A latigɛ i bena tigi min bato

1. Walisa ka ninsɔndiya sɔbɛ sɔrɔ, an ka ɲi ka mun lo kɛ ani mun na? (Ezayi 48:17, 18).

AN SANKOLOLA Faa b’an kanu kosɔbɛ ani a b’a fɛ an ka ɲɛnamaya diyabɔ bi ani sini ma (Waaj. 3:12, 13). A ye setigiya kabakomanw di an ma. Nga a ma see di an ma an k’an yɛrɛ ɲɛminɛ wala k’a latigɛ an yɛrɛ ma min ka ɲi ani min man ɲi (Waaj. 8:9; Zer. 10:23). A b’a lɔn ko walisa ka ninsɔdiya sɔbɛ sɔrɔ, an ka ɲi k’ale bato ani ka tugu a ka sariyaw kɔ.—Ezayi 48:17, 18 kalan.

2. Sutana b’a fɛ an ka mun lo miiri ani Jehova y’a yira cogo di k’o tɛ tiɲɛn ye?

² Sutana b’a fɛ an k’a miiri ko an be se ka ninsɔndiya sɔrɔ n’an y’an mabɔ Jehova la ani ko an be se k’an yɛrɛ ɲɛminɛ koɲuman (Zɛnɛzi 3:4, 5). Walisa k’a yira k’o tɛ tiɲɛn ye, Jehova y’a to adamaden murutininw k’u yɛrɛ ɲɛminɛ wagati dɔ la. An b’a yera ko adamadenw ka kuntigiya nana ni tɔɔrɔ caaman ye. Nga Bibulu be mɔgɔ caaman ka koo lakali minw ye ninsɔndiya sɔrɔ Jehova batoli la. U cɛma, min ka ɲɛyirali ɲɔgɔn tɛ yen, o ye Yezu Krista lo ye. An ka kɔn k’a filɛ kuun minw kama Yezu y’a latigɛ ka Jehova bato. O kɔ, an bena a ye fɛɛn min kama an sankolola Faa ka kan n’an ka batoli ye. A laban, an bena koo dɔw lajɛ, minw kama an y’a latigɛ ka Jehova bato.

MUN NA YEZU Y’A LATIGƐ KA JEHOVA BATO?

3. Sutana tun b’a fɛ ka mun lo di Yezu ma ani Yezu y’a latigɛ ka mun lo kɛ?

³ Ka Yezu to dugukolo kan, a tun ka ɲi k’a latigɛ a bena tigi min bato. Dɔɔni a ka batɛmu kɔ, Sutana ye duniɲa ka masayaw bɛɛ yira a la ani k’a fɔ a ye ko ni a sɔnna k’ale bato siɲɛ kelen dɔrɔn, ale bena o bɛɛ di a ma. Yezu y’a jaabi ko: “Taga ka bɔ yan Sutana, bari a fɔra Ala ka kuma na ko: ‘E ka Matigi i ka Ala bato ka baara kɛ ale kelenpe ye.’” (Mat. 4:8-10). An ka koo damanin lajɛ, minw kama Yezu y’o desizɔn ta.

4-5. Kuun minw y’a to Yezu y’a latigɛ ka Jehova bato, u dɔw ye jumanw lo ye?

⁴ Kuun fɔlɔ min kama Yezu y’a latigɛ ka Jehova bato, o ye kanuya lo ye. Yezu b’a Faa kanu kosɔbɛ ani foyi tɛ se k’o kanuya nagasi (Zan 14:31). Ka fara o kan, Yezu be Jehova bato sabu a bɛnnin lo k’o kɛ (Zan 8:28, 29; Yir. 4:11). Yezu b’a lɔn ko a Faa lo ye niin Dibaga ye, ko ale be se k’a jigi la a kan ani ko a tɛgɛ labilanin lo (Zab. 33:4; 36:10; Zaki 1:17). Jehova be tiɲɛn fɔ Yezu ye tuma bɛɛ ani fɛɛn o fɛɛn be Yezu fɛ, Jehova lo y’o di a ma (Zan 1:14). Nga Sutana be dan na pewu! Ngalontigɛla ni wasabali lo ani a be miiri a yɛrɛ dɔrɔn na. Adamadenw be sara ale lo kosɔn (Zan 8:44). Yezu b’o kala ma minkɛ, a tun t’a fɛ abada ka kɛ i ko Sutana ani ka muruti Jehova ma.—Filip. 2:5-8.

⁵ Yezu y’a latigɛ ka Jehova bato kuun wɛrɛ min kama, o ye ko a tun b’a lɔn koo ɲuman minw bena kɛ a ka kantigiya barika la (Eburuw 12:2). A tun b’a lɔn ko n’a tora kantigiya la, a bena a Faa tɔgɔ saniya. Sutana ye tɔɔrɔ minw lase an ma, Yezu tun b’a lɔn fana ko ale ka kantigiya bena kɛ sababu ye k’o bɛɛ ban.

MUN NA JEHOVA KA KAN N’AN KA BATOLI YE?

6-7. Mun na bi bi nin na, mɔgɔ caaman tɛ Jehova bato? Nga mun na Jehova ka kan n’an ka batoli ye?

⁶ Bi bi nin na, mɔgɔ caaman tɛ Jehova bato sabu u t’a ka jogow lɔn fɔlɔ. Jehova ye koo ɲuman minw bɛɛ kɛ u ye, u t’o kala ma fana. Ciden Pol ye mɔgɔ minw waaju Atɛni dugu la, olu fana tun be ten.—Kɛw. 17:19, 20, 30, 34.

⁷ Pol y’a ɲɛfɔ a lamɛnbagaw ye ko tiɲɛn Ala “lo be nii, ani sii, ani fɛɛn tɔɔ bɛɛ di adamaden ma.” A y’a fɔ fana ko: “An tonin be nii na, ka sii sɔrɔ, ka kɛwaliw kɛ Ala barika la.” Ala lo ye Danbaga ye ani “siyaw bɛɛ bɔra mɔgɔ kelen na a ye min dan.” O la, a ka kan n’an ka batoli ye.—Kɛw. 17:25, 26, 28.

8. Jehova tɛna mun lo kɛ abada? A ɲɛfɔ.

⁸ Komi Jehova lo ye Danbaga ani duniɲa bɛɛ Masa ye, a be se ka mɔgɔw wajibiya u k’ale bato. Nga a tɛna o kɛ abada! Jehova ye daliluw di an ma minw b’a to an lanin b’a la tiɲɛn na ko a be yen ani ko a b’an kelen kelen bɛɛ kanu kosɔbɛ. A b’a fɛ mɔgɔ caamanba ka kɛ a teriw ye fɔɔ abada (1 Tim. 2:3, 4). O kama, Jehova be fɔrɔmasɔn di an ma walisa an ka mɔgɔ wɛrɛw kalan a sagonata koo la ani an k’a fɔ u ye a bena koo ɲuman minw kɛ adamadenw ye (Mat. 10:11-13; 28:19, 20). A ye kafo sigi ani an be se k’a bato yen. A ye labɛnw kɛ fana walisa diinan mɔgɔkɔrɔw k’u janto an na.—Kɛw. 20:28.

9. Jehova b’a yira cogo jumanw na ko a b’an kanu?

⁹ Jehova be adamadenw kanu haali. Mɔgɔ minw lanin t’a la ko a be yen, a be u minɛ cogo min na, o b’o lo yira. Miiri nin na: Kabi wagatijan, mɔgɔ miliyari caaman b’a latigɛ u yɛrɛ ma min ka ɲi ani min man ɲi. O n’a ta bɛɛ, Jehova be ɲumanya kɛ u ye. U mako be min na walisa ka to niin na ani k’u ka ɲɛnamaya diyabɔ, a b’o di u ma (Mat. 5:44, 45; Kɛw. 14:16, 17). A be sababu di u ma u ka teriya diyabɔ ni mɔgɔw ye minw b’u kanu, ka deenw sɔrɔ ani k’u ka baaraba tɔnɔ diyabɔ (Zab. 127:3; Waaj. 2:24). O b’a yira ko an sankolola Faa be adamadenw bɛɛ kanu (Ɛkiz. 34:6). Sisan, an ka koo dɔw lajɛ, minw kama an y’a latigɛ ka Jehova bato ani an k’a filɛ fana a be an duga cogo min na o kosɔn.

MUN NA AN Y’A LATIGƐ KA JEHOVA BATO?

10. a) An be Jehova bato kuun fɔlɔ juman lo kosɔn? (Matiyo 22:37). b) Cogo juman na Jehova y’a yira ko a muɲunin lo i kɔrɔ? (Zaburuw 103:13, 14).

¹⁰ I ko Yezu, an be Jehova bato kuun fɔlɔ min kosɔn, o ye ko an b’a kanu kosɔbɛ (Matiyo 22:37 kalan). N’an be Jehova jogow lɔn, o b’a to an b’an magwɛrɛ a la. Jehova be muɲu an kɔrɔ cogo min na, miiri o la. Misali la, tuma min na Israɛldenw murutira a ma, a y’a ɲini u fɛ “ko u k’u ka taamacogojugu dabila, ka yɛlɛmani don u ka kɛwaliw la.” (Zer. 18:11). Jehova hakili b’a la ko an danna ni buguri lo ye ani ko an ye mɔgɔ dafabaliw ye (Zaburuw 103:13, 14 kalan). N’i be miiri Jehova ka muɲuli ani a ka jogo wɛrɛw koo la, yala o t’a to i b’a ɲini k’a bato fɔɔ abada wa?

11. Kuun wɛrɛ jumanw lo kosɔn an y’a latigɛ k’an sankolola Faa bato?

¹¹ An jijanin lo fana ka Jehova bato sabu a bɛnnin lo k’o kɛ (Mat. 4:10). Ka fara o kan, an b’a lɔn koo ɲuman minw bena kɛ an ka kantigiya barika la. N’an b’an Faa Jehova bato kantigiya la, an b’a ninsɔn diya, an b’a tɔgɔ saniya ani an b’a yira ko Sutana ye ngalontigɛla lo ye. Ani n’an y’a latigɛ ka Jehova bato sisan, an bena sababu sɔrɔ k’o kɛ fɔɔ abada!—Zan 17:3.

12-13. Jane ni Pam ka koo b’an nafa cogo di?

¹² An be se ka Jehova kanu kosɔbɛ kabi an denmisɛnman. Ani an kɔrɔbayatɔ, dɔ be se ka to ka fara o kanuya barika kan. An ka Jane n’a dɔgɔmuso Pam ka koo lajɛ.a Jane tun be ni saan 11 ye ani Pam tun be ni saan 10 ye tuma min na u y’a daminɛ ka bibulukalan kɛ. Hali k’a sɔrɔ u bangebagaw tun t’a fɛ ka bibulukalan kɛ, u ye sira di Jane ni Pam ma k’u ka bibulukalan kɛ ni Jehova Seerew ye. Nga, u ko fɔɔ u ka to ka tugu olu kɔ ka taga legilizi la. Jane y’a fɔ ko: “Jehova Seerew ye n’ kalan min na Bibulu kɔnɔ, o ye n’ dɛmɛ n’ ma to n’ filankuruw ka n’ lasun ka dɔrɔgi ta ani ka kakalayakow kɛ.”

¹³ Saan damanin o kɔ, o sunguru fila nunu kɛra weleweledalaw ye. Kɔfɛ, u fila bɛɛ kɛra piyɔniyew ye ani u tora k’u janto u bangebagaw la, minw tun kɔrɔla. Jane miirila u ka koo tɛmɛninw na ani a y’a fɔ ko: “N’ y’a faamu ko Jehova b’a janto a teriw la ni kantigiya ye ani i ko 2 Timote 2:19 b’a fɔ cogo min na, ‘minw ye Matigi ta ye, a b’olu lɔn.’” Siga t’a la, minw y’a latigɛ ka Jehova kanu ani k’a bato, a b’a janto u la!

14. An be se ka Jehova tɔgɔ saniya cogo di an ka kumaw n’an ka kɛwalew fɛ? (jaaw lajɛ fana).

¹⁴ Ngalon minw lara Jehova kan, an b’a fɛ k’a tɔgɔ saniya ka bɔ u bɛɛ la. Miiri nin na: I be ni teri sɔbɛ dɔ ye min ye mɔgɔ ɲuman ye, a tɛgɛ labilanin lo ani a be sɔn ka yafa. Loon dɔ, i y’a mɛn mɔgɔ dɔ daa la ko i teri ka jugu ani ko nanbaramɔgɔ lo. I bena mun lo kɛ do? I bena i teri tɔgɔ lafasa. O cogo kelen na, Sutana n’a kɔfɛmɔgɔw b’a ɲini ka Jehova tɔgɔ tiɲɛ u kɛtɔ ka ngalonw jɛnsɛn a koo la. Nga, anw be Jehova tɔgɔ lafasa an kɛtɔ ka tiɲɛn fɔ mɔgɔw ye a koo la (Zab. 34:2; Ezayi 43:10). An b’a yira ko an b’a fɛ ka Jehova bato n’an dusu bɛɛ ye an ka kumaw n’an ka kɛwalew fɛ.

15. Ciden Pol y’a ka laɲinitaw yɛlɛma minkɛ, a ye nafa jumanw lo sɔrɔ o la? (Filipikaw 3:7, 8).

¹⁵ An be sɔn k’an ka laɲinitaw yɛlɛma walisa ka Jehova bato i ko a b’a fɛ cogo min na wala ka caaman kɛ a ka baara la. Misali la, ciden Pol tun be ni lɔyɔrɔba min ye Yahutu diinan na, a sɔnna k’o to yen walisa ka kɛ Krista ka kalanden ye ani ka Jehova bato (Gal. 1:14). O la, a ye duga caaman sɔrɔ ani a ye nɛɛma sɔrɔ ka mara kɛ ni Krista ye sankolo la. A ye desizɔn min ta ka Jehova bato, a ma nimisa o la abada. Ni an fana y’a latigɛ k’o kɛ, an tɛna imisa abada!—Filipikaw 3:7, 8 kalan.

16. Julia ka koo b’an nafa cogo di? (jaaw lajɛ fana).

¹⁶ N’an ye Jehova batoli kɛ an ɲɛnako fɔlɔ ye, a bena an duga kabi sisan ani sini ma. An ka balimamuso Julia ka koo lajɛ. A denmisɛn tuma na, a tun be dɔnkili la legilizi la. Komi a tun be se dɔnkilila la koɲuman, dɔnkililabaga ŋana dɔ y’a kɔrɔsi ani a y’a daminɛ ka fɔrɔmasɔn di a ma. A ma mɛɛn, Julia ye tɔgɔba sɔrɔ ani a y’a daminɛ ka dɔnkili la dɔnkilila bonbabaw kɔnɔ. Wagati dɔ la, a tun be kalan kɛra lakɔliba dɔ la yɔrɔ min na u be mɔgɔw degi dɔnkilila la. A ka klasiden dɔ y’a daminɛ ka Ala kofɔ a ye ani k’a yira a la ko Ala tɔgɔ ko Jehova. Dɔɔni o kɔ, Julia y’a daminɛ ka bibulukalan kɛ siɲɛ fila lɔgɔkun kɔnɔ. Kɔfɛ, a y’a latigɛ ka Jehova ka baara kɛ a ɲɛnako fɔlɔ ye sanni ka taga ɲɛ n’a ka dɔnkilila baara ye. A tun man nɔgɔ a ma k’o desizɔn ta. A ko: “Mɔgɔ caaman tun b’a fɔra n’ ye ko n’ kɛtɔ ka dɔnkilila dabila walisa ka Jehova bato, o ye hakilintanya lo ye. Nga n’ tun b’a fɛ ka Jehova bato bɛrɛbɛrɛ.” Julia ye desizɔn min ta a saan 30 ni kɔ ye nin ye, a be mun lo miiri o koo la bi bi nin na? A ko: “N’ hakili siginin lo ani n’ lanin b’a la ko sini ma, n’ mako be fɛɛn minw na, Jehova bena o bɛɛ di n’ ma.”—Zab. 145:16.

TO KA JEHOVA BATO

17. Minw y’a latigɛ ka Ala bato, k’a lɔn ko duniɲa laban surunyana, o be mun lo yira u la ani minw m’a latigɛ fɔlɔ ka Ala bato, o be mun lo yira olu la?

¹⁷ Duniɲa laban surunyana kosɔbɛ. Ciden Pol y’a fɔ ko: “Tiɲɛ na, a fɔra Ala ka kuma na ko: ‘A tora dɔɔni dɔrɔn, min ka kan ka na, a bena na. A tena mɛn ka na.’” (Eburuw 10:37). O kumaw kɔrɔ ko di? O b’a yira ko wagati min tora walisa mɔgɔw k’a latigɛ ka Jehova bato, o tɔɔ man ca tugun (1 Kor. 7:29). Ani n’an be Jehova batora ka ban, an b’a lɔn ko an bena kɔrɔbɔliw sɔrɔ. Nga, an b’a lɔn fana ko an bena o muɲu wagati “dɔɔni” dɔrɔn kɔnɔ le.

18. Jehova ni Yezu b’a fɛ an ka mun lo kɛ?

¹⁸ Yezu y’a ka kalandenw jija ko u ka kɛ ale ka kalandenw ye ani ko u ka to ka tugu ale kɔ (Mat. 16:24). O la, n’an be Jehova batora a saan caaman ye nin ye, an k’an cɛsiri ka to k’o kɛ. An ye desizɔn min ta ko an bena Jehova bato, an k’an jija kosɔbɛ ka to ka koow kɛ ka kɛɲɛ n’o ye. Tiɲɛn lo ko a tɛna nɔgɔya. Nga an bena ninsɔndiya ni duga caaman sɔrɔ o la kabi sisan yɛrɛ!—Zab. 35:27.

19. Gene ka koo b’an nafa cogo di?

¹⁹ Mɔgɔ dɔw b’a miiri ko n’i be Jehova batora, i tɛ se k’i ka ɲɛnamaya diyabɔ. N’i ye kanbele wala sunguru ye, yala i b’a miiri ko n’i be Jehova batora i bena fɔn fɛɛn diiman dɔw kɔ wa? Balima kanbele dɔ tɔgɔ ko Gene. A ko: “N’ tun b’a miiri ko komi n’ ye Jehova Seere ye, n’ tun tɛ se ka n’ ka ɲɛnamaya diyabɔ. N’ kɔrɔbayara ni denmisɛn minw ye, olu tun be fɛtiw kɛ, kanbelew ni sunguruw tun b’u fɛ ani u tun be videwo tulon farimanw kɛ, k’a sɔrɔ ne tun be n’ ka wagati kɛ lajɛnw ni waajuli lo la.” O miiricogo ye nɔɔ juman lo to Gene kan? A ko: “O kanbelew n’o sunguruw tun be koo jugu minw kɛ, n’ y’a daminɛ k’u dɔw kɛ. Wagati dɔ kɔnɔ, a tun be komi n’ ninsɔn ka di. Nga ninsɔndiya sɔbɛ tun tɛ. Nafa minw b’a la ka tugu Bibulu ka fɔta kɔ, n’ y’a daminɛ ka miiri o la ani n’ y’a latigɛ ka Jehova bato ni n’ dusu bɛɛ ye. Kabi o tuma, n’ b’a yera ko Jehova be n’ ka delili kelen kelen bɛɛ jabi.”

20. An ka ɲi k’an cɛsiri ka mun lo kɛ?

²⁰ Zaburu sɛbɛbaga dɔ ye dɔnkili la Jehova ye ko: “Ala, e mana sɔn min ma, ko a ka to e ka soo kɔnɔ, o tigi dagamunin lo.” (Zab. 65:5). An k’an cɛsiri ka to ka Jehova bato. I ko Zozuwe, an fana k’a fɔ ko: “Ne ni n ka somɔgɔw, anw kɔni bena Masaba le bato.”—Zozuwe 24:15.