U ye minw bɔ kafo kɔnɔ, diinan mɔgɔkɔrɔw b’olu dɛmɛ cogo di?

1-2. a) Mɔgɔ min ye jurumuba kɛ ani a ma nimisa, Jehova b’o tigi jati cogo di? b) Jehova b’a fɛ jurumukɛlaw ka mun lo kɛ?

JEHOVA tɛ sɔn kɛtaw bɛɛ ma. Jurumu ka gwo a ye (Zab. 5:5-7). A b’a ɲini an fɛ an k’a ka sariyaw labato, o minw be sɔrɔ Bibulu kɔnɔ. Jehova b’a lɔn ko an dafanin tɛ ani ko an tɛ se k’a ka sariyaw labato cogo dafanin na (Zab. 130:3, 4). Nka, a tɛ sɔn ‘Alaɲasiranbaliw’ ma. “O Alaɲasiranbali nunu be an ka Ala ka nɛɛma koo ta k’o kɛ kokolon kɛli ye.” (Zude 4). Bibulu b’a fɔ ko Jehova bena “Alaɲasiranbaliw” halaki Arimagedɔn kɛlɛ la.—2 Piyɛri 3:7; Yir. 16:16.

² Nka, Jehova t’a fɛ mɔgɔ si ka halaki. I ko an y’a ye barokun tɛmɛninw na cogo min na, Bibulu b’a fɔ ka gwɛ ko Jehova b’a fɛ “bɛɛ ka se ka nimisa.” (2 Piyɛri 3:9). I ko Jehova, diinan mɔgɔkɔrɔw be muɲu n’u be jurumukɛla dɔ dɛmɛna a ka nimisa ani k’a magwɛrɛ Jehova la tugun. Nka jurumukɛla dɔw tɛ sɔn ka nimisa (Ezayi 6:9). Dɔw bele be to ka koo jugu kɛ, hali k’a sɔrɔ diinan mɔgɔkɔrɔw b’u jijara k’u dɛmɛ walisa u ka nimisa. O koo ɲɔgɔn na, diinan mɔgɔkɔrɔw ka ɲi ka mun lo kɛ?

“AW KA MƆGƆJUGUW BƆ AW CƐMA”

3. a) Jurumukɛla minw tɛ nimisa, Bibulu b’a fɔ ko u ka ɲi ka olu kɛ di? b) N’u ye mɔgɔ dɔ bɔ kafo kɔnɔ, mun na an be se k’a fɔ ko a tigi ɲiniko lo?

³ Ni jurumukɛla dɔ ma nimisa, diinan mɔgɔkɔrɔw ka ɲi ka 1 Korɛntikaw 5:13 ka cikan sira tagama. A fɔra yen ko: “Aw ka mɔgɔjuguw bɔ aw cɛma.” Jurumukɛla b’a lɔn ko n’a ma nimisa, u bena a bɔ kafo kɔnɔ. O la, n’u y’a bɔ kafo kɔnɔ, ale yɛrɛ ɲiniko lo. A ye fɛɛn min dan, a b’o lo tigɛra (Gal. 6:7). Mun na an be se k’o fɔ? An be se k’o fɔ sabu jurumukɛla banna ka nimisa, hali k’a sɔrɔ diinan mɔgɔkɔrɔw y’a ɲini k’a dɛmɛ siɲɛ caaman na (2 Mas. 17:12-15). A ka kɛtaw b’a yira ko a t’a fɛ ka Jehova ka sariyaw labato.—Deter. 30:19, 20.

4. Ni jurumukɛla dɔ ma nimisa ani u y’a bɔ kafo kɔnɔ, mun na u b’o fɔ kafodenw ye?

⁴ Ni jurumukɛla dɔ ma nimisa ani u y’a bɔ kafo kɔnɔ, u b’a fɔ kafodenw ye ko o tigi tɛ Jehova Seere dɔ ye tugun.a O kunnafoni kuun tɛ ka jurumukɛla lamaloya. Nka, o kunnafoni be di walisa balimaw ka se ka Bibulu ka cikan nin sira tagama: “Aw kana jɛn n’o tigi ye fewu, hali ka dumuni yɛrɛ kɛ n’a ye.” (1 Kor. 5:9-11). Ni Jehova y’o cikan di, kuun b’a la. Ciden Pol y’a sɛbɛ ko: “Burufununan fitini be se ka mugu caaman funu.” (1 Kor. 5:6). Ni jurumukɛla dɔ ma nimisa ani u m’a bɔ kafo kɔnɔ, kafoden tɔɔw be se k’a miiri ko kuun t’a la u ka Jehova ka sariyaw labato.—Talenw 13:20; 1 Kor. 15:33.

5. U ye mɔgɔ min bɔ kafo kɔnɔ, an ka ɲi k’o tigi jati cogo di ani mun na?

⁵ O la, u ye mɔgɔ min bɔ kafo kɔnɔ, an ka ɲi k’o tigi jati cogo di? Hali n’an tɛ jɛn n’o tigi ye tugun, an man ɲi k’a jati ko a ta banna. Nka, an ka ɲi k’a jati sagaden tununin lo ye. Ni sagaden dɔ tununa, a be se ka kɔsegi wɛɛrɛ kɔnɔ. An kana ɲinɛ k’o tigi tun y’a yɛrɛkun di Jehova ma. A fɔ man di nka, a ma koow kɛ ka kɛɲɛ n’o yɛrɛkundili ye ani a y’a yɛrɛ bila farati la (Ezek. 18:31). Nka komi Jehova be makari ani wagati bele be yen, an jigi b’a la k’o tigi bena kɔsegi Jehova ma. U ye mɔgɔ min bɔ kafo kɔnɔ, diinan mɔgɔkɔrɔw be se k’o tigi dɛmɛ cogo di?

U YE MINW BƆ KAFO KƆNƆ, DIINAN MƆGƆKƆRƆW B’OLU DƐMƐ COGO MIN NA

6. Ni diinan mɔgɔkɔrɔw ye mɔgɔ dɔ bɔ kafo kɔnɔ, u be se ka to k’o tigi dɛmɛ cogo di?

⁶ Ni diinan mɔgɔkɔrɔw ye mɔgɔ dɔ bɔ kafo kɔnɔ, yala u t’a ɲini tugun k’a tigi dɛmɛ a ka kɔsegi Jehova ma wa? Ayi, u bele b’a ɲini k’a dɛmɛ. Ni kɔmite mɔgɔw b’a fɔra a ye ko u bena a bɔ kafo kɔnɔ, u bena a ɲɛfɔ a ye fana a be se ka min kɛ walisa ka kɔsegi kafo kɔnɔ. Nka u tɛna dan o ma. Tuma caaman na, u bena a fɔ a ye ko a bena diya u ye ka kɔsegi ka na bɔ a ye kalo damanin tɛmɛnin kɔ walisa k’a filɛ n’a y’a miiricogo yɛlɛma. N’o tigi sɔnna, diinan mɔgɔkɔrɔw bena taga bɔ a ye kalo damanin o kɔ walisa k’a jija a ka nimisa ani ka kɔsegi Jehova ma. Hali n’a tigi nimisanin tɛ o wagati la, u bele bena to ka taga bɔ a ye tuma kelen kelen.

7. U ye mɔgɔ min bɔ kafo kɔnɔ, diinan mɔgɔkɔrɔw be se ka Jehova ka makari ladegi cogo di o tigi koo la? (Zeremi 3:12).

⁷ U ye mɔgɔ min bɔ kafo kɔnɔ, diinan mɔgɔkɔrɔw b’u jija ka Jehova ka makari ladegi o tigi koo la. Misali la, Jehova ma kɔnɔni kɛ Israɛldenw ka nimisa fɔlɔ ka sɔrɔ k’u dɛmɛ. A y’a ka kiraw ci u ma, hali k’a sɔrɔ u tun m’u miiricogo yɛlɛma fɔlɔ. Kɔrɔsili Sangaso nin ka barokun kalanta filanan na, an y’a ye Jehova y’a ka makari ɲɛyira cogo min na. A y’a fɔ kira Oze ye ko a ka segi k’a muso ta, hali k’a sɔrɔ a bele tun be ni ɲamɔgɔcɛ ye (Oze 3:1; Mal. 3:7). Ni diinan mɔgɔkɔrɔw b’a fɛ sɔbɛ la jurumukɛla ka kɔsegi Jehova ma ani n’u tɛ koow gwɛlɛya a ma, u b’a yira ko u be Jehova ka makari ladegi.—Zeremi 3:12 kalan.

8. Yezu ye talen min la deen tununin koo la, o b’an dɛmɛ ka koo wɛrɛ juman lo faamu Jehova ka makari koo la? (Luka 15:7).

⁸ Yezu ye talen min la deen tununin koo la, facɛman ye min kɛ miiri o la. Tuma min na a y’a dencɛ natɔ ye yɔrɔjan, “a bolila ka taga bolo meleke a . . . kaan na.” (Luka 15:20). A kɔrɔsi ko facɛman ma kɔnɔni kɛ a dencɛ ka yafa deli fɔlɔ. A y’a bɔ a yɛrɛ la k’a dencɛ bisimila i ko faa kanutigi bɛɛ tun bena a kɛ cogo min na. Minw bɔra Jehova kɔ, a b’u minɛ o cogo kelen lo la ani diinan mɔgɔkɔrɔw fana b’u jija k’a ladegi. U b’a fɛ o mɔgɔw ka kɔsegi Jehova ma (Luka 15:22-24, 32). Ni jurumukɛla dɔ kɔsegira Jehova ma, Jehova, Yezu, mɛlɛkɛw ani kafodenw bɛɛ be ninsɔndiya kosɔbɛ!—Luka 15:7 kalan.

9. Jehova be jurumukɛlaw jija ni kanuya ye u ka mun lo kɛ?

⁹ Fɔɔ ka na se yan, an y’a ye ko mɔgɔ minw tɛ sɔn ka nimisa u ka jurumuw na, a gwɛnin lo ko Jehova tɛ sɔn u ka to kafo kɔnɔ. Nka, a bele b’a ɲini k’u dɛmɛ sabu a b’a fɛ u ka kɔsegi ale ma. Ni jurumukɛla dɔ nimisara, a kɔrɔsi o be min kɛ Jehova la. A fɔra Oze 14:5 kɔnɔ ko: “Masaba y’a fɔ ko: ‘Ne bena Isirayɛlidenw bɔ u ka tilenbaliyakow la, ne bena u koo diya n yɛrɛ ye kosɔbɛ, bari u ka koo dimi bɔra n kɔnɔ.’” O kumaw be diinan mɔgɔkɔrɔw jija yɛrɛ le! Koo o koo b’a yira ko jurumukɛla y’a daminɛ ka nimisa, u ka ɲi k’a ɲini k’o lɔn. Minw bɔra Jehova kɔ, o kumaw b’olu jija fana u ka kɔsegi a ma, u kana koow bila ka suma.

10-11. U ye minw bɔ kafo kɔnɔ a saan caaman ye nin ye, diinan mɔgɔkɔrɔw b’u jija k’olu dɛmɛ cogo di?

¹⁰ U ye minw bɔ kafo kɔnɔ n’a sɔrɔ a saan caaman ye nin ye do? U y’u bɔ kafo kɔnɔ jurumu min kosɔn, n’a sɔrɔ u y’o dabila. Tuma dɔw la, n’a sɔrɔ u hakili yɛrɛ t’a la tugun fɛɛn min kama u tun y’u bɔ kafo kɔnɔ. A mana kɛ min o min ye, diinan mɔgɔkɔrɔw b’u jija k’u yɔrɔ ɲini ani ka taga bɔ u ye. N’u tagara bɔ u ye, u yɛrɛ be se ka delili kɛ n’u ye ani k’u jija n’u dusu bɛɛ ye u ka kɔsegi kafo kɔnɔ. Ni mɔgɔ dɔ y’a mabɔ kafo la saan caaman kɔnɔ, o be se k’a to a barika be dɔgɔya kosɔbɛ Alako ta fan fɛ. N’o tigilamɔgɔ y’a yira ko a b’a fɛ ka kɔsegi kafo kɔnɔ, diinan mɔgɔkɔrɔw be se ka labɛn kɛ walisa dɔ ka bibulukalan kɛ n’a ye, hali n’a ma segi ka kɛ Jehova Seere dɔ ye fɔlɔ yɛrɛ. Diinan mɔgɔkɔrɔw lo ka ɲi ka labɛn kɛ tuma bɛɛ o ɲɔgɔnna mɔgɔw ka bibulukalan kama.

¹¹ Diinan mɔgɔkɔrɔw be Jehova ka makari ladegi, u kɛtɔ k’a ɲini ka mɔgɔ caamanba dɛmɛ u k’a faamu ko daa yɛlɛnin b’u ye u ka kɔsegi ka na kafo kɔnɔ. Ni jurumukɛla dɔ y’a yira ko a nimisanin lo ani a y’a ka kɛwale juguw dabila, diinan mɔgɔkɔrɔw man ɲi ka koow bila ka suma. U ka ɲi ka sɔn a be kɛ kafoden dɔ ye tugun.—2 Kor. 2:6-8.

12. a) Koo jumanw lo la diinan mɔgɔkɔrɔw ka ɲi ka kɔrɔsili kɛ koɲuman? b) Mun na an ma ɲi k’a miiri ko ni dɔ ye jurumu sifa dɔw kɛ, Jehova tɛ se ka yafa a ma? (jukɔrɔla kunnafoni fana lajɛ).

¹² Koo dɔw la, diinan mɔgɔkɔrɔw ka ɲi ka kɔrɔsili kɛ koɲuman ka sɔrɔ ka mɔgɔ dɔ kɛ kafoden dɔ ye tugun. Misali la, n’a tigi tun benna denmisɛn dɔ kan ka cɛnimusoko kɛ n’a ye, n’a tun ye tiɲɛn sira bila ani a be kerecɛn kafo kɛlɛ, wala n’a tun ye nanbarakow kɛ walisa k’a ka furu sa, diinan mɔgɔkɔrɔw ka ɲi k’a ɲini k’a lɔn n’o tigi nimisanin lo sɔbɛ la (Mal. 2:14; 2 Tim. 3:6). U ka ɲi ka Jehova ka sagakulu latanga. Nka, an ka ɲi ka la a la ko jurumukɛla wo jurumukɛla mana nimisa sɔbɛ la ani k’a ka kojugukɛ dabila, Jehova be sɔn a ka kɔsegi ale ma. Tiɲɛn lo ko ni mɔgɔ dɔ ye jurumuba kɛ, diinan mɔgɔkɔrɔw ka ɲi ka koow kɛ ni hakilitigiya ye. Nka, u man ɲi k’a miiri ko jurumu sifa dɔw be yen ni mɔgɔ dɔ y’u kɛ, Jehova tɛ se ka yafa a ma abada.b—1 Piyɛri 2:10.

KAFODENW BE SE KA MIN KƐ

13. Diinan mɔgɔkɔrɔw ye mɔgɔ min kolo, kafodenw b’o tigi minɛ cogo di? Nka, u ye mɔgɔ min bɔ kafo kɔnɔ, kafomɔgɔw b’ale minɛ cogo di?

¹³ I ko an y’an ye barokun tɛmɛnin na, tuma dɔw la, diinan mɔgɔkɔrɔw be se k’a fɔ kafo kɔnɔ ko u basigira Bibulu kan ka kafoden dɔ kolo. O koo ɲɔgɔn na, an be se ka to ka jɛn n’o tigi ye sabu a y’a miiricogo yɛlɛma ani k’a ka kojugukɛ dabila (1 Tim. 5:20). A bele ye kafoden dɔ ye ani a mako be kafomɔgɔw ka jijali la walisa ka to ka koo tilennin kɛ (Eburuw 10:24, 25). Nka, u ye mɔgɔ min bɔ kafo kɔnɔ, o tigi ka koo be dan na. An man ɲi ka “jɛn n’o tigi ye fewu, hali ka dumuni yɛrɛ kɛ n’a ye.”—1 Kor. 5:11.

14. U ye min bɔ kafo kɔnɔ, kerecɛn be se ka mun lo latigɛ o tigi koo la ka kɛɲɛ n’a dusukun ye min kolola Bibulu fɛ? (jaa lajɛ fana).

¹⁴ An ye min fɔ ka tɛmɛ, yala o kɔrɔ ko u ye mɔgɔ min bɔ kafo kɔnɔ, an ka ɲi k’an mako bɔ pewu o tigi la wa? Ayi, o tɛ. Tiɲɛn lo ko an tɛ jɛnɲɔgɔnya kɛ n’o tigi ye tugun. Nka ka kɛɲɛ n’an dusukun ye min kolola Bibulu fɛ, an be se k’a latigɛ k’o tigi weele ka na kafo ka lajɛn dɔ la. A be se ka kɛ an somɔgɔ dɔ wala an teri kɔrɔ dɔ ye. N’o ɲɔgɔnna mɔgɔ nana kafo ka lajɛn dɔ la do? Fɔlɔ la, an tun tɛ o tigi fo. Nka sisan, kerecɛn kelen kelen bɛɛ lo b’a latigɛ n’a bena o tigi fo wala n’a tɛna a fo. A b’o koo fana latigɛ ka kɛɲɛ n’a dusukun ye min kolola Bibulu fɛ. A be se ka diya dɔw ye k’o tigi fo wala k’a bisimila kafo ka lajɛn dɔ la. Nka, an tɛna baro kɛ n’a tigi ye ka taga yɔrɔjan wala ka teriya kɛ n’a ye.

15. Jurumukɛla sifa jumanw lo kofɔra 2 Zan 9-11 kɔnɔ? (koorilen nin fana lajɛ: “Yala Zan ni Pol tun be kumana jurumu sifa kelen lo koo la wa?”).

¹⁵ Dɔw be se k’u yɛrɛ ɲininga ko: “N’ ko Bibulu b’a fɔ ko mɔgɔ min b’o tigilamɔgɔ fo, o tigi niin be don a ka kɛwale juguw la?” (2 Zan 9-11 Kalan). Min fɔra ka kɔn 2 Zan 9-11 ɲɛ ani o kɔ, o b’a yira ko Zan tun kaan be mɔgɔ sugu nunu lo ma: Minw ye tiɲɛn sira bila ani u be kerecɛn kafo kɛlɛ ani minw cɛsirinin lo ka tɔɔw lasun ka koo jugu kɛ (Yir. 2:20). O la, n’u ye mɔgɔ dɔ bɔ kafo kɔnɔ ani a lɔnnin lo ko a cɛsirinin lo ka ngalon kalanw jɛnsɛn Ala koo la wala a be mɔgɔw lasun ka koo jugu wɛrɛ kɛ, diinan mɔgɔkɔrɔw tɛna taga bɔ o tigi ye. Nka o tigilamɔgɔ bele be se ka nimisa. N’a ma nimisa, an tɛna a fo wala k’a weele ka na kafo ka lajɛnw na.

AN KA JEHOVA KA MAKARI LADEGI

16-17. a) Jehova b’a fɛ jurumukɛlaw ka mun lo kɛ? (Ezekiyɛli 18:32). b) Diinan mɔgɔkɔrɔw be se k’a yira cogo di ko u ye Jehova baarakɛɲɔgɔnw ye, n’u b’a ɲinina ka jurumukɛla dɔ dɛmɛ?

¹⁶ Barokun kalanta duuru minw be sɔrɔ Kɔrɔsili Sangaso nin kɔnɔ, u y’an dɛmɛ ka mun lo faamu? U y’an dɛmɛ k’a faamu ko Jehova t’a fɛ mɔgɔ si ka halaki! (Ezekiyɛli 18:32 kalan). A b’a fɛ jurumukɛlaw ka nimisa ka segi ale ma (2 Kor. 5:20). O yɛrɛ lo kama Jehova sagokɛla minw tun bɔra a kɔ, a tora k’u jija u ka nimisa ani ka kɔsegi ale ma. Nɛɛma lo kafo diinan mɔgɔkɔrɔw fɛ ka kɛ Jehova baarakɛɲɔgɔnw ye, u kɛtɔ k’u jija ka jurumukɛlaw dɛmɛ u ka nimisa.—Ɔrɔm. 2:4; 1 Kor. 3:9.

¹⁷ Ni jurumukɛla dɔ nimisara, miiri k’a filɛ ninsɔndiya min be kɛ sankolo la! Tuma o tuma ni saga tununin dɔ kɔsegira kafo kɔnɔ, an sankolola Faa Jehova yɛrɛ lo ninsɔn be diya kosɔbɛ. N’an tora ka miiri Jehova ka makari, a ka nɛɛma n’a ka ɲumanya la, o b’an ka kanuya barika bonya a koo la.—Luka 1:78.