Kɛ teri sɔbɛ ye

YALA i delila ka gwɛlɛya dɔ sɔrɔ ani mɔgɔ si tun tɛ yen k’i dɛmɛ wa? An be wagati gwɛlɛw lo la minkɛ, an fari be se ka faga ani an be se k’a miiri ko an b’an kelen na (2 Tim. 3:1). Nka waajibi tɛ an k’an ka gwɛlɛyaw muɲu an kelen. Bibulu b’a yira ko nafa b’a la ka kɛ ni teri sɔbɛw ye “waatigwɛlɛnw” na.—Talenw 17:17.

TERI SƆBƐW BE SE K’AN DƐMƐ COGO DI?

Ciden Pol ye voyazi minw kɛ a ka misɔndenya baara sen fɛ, a teri dɔw y’a bila sira ani u y’a dɛmɛ cogo caaman na (Kɔlɔs. 4:7-11). Tuma min na a tun be kaso la Ɔrɔmu, a teriw ye koo dɔw kɛ a ye, a tun tɛ se ka minw kɛ a yɛrɛ ma. Misali la, Epaforaditi nana Filipi balimaw ka sama di Pol ma (Filip. 4:18). Pol tun ye lɛtɛrɛ minw sɛbɛ kafo dɔw ma, Tisiki lo tagara o lase u ma. U tun ye Pol datugu a ka boon kɔnɔ ani kɔfɛ kaso la. O bɛɛ n’a ta, a sera k’a ka cidenya baara dafa a teriw ka dɛmɛ barika la. Ele be se ka kɛ teri sɔbɛ ye cogo di bi?

Balima minw be ɲɛnamaya kɛra an ka wagati la, u dɔw ka ɲɛyirali b’a yira teriw be se ka ɲɔgɔn dɛmɛ cogo min na. Balimamuso dɔ tɔgɔ ko Elisabet, kudayi piyɔniye lo ani a be Ɛsipaɲi jamana na. A kɔrɔsi balimamuso dɔ y’a yira cogo min na ko a y’a teri sɔbɛ ye. Tuma min na dɔgɔtɔrɔw y’a fɔ ko kansɛri bana be Elisabet bamuso la ani ko a bena sa yanni dɔɔni, o balimamuso basigira Bibulu kan ka mesazi caaman ci Elisabet ma minw y’a jija. Elisabet ko: “O mesaziw ye barika don n’ na n’ sera ka muɲuli kɛ loon o loon ani n’ tun t’a miiri ko n’ be n’ kelen na.”—Talenw 18:24.

An be se k’an ka jɛnɲɔgɔnya sabati n’an balimaw ye, n’an b’u dɛmɛ u ka bɔ waajuli la ani ka na lajɛnw na. Misali la, i be se ka balima mɔgɔkɔrɔba dɔ ta ka taga n’a ye waajuli la wala lajɛnw na. N’i y’o kɛ, siga t’a la aw bena baro minw kɛ, o bena aw jija (Ɔrɔm. 1:12). Nka, balima dɔw yɛrɛ tɛ se ka bɔ u ka soo. I be se ka kɛ teri sɔbɛ ye u fɛ cogo di?

MINW TƐ SE KA BƆ U KA SOO, KƐ TERI SƆBƐ YE U FƐ

Kɛnɛyakow wala gwɛlɛya wɛrɛw be balima dɔw kan minw b’u bali ka na lajɛnw na Masaya Boon kɔnɔ. An ka balimacɛ dɔ ka koo lajɛ min tɔgɔ ka David. Kansɛri bana tun b’a la. Kalo wɔɔrɔ ni kɔ, a tun tɛ se ka bɔ a ka soo sabu u tun b’a furakɛra. O wagati bɛɛ la, ale n’a muso Lidia tun be lajɛnw kɛ vidéoconférence lo sababu fɛ.

U teri minw be u ka kafo kɔnɔ, olu y’u dɛmɛ cogo di? Lajɛn kelen kelen bɛɛ bannin kɔ, minw be Masaya Boon na, u dɔw tun be jijali kɛ walisa ka kuma ni David ani Lidia ye vidéoconférence sababu fɛ. Ka fara o kan, ni David ni Lidia tun ye lakalitaw kɛ, balimaw tun be mesaziw ci u ma walisa k’u jija. O ye mun lo kɛ u la? David ni Lidia tun b’a ye ko balimaw b’u kanu.

Minw tɛ se ka bɔ u ka soo, yala an tɛ se ka labɛnw kɛ walisa ka waajuli kɛ n’u ye wa? An be se k’an ka porogramu yɛlɛma dɔɔni o kama. O la, an b’a yira ko an ma ɲinɛ u kɔ (Talenw 3:27). An be se ka labɛnw kɛ walisa ka waajuli kɛ n’u ye lɛtɛrɛw wala telefɔni sababu fɛ. Labɛnw be se ka kɛ fana walisa o balimaw ka waajuli baara lajɛnw lamɛn vidéoconférence sababu fɛ. David ni Lidia dusu diyara kosɔbɛ sabu u ka kafo ye o labɛn sigi sen kan. David ko: “An kɛtɔ ka baro dennin ani delili kɛ n’an balimaw ye, o dama tun b’an jija kosɔbɛ.” Ka fara o kan, balima min tɛ se ka bɔ a ka soo, n’a bɛnnin lo ani ni farati t’o la, tuma kelen kelen i be se ka labɛn kɛ ka taga n’i ka Bibulu kalanden dɔ ye a ka soo walisa k’a ka bibulukalan kɛ yen.

An balima minw tɛ se ka bɔ u ka soo, n’an be wagati kɛ n’u ye, o b’a to an b’u ka jogo ɲumanw kɔrɔsi ani an b’an magwɛrɛ u la kosɔbɛ. Misali la, waajuli kɛtɔ n’u ye, n’i y’a ye u be baara kɛra koɲuman ni Bibulu ye cogo min na walisa ka mɔgɔw dusukun sɔrɔ, u koo bena diya i ye kosɔbɛ. N’an b’an balimaw dɛmɛ u ka se ka Alakow kɛ, an bena teri kuraw sɔrɔ.—2 Kor. 6:13.

Gwɛlɛyaw wagati la, Pol teri Titi tagara bɔ a ye minkɛ, o y’a jija yɛrɛ le! (2 Kor. 7:5-7). N’an be jijali kumaw fɔ an balimaw ye, o ye koo ɲuman lo ye. Nka Titi ka ɲɛyirali b’a yira ko an be se k’u jija n’an be wagati kɛ n’u ye fana ani n’an be koo dɔw kɛ k’u dɛmɛ.—1 Zan 3:18.

KƐ TERI SƆBƐ YE I BALIMAW FƐ KƆRƆBƆLI TUMA NA

An balima minw be Irisi jamana na, u ye ɲɛyirali ɲumanw ye an fɛ sabu u be ɲɔgɔn dɛmɛ. An ka balimacɛ Sergueï n’a muso Tatiana ka koo lajɛ. Polisiw nana u ka boon fuye ani o kɔ, u tagara n’u ye polisiso walisa k’u daa wɔgɔbi. U kɔnna ka Tatiana lo bila ani a kɔsegira soo. Sergueï ko: “[Tatiana] senin kɔ soo dɔrɔn, balimamuso jagwɛlɛ dɔ nana bɔ a ye. An teri caaman wɛrɛw nana an dɛmɛ k’an ka boon dilan.”

Sergueï y’a fɔ fana ko: “Kabi wagatijan, Talenw 17:17 ka di n’ ye. A fɔra yen ko: ‘Teri sɛbɛ bɛ mɔgɔ kanu tuma bɛɛ, a bɛ kɛ i balimakɛ ye tɔɔrɔ waati la.’ (Bible senuma). Kɔrɔbɔliw tuma yɛrɛ lo la, n’ ye o talen kɔnɔnakumaw tiɲɛntigiya ye kosɔbɛ sabu n’ tun tɛ se ka n’ ka gwɛlɛyaw muɲu n’ kelen. Jehova ye teriw di n’ ma minw ye n’ dɛmɛ ni jagwɛlɛya ye.”a

Wagati gwɛlɛ nunu na, an mako be an teriw ka dɛmɛ na walisa ka muɲuli kɛ. Tɔɔrɔba wagati la yɛrɛ le an mako bena kɛ u ka dɛmɛ na kosɔbɛ. O la, an k’an seko bɛɛ kɛ walisa ka kɛ teri sɔbɛw ye kabi sisan!—1 Piyɛri 4:7, 8.