Dɛmɛ ɲini diinan mɔgɔkɔrɔw fɛ

1. Jehova y’a yira cogo di ko a ka sagadenw koo ka gwɛlɛ a ma?

JEHOVA ka sagadenw koo ka gwɛlɛ a ma. A y’u san ni Yezu joli ye ani k’u kalifa diinan mɔgɔkɔrɔw ma walisa u k’u janto u la (Kɛw. 20:28). Ala b’a fɛ diinan mɔgɔkɔrɔw k’a ka sagadenw minɛ ni ɲumanya ye. Diinan mɔgɔkɔrɔw be tugu Yezu ka ɲɛminɛli kɔ, u kɛtɔ k’u balimaw jija ani k’u dɛmɛ u ka to kantigiya la Jehova ye.—Ezayi 32:1, 2.

2. Jehova b’a janto jɔn lo la kosɔbɛ ka tɛmɛ? (Ezekiyɛli 34:15, 16).

² Jehova ka sagadenw bɛɛ koo ka gwɛlɛ a ma. Nga minw be tɔɔrɔla, a b’a janto olu lo la kosɔbɛ ka tɛmɛ. Minw be tɔɔrɔla Alako ta fan fɛ, a be tɛmɛ diinan mɔgɔkɔrɔw fɛ k’u dɛmɛ (Ezekiyɛli 34:15, 16 kalan). Nga, a b’a fɛ an yɛrɛ lo ka dɛmɛ ɲini n’an mako b’o la. A b’a fɛ an k’a deli n’an dusu bɛɛ ye ka dɛmɛ ɲini a fɛ. Nga o dɔrɔn tɛ, a b’a fɛ fana an ka dɛmɛ ɲini kafo “kɔlɔsibagaw ni karamɔgɔw” fɛ.—Efɛz. 4:11, 12.

3. Diinan mɔgɔkɔrɔw be ni kunkanbaara min ye, n’an y’o lajɛ, an bena nafa juman lo sɔrɔ o la?

³ Barokun nin na, an bena a ye ko Ala ye labɛn dɔ bila sen kan walisa k’an dɛmɛ Alako ta fan fɛ diinan mɔgɔkɔrɔw sababu fɛ. An bena ɲiningali nunu jaabi: Tuma juman lo la an ka ɲi ka dɛmɛ ɲini diinan mɔgɔkɔrɔw fɛ? Mun na an ka ɲi k’o kɛ? Ani u b’an dɛmɛ cogo di? Hali n’an mako tɛ diinan mɔgɔkɔrɔw ka dɛmɛ na sisan, n’an y’o ɲiningaliw jaabili lajɛ, o bena a to an be Jehova waleɲuman lɔn kosɔbɛ a ka labɛn kosɔn. Barokun nin bena an dɛmɛ fana k’a lɔn an ka ɲi ka min kɛ n’an makoya nana se u ka dɛmɛ ma loon dɔ.

TUMA JUMAN LO LA AN KA ƝI KA DƐMƐ ƝINI DIINAN MƆGƆKƆRƆW FƐ?

4. Mɔgɔ min man kɛnɛ Alako ta fan fɛ, an b’a lɔn cogo di ko Zaki 5:14-16, 19, 20 be kumana o tigi lo koo la? (jaaw lajɛ fana).

⁴ Kalanden Zaki y’a ɲɛfɔ cogo min na Jehova be tɛmɛ diinan mɔgɔkɔrɔw fɛ k’an dɛmɛ. A y’a fɔ ko: “N’aw dɔ man kɛnɛ, o tigi ka Krista ka jama ɲamɔgɔw wele.” (Zaki 5:14-16, 19, 20 kalan). A ye min fɔ ka kɔn o vɛrisew ɲɛ, o b’a yira ko mɔgɔ min man kɛnɛ Alako ta fan fɛ, a tun kaan b’o tigi lo ma. Misali la, Zaki ko tigi min man kɛnɛ, a ka kafo diinan mɔgɔkɔrɔw lo weele. Nga a m’a fɔ ko a ka dɔgɔtɔrɔ weele. Ka fara o kan, Zaki y’a ɲɛfɔ ko mɔgɔ min man kɛnɛ, n’o tigi ka hakɛw yafara, a be kɛnɛya. Ni banabagatɔ b’a fɛ ka kɛnɛya, a ka ɲi ka taga dɔgɔtɔrɔ fɛ, k’a fɔ a ye a yɔrɔ min be dimina ani ka dɔgɔtɔrɔ ka cikanw sira tagama. O cogo kelen na, n’an mako be dɛmɛ na walisa k’an magwɛrɛ Jehova la tugun, an ka ɲi ka taga kuma diinan mɔgɔkɔrɔw fɛ. An k’a fɔ u ye gwɛlɛya min b’an kan ani u bena basigi Bibulu kan ka ladili minw di an ma, an ka tugu o kɔ.

5. An be se k’a lɔn cogo di ko an ni Jehova ka jɛnɲɔgɔnya barika be dɔgɔyara?

⁵ Zaki b’an jija a ka bataki sapitiri 5nan na ko an ka taga kuma diinan mɔgɔkɔrɔw fɛ n’an y’a ye ko an mako be dɛmɛ na walisa k’an ka limaniya barika bonya. Hakilitigiyako lo an kana kɔnɔni kɛ koo dɔ ka an ni Jehova ka teriya nagasi, ka sɔrɔ ka taga dɛmɛ ɲini diinan mɔgɔkɔrɔw fɛ. An ka ɲi k’an kɔnɔ gwɛ an yɛrɛ ye. Bibulu b’an lasɔmi ko an be se k’an yɛrɛ lafili ko an ka kɛnɛ Alako ta fan fɛ (Zaki 1:22). Galen, Saadi kerecɛn dɔw y’o lo kɛ, nga Yezu y’a fɔ u ye ko Jehova dusu man di u kɔrɔ tugun (Yir. 3:1, 2). An be se k’a lɔn cogo di ko an ka kɛnɛ Alako ta fan fɛ? An tun kisɛyanin lo cogo min na Alako ta fan fɛ an batize tuma na ani an kisɛyanin be cogo min na sisan, an k’o suma ni ɲɔgɔn ye (Yir. 2:4, 5). An k’an yɛrɛ ɲininga ko: “N’ ninsɔn tun ka di cogo min na ka Bibulu kalan ani ka miiri a kan, yala dɔ bɔra o la wa? Yala n’ tɛ lajɛnw labɛn ani n’ y’a daminɛ ka fɔn u dɔw la wa? Yala n’ sumayara waajuli baara la wa? Yala ɲɛnagwɛkow ani bololafɛnw be n’ ka wagati caaman ta ani n’ be miiri o koow la ka tɛmɛ fɔlɔ la kan wa?” Yala i y’o ɲiningaliw dɔ jaabi ko ɔnhɔn wa? N’o lo, n’a sɔrɔ o kɔrɔ ko i ni Jehova ka jɛnɲɔgɔnya barika y’a daminɛ ka dɔgɔya ani o be se ka juguya n’i ma dɔ kɛ dɔ ye. Nga n’i tɛ se ka i ni Jehova ka jɛnɲɔgɔnya barika bonya i yɛrɛ ma wala n’i donna a gasi la, i ka ɲi ka dɛmɛ ɲini diinan mɔgɔkɔrɔw fɛ.

6. Ni mɔgɔ ye jurumuba kɛ, a ka ɲi ka mun lo kɛ?

⁶ Ni mɔgɔ ye jurumuba dɔ kɛ, o min kosɔn u be se k’a bɔ kafo kɔnɔ, a ka ɲi ka taga kuma diinan mɔgɔkɔrɔ dɔ fɛ (1 Kor. 5:11-13). O tigi mako be dɛmɛ na walisa ka segi ka jɛnɲɔgɔnya ɲuman kɛ ni Jehova ye. Ni jurumukɛla b’a fɛ Jehova ka yafa a ma kunmabɔsara barika la, a ka ɲi ‘ka kɛwale ɲumanw kɛ minw b’a yira ko a nimisara ka faran a ka kojugu la.’ (Kɛw. 26:20). O kɛwale ɲumanw dɔ ye ka taga kuma diinan mɔgɔkɔrɔw fɛ n’an ye jurumuba dɔ kɛ.

7. Mɔgɔ wɛrɛ jumanw lo mako be diinan mɔgɔkɔrɔw ka dɛmɛ na?

⁷ Minw b’a jati ko a ka gwɛlɛ kosɔbɛ u ma k’u ka nege juguw kɛlɛ, diinan mɔgɔkɔrɔw b’a fɛ fana k’olu dɛmɛ (Kɛw. 20:35). N’a sɔrɔ a ka gwɛlɛ i ma k’i ka nege juguw kɛlɛ sabu sanni i ka tiɲɛn lɔn, i tun be dɔrɔgi ta, ka porno filɛ wala ka kakalayakow kɛ. Kana sigasiga ka dɛmɛ ɲini. I be se k’a latigɛ ka kuma diinan mɔgɔkɔrɔ dɔ fɛ min bena i lamɛn, ka ladili nafaman d’i ma ani k’i hakili sigi ko i be se ka see sɔrɔ i ka nege juguw kan ani k’i koo diya Jehova ye (Waaj. 4:12). N’i dusu kasinin lo i ka nege juguw kosɔn, diinan mɔgɔkɔrɔw bena i hakili jigi ko n’a sɔrɔ o b’a yira ko i be ele ni Jehova ka jɛnɲɔgɔnya jati fɛɛnba ye ani ko i lanin t’i yɛrɛ la kojugu.—1 Kor. 10:12.

8. Fili sifa jumanw lo la an mako t’a la ka taga kuma diinan mɔgɔkɔrɔw fɛ?

⁸ An mako t’a la ka an ka fili kelen kelen bɛɛ fɔ diinan mɔgɔkɔrɔw ye. Misali la, miiri k’a filɛ ko i donna balima dɔ gasi la wala i dimina kosɔbɛ a kɔrɔ. Sanni i ka taga o ɲɛfɔ diinan mɔgɔkɔrɔ dɔ ye, i be se ka Yezu ka ladili sira tagama ka taga o balima ye ka bɛɛn sigi aw ni ɲɔgɔn cɛ (Mat. 5:23, 24). I be se fana ka sɛgɛsɛgɛri kɛ dususuman, muɲuli ani yɛrɛminɛli koo la. O la, i bena se ka koow kɛ ka kɛɲɛ n’o jogo ɲumanw ye bɛrɛbɛrɛ loon nataw la. Nga n’i bele tɛ sera k’o koo ɲɛnabɔ, i be se ka dɛmɛ ɲini diinan mɔgɔkɔrɔ dɔ fɛ. Ciden Pol ye lɛtɛrɛ min ci Filipikaw ma, a ko balimacɛ dɔ ka Evɔdi ani Sɛtisi dɛmɛ u ka bɛɛn sigi u ni ɲɔgɔn cɛ. I ka kafo diinan mɔgɔkɔrɔ dɔ be se ka ele fana dɛmɛ o cogo kelen na.—Filip. 4:2, 3.

MUN NA AN KA ƝI KA DƐMƐ ƝINI DIINAN MƆGƆKƆRƆW FƐ?

9. Mun na an man ɲi k’a to maloya k’an bali ka dɛmɛ ɲini diinan mɔgɔkɔrɔw fɛ? (Talenw 28:13).

⁹ N’an ye jurumuba dɔ kɛ wala n’an y’a kɔrɔsi ko an tɛ sera k’an ka nege juguw kɛlɛ, an mako be limaniya ni jagwɛlɛya la walisa ka dɛmɛ ɲini. An man ɲi k’a to maloya k’an bali ka dɛmɛ ɲini diinan mɔgɔkɔrɔw fɛ. Mun na do? Sabu Jehova ye diinan mɔgɔkɔrɔw sigi walisa u k’an dɛmɛ an ka jɛnɲɔgɔnya sabatinin ka to n’ale ye. O la, n’an be dɛmɛ ɲini diinan mɔgɔkɔrɔw fɛ, an b’a yira ko an lanin be Jehova la ani an be mɛnni kɛ a fɛ. An b’a yira fana ko an mako be Jehova ka dɛmɛ na walisa k’an ka nege juguw kɛlɛ (Zab. 94:18). N’an y’an ka jurumuw kofɔ diinan mɔgɔkɔrɔw ye ani k’u dabila, an be se ka la a la ko Jehova bena yafa an ma.—Talenw 28:13 kalan.

10. Mun lo be se ka kɛ n’an y’a ɲini k’an ka jurumuw dogo?

¹⁰ N’an y’an ka jurumu kofɔ diinan mɔgɔkɔrɔw ye, nafaba b’o la. Nga n’an y’a ɲini k’o dogo, an be se k’an ka koow tɔɔ juguya. Tuma min na masacɛ Dawuda y’a ɲini k’a ka jurumuw dogo, a tɔɔrɔla dusukunnako ni Alako ta fan fɛ ani a yɛrɛ banana (Zab. 32:3-5). Ni mɔgɔ man kɛnɛ wala n’a mandimina, n’a ma furakɛ, a ka bana be se ka juguya. O kelen lo fana Alako ta fan fɛ. Jehova b’o faamu minkɛ, a b’an weele ko “an ka sigikafɔ kɛ” n’ale ye. O kɔrɔ ko an ka ɲi ka taga kuma diinan mɔgɔkɔrɔw fɛ, a y’o minw sigi walisa u k’an dɛmɛ an ka jɛnɲɔgɔnya ɲuman kɛ n’ale ye kokura.—Ezayi 1:5, 6, 18.

11. N’an ye jurumuba dɔ dogo, o nɔfɛkow be se ka kɛ jumanw ye mɔgɔ wɛrɛw kan?

¹¹ N’an ye jurumuba dɔ kɛ ani an y’o dogo, o be se ka bɔnɛ lase tɔɔw ma. O be se ka kafo ka hɛɛrɛ nagasi ani k’a to Ala ka hakili senu tɛ baara kɛ kafo kɔnɔ tugun (Efɛz. 4:30). O la, n’an bɔra a kala ma ko an ka kafomɔgɔ dɔ ye jurumuba kɛ, an ka ɲi k’a jija a ka taga kuma diinan mɔgɔkɔrɔw fɛ. Ni wagati dɔ tɛmɛna ani jurumukɛla ma taga kuma diinan mɔgɔkɔrɔw fɛ, an ka ɲi ka taga kuma u fɛ sabu an b’a fɛ ka kantigiya kɛ Jehova ye. Nga n’an y’o tigi ka jurumuba dogo, an fana ye jurumuba kɛ (Lev. 5:1). Ni jurumukɛla banna ka taga kuma diinan mɔgɔkɔrɔw fɛ, an yɛrɛ ka kan ka taga o fɔ u ye sabu an be Jehova kanu. O cogo la, an be dɛmɛ don walisa kafo saniyanin ka to ani an be jurumukɛla dɛmɛ a ka se ka jɛnɲɔgɔnya ɲuman kɛ ni Jehova ye tugun.

DIINAN MƆGƆKƆRƆW B’AN DƐMƐ COGO DI?

12. Minw barika ka dɔgɔ Alako ta fan fɛ, diinan mɔgɔkɔrɔw b’olu dɛmɛ cogo di?

¹² Minw barika ka dɔgɔ Alako ta fan fɛ, Bibulu be diinan mɔgɔkɔrɔw jija u k’olu dɛmɛ (1 Tes. 5:14). N’i ye jurumu kɛ, n’a sɔrɔ diinan mɔgɔkɔrɔw bena i ɲininga koo dɔw la walisa ka i ka miiriyaw n’i dusukunnakow faamu (Talenw 20:5). N’a sɔrɔ kuma man di i ye wala min kɛra, i be maloyara ka kuma o koo la. O la, n’a sɔrɔ a tɛna nɔgɔya i ma ka kuma diinan mɔgɔkɔrɔw fɛ. Nga n’i ye i kɔnɔ gwɛ u ye, o bena u dɛmɛ. Kana siran ka kuma hali n’a b’i ɲɛɛ na ko i be “kuma ɲagaminin” lo fɔra (Zɔbu 6:3). Diinan mɔgɔkɔrɔw tɛna teliya ka kiti tigɛ i kan. Nga u bena u jija k’i lamɛn koɲuman ani k’i ka koo faamu ka ɲɛ ka sɔrɔ ka ladili di i ma (Talenw 18:13). Diinan mɔgɔkɔrɔw b’a lɔn ko ka se ka mɔgɔ dɔ dɛmɛ, o be wagati ta. O kama, u b’a faamu ko tuma dɔw la u ka ɲi ka ɲɔgɔnye wɛrɛw kɛ n’i ye walisa ka se k’i dɛmɛ.

13. Ni diinan mɔgɔkɔrɔw be delili kɛ an ye ani n’u be basigi Bibulu kan ka ladiliw di an ma, o b’an nafa cogo di? (jaaw lajɛ fana).

¹³ N’i ye dɛmɛ ɲini diinan mɔgɔkɔrɔw fɛ, u bena u jija walisa u kana dɔ fara i ka tɔɔrɔ kan. Nga u bena delili kɛ i ye. N’a sɔrɔ a bena bari i la k’a ye ko “barika be” u ka delili la. Ka fara o kan, u bena ‘tulu kɛ i kuun na Matigi [Jehova] tɔgɔ la.’ (Zaki 5:14-16). O “tulu” ɲɛsinna tiɲɛn kumaw lo ma minw be sɔrɔ Ala ka Kuma kɔnɔ. Diinan mɔgɔkɔrɔw bena baara kɛ ni vɛrise dɔw ye koɲuman walisa k’i hakili sigi, k’i jija, ani k’i dɛmɛ i ka jɛnɲɔgɔnya ɲuman kɛ ni Jehova ye tugun (Ezayi 57:18). U bena basigi Bibulu kan ka ladili minw di i ma, o bena i barika bonya walisa i ka to ka Jehova sago kɛ. U ka dɛmɛ sababu la, a bena kɛ komi i be Jehova kumakan mɛnna a b’a fɔra i ye ko: ‘Sira ye nin ye, a minɛ.’—Ezayi 30:21.

14. Ka kɛɲɛ ni Galatikaw 6:1 ye, ni mɔgɔ ye “fili dɔ” kɛ, diinan mɔgɔkɔrɔw b’a dɛmɛ cogo di? (jaaw lajɛ fana).

¹⁴ Galatikaw 6:1 kalan. Ni kerecɛn ye “fili dɔ” kɛ, o b’a yira ko a tɛ tagamana ka kɛɲɛ ni Ala ka sariya tilenninw ye. N’a sɔrɔ a ye desizɔn jugu dɔ lo ta, wala a ye jurumuba dɔ lo kɛ. Kanuya b’a to diinan mɔgɔkɔrɔw b’a ɲini “k’o tigi dɛmɛ ni dusuɲuman ye a ka kɔsegi siraɲuman kan.” Dɔgɔtɔrɔ be kolo karininw segi u nɔɔ na cogo min na walisa u ka tugu ɲɔgɔn na ka ɲɛ, gɛrɛkikan kumaden min bayɛlɛmana ko “kɔsegi,” o be se ka ɲɛsin o ma. Ni dɔgɔtɔrɔ ɲuman be mɔgɔ dɔ kolo segira a nɔɔ na, a b’o kɛ cogo dɔ la walisa a kana dɔ fara o tigi ka dimi kan. O cogo kelen na, ni dɔ ye fili kɛ ani diinan mɔgɔkɔrɔw b’a dɛmɛna, u be koo bɛɛ kɛ walisa u kana dɔ fara o tigi ka dusukasi kan. Bibulu b’a fɔ diinan mɔgɔkɔrɔw ye ko u “kelen kelen bɛɛ [k’u] yɛrɛ kɔlɔsi.” Ni diinan mɔgɔkɔrɔw be mɔgɔ dɔ dɛmɛna a ka kɔsegi sira ɲuman kan, u b’a to u hakili la k’u ye mɔgɔ dafabaliw ye ani k’olu fana be fili. O la, u tɛna a kɛ i n’a fɔ u ka fisa n’o tigi ye. Nga, u bena u jija ka makari a la ani ka koow kɛ ni majigilenya ye.—1 Piyɛri 3:8.

15. Ni gwɛlɛya b’an kan, an ka ɲi ka mun lo kɛ?

¹⁵ An be se ka la an ka kafo diinan mɔgɔkɔrɔw la. U be fɔrɔmasɔn sɔrɔ, o min b’u dɛmɛ k’u ka ladiliw basigi Bibulu kan sanni k’u basigi u yɛrɛ ka miiriyaw kan. O fɔrɔmasɔn b’u dɛmɛ fana ka an ka gundokow mara ani ka to k’an dɛmɛ an k’an ka gwɛlɛyaw muɲu (Talenw 11:13; Gal. 6:2). Diinan mɔgɔkɔrɔw ka jogow tɛ kelen ye ani dɔw kɛra diinan mɔgɔkɔrɔw ye wagatijan kɔnɔ ka tɛmɛ dɔ wɛrɛw kan. Nga an mana u min o min sɔrɔ, an be se k’an ka gwɛlɛya kofɔ a ye. An man kan ka taga ladili ɲini u kelen kelen bɛɛ fɛ sabu an b’a fɛ u dɔ k’an diyanyeko fɔ an ye. N’an y’o kɛ, an bena kɛ i n’a fɔ mɔgɔ minw tɛ “sɔn kalansɔbɛ” ma min be bɔ Ala ka Kuma kɔnɔ. O tigiw “be koo minw fɛ,” u b’a fɛ tɔɔw k’o lo fɔ olu ye (2 Tim. 4:3). N’an tagara dɛmɛ ɲini diinan mɔgɔkɔrɔ dɔ fɛ gwɛlɛya dɔ koo la, a be se k’an ɲininga n’an y’o kofɔ diinan mɔgɔkɔrɔ wɛrɛw ye ani u ye ladili min di an ma. Komi a b’a seko daan lɔn, n’a sɔrɔ a bena ladili ɲini diinan mɔgɔkɔrɔ wɛrɛ fɛ.—Talenw 13:10.

AN KELEN KELEN BƐƐ KA ƝI KA MIN KƐ

16. An kelen kelen bɛɛ ka ɲi ka mun lo kɛ?

¹⁶ Diinan mɔgɔkɔrɔw be ladiliw di an ma ani u b’an dɛmɛ gwɛlɛyaw wagati la. Nga u t’a fɔ an ye an ka ɲi ka min kɛ. An kelen kelen bɛɛ lo ka ɲi k’a yira an ka kumaw n’an ka kɛtaw fɛ loon o loon ko an be Jehova kanu ani ko an b’a fɛ k’an koo diya a ye. A ka dɛmɛ barika la, an be se ka desizɔn ɲumanw ta ani ka to kantigiya la (Ɔrɔm. 14:12). Diinan mɔgɔkɔrɔw tɛna a fɔ an ye an ka ɲi ka min kɛ. Nga u bena tɛmɛ Bibulu fɛ k’an dɛmɛ an ka Jehova ka miiriya faamu. O kama, n’an tugura u ka ladiliw kɔ, an bena “hakili sɔrɔ” ka se ka desizɔn ɲumanw ta.—Eburuw 5:14.

17. An ka ɲi k’an jija ka mun lo kɛ?

¹⁷ Nɛɛmaba lo an fɛ ka kɛ Jehova ka sagadenw ye! Jehova ye ‘saga dɛndɛbaga ɲuman’ Yezu ci dugukolo kan walisa a ka kunmabɔsara di an kosɔn. O sababu la, an be se ka ɲɛnamaya banbali sɔrɔ (Zan 10:11). Jehova tɛmɛna kafo diinan mɔgɔkɔrɔw fɛ k’a ka layidu nin dafa: “Ne bena ɲamɔgɔɲumanw di aw ma ne yɛrɛ sago la. Minw bena janto aw la ni lɔnniya ni hakilitigiya ye.” (Zer. 3:15). N’an ka limaniya barika dɔgɔyara wala n’an man kɛnɛ Alako ta fan fɛ, an man ɲi ka sigasiga ka dɛmɛ ɲini diinan mɔgɔkɔrɔw fɛ. Jehova lo ye diinan mɔgɔkɔrɔw sigi walisa u k’an dɛmɛ. O la, an k’an jija ka to ka nafa sɔrɔ bɛrɛbɛrɛ u ka dɛmɛ na.