Dususalo ɲini Jehova fɛ

1. Yahutu minw tun be jɔnya la Babilɔni, olu ka koow cogoya lakali.

YAHUTU minw tun be jɔnya la Babilɔni, miiri k’a filɛ olu dusukunnakow tun ye min ye. U juguw ye u wolodugu halaki u ɲɛɛ na. Olu n’u bɛnbaw ka jurumuw kosɔn, u juguw bɔra n’u ye u ka jamana na ka taga n’u ye jamana wɛrɛ la (2 Til. Kib. 36:15, 16, 20, 21). Tiɲɛn lo ko k’u to jɔnya la Babilɔni, u tun be se k’u ka loon o loon koow kɛ (Zer. 29:4-7). Nga, koow tun man nɔgɔ u fɛ ani a tun man di u ye ka ɲɛnamaya kɛ yen. U tun be mun lo miiri u ka koow cogoya la? U dɔ y’a fɔ ko: “K’an to Babilɔni baaw daa la, an tun siginin be o yɔrɔ la n’an be kasira, an tun be miiri Siyɔn la.” (Zab. 137:1). Tiɲɛn na, Yahutuw mako tun be dususalo la. Nga, u tun bena o sɔrɔ min le?

2-3. a) Yahutu minw tun be jɔnya la, Jehova ye mun lo kɛ u ye? b) An bena mun lo lajɛ barokun nin na?

² Jehova “be mɔgɔ bɛɛ jigi tugu.” (2 Kor. 1:3). Jehova b’a sagokɛlaw kanu minkɛ, a ka di a ye k’u jigi tugu. Yahutu minw tun be jɔnya la, Jehova tun b’a lɔn ko u dɔw bena sɔn a ka kololi la ani ka kɔsegi ale ma (Ezayi 59:20). O la, saan 100 ni kɔ sanni u ka taga jɔnya la, a y’a kɛ kira Ezayi ye Ezayi ka kitabu sɛbɛ. Mun na do? Ezayi y’a sɛbɛ ko: “‘Aw ka ne ka jama dusu saalo, k’u dusu saalo.’ Aw ka Ala le ko ten.” (Ezayi 40:1). Yahutuw mako tun bena kɛ dususalo min na k’u to jɔnya la, Jehova y’o lase u ma Ezayi ka kitabu sababu fɛ.

³ I ko o Yahutuw, an fana mako be dususalo la tuma dɔw la. Barokun nin na, an bena koo saba lajɛ Jehova ye minw kɛ ka Yahutuw dusu saalo k’u to jɔnya la: 1) A ye layidu ta ko minw nimisara, a bena yafa u ma, 2) a ye jigiya di a ka jama ma ani 3) a y’u hakili sigi. O koow lajɛtɔ, an k’a kɔrɔsi Jehova ka dususalo kumaw be se ka an fana nafa cogo min na.

JEHOVA BE YAFA AN MA

4. Jehova y’a yira cogo di ko a ye makaritigi Ala ye? (Ezayi 55:7).

⁴ Jehova ye “makaritigi” Ala ye (2 Kor. 1:3). A y’o yira tuma min na a y’a daa di ko Yahutu minw be jɔnya la, n’u nimisara, ale bena yafa u ma (Ezayi 55:7 kalan). Jehova y’a fɔ ko: “I koo diyara ne ye, daan te o kanuya la, o la, ne bena makari i la.” (Ezayi 54:8). A tun bena makari u la cogo di do? Yahutuw tun bena to jɔnya la Babilɔni saan caaman kɔnɔ u ka kanminɛbaliya kosɔn. Nga, Jehova ye layidu ta ko u tɛna to yen fɔɔ abada (Ezayi 40:2). Yahutu minw tun nimisara ani u tun b’a fɛ ka Jehova dusu diya, siga t’a la, o kumaw y’u jigi tugu kosɔbɛ!

5. Mun na an be se ka la a la ka tɛmɛ Yahutuw kan ko Jehova b’an ka jurumuw yafa?

⁵ An be kalan juman lo sɔrɔ o la? Jehova labɛnnin lo k’a sagokɛlaw ka jurumuw yafa pewu pewu. Bi, an be se ka la a la ka tɛmɛ Yahutuw kan ko Jehova b’an ka jurumuw yafa. Mun na do? Sabu an b’a lɔn a ye min kɛ walisa k’an ka jurumuw yafa. Saan caaman Ezayi ka kiraya kuma sɛbɛnin kɔ, Jehova y’a Dencɛ kanulen ci ka na dugukolo kan, walisa k’a niin di ka kɛ kunmabɔsara ye jurumukɛlaw bɛɛ kosɔn minw nimisanin lo. Yezu ka kunmabɔsara sababu fɛ, Jehova b’an ka “hakɛw yafa” pewu pewu (Kɛw. 3:19; Ezayi 1:18; Efɛz. 1:7). Tiɲɛn na, Jehova be yafa sɔbɛ la!

6. N’an be miiri Jehova ka yafali koo la, mun na o b’an dusu saalo? (jaa lajɛ fana).

⁶ N’an dusukun b’an kɛlɛla kojugu, Jehova ka kuma minw be sɔrɔ Ezayi 55:7 kɔnɔ, o be se k’an dusu saalo. An dɔw nimisara an ka jurumu tɛmɛninw na. Nga, n’a sɔrɔ an bele be to k’an yɛrɛ jalaki o jurumuw kosɔn, sanko n’an be tɔɔrɔla u nɔfɛkow kosɔn. Nga n’an y’o jurumuw kofɔ ani k’u dabila, an be se ka la a la ko Jehova yafara an ma. Ni Jehova yafara an ma, a t’an ka jurumu to a hakili la tugun (Zeremi 31:34 lajɛ). Komi Jehova tɛ to ka miiri an ka jurumu tɛmɛninw na, an fana man ɲi k’o kɛ. Jehova t’an ka fili tɛmɛninw lo filɛ. Nga min kɔrɔtanin lo a fɛ, o ye an be min kɛra sisan (Ezek. 33:14-16). An Faa Ala ye makaritigi ye minkɛ, yanni dɔɔni, a bena an ka jurumuw nɔfɛkow bɛɛ bɔ an kan.

7. N’an ye jurumuba dɔ kɛ ani an b’o dogora, mun lo bena a to an be dɛmɛ ɲini diinan mɔgɔkɔrɔw fɛ?

⁷ N’an dusukun b’an kɛlɛla sabu an ye jurumuba dɔ kɛ ani an b’o dogora, an ka ɲi ka mun lo kɛ do? Bibulu b’an jija ko an ka dɛmɛ ɲini diinan mɔgɔkɔrɔw fɛ (Zaki 5:14, 15). An ye min kɛ, a be se ka gwɛlɛya an ma k’o fɔ u ye. Nga, an k’a to an hakili la ko Jehova be tɛmɛ o cɛɛw lo fɛ k’an dɛmɛ ani i ko Jehova, u bena an minɛ ni kanuya ye ani u bena makari an na. N’an be miiri o la ani n’an nimisanin lo, an bena a ɲini ka kuma diinan mɔgɔkɔrɔw fɛ. A kɔrɔsi Jehova ka makari ye balimacɛ Arthura dusu saalo cogo min na. O balimacɛ dusukun tun b’a kɛlɛla kojugu. A ko: “N’ ye porno filɛ saan kelen ɲɔgɔn kɔnɔ. Nga tuma min na n’ ye forobakalan dɔ lamɛn dusukun koo la, n’ ye n’ ka jurumu fɔ n’ muso ani diinan mɔgɔkɔrɔw ye. O kɔ, n’ dusukun tun tɛ n’ kɛlɛ tugun. Nga n’ dusu bele tun tiɲɛnin lo n’ ka jurumu kosɔn. Diinan mɔgɔkɔrɔw ye n’ hakili jigi ko Jehova ma ban n’ na, ko a b’an kolo sabu an koo ka di a ye. U ka dususalo kumaw ye n’ hakili sigi ani ka n’ dɛmɛ k’a faamu ko Jehova yafara n’ ma tiɲɛn na.” Bi bi nin na, Arthur ye kudayi piyɔniye ye ani kɔrɔsigi ciden lo fana. N’an nimisanin lo sɔbɛ la, Jehova labɛnnin lo tuma bɛɛ ka yafa an ma. O b’an dusu saalo yɛrɛ le!

JEHOVA BE JIGIYA DI AN MA

8. a) Yahutu minw tun be jɔnya la, Jehova ye jigiya juman lo di olu ma? b) Ka kɛɲɛ ni Ezayi 40:29-31 ka fɔta ye, o jigiya tun bena nɔɔ juman lo to Yahutu nimisabagatɔw kan?

⁸ Yahutuw tun be se k’a miiri ko u tɛna kɔsegi abada u wolodugu la. Mun na do? Sabu a tun lɔnnin lo ko Babilonɛkaw tun tɛ u ka jɔɔnw labila (Ezayi 14:17). Nga Jehova ye jigiya di a ka jama ma. A ye layidu ta ko a bena a ka jama hɔɔrɔnya ani foyi tɛ se k’a bali k’o kɛ (Ezayi 44:26; 55:12). Jehova ɲɛɛ kɔrɔ, Babilonɛkaw gwiliya tun be i ko gwangwan (Ezayi 40:15). N’i ye gwangwan fiyɛ dɔrɔn, a be tunu. Jehova ka jigiya kumaw tun bena nɔɔ juman lo to Yahutuw kan? A tun bena u dusu saalo. Nga o dɔrɔn tɛ, Ezayi y’a sɛbɛ ko: “Minw jigi be Masaba kan, olu be fangakura sɔrɔ.” (Ezayi 40:29-31 kalan). Tiɲɛn na, jigiya tun bena Yahutuw barika bonya ani u tun bena “van i ko sɛgɛn.”

9. Mun na Yahutuw tun be se ka la a la ko Jehova ka layiduw bena dafa?

⁹ Jehova ye daliluw di Yahutuw ma minw tun b’a yira ko a ka layiduw bena dafa. O ye dalilu jumanw lo ye? An k’a filɛ kiraya kuma minw tun dafara ka ban. Misali la, Yahutuw tun b’a lɔn ko Asirikaw ye Israɛl siya tan ka mara minɛ ani u tagara ni jama ye jɔnya la (Ezayi 8:4). U y’a ye fana ko Babilonɛkaw ye Zeruzalɛmu halaki ani ka taga ni dugumɔgɔw ye jɔnya la (Ezayi 39:5-7). U tun be niin na tuma min na Babilonɛkaw ye masacɛ Sedesiyasi ɲɛɛw ci ani k’a minɛ ka taga n’a ye Babilɔni (Zer. 39:7; Ezek. 12:12, 13). Jehova tun ye koo minw fɔ, u bɛɛ dafara (Ezayi 42:9; 46:10). Siga t’a la, o koow bɛɛ y’a to Israɛldenw lara a la kosɔbɛ ko Jehova ye layidu min ta ko a bena u hɔɔrɔnya, o fana bena dafa!

10. Laban loon nunu na, mun lo bena an dɛmɛ an ka jigiya sabatinin ka to?

¹⁰ An be kalan juman lo sɔrɔ o la? N’an jigi tigɛnin lo, an ka jigiya be se k’an dusu saalo ani ka fanga kura di an ma. An be wagati gwɛlɛw lo la ani an jugu farimanw b’an kɛlɛla. Nga, an man ɲi k’an fari faga. Jehova ye jigiya ɲuman di an ma, o min ye ka ɲɛnamaya kɛ fɔɔ abada hɛɛrɛ sɔbɛ la ani yɔrɔ latanganin na. An ka ɲi ka to ka miiri o jigiya la. N’o tɛ, a tɛna gwɛ an ɲɛɛ na. A bena kɛ i n’a fɔ an be yɔrɔ cɛɲumanin dɔ filɛra vitiri nɔgɔnin fɛ. N’an be to k’an ka jigiya sabati, a be komi an b’o vitiri saniyara le walisa ka yeli kɛ ka ɲɛ. An be se ka to k’an ka jigiya sabati cogo di? An ka ɲɛnamaya bena diya cogo min na duniɲa kura kɔnɔ, an ka wagati ta tuma o tuma ka miiri o la. An ka to ka barokunw kalan, ka videwow filɛ ani ka dɔnkiliw lamɛn minw be kuma an ka jigiya koo la. An kɔrɔtɔnin lo layidu minw ka dafa alijɛnɛ kɔnɔ, an k’u kofɔ Jehova ye delili la.

11. Mun lo ye balimamuso Joy dɛmɛ a ye fanga kura sɔrɔ?

¹¹ Balimamuso dɔ tɔgɔ ko Joy ani banajugu dɔw b’a la. A kɔrɔsi a ka jigiya y’a dusu saalo ani k’a barika bonya cogo min na. A ko: “Ni n’ hakili ɲagaminin lo, n’ be n’ dusukunnakow bɛɛ fɔ Jehova ye sabu n’ b’a lɔn ko a be n’ faamu. O kɔ, Jehova be ‘sebagaya kabakoman’ di n’ ma.” (2 Kor. 4:7). Joy be to ka miiri k’a filɛ fana ko ale be duniɲa kura kɔnɔ, yɔrɔ min na mɔgɔ “si ten’a fɔ ko: ‘Ne man kɛnɛ.’” (Ezayi 33:24). Ni an fana be to k’an dusukunnakow bɛɛ fɔ Jehova ye ani ka to ka miiri an ka jigiya koo la, an bena fanga kura sɔrɔ.

12. Mun na an be se ka la Jehova ka layiduw la? (jaa lajɛ fana).

¹² I ko Jehova tun y’a kɛ ni Yahutuw ye cogo min na, a be dalilu caaman di an fana ma bi, minw b’a to an be se ka la a ka layiduw la. Kiraya kuma minw be dafara an ɲɛɛ na, miiri u la. Misali la, an ɲɛɛ b’a la ko “fangayɔrɔ ni dɛsɛyɔrɔ” be Angletɛri ni Ameriki ka fangatigiya la (Dan. 2:42, 43). A tun fɔra fana ko “dugukolo bena yɛrɛyɛrɛ yɔrɔ dɔw la,” ani o lo be kɛra. Ka fara o kan, an be kibaro diiman fɔra “diɲɛ yɔrɔ bɛɛ la.” (Mat. 24:7, 14). O kiraya kumaw ani caaman wɛrɛw be dafara minkɛ, an lanin b’a la kosɔbɛ ko Jehova ye layidu ta koo ɲuman nata minw koo la, olu fana bena dafa.

JEHOVA B’AN HAKILI SIGI

13. a) Ni Yahutuw hɔɔrɔnya wagati tun be surunyana, u tun bena gwɛlɛya jumanw lo sɔrɔ? b) Ka kɛɲɛ ni Ezayi 41:10-13 ka fɔta ye, Yahutu minw tun be jɔnya la, Jehova ye olu dusu saalo cogo di?

¹³ Yahutu minw tun be jɔnya la Babilɔni, Jehova ye jigiya ɲuman di u ma ko u bena hɔɔrɔnya. Nga a tun b’a lɔn ko n’o wagati be surunyana, u bena gwɛlɛya dɔw sɔrɔ. Jehova tun kɔnna k’a fɔ ko masacɛ setigi dɔ bena Babilɔni n’a lamini duguw minɛ (Ezayi 41:2-5). Nga yala Yahutuw tun ka ɲi ka siran wa? Ayi! Saan caaman ka kɔn o ɲɛ, Jehova tun y’a ka jama hakili sigi ko: “Aw kana siran, bari, ne be ni aw ye, aw hakili kana ɲagami, bari, ne le ye aw ka Ala ye.” (Ezayi 41:10-13 kalan). Jehova tun b’a fɛ ka mun lo fɔ tuma min na a ko: “Ne le ye aw ka Ala ye”? A tun tɛ Yahutuw hakili jigira le ko u ka ɲi k’ale lo bato sabu u tun b’o lɔn ka ban. Nga a tun b’u hakili jigira le ko ale bele be n’u ye.—Zab. 118:6.

14. Jehova ye koo wɛrɛ juman lo kɛ walisa ka Yahutuw hakili sigi?

¹⁴ Yahutu minw tun be jɔnya la, Jehova y’u hakili sigi fana a kɛtɔ k’u hakili jigi ko fanga kabakoman ni lɔnniyaba b’ale fɛ. A y’a fɔ u ye ko u k’u ɲɛɛ kɔrɔta ka lolow filɛ. A ko ale m’u dan dɔrɔn dɛ, nga a b’u kelen kelen bɛɛ tɔgɔ lɔn (Ezayi 40:25-28). N’a be lolow kelen kelen bɛɛ lɔn u tɔgɔ la, siga t’a la, a b’a sagokɛlaw kelen kelen bɛɛ tɔgɔ lɔn fana! Ka fara o kan, ni see b’a ye ka lolow dan, siga t’a la, see b’a ye fana k’a sagokɛlaw dɛmɛ. O la, Yahutu minw tun be jɔnya la, kuun tun t’a la u ka hami wala ka siran.

15. Yahutu minw tun be jɔnya la, Jehova y’u labɛn cogo di koo nataw kama?

¹⁵ Jehova tun y’a sagokɛlaw labɛn fana koo nataw kama. Ezayi sapitiri 26nan na, a tun y’a fɔ a ka jama ye ko: “Aw ka don aw ka soow kɔnɔ, ka daaw tugu. Aw ka dogo waati kunkurunnin kɔnɔ, fɔɔ Masaba ka dimi waati ka tɛmɛ.” (Ezayi 26:20). A be komi Yahutuw y’o cikan sira tagama tuma min na masacɛ Sirusi ye Babilɔni dugu minɛ. Grɛkiw ka tarikikow sɛbɛbaga dɔ ko tuma min na Sirusi donna Babilɔni, a “ye cii di [a ka sɔrɔdasiw] ma ko u mana mɔgɔ o mɔgɔ ye kɛnɛma, u k’o tigi faga.” Miiri k’a filɛ Babilɔnikaw siranna cogo min na! Nga Yahutu minw tun be jɔnya la, a be komi olu kisira sabu u ye Jehova ka cikanw labato.

16. Mun na an man ɲi ka siran kojugu an ka siniɲasigi koo la? (jaa lajɛ fana).

¹⁶ An be kalan juman lo sɔrɔ o la? Yanni dɔɔni, tɔɔrɔba dɔ bena daminɛ, o min ɲɔgɔn ma kɛ ka ye. N’o kɛra, duniɲamɔgɔw hakili bena ɲagami ani u bena siran kojugu. Nga an minw ye Jehova sagokɛlaw ye, an tɛna siran. An b’a lɔn ko Jehova lo ye an ka Ala ye. O kama, an bena jagwɛlɛya sɔrɔ sabu an b’a lɔn ko an ka “hɔrɔnyali waati sera.” (Luka 21:28). Hali tuma min na jamanaw bena lajɛn ka wuli an kama, an bena to k’an jigi la Jehova kan. Jehova bena tɛmɛ mɛlɛkɛw fɛ k’an latanga ani a bena cikanw di minw bena an kisi. A bena o cikanw lase an ma cogo di? An t’o lɔn fɔlɔ. Nga n’a sɔrɔ a bena tɛmɛ an ka kafow lo fɛ k’o cikanw lase an ma. O kafow lo bena kɛ i n’a fɔ an ka “soow,” yɔrɔ minw na an latanganin bena kɛ. An be se k’an yɛrɛ labɛn cogo di koo nataw kama? An ka ɲi k’an magwɛrɛ kosɔbɛ an balimaw na, ka tugu ɔriganisasiyɔn ka cikanw kɔ ani ka la a la ko Jehova lo b’o ɔriganisasiyɔn ɲɛminɛna.—Eburuw 10:24, 25; 13:17.

17. I be se ka dususalo sɔrɔ Jehova fɛ cogo di?

¹⁷ Yahutu minw tun be jɔnya la, hali ni koow tun man nɔgɔ u fɛ, u mako tun be dususalo min na, Jehova y’o lase u ma. A bena o ɲɔgɔn lo kɛ an fana ye. O la, sinikow mana kɛ min o min ye, to ka dususalo ɲini Jehova fɛ. La a la ko Jehova be makari sɔbɛ la ani to k’i ka jigiya barika bonya. Kana ɲinɛ ko ni Jehova ye i ka Ala ye, i man ɲi ka siran foyi ɲɛ.