I tɛ koo minw lɔn, i yɛrɛ majigi ka sɔn u la

1. Jehova y’an dan cogo di ani mun na do?

JEHOVA y’an dan cogo kabakoman na. Misali la, an be se ka miiri, ka koo kuraw degi ani an ye min degi, ka baara kɛ n’o ye. Mun na a y’an dan o cogo la? Jehova b’a fɛ an k’ale “lɔn” ka ɲɛ ani an ka basigi o kan ka desizɔn ɲumanw ta.—Talenw 2:1-5; Ɔrɔm. 12:1.

2. a) An ka ɲi ka sɔn mun lo ma? (Zɔbu 37:23, 24; jaa lajɛ fana). b) Mun na a kɔrɔtanin lo an k’a faamu ko an tɛ fɛɛn bɛɛ lɔn?

² Hali ni Jehova ye see di an ma ka fɛɛnw degi, an tɛ se ka koo bɛɛ lɔn (Zɔbu 37:23, 24 kalan). An ka Zɔbu ka koo lajɛ. Jehova ye ɲiningali caaman kɛ a ye, o min y’a to Zɔbu y’a faamu ko ale tɛ koo caaman lɔn. O y’a to a y’a yɛrɛ majigi ani o y’a dɛmɛ fana k’a ka miiriya yɛlɛma (Zɔbu 42:3-6). N’an fana y’an majigi ka sɔn a ma ko an tɛ koo bɛɛ lɔn, o bena an nafa kosɔbɛ. O bena a to an be la a la ko an mako b’a la sɔbɛ la ka fɛɛn minw lɔn walisa ka desizɔn ɲumanw ta, Jehova bena an dɛmɛ k’o lɔn.—Talenw 2:6.

3. An bena mun lo ye barokun nin na?

³ An tɛ koo minw lɔn, an bena u dɔw lajɛ barokun nin na. An t’o koow lɔn minkɛ, an bena a ye o be se ka gwɛlɛya minw lase an ma. An bena a ye fana fɛɛn min kama a ka ɲi an kana koo dɔw lɔn. N’an y’o lajɛ, an bena la a la kosɔbɛ ko an mako b’a la sɔbɛ la ka koo minw lɔn, Jehova b’o fɔ an ye sabu a ka “lɔnniya dafanin” lo.—Zɔbu 37:16, Biblu Ala ta Kuma.

AN T’A LƆN DUNIƝA NIN BENA HALAKI LOON TIGITIGI MIN NA

4. Ka kɛɲɛ ni Matiyo 24:36 ye, an tɛ mun lo lɔn?

⁴ Matiyo 24:36 kalan. An t’a lɔn duniɲa juguman nin bena halaki loon tigitigi min na. Hali tuma min na Yezu tun be dugukolo kan, a tun t’o “loon n’o waati lɔn.”a Kɔfɛ, a y’a fɔ a ka cidenw ye ko Jehova ye koo dɔw kɛwagati to ale yɛrɛ “kelenpe le bolo” sabu ale lo ye wagati Tigi ye (Kɛw. 1:6, 7). Jehova ye loon tigitigi bɔ ka ban, o min na a bena duniɲa juguman nin halaki. Nga an kɔni tɛ se k’o loon lɔn.

5. Komi an t’a lɔn Jehova ka loon bena na wagati min na tigitigi, o be se ka nɔɔ juman lo to an kan?

⁵ Ka kɛɲɛ ni Yezu ka kumaw ye, an t’a lɔn an ka ɲi ka kɔnɔni kɛ fɔɔ wagati min na Jehova ka loon be sɔrɔ ka se. O be se k’a to an be kɔrɔtɔ wala an fari be faga sanko n’an be Jehova ka loon kɔnɔna kabi wagatijan. Wala a be se ka kɛ an ɲɛɛ na ko a ka gwɛlɛ ka an somɔgɔw wala mɔgɔ wɛrɛw ka lɔgɔbɔri muɲu (2 Piyɛri 3:3, 4). Ka fara o kan, an be se k’a miiri ko n’an tun b’a lɔn Jehova ka loon bena na loon tigitigi min na, a tun bena nɔgɔya an ma kosɔbɛ ka kɔnɔni kɛ ani ka mɔgɔw ka lɔgɔbɔri muɲu.

6. Komi an t’a lɔn Jehova ka loon bena na wagati tigitigi min na, nafa juman lo b’o la?

⁶ Komi Jehova m’a yira an na a ka loon bena na wagati tigitigi min na, o be sababu di an ma k’a yira ko an b’a batora sabu an b’a kanu ani an lanin b’a la. An tɛ Jehova batora wagati tigitigi dɔ lo kama, nga fɔɔ abada. O kama, “Ala ka loon” bena na wagati tigitigi min na, sanni an ka to ka miiri o lo la, a ka ɲi an ka to ka miiri a bena koo ɲuman minw kɛ o loon tɛmɛnin kɔ. O bena a to an b’an magwɛrɛ Jehova la kosɔbɛ ani k’an jigi la a kan.—2 Piyɛri 3:11, 12.

7. An be mun lo lɔn?

⁷ An be min lɔn, a ka ɲi an ka to ka miiri o lo la. Misali la, an b’a lɔn ko laban loonw daminɛna saan 1914. Jehova ye kiraya kuma dɔw fɔ Bibulu kɔnɔ minw b’a yira ko laban loonw tun bena daminɛ o saan lo la. Nga o dɔrɔn tɛ, a y’a ɲɛfɔ fana k’a pereperelatigɛ duniɲa ka koow bena kɛ cogo min na kabi o wagati. O kama, an lanin b’a la ko “Masaba ka lonba surunyana.” (Sof. 1:14). An b’a lɔn fana Jehova b’a fɛ an ka baara min kɛ: O ye ka Masaya “kibaru diman” fɔ mɔgɔ caamanba ye (Mat. 24:14). O kibaro diiman be fɔra jamana 240 ɲɔgɔn na ani kaan 1000 ni kɔ la. An mako t’a la ka Jehova ka “loon n’o waati lɔn” ka sɔrɔ ka kisɛya waajuli baara la, o min sababu la mɔgɔw niin be kisi.

AN T’A LƆN JEHOVA BENA AN DƐMƐ COGO MIN NA

8. N’a fɔra ko “Ala ka koo kɛninw,” o be mun lo yira? (Waajulikɛla 11:5).

⁸ An tɛ se ka “Ala ka koo kɛninw faamu” tuma bɛɛ (Waajulikɛla 11:5 kalan). O b’a yira ko Jehova be koo dɔw kɛ wala a b’a to koo dɔw ka kɛ walisa k’a sagonata dafa. An tɛ se k’a lɔn tigitigi fɛɛn min kama Jehova b’a to koo dɔw ka kɛ wala a bena an dɛmɛ cogo tigitigi min na (Zab. 37:5). Bibulu b’a fɔ ko an tɛ se ka “Ala ka koo kɛninw faamu” i ko an t’a faamu deen be bonya a bamuso kɔnɔ cogo min na. Hali lɔnnikɛlaw bele t’o koo faamu ka ɲɛ. O cogo kelen na, an t’a faamu bɛrɛbɛrɛ Jehova bena koow kɛ cogo min na.

9. Komi an t’a lɔn Jehova bena an dɛmɛ cogo tigitigi min na, an be se ka gwɛlɛya jumanw lo sɔrɔ?

⁹ Komi an t’a lɔn Jehova bena an dɛmɛ cogo tigitigi min na, o be se k’a to an be sigasiga ka desizɔn dɔw ta. N’a sɔrɔ an bena siran ka kari fɛɛn dɔw kɔ walisa ka dɔ fara an ka waajuli baara kan, i n’a fɔ k’an ka ɲɛnamaya kɛcogo nɔgɔya wala ka taga dɛmɛ don yɔrɔ minw na Masaya weleweledalaw man ca. A be se ka kɛ ko an ma se k’an ka laɲinitaw dafa Alako ta fan fɛ wala ko an tɛ bibulukalanw sɔrɔla waajuli la an ka jijalibaw bɛɛ n’a ta. A be se ka kɛ fana ko an be lɔlibaara dɔ kɛra Jehova ka ɔriganisasiyɔn kɔnɔ, nga an be gwɛlɛya caaman sɔrɔla o la. O koow bɛɛ be se k’a to an b’an yɛrɛ ɲininga ni Jehova dusu ka di an kɔrɔ.

10. Komi an t’a lɔn Jehova bena min kɛ tigitigi, o be se k’a to an b’a ɲini ka kɛ ni jogo jumanw lo ye?

¹⁰ Komi an t’a lɔn Jehova bena an dɛmɛ cogo tigitigi min na, o be se k’a to an b’a ɲini ka kɛ ni jogo kɔrɔtanin dɔw ye i n’a fɔ majigilenya. O b’a to fana an be sɔn a ma ko Jehova ka kokɛcogow n’a ka miiriyaw tɛmɛna an ta kan fɔɔ ka taga ka na (Ezayi 55:8, 9). Ka fara o kan, an b’an jigi bɛɛ la Jehova kan walisa a ka koow ɲɛnabɔ an ye cogo fisaman na. Ni koow be ɲɛna an bolo waajuli baara la wala ɔriganisasiyɔn ka lɔlibaara dɔ la, an be Jehova lo tando ani o ka kan (Zab. 127:1; 1 Kor. 3:7). Hali ni koow ma kɛ i ko an b’a fɛ cogo min na, an k’a to an hakili la ko Jehova lo be koo bɛɛ lɔn (Ezayi 26:12). An b’an seko kɛ ani an lanin b’a la ko Jehova bena a tɔɔ kɛ. An lanin b’a la fana ko a bena an ɲɛminɛ hali n’a tɛna o kɛ cogo kabakoman na i ko a tun b’a kɛ cogo min na galen.—Kɛw. 16:6-10.

11. An be koo kɔrɔtanin jumanw lo lɔn?

¹¹ An b’a lɔn ko Jehova b’an kanu, ko a tilennin lo ani hakilitigi lo. An b’a lɔn fana ko an be min kɛ ale n’an kerecɛnɲɔgɔnw ye, o ka di a ye kosɔbɛ. Ka fara o kan, an b’a lɔn ko Jehova b’a sagokɛla kantigiw duga tuma bɛɛ.—Eburuw 11:6.

AN T’A LƆN KOO MINW BENA KƐ SINI MA

12. Ka kɛɲɛ ni Zaki 4:13, 14 ye, an tɛ mun lo lɔn?

¹² Zaki 4:13, 14 kalan. An t’a lɔn an ka ɲɛnamaya bena kɛ cogo min na sini ma. Duniɲa nin na, ‘barinako be se k’an bɛɛ sɔrɔ.’ (Waaj. 9:11). O la, an b’a fɛ ka koo minw kɛ, an t’a lɔn n’u bena ɲɛnabɔ wala n’an bena kɛ niin na ka se k’u kɛ.

13. Komi an t’a lɔn min bena kɛ tigitigi sini ma, o be se ka nɔɔ juman lo to an kan?

¹³ Komi an t’a lɔn min bena kɛ tigitigi sini ma, a be se ka gwɛlɛya an ma ka muɲuli kɛ. Mun na do? Sabu n’an be to ka jɔɔrɔ kojugu sinikow la, o be se k’an ka ninsɔndiya nagasi. An ka ɲɛnamaya be se ka bari ka yɛlɛma wala koo jugu dɔ be se ka bari k’an sɔrɔ ani o b’an dusu kasi fɔɔ k’an hakili ɲagami. An be koo minw makɔnɔna, n’o ma kɛ, o be se k’an jigi tigɛ ani k’an fari faga.—Talenw 13:12.

14. An ka ninsɔndiya be bɔ mun lo la? (jaaw lajɛ fana).

¹⁴ N’an be gwɛlɛyaw muɲu, an b’a yira ko an b’an sankolola Faa batora sabu an b’a kanu. Bibulu ka maanaw b’a yira ko an man ɲi ka kɔnɔni kɛ ko Jehova k’an latanga gwɛlɛya sifa bɛɛ ma. U t’a yira fana ko bɛɛ n’a dankan lo. K’a lɔn koo minw bena an sɔrɔ sini ma, Jehova b’a lɔn ko an ka ninsɔndiya tɛ bɔ o lo la. Nga a b’a lɔn ko an ninsɔn bena diya n’an be to k’a deli a k’an ɲɛminɛ ani n’an be mɛnni kɛ a fɛ (Zer. 10:23). N’an be to ka dɛmɛ ɲini Jehova fɛ ka sɔrɔ ka desizɔnw ta, a be i n’a fɔ an b’a fɔra le ko ni Jehova ‘sɔnna, an bena nin ni nin kɛ.’—Zaki 4:15.

15. An be mun lo lɔn siniko la?

¹⁵ Hali n’an t’a lɔn koo minw bena kɛ sini ma, an kɔni b’a lɔn ko Jehova y’a daa di ko an bena ɲɛnamaya kɛ fɔɔ abada, a mana kɛ sankolo la wala dugukolo kan. An b’a lɔn ko Jehova tɛ se ka ngalon tigɛ ani ko foyi tɛ se k’a bali a k’a ka layiduw bɛɛ dafa (Titi 1:2). “Koo min bena kɛ,” ale kelenpe lo be se k’o “koo fɔ kabini a daminɛ. Koo min ma kɛ fɔlɔ, ale kelenpe le be se k’o fɔ fana “kabini tumajan.” Galen, a tun ko koo minw bena kɛ, u bɛɛ dafara ani a ko minw bena kɛ sini ma, u bɛɛ bena dafa fana (Ezayi 46:10). An lanin b’a la ko foyi tɛ se ka Jehova bali a k’an kanu (Ɔrɔm. 8:35-39). Gwɛlɛya o gwɛlɛya mana an sɔrɔ, an mako be hakilitigiya, dususalo ani fanga min na ka se k’o muɲu, a bena o di an ma. An ka la a la ko Jehova bena an dɛmɛ ani k’an duga.—Zer. 17:7, 8.

JEHOVA B’AN LƆN FƆƆ KA SE HAKƐ MIN MA, AN TƐ SE K’O FAAMU BƐRƐBƐRƐ

16. Jehova be mun lo lɔn an koo la ani o be mun lo kɛ ele la? (Zaburuw 139:1-6).

¹⁶ Zaburuw 139:1-6 kalan. An Danbaga be fɛɛn bɛɛ lɔn an koo la. A b’an ka miiriyaw n’an dusukunnakow lɔn ani a b’a lɔn fɛɛn min kama an be n’o miiriyaw n’o dusukunnakow ye. An be min fɔ, a b’o lɔn ani a b’a lɔn fana min b’an dusu la. An be min bɛɛ kɛ ani an b’o kɛ kuun min kama, a b’o kala ma. I ko masacɛ Dawuda y’a fɔ cogo min na, Jehova be se k’an dɛmɛ ani a labɛnnin lo tuma bɛɛ k’o kɛ. Jehova lo ye duniɲa kuru bɛɛ Masaba ni Sebagayabɛɛtigi ye, min ye sankolo ni dugukolo dan. K’a ye ko a b’a janto an na kosɔbɛ, o b’an kabakoya yɛrɛ le! Dawuda y’a fɔ ko: “O lɔnniya sifa ka bon ne ma, ne te se k’a faamu.”—Zab. 139:6.

17. Mun na a be se ka gwɛlɛya an ma ka sɔn a ma ko Jehova b’an lɔn ka ɲɛ?

¹⁷ An somɔgɔw ka kokɛcogow, an ka siya ani an ka lannakow kosɔn, a be se ka gwɛlɛya an ma k’a ye ko Jehova y’an Faa ye min b’an kanu ani min b’a mako don an na. Wala a be se ka kɛ an ɲɛɛ na ko an ka kojugubaw kosɔn, Jehova t’a fɛ k’an ye ani ko a yɔrɔ ka jan an na. Hali Dawuda yɛrɛ delila ka kɛ n’o miiriyaw ɲɔgɔn ye (Zab. 38:19, 22). Wala mɔgɔ min be jijalibaw kɛra walisa ka ɲɛnamaya kɛ ka kɛɲɛ ni Ala ka sariyaw ye, a be se k’a yɛrɛ ɲininga ko: “Ni Ala be n’ lɔn ka ɲɛ, mun na a tɛ n’ minɛ ten dɔrɔn, sanni k’a ɲini n’ fɛ n’ ka yɛlɛmaniw kɛ?”

18. Ka sɔn a ma ko Jehova b’an lɔn koɲuman ka tɛmɛ an yɛrɛ kan, o b’an nafa cogo di? (jaaw lajɛ fana).

¹⁸ An ka sɔn a ma ko Jehova b’an lɔn koɲuman ka tɛmɛ an yɛrɛ kan. An t’an yɛrɛ ka jogow ɲuman minw ye, ale b’u ye. A b’an ka filiw lɔn, a b’a lɔn fɛɛn kama an be miiri cogo dɔ la ani a b’a lɔn fana fɛɛn min y’an bila koo dɔw kɛli la. O bɛɛ n’a ta, a b’an kanu (Ɔrɔm. 7:15). N’an sɔnna a ma ko Jehova b’an ka jogo ɲumanw lo filɛ, o bena a to an be la a la kosɔbɛ ko an ka ɲi k’a bato kantigiya ni ninsɔndiya la.

19. An be mun lo lɔn tigitigi Jehova koo la?

¹⁹ An be min lɔn, o ye ko n’i ko Jehova, i ko kanuya le. Siga si t’o la (1 Zan 4:8). An b’a lɔn ko Jehova be sariyaw d’an ma sabu a b’an kanu ani a b’an ɲɛɛ le fɛ tuma bɛɛ. An b’a lɔn ko Jehova b’a fɛ an ka ɲɛnamaya kɛ fɔɔ abada, o lo kama a ye kunmabɔsara di. O kunmabɔsara b’an hakili sigi ko an be se k’an koo diya Jehova ye an ka dafabaliya bɛɛ n’a ta (Ɔrɔm. 7:24, 25). An b’a lɔn ko “Ala ka bon n’an kɔnɔnako ye. Ale be koo bɛɛ lɔn.” (1 Zan 3:19, 20). Jehova b’an lɔn koɲuman ani a lanin b’a la ko an be se k’a sago kɛ.

20. An tɛ koo minw lɔn, mun lo bena an dɛmɛ an kana to ka jɔɔrɔ kojugu o koow la?

²⁰ An mako gwɛlɛ b’a la ka koo minw lɔn, Jehova m’u si dogo an na. O la, an tɛ koo minw lɔn, kuun t’a la an ka hami o kosɔn. Nga koo minw kɔrɔtanin lo sɔbɛ la, an ka sinsin olu lo kan. N’an b’o kɛ, an b’a yira ko an lanin be Jehova la bɛrɛbɛrɛ, ale min be “koo lɔn tigitigi.” (Zɔbu 36:4). Hali ni an tɛ koo dɔw faamu sisan, an b’a lɔn ko Jehova bena to ka koo kuraw yira an na. An ninsɔn ka di sabu an bena to ka koo kuraw lɔn an ka Ala Jehova koo la fɔɔ abada.—Waaj. 3:11.