Mun lo be se k’i dɛmɛ i be to k’i ka kelenna kalan kɛ tuma o tuma?
YALA a ka gwɛlɛ i ma k’i ka kelenna kalan kɛ tuma o tuma ani ka ninsɔndiya sɔrɔ o la wa? O ka gwɛlɛ an bɛɛ ma tuma dɔw la. Nka an be koo minw kɛ tuma o tuma i n’a fɔ ka jii ko, miiri o la. Jiko tɛ ɲɛ jijali ani wagati kɔ. Nka miiri k’a filɛ n’an kora ka ban o b’an lafiya cogo min na! N’an be Bibulu sɛgɛsɛgɛ, o fana be se k’an lafiya i ko n’an kora ka gwɛ ni “ji ye, Kibaro Diman kuma baraka ra.” (Efɛz. 5:26, Biblu Ala ta Kuma). An ka ladili damanin lajɛ minw be se k’i dɛmɛ:
Porogramu dɔ kɛ. An b’a lɔn ko “fɛɛn minw kɔrɔtanin lo kosɔbɛ” kerecɛn fɛ, u dɔ ye kelenna kalan ye (Filip. 1:10 NW). I ka ɲi k’i ka kelenna kalan kɛ loon ani wagati min na, walisa i kana ɲinɛ o kɔ, o sɛbɛ ka nɔrɔ yɔrɔ min na i be se k’a ye nɔgɔman na. Wala i be se k’a sɛbɛ i ka telefɔni kɔnɔ ani k’a to a b’i hakili jigi dɔɔni ka kɔn a kɛwagati ɲɛ.
Koow kɛ ka kɛɲɛ n’i ka koow cogoya ye. Ele be se ka i hakili sigi ka kalan kɛ wagatijan kɔnɔ, wala a ka fisa i ma ka kalan kɛ siɲɛ caaman wagati kunkuruninw kɔnɔ le? Ele lo b’a lɔn min ka fisa i ma. I ka kelenna kalan kɛ ka kɛɲɛ n’i ka koow cogoya ye. N’i ka kelenna kalan wagati sera ani a kɛlɔgɔ t’i la, mun na i t’a latigɛ ka kalan kɛ miniti tan dɔrɔn kɔnɔ? Miniti tan kalan ka fisa gwansan ye. Ani n’i y’a daminɛ, n’a sɔrɔ kalan nege bena don i la ani miniti tan yɛrɛ tɛna i labɔ.—Filip. 2:13.
Kɔn ka barokunw sugandi. N’i ka kelenna kalan tuma na le i be miiri i bena kalan kɛ fɛɛn min kan, n’a sɔrɔ i tɛna ‘koo ɲuman kɛ’ n’i ka wagati ye (Efɛz. 5:16). I b’a fɛ ka sɛgɛsɛgɛri kɛ barokun minw kan, mun na i t’o sɛbɛ ka bila? Ɲiningali o ɲiningali mana na i hakili la, o sɛbɛ. Ani i ka kelenna kalan kelen kelen bɛɛ laban na, i b’a fɛ ka sɛgɛsɛgɛri kɛ koo wɛrɛ minw kan, u sɛbɛ.
Kana ja kelen kan. N’a bɛnnin lo, i be se ka yɛlɛmani don i ka porogramu na i n’a fɔ i bena kalan kɛ wagati hakɛ min na ani barokun minw kan. I be kalan kɛ tuma min na, wagati hakɛ min na ani fɛɛn min kan, o lo kɔrɔtanin tɛ. Nka min kɔrɔtanin lo, o ye ka to ka kalan kɛ tuma o tuma.
N’an b’an ka kelenna kalan kɛ tuma o tuma, o b’an nafa yɛrɛ le. An b’an magwɛrɛ kosɔbɛ Jehova la, an be desizɔn ɲumanw ta ani an barika be bonya Alako ta fan fɛ.—Zozuwe 1:8.