ɲi an ka to ka waajuli kɛ fɔɔ ka taga se o loon ma.

3. Mun lo b’an lasun ka waajuli kɛ?

³ An bɛɛ ka ɲi k’an yɛrɛ ɲininga ɲiningali jɔnjɔn min na, o ye ko: Mun na an be kibaro diiman fɔ mɔgɔw ye? Kanuya lo b’an lasun k’o kɛ. N’an be waajuli kɛ, an b’a yira ko kibaro diiman ka di an ye, an be mɔgɔw kanu ani min kɔrɔtanin lo ka tɛmɛ o bɛɛ kan, o ye ko an be Jehova kanu ani a tɔgɔ koo ka di an ye. An k’o koo kelen kelen bɛɛ lajɛ.

KIBARO DIIMAN KA DI AN YE

4. N’an ye kibaro diiman dɔ mɛn, o be mun lo kɛ an na?

⁴ Tuma min na i ye kibaro diiman dɔw mɛn, i hakili b’a la o ye min kɛ i la wa? N’a sɔrɔ i somɔgɔ dɔ ye deen sɔrɔ wala i ye baara dɔ sɔrɔ i mako gwɛlɛ tun be min na. Siga t’a la, i kɔrɔtɔra k’o kibaro diiman fɔ i somɔgɔw n’i teriw ye. Yala o ɲɔgɔn lo kɛra tuma min na i ye Ala ka Masaya kibaro diiman mɛn, o min ye kibarow bɛɛ la diiman ye wa?

5. I siɲɛ fɔlɔ ka Bibulu ka tiɲɛnkalanw lɔn, o ye mun lo kɛ i la do? (jaaw lajɛ fana).

⁵ I siɲɛ fɔlɔ ka Bibulu ka tiɲɛnkalanw lɔn, miiri k’a filɛ o ye min kɛ i la. I ye koo nunu faamu i sankolola Faa koo la: a b’i kanu, a b’a fɛ i ka kɛ a sagokɛla dɔ ye, a ye layidu ta ko a bena dimi ni tɔɔrɔ ban, k’i ka mɔgɔ kanulenw suu kunu duniɲa kura kɔnɔ ani koo caaman wɛrɛw (Mariki 10:29, 30; Zan 5:28, 29; Ɔrɔm. 8:38, 39; Yir. 21:3, 4). O tiɲɛnkalanw y’i dusu sɔrɔ yɛrɛ le! (Luka 24:32). U diyara i ye fɔɔ i tun b’a fɛ k’u fɔ mɔgɔ bɛɛ ye!—Zeremi 20:9 lajɛ.

6. I be kalan juman sɔrɔ Ernest ni Rose ka koo la?

⁶ An ka balimacɛ Ernestb ka koo lajɛ. Tuma min na a tun be ni saan 10 ɲɔgɔn ye, a facɛ sara. Ernest ko: “N’ tun be n’ yɛrɛ ɲininga ko: ‘A tagara sankolo la le waa, a ta banna le pewu?’ N’ ɲɛɛ tun be bɔ denmisɛn tɔɔw fɛ minw facɛ bele tun be sii la.” Ernest tun be to ka taga kaburutu la tuma o tuma, k’a kunbiri gwan a facɛ ka kaburu gɛrɛfɛ ani ka delili kɛ ko: “Sabari Ala, ne b’a fɛ k’a lɔn n’ facɛ be yɔrɔ min na.” Saan 17 ɲɔgɔn Ernest facɛ sanin kɔ, dɔ ye bibulukalan kofɔ a ye ani a sɔnna. A dusu diyara kosɔbɛ k’a lɔn ko a be komi mɔgɔ saninw be sinɔgɔba lo la ani u tɛ foyi kala ma. A diyara a ye kosɔbɛ fana k’a lɔn ko layidu tara Bibulu kɔnɔ sukununi koo la (Waaj. 9:5, 10; Kɛw. 24:15). A laban, ɲiningali minw tun b’a hakili ɲagamina kabi saan caaman, a y’u jaabiliw sɔrɔ! Ernest tun be Bibulu ka tiɲɛnkalan minw faamuna, u diyara a ye kosɔbɛ. A muso Rose farala a kan ka bibulukalan kɛ ani o kalan diyara ale fana ye. U batizera saan 1978. U y’o tiɲɛnkalan nafamanw kofɔ ni kisɛya ye u somɔgɔw, u teriw ani mɔgɔ wɛrɛw ye. O kɛra sababu ye Ernest ni Rose ye mɔgɔ 70 ni kɔ dɛmɛ u ye Jehova lɔn ani ka batize.

7. Ni Bibulu ka tiɲɛnkalanw diyara an ye, o b’an lasun ka mun lo kɛ? (Luka 6:45).

⁷ Tiɲɛn na, ni Bibulu ka tiɲɛnkalanw ka di an ye, o b’an lasun k’u kofɔ mɔgɔ bɛɛ ye (Luka 6:45 kalan). An be kɛ i ko Yezu ka kalanden fɔlɔw, olu minw y’a fɔ ko: “Anw ye min ye, ka min mɛn, anw te se ka to o fɔbali ye.” (Kɛw. 4:20). Bibulu ka tiɲɛnkalanw ka di an ye, fɔɔ an b’a fɛ k’u kofɔ mɔgɔ caamanba ye.

AN BE MƆGƆW KANU

8. Mun lo b’an lasun ka kibaro diiman fɔ mɔgɔw ye? (koorilen nin lajɛ: “Mɔgɔw kanu: U kɛ Krista ka kalandenw ye”; jaa lajɛ fana).

⁸ I ko Jehova n’a Dencɛ, an be mɔgɔw kanu (Talenw 8:31; Zan 3:16). Minw “te Ala lɔn” ani “jigi layɔrɔ” tɛ u fɛ, olu hinɛ b’an na kosɔbɛ (Efɛz. 2:12). U ka gwɛlɛyaw kosɔn, a be komi u be dingɛ dunba dɔ lo kɔnɔ. Nka juru dɔ be an bolo min be se k’u kisi: O ye Masaya kibaro diiman lo ye. An b’o mɔgɔw kanu ani an be hinɛ u la minkɛ, o b’an lasun k’an seko bɛɛ kɛ ka kibaro diiman lase u ma. O kibaro diiman nafa ka bon kosɔbɛ! O be jigiya di u ma, k’u dɛmɛ u ka ɲɛnamaya kɛ cogo fisaman na kabi sisan ani a be sababu di u ma ka “ɲɛnamaya sɛbɛ sɔrɔ,” o kɔrɔ ɲɛnamaya banbali, Ala ka duniɲa kura kɔnɔ.—1 Tim. 6:19, Bible senuma.

9. An be mɔgɔw lasɔmi mun lo la siniɲasigi koo la ani mun na? (Ezekiyɛli 33:7, 8).

⁹ An be mɔgɔw kanu minkɛ, o b’an lasun fana k’u lasɔmi ko duniɲa juguman nin laban wagati surunyana (Ezekiyɛli 33:7, 8 kalan). An be hinɛ an somɔgɔw ni mɔgɔ tɔɔw la minw tɛ Jehova lɔn. Mɔgɔ caaman be ɲɛnamaya kɛ ten dɔrɔn, ani u t’a lɔn min bena kɛ sini ma. U t’a lɔn ko tɔɔrɔba dɔ bena kɛ, “min ɲɔgɔn ma kɛ ka ye kabini diɲɛ dantuma, fɔɔ ka na se bii ma, ani o tɔɔrɔ ɲɔgɔn fana tena kɛ tugu abada.” (Mat. 24:21). An b’a fɛ u k’a lɔn min bena kɛ o wagati la. A fɔlɔ, ngalon diinanw bena halaki ani o kɔ, duniɲa juguman nin bɛɛ bena halaki fana Arimagedɔn kɛlɛ la (Yir. 16:14, 16; 17:16, 17; 19:11, 19, 20). An be Ala deli ko mɔgɔ caamanba ka sɔn o lasɔmini kuma ma ani u ka fara an kan kabi sisan ka Jehova bato. Nka, an somɔgɔ kanulenw ni mɔgɔ wɛrɛ minw tɛ sɔn k’an lamɛn sisan do?

10. Mun na kɔrɔtɔko lo an ka to ka mɔgɔw lasɔmi?

¹⁰ An y’a ye barokun tɛmɛnin na ko n’a sɔrɔ Jehova bena mɔgɔ dɔw kisi minw bena limaniya a la Babilonɛba halakinin kɔ. N’o lo, an ka to ka mɔgɔw lasɔmi sabu kɔrɔtɔko lo ka tɛmɛ sanga ni wagati bɛɛ kan. Miiri nin na: An be min fɔ mɔgɔw ye sisan, u hakili be se ka jigi o la kɔfɛ (Ezekiyɛli 33:33 lajɛ). N’a sɔrɔ u hakili bena jigi an ka lasɔmini kumaw na ani o bena u lasun ka na fara an kan ka Jehova bato sanni wagati ka tɛmɛ. Filipi dugu la, ‘dugukoloyɛrɛyɛrɛ’ dɔ kɛnin kɔ le, kasobon kɔrɔsibaga dɔ limaniyara Jehova la. O cogo kelen na, minw tɛ sɔn k’an lamɛn bi, n’a sɔrɔ u bena limaniya Jehova la Babilonɛba halakinin kɔ.—Kɛw. 16:25-34.

AN BE JEHOVA KANU ANI A TƆGƆ KOO KA DI AN YE

11. An b’a yira cogo di ko Jehova ka kan ni nɔɔrɔ ni bonya ani sebagaya ye? (Yirali 4:11; jaaw lajɛ fana).

¹¹ An be kibaro diiman fɔ kuun minw kosɔn, u bɛɛ la kɔrɔtaninba ye ko an be Jehova Ala kanu ani a tɔgɔ senuman koo ka di an ye. Waajuli baara be sababu di an ma k’an ka Ala kanulen tando (Yirali 4:11 kalan).c Mɛlɛkɛw jamakuluba ye min fɔ, an sɔnnin be o ma. U ko: “An Matigi ni an ka Ala, i ka kan ni nɔɔrɔ ni bonya ani sebaaya ye.” Dalilu barikaman minw b’a yira ko Jehova lo ye ‘fɛn bɛɛ dan’ ani ko an be niin na ale lo barika la, n’an b’o yira mɔgɔw la, an be nɔɔrɔ ni bonya la Jehova kan. Ka kɛɲɛ n’an ka koow cogoya ye, n’an b’an ka wagati, an fanga ani an bololafɛnw ta ka waajuli baara kɛ bɛrɛbɛrɛ, an b’a yira o fɛ ko Jehova ka kan n’an ka sebagaya ye (Mat. 6:33; Luka 13:24; Kɔlɔs. 3:23). Kuma kuntaga surun na, a ka di an ye ka kuma an ka Ala kanulen koo la. A ka di an ye fana k’a tɔgɔ kofɔ mɔgɔw ye ani k’u dɛmɛ k’a faamu Ala sugu min lo. Mun na do?

12. An be Jehova tɔgɔ saniya cogo di an ka waajuli baara la?

¹² An be Jehova kanu minkɛ, o b’an lasun k’a tɔgɔ saniya (Mat. 6:9). Sutana ye ngalonfin minw la Jehova kan, an b’a fɛ ka mɔgɔw dɛmɛ u k’a faamu k’o tɛ tiɲɛn ye (Zɛnɛzi 3:1-5; Zɔbu 2:4; Zan 8:44). N’an be waajuli kɛra, an b’a fɛ kosɔbɛ k’a fɔ an lamɛnbagaw bɛɛ ye Jehova ye Ala sugu min ye. An b’a fɛ k’a fɔ u ye ko kanuya lo ye a ka jogow bɛɛ la belebeleba ye ani ko a be kuntigiya kɛ tilenninya la. An b’a fɛ k’a fɔ u ye fana ko yanni dɔɔni, Ala ka Masaya bena tɔɔrɔw bɛɛ ban ani ka hɛɛrɛ ni ninsɔndiya lase adamadenw ma (Zab. 37:10, 11, 29; 1 Zan 4:8). N’an b’o koow fɔ mɔgɔw ye waajuli baara la, an be Jehova tɔgɔ lo saniyara. An dusu ka di fana k’a lɔn ko an be koow kɛra k’a yira ko an ye Jehova Seerew ye. Cogo di do?

13. Mun na an b’a jati ko Jehova ye bonyaba la an kan a kɛtɔ k’an weele a Seerew? (Ezayi 43:10-12).

¹³ Jehova y’an weele ko a ‘seerew’ (Ezayi 43:10-12 kalan). A saan damanin ye nin ye, a tun fɔra Koow Ɲɛnabɔla Jɛnkulu mɔgɔw ka bataki dɔ kɔnɔ ko: “Ka weele ko Jehova Seere, o nɛɛma ɲɔgɔn tɛ yen.” Mun na do? An ka misali dɔ lajɛ. Miiri k’a filɛ ko i b’a fɛ mɔgɔ dɔ ka seereya kɛ i koo la kititigɛso la. I bena mɔgɔ juman lo sugandi? Siga t’a la, i bena i lɔnbaga dɔ lo sugandi min ye lannamɔgɔ ye ani a be ni tɔgɔ ɲuman ye. Jehova kɛtɔ k’an sugandi ka kɛ a Seerew ye, a y’a yira ko a b’an lɔn ka ɲɛ ani ko a lanin b’a la ko an bena a yira tɔɔw la ko ale lo ye tiɲɛn Ala kelenpe ye. Jehova ye bonyaba la an kan yɛrɛ le a kɛtɔ k’an kɛ a Seerew ye! O la, an be tɛmɛ sababuw bɛɛ fɛ k’a tɔgɔ kofɔ mɔgɔw ye ani k’a yira ko ngalonfin minw bɛɛ lara a kan, u si tɛ tiɲɛn ye. O cogo la, an be koow kɛ ka kɛɲɛ n’an tɔgɔ ye: An ye Jehova Seerew ye!—Zab. 83:18, NW; Ɔrɔm. 10:13-15.

AN BENA TO KA WAAJULI KƐ FƆƆ KA TAGA SE DUNIƝA LABAN MA

14. Ninsɔndiyakoba jumanw lo bena kɛ yanni dɔɔni?

¹⁴ Ninsɔndiyakoba dɔw bena kɛ yanni dɔɔni! Jehova ka dɛmɛ barika la, an jigi b’a la ko mɔgɔ caamanba bena sɔn tiɲɛn batoli ma sanni tɔɔrɔba ka daminɛ. Tiɲɛn lo ko tɔɔrɔba wagati bena kɛ wagati gwɛlɛ ye min ɲɔgɔn ma deli ka kɛ ka ye. Nka, an ninsɔn ka di k’a lɔn ko hali o wagati gwɛlɛ na, n’a sɔrɔ dɔw bena bɔ Sutana kɔ ani ka fara an kan ka Jehova bato!—Kɛw. 13:48.

15-16. An bena to ka mun lo kɛ ani fɔɔ wagati juman?

¹⁵ Yanni o cɛ, baara kɔrɔtaninba dɔ b’an fɛ ka kɛ, o min ɲɔgɔn tɛna kɛ ka ye tugun. Nɛɛma lo an fɛ ka Ala ka Masaya kibaro diiman fɔ duniɲa yɔrɔ bɛɛ la. O wagati kelen na, koo minw bena kɛ yanni dɔɔni, an ka ɲi ka to ka mɔgɔw lasɔmi o la. Mɔgɔw ka ɲi k’a lɔn ko duniɲa juguman nin laban surunyana kosɔbɛ yɛrɛ le! N’o wagati sera, u bena a lɔn ko an tun be kibaro min fɔra, o bɔra Jehova Ala lo yɔrɔ.—Ezek. 38:23.

¹⁶ O la, an cɛsirinin lo ka mun lo kɛ? Kibaro diiman ka di an ye, an be mɔgɔw kanu ani min kɔrɔtanin lo ka tɛmɛ o bɛɛ kan, o ye ko an be Jehova Ala kanu ani a tɔgɔ koo ka di an ye. O kanuya lo bena to k’an lasun ka waajuli kɛ n’an dusu bɛɛ ye ani ni kɔrɔtɔ miiriya ni kisɛya ye, fɔɔ tuma min na Jehova bena a fɔ ko: “A ka ɲi ten!”