Kana a miiri ko see t’i ye: I be se ka min kɛ hali n’i bolo degunnin lo
1. Mun lo b’a to balima dɔw be sigasiga ka bibulukalan kofɔ mɔgɔw ye?
1 Balima dɔw be sigasiga ka bibulukalan kofɔ mɔgɔw ye sabu u bolo degunnin lo. Ka Bibulu kalanden dɛmɛ, o be wagati ta. Ka bibulukalan labɛn ani k’a ɲɛminɛ, ka kalanden dɛmɛ a ka see sɔrɔ a yɛrɛ ka gwɛlɛyaw kan, o bɛɛ be wagati ta. Ciden Pol y’a fɔ ko ale tun b’a yɛrɛ niin di walisa ka Tesalonikekaw dɛmɛ u ka Jehova lɔn (1 Tes. 2:7, 8). Cogo di an be se ka bibulukalan kɛ ni mɔgɔ ye hali n’an bolo degunnin lo?
2. N’an be Jehova kanu, o ka ɲi k’an lasun ka baara juman kɛ n’an ka wagati ye?
2 Batoli koow be wagati ta: Tiɲɛn na, batoli koow be wagati ta. Ɲɛyirali fɛ, an be to ka wagati ta ka taga lajɛnw na, ka waajuli kɛ, ka Bibulu kalan ani ka delili kɛ. Mɔgɔ min furunin lo, hali n’a bolo degunnin lo, a bena diya a ye ka wagati kɛ n’a furuɲɔgɔn ye. An ninsɔn ka kan ka diya kosɔbɛ ‘ka wagati kunmabɔ’ ka Jehova bato sabu an b’a kanu (Efes. 5:15-17; 1 Yuh. 5:3). Ka kɛɲɛ ni Yesu ka fɔta ye, an ka batoli faan min kɔrɔtanin lo, o ye ka mɔgɔw kɛ ale ka kalandenw ye (Mat. 28:19, 20). N’an be miiri o kan, o bena an dɛmɛ an kana sigasiga ka bibulukalan kɛ ni mɔgɔw ye.
3. An be se ka bibulukalan koo ɲɛnabɔ cogo di ni koo dɔw ye an ka waajuli porogramu ɲagami?
3 Nka ni baloɲini baara, kɛnɛyakow wala Alako baara wɛrɛw be an ka wagati bɛɛ ta do? Tuma dɔ la, weleweledala minw ka kan ka kɛ yɔrɔ jan na, olu b’u ka bibulukalan kɛ telefɔni na wala ɛntɛrɛnɛti kan. Kɛnɛyakow be minw ka wagati ta, olu ye labɛn kɛ walisa kalanden ka na u ka soo bibulukalan kama. Dɔw ye labɛn kɛ walisa weleweledala sɔbɛ dɔ ka taga bibulukalan kɛ u nɔɔ na n’u labilanin tɛ.
4. N’an be sɔn ka bibulukalan kɛ ni mɔgɔw ye, an be nafa jumanw sɔrɔ o la?
4 Pol tun y’a ka wagati n’a ka fanga kɛ ka mɔgɔw dɛmɛ u ka tiɲɛn lɔn. A ye ninsɔndiyaba sɔrɔ o la (Kɛw. 20:35). Pol sera ka mɔgɔ minw dɛmɛ Tesalonike dugu kɔnɔ, n’a miirila olu bɛɛ la, o b’a lasun ka Jehova tando (1 Tes. 1:2). N’an bolo degunnin lo ani an t’a to o k’an bali ka bibulukalan kɛ ni mɔgɔw ye, dɔ be se ka fara an ka ninsɔndiya kan ani an be se ka wasa an ka waajuli baara la.