Min b’i fɛ, yala i b’a to o k’i wasa wa?

1. Min b’i bolo, k’a to o k’i wasa, o kɔrɔ ko di? Nga o kɔrɔ tɛ mun lo ye?

MIN b’i bolo o b’i wasa wa? Mɔgɔ min wasanin lo, o tigi ninsɔn ka di ani a hakili siginin lo sabu a be duga minw sɔrɔla sisan, a be sinsin o lo kan. A t’a dusu tiɲɛ wala ka dimi sabu a tɛ ni fɛɛn dɔw ye. Nga min b’i bolo, k’a to o k’i wasa o kɔrɔ tɛ ko i tɛ jɔrɔ i ka ɲɛnamaya kɛcogo koo la. Misali la, koo jugu tɛ k’a ɲini ka caaman kɛ Jehova ka baara la (Ɔrɔm. 12:1; 1 Tim. 3:1). O bɛɛ n’a ta n’i be kunkanbaara dɔ fɛ, ani o ma kalifa i ma fɔlɔ, o man ɲi k’i ka ninsɔndiya nagasi.

2. Min b’an bolo n’an t’a to o k’an wasa, mun na farati b’o la?

² Min b’an bolo n’an t’a to o k’an wasa, o nɔfɛkow be se ka juguya. Mɔgɔ minw ka fɛɛn t’u wasa abada, u dɔw be baara kɛ lɛri caaman kɔnɔ walisa ka fɛɛn dɔw sɔrɔ u mako tɛ minw na. A fɔ man di nga kerecɛn dɔw yɛrɛ ye wari wala fɛɛn dɔw sonya sabu o nege donna u la. N’a sɔrɔ u y’a fɔ u yɛrɛ ye ko: “Ne ka kan n’a ye,” “n’ tun b’o kɔnɔna kabi wagatijan,” wala “n’ bena a sara kɔfɛ.” Nga sonyali sifa bɛɛ ka gwo Jehova ye ani o b’a tɔgɔ tiɲɛ (Talenw 30:9). Dɔ wɛrɛw tun be kunkanbaara dɔw fɛ nga u m’o sɔrɔ minkɛ, u fari fagara fɔɔ u ye Jehova sago kɛli dabila (Gal. 6:9). Mun lo be se k’a to Jehova sagokɛla dɔ be miiri ka o koo ɲɔgɔn kɛ? N’a sɔrɔ dɔɔni dɔɔni a tigi ka fɛɛnw tun t’a wasara tugun.

3. An be kalan juman lo sɔrɔ Filipikaw 4:11, 12 kɔnɔ?

³ Min b’an bolo, an bɛɛ be se k’a to o k’an wasa. Ciden Pol y’a sɛbɛ ko ale ka koow cogoya mana kɛ min o min ye, ‘a wasanin lo, bari a y’o dege.’ (Filipikaw 4:11, 12 kalan). A tun be kaso la tuma min na a y’o sɛbɛ. O bɛɛ n’a ta, a ka ninsɔndiya ma nagasi. Min tun b’a bolo, a y’a faamu cogo min na a be se k’a to o k’a wasa. N’a sɔrɔ a ka gwɛlɛ an ma an ka fɛɛnw k’an wasa. N’o lo, Pol ka kumaw, ani koo minw kɛra a ka ɲɛnamaya kɔnɔ, o be se k’an hakili sigi ko anw fana be se k’a to an ka fɛɛnw k’an wasa. An man ɲi k’a miiri ko an ka koow cogoya bena an wasa n’an ma jijali foyi kɛ. Walisa an ka koow cogoya k’an wasa, an ka ɲi k’o degi le. An be se k’o kɛ cogo di? An ka jogo dɔw lajɛ minw bena an dɛmɛ walisa an ka fɛɛnw k’an wasa.

KƐ ƝUMANLƆNBAGA YE

4. Mɔgɔ min ye ɲumanlɔnbaga ye, mun na o tigi ka fɛɛnw b’a wasa? (1 Tesalonikaw 5:18).

⁴ Mɔgɔ min ye ɲumanlɔnbaga ye, o tigi ka fɛɛnw b’a wasa (1 Tesalonikaw 5:18 kalan). Misali la, n’an be Jehova waleɲuman lɔn an makoyafɛnw kosɔn, fɛɛn minw t’an fɛ, an man teli ka hami kojugu o koo la. I be ni kunkanbaara minw ye, miiri u la ani Jehova waleɲuman lɔn u kosɔn. O bena i dɛmɛ k’i seko kɛ k’o kunkanbaaraw dafa sanni i ka to ka miiri kunkanbaara wɛrɛw la i tɛ ni minw ye. Jehova b’a lɔn ko a kɔrɔtanin lo an ka kɛ ɲumanlɔnbagaw ye. O yɛrɛ lo kama a b’an jija Bibulu kɔnɔ ko an ka to k’ale fo an ka deliliw la. N’an ye ɲumanlɔnbagaw ye, “Ala ka hɛrɛ min tɛmɛna mɔgɔw ka faamuyali” kan, an bena o sɔrɔ.—Filip. 4:6, 7.

5. Mun kama Israɛldenw tun ka ɲi ka Jehova waleɲuman lɔn? (jaa lajɛ fana).

⁵ An k’a filɛ min ye Israɛldenw sɔrɔ. Siɲɛ caaman na, u ŋunuŋununa Jehova kɔrɔ sabu u tun be dumuni minw kɛ Ezipiti, u tun tɛ o sɔrɔla tugun (Nɔnb. 11:4-6). Tiɲɛn lo ko ɲɛnamaya tun man nɔgɔ kongokolon kɔnɔ. Nga min tun b’u bolo mun lo tun bena a to o k’u wasa? Jehova tun ye min kɛ u ye ka ban, u tun ka ɲi ka miiri o la ani k’a waleɲuman lɔn o kosɔn. Israɛldenw tun ka ɲi k’u hakili jigi ko u tun ye jɔɔnw ye Ezipiti ani ko Ezipitikaw tun ka fari u ma. Nga Jehova ye tɔɔrɔ tan lase Ezipitikaw ma ani ka Israɛldenw kisi. U bɔnin kɔ jɔnya la, u ye Ezipitikaw ka sanu, warigwɛ ani faniw cɛ (Ɛkiz. 12:35, 36). Tuma min na u sera Kɔgɔji wulen daa la, Farahuna n’a ka kɛlɛbolo tun b’u nɔgwɛnna. Nga Jehova ye kɔgɔji wulen tilan fila walisa u ka se ka tɛmɛ. Ka fara o kan, kongokolon kɔnɔ, Jehova tora k’u balo ni maanɛ ye loon o loon. O la, mun na Israɛldenw tun be ŋunuŋununa dumuni kosɔn? Israɛldenw mako tun be dumuni min na, u tun b’o sɔrɔ. Nga u tun wasanin tɛ sabu Jehova tun be min di u ma, u tun t’a waleɲuman lɔn o kosɔn.

6. An be se ka kɛ ɲumanlɔnbagaw ye cogo di?

⁶ I be se ka kɛ ɲumanlɔnbaga ye cogo di? A fɔlɔ, koo ɲuman minw be kɛra i ka ɲɛnamaya kɔnɔ, wagati kunmabɔ loon o loon walisa ka miiri o la. I be se fana ka fɛɛn fila wala saba sɛbɛ i b’a fɛ k’i ka waleɲumanlɔn yira minw kosɔn (Dus. 3:22, 23). A filanan, i ka waleɲumanlɔn yira. Tɔɔw be koo ɲuman minw kɛ i ye, u fo o kosɔn. Nga min kɔrɔtanin lo kosɔbɛ, o ye ko i ka Jehova fo tuma o tuma (Zab. 75:2). A sabanan, ɲumanlɔnbagaw kɛ i teri sɔbɛw ye. N’an teriw ye ɲumanlɔnbagaw ye, o bena an fana jija an ka kɛ ɲumanlɔnbagaw. Nga n’an teriw tɛ ɲumanlɔnbagaw ye an fana tɛna kɛ a dɔ ye (Deter. 1:26-28; 2 Tim. 3:1, 2, 5). N’an be sababuw ɲini k’an ka waleɲumanlɔn yira, an dusu man teli ka tiɲɛ sabu gwɛlɛyaw b’an kan wala fɛɛn dɔw t’an fɛ.

7. Mun lo ye balimamuso Amelia dɛmɛ a kɛra ɲumanlɔnbaga ye?

⁷ An k’a filɛ min ye balimamuso Ameliaa sɔrɔ. A be Ɛndonezi jamana na ani a ko: “COVID-19 fɔɲɔbana tuma na, n’ y’a daminɛ ka n’ ka koow cogoya suma ni balima tɔɔw ta ye. O y’a to n’ ka koow cogoya tun tɛ n’ wasa tugun.” (Gal. 6:4). Mun lo y’a dɛmɛ k’a ka koow filɛcogo yɛlɛma? A ko: “Jehova tun be koo ɲuman minw kɛ n’ ye loon o loon n’ y’a daminɛ ka miiri o la. N’ ye duga minw sɔrɔ sabu n’ kɛra Jehova ka ɔriganisasiyɔn mɔgɔ dɔ ye, n’ miirila o fana na koɲuman. O kɔ, n’ ye Jehova fo o bɛɛ kosɔn. O y’a to n’ tun wasanin lo tiɲɛn tiɲɛn na.” Yala i wasanin tɛ i ka koow cogoya kosɔn wa? N’o lo, balimamuso Amelia ye min kɛ, ele fana be se k’o ɲɔgɔn kɛ walisa ka to k’i ka waleɲumanlɔn yira.

MIN KƆRƆTANIN LO, O TO I HAKILI LA ANI I MAJIGININ KA TO

8. Mun lo ye Baruki sɔrɔ?

⁸ Wagati dɔ la, kira Zeremi ka sekeretɛri Baruki tun wasanin tɛ a ka koow cogoya kosɔn. Baara min tun kalifara Baruki ma, o tun man nɔgɔ. Israɛldenw tun ye ɲumanlɔnbaliw ye ani u tun tɛ mɛnni kɛ Jehova fɛ. O kama, Baruki tun ka ɲi ka Zeremi dɛmɛ k’a fɔ u ye min tun bena u sɔrɔ o kosɔn. Koo min tun kɔrɔtanin lo, wagati dɔ la, Baruki m’o to a hakili la. Jehova tun b’a fɛ a ka min kɛ, sanni a k’o to a hakili la, a be komi a y’a daminɛ ka miiri kojugu a yɛrɛ koo la ani a tun b’a fɛ ka min kɛ. Jehova tɛmɛna Zeremi fɛ k’a fɔ Baruki ye ko: “Ele be kobabaw le laɲinina i yɛrɛ ye. Kana o laɲini.” (Zer. 45:3-5). A be komi Jehova tun b’a fɔra le ko: “A to i ka koow cogoya k’i wasa.” Baruki sɔnna Jehova ka ladili ma ani a magwɛrɛnin tora Jehova la kosɔbɛ.

9. Ka kɛɲɛ ni 1 Korɛntikaw 4:6, 7 ye, majigilenya bena an dɛmɛ ka sɔn mun lo ma? (jaaw lajɛ fana).

⁹ Wagati dɔ la, kerecɛn dɔ be se k’a miiri ko ale ka kan ni kunkanbaara dɔ ye. N’a sɔrɔ a be koo caaman lɔn, a be baaraba kɛ, wala a be Jehova batora a saan caaman ye nin ye. Nga a tun b’a fɛ ka kunkanbaara min sɔrɔ, a be se ka kɛ k’o kalifara mɔgɔ wɛrɛ ma. Mun lo be se k’a dɛmɛ a dusu kana tiɲɛ? A be se ka miiri ciden Pol ka kuma na, min be sɔrɔ 1 Korɛntikaw 4:6, 7 kɔnɔ (o vɛrisew kalan). An be koo minw lɔn ani u be nɛɛma baara minw kalifa an ma, u bɛɛ be bɔ Jehova lo yɔrɔ. Jehova t’o di an ma sabu an ka fisa ni tɔɔw ye. Nga a b’o di an ma a ka kanuya n’a ka ɲumanyaba kosɔn.—Ɔrɔm. 12:3, 6; Efɛz. 2:8, 9.

10. An be se ka kɛ ni majigilenya ye cogo di?

¹⁰ N’an miirila koɲuman Yezu ka ɲɛyirali la, o be se k’an dɛmɛ ka kɛ ni majigilenya ye. An k’a filɛ min kɛra suu min na Yezu y’a ka cidenw seen ko. Ciden Zan y’a sɛbɛ ko: “Yezu tun y’a lɔn ko a Faa ye koo bɛɛ don ale bolo, ani ko ale bɔra Ala fɛ, ani a ka kan ka segi Ala fɛ tugu. . . . [A y’a] daminɛ k’a ka kalandenw seen ko.” (Zan 13:3-5). Yezu tun be se k’a miiri ko a ka kalandenw lo ka kan k’ale seen ko. A ka ɲɛnamaya kuru bɛɛ la dugukolo kan, a ma deli k’a miiri abada ko komi a ye Ala deen ye, a ka kan k’a ka ɲɛnamaya kɛ ɲɛsuma na ani ka kɛ ni boon ɲuman ni wari caaman ye (Luka 9:58). Yezu tun majiginin lo ani min tun b’a fɛ, a tun b’a to o k’a wasa. A ye ɲɛyirali ɲuman to an ye.—Zan 13:15.

11. Mun lo ye Dennis dɛmɛ a ka wasa a ka koow cogoya kosɔn?

¹¹ Balimacɛ Dennis be Peyiba jamana na. A b’a jijara ka Yezu ka majigilenya ɲɔgɔn ladegi. Nga o man nɔgɔ a ma tuma bɛɛ. A ko: “N’ be nɛɛma baara min fɛ, n’o kalifara balima wɛrɛ ma, tuma dɔw la n’ dusu be tiɲɛ sabu n’ ka miiri la ne lo tun ka kan n’o baara ye. N’o miiriya ɲɔgɔn be n’ kan, n’ be sɛgɛsɛgɛri kɛ majigilenya koo la. Apilikasɔn JW Library^® kɔnɔ, n’ ye tagamasiɲɛ bila vɛrise dɔw kan minw be kuma majigilenya koo la. N’ y’o kɛ walisa n’ ka se k’o vɛrisew sɔrɔ joona joona ani ka segi k’u kalan. N’ ye kalan dɔw fana telesarse n’ ka telefɔni kan majigilenya koo la ani n’ b’u lamɛn tuma kelen kelen.b N’ y’a faamu ko an be baara minw bɛɛ kɛra Jehova ye, o kuun ye ka nɔɔrɔ la a kan. Nga, an man ɲi k’o kɛ walisa k’an yɛrɛ yira. Jehova ka ɲumanya kosɔn, a b’a to an kelen kelen bɛɛ k’an seen don a ka baara la. Nga ale lo b’a kɛ o baara be ɲɛ.” N’i y’a daminɛ k’a miiri ko i ka koow cogoya t’i wasara tugun, i jija ka kɛ ni majigilenya ye. O la, i ni Jehova ka teriya bena sabati ani o bena a to i be wasa i ka koow cogoya kosɔn.—Zaki 4:6, 8.

TO KA MIIRI JEHOVA KA LAYIDUW KOO LA

12. Jigiya juman lo b’an dɛmɛ an ka wasa an ka koow cogoya kosɔn? (Ezayi 65:21-25).

¹² N’an be miiri an ka jigiya ɲuman koo la, o bena a to an ka koow cogoya k’an wasa kosɔbɛ. Ezayi ka kitabu kɔnɔ, Jehova y’a fɔ ko ale b’a lɔn ko gwɛlɛya caaman b’an kan. Nga a ye layidu ta fana ko a bena o gwɛlɛyaw bɛɛ ban (Ezayi 65:21-25 kalan). An bena ɲɛnamaya kɛ yɔrɔ latanganin na ani boon cɛɲumaninw kɔnɔ. An bena baara nafamanw kɛ ani an bena dumuni diiman caaman sɔrɔ, minw tɛ mɔgɔ bana. An tɛna siran tugun ko koo jugu dɔ bena anw wala an deenw sɔrɔ (Ezayi 32:17, 18; Ezek. 34:25). Tiɲɛn na, siniɲasigi ɲuman lo b’an kɔnɔna, siga si t’o la!

13. Koo jumanw lo la an ka ɲi ka to ka miiri kosɔbɛ an ka jigiya koo la?

¹³ Sisan ka tɛmɛ sanga ni wagati bɛɛ kan, an ka ɲi ka to ka miiri an ka jigiya koo la. Mun na do? Sabu an be “laban tuma na” ani gwɛlɛyaw b’an bɛɛ kan, o minw muɲu man nɔgɔ (2 Tim. 3:1). An mako be ladili, fanga ani dɛmɛ min na walisa ka se k’an ka gwɛlɛyaw muɲu, Jehova b’o di an ma loon o loon (Zab. 145:14). An ka jigiya fana be se k’an dɛmɛ ka muɲuli kɛ gwɛlɛyaw wagati la. N’a sɔrɔ i b’i jijara kosɔbɛ k’i ka denbaya mako wasa, nga o man nɔgɔ i fɛ. Yala o kɔrɔ ko i bena to ka bondori kɛ tuma bɛɛ le walisa ka ele n’i ka denbayamɔgɔw makoɲɛfɛnw sɔrɔ wa? Ayi dɛ! Jehova ye layidu ta ko i mako be min na, a bena o di i ma. Nga a tɛna dan o dɔrɔn ma, a bena fɛɛn caaman wɛrɛw d’i ma alijɛnɛ kɔnɔ (Zab. 9:19; 72:12-14). N’a sɔrɔ banajugu dɔ b’i la min b’i tɔɔrɔ loon o loon, wala n’a sɔrɔ hakili ɲagami bana wala bana jugu wɛrɛ lo b’i la. Yala i bena to ka tɔɔrɔ ten fɔɔ abada ani i tɛ kɛnɛya wa? Ayi dɛ! Ala ka duniɲa kura kɔnɔ, bana ni saya tɛna kɛ yen (Yir. 21:3, 4). O jigiya b’a to an be wasa kabi sisan ani an dusu tɛ tiɲɛ wala an tɛ dimi an ka koow cogoya kosɔn. Hali n’u be tilenbaliyako kɛra an na, n’an ka mɔgɔ kanulen dɔ sara, n’an man kɛnɛ wala ni gwɛlɛya wɛrɛ b’an kan, an bele hakili be se ka sigi ani ka ninsɔndiya sɔrɔ. Mun na do? Sabu an ka gwɛlɛya mana kɛ min o min ye, an b’a lɔn k’o ye “waati dɔɔni tɔɔrɔ” lo ye ani ko duniɲa kura kɔnɔ, an bena an yɛrɛ sɔrɔ pewu pewu.—2 Kor. 4:17, 18.

14. An be se k’an ka jigiya barika bonya cogo di?

¹⁴ An be ni jigiya min ye siniɲasigi koo la, o b’a to an be wasa an ka koow cogoya kosɔn. O la, an be se k’an ka jigiya barika bonya cogo di? Misali la, n’a sɔrɔ mɔgɔ dɔ mako b’a la ka linɛti don walisa ka yeli kɛ ka ɲɛ yɔrɔjan. O cogo kelen na, n’a sɔrɔ an ka ɲi ka koo tigitigi dɔw kɛ k’an ka jigiya barika bonya walisa alijɛnɛ nata koo gwɛnin ka to an hakili la kosɔbɛ. Misali la, ni haminankow b’an kan wariko ta fan fɛ, an ka miiri k’a filɛ an ka ɲɛnamaya bena kɛ cogo min na tuma min na an mako tɛna kɛ wari la tugun ani fantanya tɛna kɛ yen tugun. An ma nɛɛma baara minw sɔrɔ fɔlɔ, n’a sɔrɔ an be hamina o lo koo la. N’o lo, an be se ka miiri k’a filɛ ko n’an nana kɛ mɔgɔ dafaninw ye ani n’an ye Jehova bato saan waa caaman kɔnɔ, an tɛna o haminankow jati tugun (1 Tim. 6:19). N’a sɔrɔ an be hamina koo caaman na fɔɔ a ka gwɛlɛ an ma ka miiri siniɲasigi koo la. Nga Jehova ye siniɲasigi ɲuman min layidu ta an ye, n’an tora ka miiri o la kosɔbɛ, a bena nɔgɔya an ma ka sinsin o kan sanni ka to ka miiri an ka gwɛlɛyaw la.

15. Christa ye min fɔ, i be kalan juman lo sɔrɔ o la?

¹⁵ An kumana balimacɛ Dennis min koo la, a muso tɔgɔ ko Christa. An k’a filɛ jigiya ye Christa dɛmɛ cogo min na. A y’a fɔ ko: “Bana dɔ be n’ na min be n’ barika dɔgɔya kosɔbɛ fɔɔ k’a to n’ tɛ se ka tagama. O kama, n’ be sigi murukuwotoro lo kɔnɔ, ani n’ be tile fanba kɛ n’ ka dilan kan. Dimi be n’ kan loon o loon. A ma mɛn, n’ ka dɔgɔtɔrɔ y’a fɔ n’ ye ko n’ ka bana tɛna kun n’ na. N’ sinna k’a fɔ n’ yɛrɛ ye ko: ‘Ne be siniɲasigi yera cogo min na, ale t’a yera o cogo kelen na.’ Ne be sinsin n’ ka jigiya lo kan, o min be n’ hakili sigi. N’ ka ɲi ka gwɛlɛya caaman muɲu bi. Nga duniɲa kura kɔnɔ, n’ bena ɲɛnamaya diyabɔ bɛrɛbɛrɛ!”

“FOYI TE DƐSƐ A ƝASIRANBAGA LA”

16. Mun na masacɛ Dawuda tun be se k’a fɔ ko “foyi te dɛsɛ” Jehova ɲɛsiranbagaw la?

¹⁶ Hali n’an b’a to an ka koow cogoya k’an wasa, an bena gwɛlɛya dɔw sɔrɔ. Bibulu b’a yira ko masacɛ Dawuda tɔɔrɔla a woloden saba saya kosɔn. U bagara a ma ko a ye koo jugu dɔw kɛ, u y’a janfa, ani masacɛ dɔ y’a nɔgwɛn saan caaman kɔnɔ. O gwɛlɛyaw bɛɛ n’a ta, Dawuda tun wasanin lo. A y’a fɔ Jehova koo la ko: “Foyi te dɛsɛ a ɲasiranbaga la.” (Zab. 34:10, 11). Mun na Dawuda tun be se k’o fɔ? Sabu a tun b’a lɔn ko hali ni Jehova t’a sagokɛlaw tanga gwɛlɛyaw bɛɛ ma, ale mako be min na, Jehova bena o di a ma tuma bɛɛ (Zab. 145:16). An fana be se k’an jigi la Jehova kan walisa a k’an dɛmɛ an ka se k’an ka gwɛlɛyaw bɛɛ muɲu. O la, an ka koow cogoya mana kɛ min o min ye, an be se ka hakilisigi ni ninsɔndiya sɔrɔ.

17. Mun na i b’a fɛ k’i seko bɛɛ kɛ walisa i ka koow cogoya k’i wasa?

¹⁷ Jehova b’a fɛ i ka koow cogoya k’i wasa (Zab. 131:1, 2). O la, i seko bɛɛ kɛ walisa i ka koow cogoya k’i wasa. N’i b i jija ka kɛ ɲumanlɔnbaga ye, k’a to i hakili la min kɔrɔtanin lo, k’i yɛrɛ majigi ani k’i ka jigiya barika bonya, i bena se k’a fɔ ko: “Ne wasanin lo.”—Filip. 4:11.