I be se ka Jehova ka yafali ladegi cogo di?

1-2. a) Tuma juman lo la a be se ka gwɛlɛya an ma kosɔbɛ ka yafa mɔgɔ dɔ ma? b) Denise y’a yira cogo di ko a be yafa?

YALA a ka gwɛlɛ i ma ka yafa tɔɔw ma wa? O ka gwɛlɛ an caaman ma, sanko ni mɔgɔ dɔ ye koo dɔ fɔ wala ka koo dɔ kɛ min digira an na kosɔbɛ. Nka, an be se ka koo dɔw kɛ walisa an diminin kana to ani ka yafa a tigi ma. An ka balimamuso Denisea ka koo lajɛ. Ale y’a yira cogo kabakoman na ko a be yafa. Saan 2017, Denise n’a somɔgɔw tagara Jehova Seerew ka sigiyɔrɔsoba kura filɛ. U kɔsegitɔ soo, mobilitigi dɔ y’u gosi. Denise kirinna. Tuma min na a ɲɛɛ yɛlɛla, a y’a mɛn ko a deenw mandimina kosɔbɛ ani ko a cɛɛ Brian sara. A miirila o koo la ani a y’a fɔ ko: “N’ dusu kasira kosɔbɛ ani n’ hakili ɲagamina.” Kɔfɛ, a y’a mɛn ko o mobili bolibaga ɲɛma tun lɔnin lo kasara tuma na ani ko a tun ma dɔrɔ min wala ka dɔrɔgi ta. O la, Denise ye Jehova deli ko a k’ale dɛmɛ a hakili be sigi.

² O cɛɛ ye mɔgɔ faga minkɛ, u tagara n’o koo ye kititigɛso la. Ni jalaki tun benna a kan, u tun bena a don kaso la. Kititigɛla dɔ y’a fɔ Denise ye ko a bena seereya min kɛ kititigɛso la, u bena basigi o lo kan k’a latigɛ u bena min kɛ o cɛɛ la. Denise ko: “O kasara kɛra wagati gwɛlɛ yɛrɛ lo ye n’ fɛ. A tun ka gwɛlɛ n’ ma kosɔbɛ ka segi ka kuma o koo la. A tun be komi u ye n’ joli faran ani ka kɔgɔ fata a la.” O cɛɛ tun ye kojuguba kɛ Denise n’a somɔgɔw la. Lɔgɔkun damanin dɔrɔn o kasara kɔ, Denise tagara kititigɛso la walisa ka seereya kɛ. A ye mun lo fɔ do? A y’a ɲini kititigɛla fɛ ko a ka makari o cɛɛ la.b Tuma min na Denise tilara kuma na, kititigɛla ɲɛji jigira. A ko: “N’ ye kititigɛla ye a saan 25 bɛɛ ye nin ye, nka n’ ma deli ka nin ɲɔgɔn mɛn ka ye. N’ ma deli k’a mɛn ko denbayamɔgɔ dɔw y’a ɲini kititigɛla fɛ ko a ka makari mɔgɔ dɔ la min ye bɔnɛ lase u ma. U ma deli k’a yira ko u b’o tigi kanu ani ko u yafara a ma.”

3. Mun lo y’a to Denise yafara o cɛɛ ma?

³ Mun lo y’a to Denise yafara o cɛɛ ma? A miirila Jehova ka yafali koo la (Mise 7:18). Jehova be yafa an ma cogo min na, n’an b’a waleɲuman lɔn o kosɔn, o bena a to an be yafa tɔɔw ma.

4. Jehova b’a fɛ an ka mun lo kɛ? (Efɛzikaw 4:32).

⁴ Jehova b’a fɛ an ka sɔn ka yafa tɔɔw ma i ko ale be yafa an ma cogo min na (Efɛzikaw 4:32 kalan). Minw be don an gasi la, a b’a fɛ an ka to ka yafa olu ma (Zab. 86:5; Luka 17:4). Barokun nin na, an bena koo saba lajɛ minw bena an dɛmɛ an ka to ka yafa kosɔbɛ.

KANA I ƝƐƐ TUGU I DUSUKUNNAKOW KAN

5. Ka kɛɲɛ ni Talenw 12:18 ye, ni mɔgɔ dɔ donna an gasi la, o be se ka mun lo kɛ an na?

⁵ Mɔgɔ dɔ be se ka koo dɔ fɔ wala ka koo dɔ kɛ min be digi an na kosɔbɛ, sanko n’o tigi y’an teri sɔbɛ wala an ka denbayamɔgɔ dɔ lo ye (Zab. 55:13-15). Tuma dɔw la yɛrɛ, a be komi u y’an sɔgɔ sɔgɔ ni muru lo ye (Talenw 12:18 kalan). N’a sɔrɔ an bena a ɲini k’an ɲɛɛ tugu an dusukunnakow kan. Nka n’an y’o kɛ, a be komi u y’an sɔgɔ ni muru ye ani an y’o muru to o joli kɔnɔ. O cogo kelen na, an tɛ se k’an ɲɛɛ tugu an dusukunnakow kan ani k’a miiri ko an dusu bena suma.

6. Ni mɔgɔ dɔ donna an gasi la, an be se k’o koo ta cogo di?

⁶ Ni mɔgɔ dɔ donna an gasi la, an ka teli ka koo fɔlɔ min kɛ, o ye ka dimi. Bibulu b’a fɔ ko koo dɔ be se k’a to an be dimi. Nka a b’an lasɔmi ko an kana a to o dimiya ka see sɔrɔ an kan (Zab. 4:5; Efɛz. 4:26). Mun na do? Sabu an dusukunnakow lo ka teli k’an lasun ka koow kɛ. Tuma caaman na, dimiya nɔfɛkow ka jugu (Zaki 1:20). An k’a to an hakili la ko koo dɔ be se k’a to an be dimi, nka anw lo b’a latigɛ n’an diminin bena to.

7. Ni mɔgɔ dɔ donna an gasi la, o be se ka koo wɛrɛ juman lo kɛ an na?

⁷ Ni dɔ ye koo jugu kɛ an na, o be se k’an tɔɔrɔ cogo wɛrɛw la. Misali la, balimamuso Ann ko: “N’ denmisɛn tuma na, n’ facɛ ye n’ bamuso furu sa ani ka an ka baarakɛden furu. A tun be n’ ɲɛɛ na ko mɔgɔ tɛ n’ na. Tuma min na u ye deenw sɔrɔ, u tun tɛ n’ jati tugun ani n’ koo tun man di u ye.” Balimamuso Georgette cɛɛ y’a janfa. Georgette y’a ɲɛfɔ o ye min kɛ ale la. A ko: “An tun ye teriw ye kabi an denmisɛn tuma ani an ye piyɔniye baara kɛ ɲɔgɔn fɛ. O koo ye n’ dusu kasi cogo min na, a tɛ se ka fɔ!” Balimamuso dɔ tɔgɔ ko Naomi ani a ko: “N’ tun ma deli k’a miiri abada ko n’ cɛɛ be se ka koo jugu kɛ n’ na. O la, tuma min na a y’a fɔ n’ ye ko a tun be porno filɛ dogo la, o koo ye n’ jigi tigɛ ani n’ tun b’a jati ko a ye n’ janfa le.”

8. a) Kuun minw kama an ka ɲi ka yafa tɔɔw ma, u dɔw ye jumanw ye? b) N’an be yafa, o b’an nafa cogo di? (koorilen nin lajɛ: “Ni mɔgɔ dɔ ye koo dɔ kɛ an na min y’an tɔɔrɔ kosɔbɛ”).

⁸ An tɛ se ka tɔɔw bali u ka koo jugu kɛ an na wala ka kuma jugu fɔ an ma. Nka an be se k’a latigɛ an bena o koo ta cogo min na. Tuma caaman na min ka fisa, o ye ka yafa. Mun na do? Sabu an be Jehova kanu ani a b’a fɛ an ka yafa tɔɔw ma. N’an diminin tora ani an ma sɔn ka yafa, an ka teli ka koo jugu dɔ kɛ. O yɛrɛ ka teli k’an ka kɛnɛyako nagasi (Talenw 14:17, 29, 30). An ka balimamuso Christine ka koo lajɛ. A ko: “Ni n’ diminin lo, n’ man teli ka yɛlɛko, ani n’ be dumuni kolonw lo kɛ. N’ tɛ sinɔgɔ ka ɲɛ, ani a ka gwɛlɛ n’ ma ka n’ yɛrɛ minɛ. O b’a to n’ tɛ n’ cɛɛ ni tɔɔw minɛ ka ɲɛ.”

9. Mun na an diminin man ɲi ka to?

⁹ Ni dɔ ye koo jugu kɛ an na, hali n’a ma yafa deli, an be se ka mun lo kɛ walisa o tigi ka kɛta kana an tɔɔrɔ kojugu? An kumana Georgette min koo la, ale ko: “N’ cɛɛ kɔrɔ ye min kɛ n’ na, n’ diminin tora a kɔrɔ wagati dɔ la. Nka tuma min na n’ labanna ka yafa a ma, n’ hakili sigira kosɔbɛ.” N’an be yafa, an b’an yɛrɛ tanga dimiya nɔfɛkow ma. An be koo ɲuman kɛ an yɛrɛ la fana sabu an tɛ to ka miiri o koo la tugun ani an be ninsɔndiya sɔrɔ kokura (Talenw 11:17). Nka n’i bele labɛnnin tɛ ka yafa do?

DIMIYA DABILA

10. Mun na an mako be wagati la walisa ka yafa? (jaaw lajɛ fana).

¹⁰ I be se ka dimiya dabila cogo di? I be se k’o kɛ cogo minw na, o dɔ ye k’a to wagati dɔ be tɛmɛ. Ni mɔgɔ mandimina fɔɔ ka juguya ani u y’a furakɛ, a mako be wagati la walisa ka kɛnɛya. O cogo kelen na ni dɔ y’an hakɛ ta, sanni an ka yafa a tigi ma n’an dusu bɛɛ ye, o be se ka wagati ta.—Waaj. 3:3; 1 Piyɛri 1:22.

11. Delili be se k’i dɛmɛ cogo di ka yafa?

¹¹ Jehova deli a k’i dɛmɛ ka yafa.c An kumana Ann min koo la, ale y’a ɲɛfɔ delili y’a dɛmɛ cogo min na. A ko: “An ye koo bɛnbali minw kɛ ani ka kuma bɛnbali minw fɔ, n’ ye Jehova deli ko a ka yafa an ka denbayamɔgɔ kelen kelen bɛɛ ma o kosɔn. O kɔ, n’ ye lɛtɛrɛ ci n’ facɛ n’a muso kura ma ani n’ y’a fɔ u ye ko n’ yafara u ma.” Ann ko a ma nɔgɔya ale ma k’o kɛ. Nka a ko: “N’ ye n’ jija ka Jehova ka yafali ladegi minkɛ, n’ jigi b’a la ko o bena a to n’ facɛ n’a muso b’a ɲini ka dɔ lɔn Jehova koo la.”

12. Mun na an ka ɲi k’an jigi la Jehova kan sanni k’a miiri ko joo b’an fɛ ka dimi? (Talenw 3:5, 6).

¹² I jigi la Jehova kan. Kana a miiri ko joo b’i fɛ ka dimi (Talenw 3:5, 6 kalan). Jehova b’a lɔn tuma bɛɛ min ka fisa an ma (Ezayi 55:8, 9). A tɛna a ɲini an fɛ abada an ka koo dɔ kɛ min bena bɔnɛ lase an ma. O la, n’a b’an jija ko an ka yafa tɔɔw ma, an ka la a la ko o b’an nafa le (Zab. 40:5; Ezayi 48:17, 18). Nka n’an b’a miiri ko joo b’an fɛ ka dimi, an tɛna se ka yafa abada (Talenw 14:12; Zer. 17:9). An kumana Naomi min koo la, ale ko: “A daminɛ na, n’ tun b’a miiri ko joo be n’ fɛ ka ban ka yafa n’ cɛɛ ma sabu a tun be to ka porno filɛ. N’ tun be siranna ko a bena koo wɛrɛ kɛ n’ na min bena digi n’ na tugu wala a bena ɲinɛ ko a ye kojuguba kɛ n’ na. N’ y’a jati fana ko Jehova be n’ dusukunnakow faamu. Nka kɔfɛ, n’ y’a faamu ko hali n’a be n’ dusukunnakow faamu, o kɔrɔ tɛ ko a sɔnnin be u ma. Jehova be n’ dusukunnakow lɔn ani a b’a lɔn fana ko walisa ka dimiya dabila, o be wagati ta. Nka a b’a fɛ n’ ka to ka yafa tɔɔw ma.”d

KƐ NI MIIRIYA ƝUMANW YE

13. Ka kɛɲɛ ni Ɔrɔmukaw 12:18-21 ka fɔta ye, an ka ɲi ka mun lo kɛ?

¹³ Ka yafa mɔgɔ dɔ ma min ye kojuguba kɛ an na, o kɔrɔ tɛ dɔrɔn k’a latigɛ ko an tɛna kuma o koo la tugun. N’an kerecɛnɲɔgɔn dɔ lo donna an gasi la, an ka laɲinita ye ka hɛɛrɛ kɛ n’a ye (Mat. 5:23, 24). Sanni an diminin ka to a kɔrɔ, an b’a latigɛ ka makari a la ani ka yafa a ma (Ɔrɔmukaw 12:18-21 kalan; 1 Piyɛri 3:9). Mun lo be se k’an dɛmɛ k’o kɛ?

14. An ka ɲi k’an jija ka mun lo kɛ ani mun na?

¹⁴ Ni mɔgɔ dɔ donna an gasi la, an ka ɲi k’an jija k’o tigi jati i ko Jehova b’a jati cogo min na. Jehova b’a latigɛ ka sinsin mɔgɔw ka jogo ɲumanw lo kan (2 Til. Kib. 16:9; Zab. 130:3). Anw do? An be sinsin mun lo kan? Mɔgɔw ka jogo ɲumanw, wala u ka fiɲɛw? An b’a latigɛ ka sinsin min kan, an bena o lo kɔrɔsi. N’an be sinsin tɔɔw ka jogo ɲumanw lo kan, a bena nɔgɔya an ma ka yafa u ma. Balimacɛ dɔ tɔgɔ ko Jarrod ani a ko: “A ka nɔgɔ n’ ma ka yafa balima dɔ ma ni n’ b’a ka fili suma n’a ka jogo ɲuman caaman ye.”

15. N’i yafara mɔgɔ dɔ ma, mun na a ka ɲi i k’o fɔ a tigi ye?

¹⁵ Koo wɛrɛ min kɔrɔtanin lo, o ye ko n’an yafara mɔgɔ dɔ ma, an k’o fɔ a tigi ye. Mun na do? An kumana Naomi min koo la ka tɛmɛ, ale ko: “N’ cɛɛ ye n’ ɲininga ko: ‘I yafara n’ ma wa?’ Tuma min na n’ tun b’a fɛ k’a fɔ ko n’ yafara a ma, n’ ma se k’o fɔ. N’ y’a faamu ko n’ tun ma yafa a ma ni n’ dusu bɛɛ ye. Kɔfɛ, n’ sera ka n’ kɔnɔ gwɛ k’a fɔ a ye ko: ‘N’ yafara i ma.’ Tuma min na n’ yafara n’ cɛɛ ma, a ɲɛji jigira. N’ kabakoyara k’a ye o ye ale ani ne yɛrɛ lafiya cogo min na! O kɔ, n’ lara a la kokura ani an segira ka kɛ teri sɔbɛw ye.”

16. I ye mun lo faamu yafali koo la?

¹⁶ Jehova b’a fɛ an ka yafa tɔɔw ma (Kɔlɔs. 3:13). O bɛɛ n’a ta, a be se ka gwɛlɛya an ma k’o kɛ. Nka n’an t’an ɲɛɛ tugu an dusukunnakow kan ani n’an b’an jija walisa an diminin kana to, an bena se ka yafa tɔɔw ma. O la, an bena kɛ ni miiriya ɲumanw ye.—Koorilen nin lajɛ: “Koo saba dɔw, minw bena an dɛmɛ ka yafa tɔɔw ma.”

NAFA MINW B’A LA KA YAFA, TO KA MIIRI U LA

17. N’an be yafa, o b’an nafa cogo di?

¹⁷ An be yafa kuun caaman kosɔn. An k’u la damanin dɔrɔn lajɛ. A fɔlɔ, an b’an Faa Jehova ladegi ani an b’an koo diya a ye, ale min ye makaritigi ye (Luka 6:36). A filanan, an b’a yira ko an be Jehova waleɲuman lɔn kosɔbɛ sabu a be yafa an ma (Mat. 6:12). A sabanan, an be to kɛnɛya la ani an b’an ka teriya sabati ni tɔɔw ye.

18-19. N’an be yafa, nafa juman b’o la?

¹⁸ N’an be yafa, an be duga caaman sɔrɔ an jigi tun tɛ minw na. Misali la, an kumana Denise min koo la a daminɛ na, a kɔrɔsi ale ka koo kɛra cogo min na. Kɔfɛ, a bɔra a kala ma ko cɛɛ min tun y’u gosi n’a ka mobili ye, a tun y’a latigɛ k’a yɛrɛ faga a ka kiti kɔ. Nka Denise yafara a ma minkɛ, o y’a kabakoya fɔɔ a ye bibulukalan daminɛ ni Jehova Seerew ye.

¹⁹ N’a sɔrɔ a ka gwɛlɛ an ma kosɔbɛ ka yafa mɔgɔ dɔ ma. Nka n’an y’o kɛ, o bena an nafa yɛrɛ le! (Mat. 5:7). O la, an bɛɛ k’an jija kosɔbɛ ka Jehova ka yafali ladegi.