Ala ka kanuya tɛ ban abada

1-2. Gwɛlɛya juman lo be kerecɛn caaman kan?

MIIRI kurun dɔ koo la fɔɲɔba jukɔrɔ. Jikuruw be lamagara ani k’o kurun fifa faan bɛɛ la. N’u ma banamini fili, jikuruw bena to ka o kurun fifa fifa. Banamini b’a to kurun be lɔ ka ɲɛ ani a tɛ sira bila fɔɲɔ tuma na.

² N’i gwɛlɛyaba dɔ b’i kan, i be se ka kɛ i ko o kurun. I dusukunnakow be se ka yɛlɛma yɔrɔnin kelen. Loon dɔ i lanin b’a la ko Jehova b’i kanu ani ko a b’i dɛmɛna. Nga o loon dugusagwɛ, i b’i yɛrɛ ɲininga n’a b’i ka gwɛlɛyaw kala ma (Zab. 10:1; 13:2). N’a sɔrɔ i teri dɔ be dususalo kumaw fɔ i ye ani i hakili be sigi wagati dɔ la (Talenw 17:17; 25:11). Nga o kɔ, i b’a daminɛ ka sigasiga tugun. I be se k’i yɛrɛ ɲininga n’i bele koo ka di Jehova ye. I be se k’i ka banamini fili ka ɲɛ cogo di gwɛlɛyaw tuma na? O kɔrɔ, mun lo be se k’i dɛmɛ ka la a la ko Jehova b’i kanu ani ko a b’i dɛmɛna?

3. Kumaden min bayɛlɛmana Zaburuw 31:8 ani 136:1 kɔnɔ ko “ɲumanya,” o kɔrɔ ko di? Mun na an be se k’a fɔ ko Jehova ka kanuya n’a ka kantigiya ɲɔgɔn tɛ yen? (jaa lajɛ fana).

³ Cogo minw na i be se k’i ka banamini fili gwɛlɛya tuma na, u la dɔ ye k’i hakili to Jehova ka kanuya n’a ka kantigiya koo la (Zaburuw 31:8; 136:1 kalan). Kumaden min bayɛlɛmana vɛrise nunu kɔnɔ ko “ɲumanya,” o ɲɛsinna kanuya barikaman lo ma min be mɔgɔ fila cɛ, ani u be kantigiya min kɛ ɲɔgɔn ye. Jehova ka kanuya n’a ka kantigiya ɲɔgɔn tɛ yen. Kumaden minw bayɛlɛmana Ɛkizɔdi 34:6, 7 ni Zaburuw 86:5 kɔnɔ, o b’a yira ko Jehova ka kanuya n’a ka kantigiya ka bon. Miiri k’a filɛ o kɔrɔ ye min ye: Jehova t’a sagokɛla kantigiw to yen abada! N’an b’a to an hakili la ko Jehova ye kantigi ye, o b’a to an be lɔ kelen kan gwɛlɛyaw tuma na.—Zab. 23:4.

JEHOVA KA KANUYA JATI BIBULU KA KALAN JƆNJƆN DƆ YE

4. Bibulu ka kalan jɔnjɔn dɔw kofɔ ani a ɲɛfɔ fɛɛn min kama an lanin b’u la kosɔbɛ.

⁴ N’i be Jehova ka kanuya jati Bibulu ka kalan jɔnjɔn dɔ ye, o be se k’i dɛmɛ fana i ka lɔ kelen kan gwɛlɛyaw tuma na. N’u ko Bibulu ka kalan jɔnjɔn, ele fɛ o ye mun lo ye? I ye kalan minw faamu Ala ka Kuma kɔnɔ, n’a sɔrɔ i be miirila olu lo la. Misali la, i y’a faamu ko Ala tɔgɔ ko Jehova ani ko Yezu ye a Dencɛ kelenpe bangelen ye. I y’a faamu fana ko suuw tɛ foyi kala ma ani ko dugukolo bena kɛ alijɛnɛ ye walisa adamadenw ka sigi a kan fɔɔ abada (Zab. 83:19; Waaj. 9:5; Zan 3:16; Yir. 21:3, 4). Kabi i sɔnna o kalanw ma, mɔgɔ si tɛ se k’i lafili nɔgɔman na u koo la. Mun na do? Sabu i y’a faamu k’o kalanw basigira daliluw lo kan. N’an b’a jati ko Jehova ka kanuya ye Bibulu ka kalan jɔnjɔn dɔ ye, o be se k’an dɛmɛ an kana a miiri ko a t’an ka gwɛlɛyaw kala ma wala ko a t’a janto an na gwɛlɛyaw tuma na. An k’a filɛ an be se k’o kɛ cogo min na.

5. A ɲɛfɔ cogo min na mɔgɔ be se ka ban ngalon kalanw na.

⁵ Tuma min na i y’a daminɛ ka bibulukalan kɛ, mun lo y’i dɛmɛ ka ban ngalon kalanw na? U tun y’i kalan min na i ka diinan kɔnɔ, n’a sɔrɔ i y’u suma ni Bibulu kɔnɔnakumaw ye. An ka misali dɔ lajɛ. N’a sɔrɔ i tun b’a miiri ko Yezu lo ye Sebagayabɛɛtigi Ala ye. Nga i ka bibulukalan kɛtɔ, i y’i yɛrɛ ɲininga ko: “Yala o kalan ye tiɲɛn ye wa?” Ani Bibulu sɛgɛsɛgɛnin kɔ, i y’a faamu ko o kalan tɛ tiɲɛn ye. O la, i banna o ngalon kalan na ani ka sɔn tiɲɛnkalan nin na: Yezu lo ye “dafɛn bɛɛ la fɔlɔ bangelen” ye, “Ala Dencɛ kelenpe.” (Kɔlɔs. 1:15, Bible senuma; Zan 3:18). A be se ka gwɛlɛya kosɔbɛ ka kɛlɛkunbɛn kogo ci. O cogo kelen na fana, a be se ka gwɛlɛya an ma ka ban ngalon kalanw na (2 Kor. 10:4, 5). Nga, n’i sɔnna u la, i tɛ kɔsegi i ka lannako kɔrɔw ma tugun.—Filip. 3:13.

6. Mun na i be se ka la a la ko Jehova ka “ɲumanya [wala kanuya kantigiman] te ban abada?”

⁶ I be se k’o ɲɔgɔn kɛ, n’a y’a sɔrɔ ko i be sigasigara Jehova ka kanuya koo la kɔrɔbɔli dɔ kosɔn. I be se k’i yɛrɛ ɲininga ko: “Yala n’ ka miiriya bɛnnin lo wa?” Fɛɛn min b’a to i be sigasigara Jehova ka kanuya koo la, o suma ni Zaburuw 136:1 kɔnɔnakumaw ye. O lo ye barokun nin ka vɛrise jɔnjɔn ye. Kumaden min bayɛlɛmana ko “ɲumanya,” o ɲɛsinna kanuya ani kantigiya lo ma. O la, mun na Zaburu sɛbɛbaga ye Jehova ka kanuya kofɔ o cogo la? Mun na a fɔra o Zaburu kɔnɔ siɲɛ 26 bɛɛ ko Jehova ka “ɲumanya [wala kanuya kantigiman] te ban abada?” I ko an y’a ye cogo min na, Jehova be ni ka kanuya kantigiman min ye a sagokɛlaw koo la, o ye Bibulu ka kalan jɔnjɔn dɔ ye. O kalan be i ko Bibulu ka kalan jɔnjɔn tɔɔw, i sɔnna minw na nɔgɔman na. O la, k’a miiri ko nafa foyi t’i la Jehova ɲɛɛ kɔrɔ ani ko a t’i kanu, o ye ngalon kalan dɔ lo ye. Ban o ngalon kalan na, i ko i tun bena ban ngalon kalan tɔɔw la cogo min na!

7. Vɛrise dɔw kofɔ minw b’an hakili sigi ko Jehova b’an kanu.

⁷ Bibulu yɔrɔ caaman b’an hakili sigi ko Jehova b’an kanu. Misali la, Yezu y’a fɔ a ka kalandenw ye ko: “Aw ka fisa ni kɔnɔninw ye.” (Mat. 10:31). Jehova fana y’a fɔ a sagokɛlaw ye ko: “Ne be barika don aw la, ne b’aw dɛmɛ. Ne b’aw tanga ka see d’aw ma ni ne ka sebagaya ye.” (Ezayi 41:10). O kumaw barika ka bon yɛrɛ le. Yezu m’a fɔ ko “n’a sɔrɔ aw ka fisa ni kɔnɔninw ye.” Ani Jehova fana m’a fɔ ko “n’a sɔrɔ ne b’aw dɛmɛ.” Nga u y’a fɔ ko: “Aw ka fisa ni kɔnɔninw ye” ani “ne b’aw dɛmɛ.” Ni gwɛlɛya dɔ b’i kan fɔɔ i b’i yɛrɛ ɲiningara ni Jehova b’i kanu, o vɛrisew be se k’i hakili sigi. Nga o dɔrɔn tɛ, o be se k’a to i be la a la kosɔbɛ ko Jehova b’i kanu. O vɛrisew kɔnɔnakumaw basiginin lo daliluw lo kan. N’i be delili kɛ ani o kɔ ka miiri o vɛrisew kan, i bena a ye ko 1 Zan 4:16 ka kumaw ye tiɲɛn ye. A fɔra yen ko: “Ala b’an kanu cogo min na, anw kɔni b’o lɔn, ani anw lara o la.”a

8. Tuma dɔw la, n’i b’a miiri ko Jehova t’i kanu, i be se ka mun lo kɛ?

⁸ Nga n’i bele b’a miiri tuma dɔw la ko Jehova t’i kanu do? I be min miiri ani i be min lɔn, u suma ni ɲɔgɔn ye. An tɛ se ka la an dusukunnakow la. Nga Bibulu be min fɔ Jehova ka kanuya koo la, o ye tiɲɛnko lo ye. N’an lanin t’a la ko Jehova b’an kanu, o kɔrɔ ko an ɲinɛna a ka jogo jɔnjɔn dɔ lo kɔ, o min y’a ka kanuya ye.—1 Zan 4:8.

JEHOVA BE NI KANUYA MIN YE I KOO LA, MIIRI O LA

9-10. Yezu tun be kumana mun lo koo la tuma min na a y’a fɔ Zan 16:26, 27 kɔnɔ ko: “N Faa yɛrɛ fana b’aw kanu”? (jaa lajɛ fana).

⁹ Yezu ye min fɔ a ka kalandenw ye, o be se k’an dɛmɛ ka koo caaman faamu Jehova ka kanuya koo la. A ko: “N Faa yɛrɛ fana b’aw kanu.” (Zan 16:26, 27 kalan). Yezu m’o kumaw fɔ walisa k’a ka kalandenw hakili sigi dɔrɔn dɛ. Vɛrise minw be kɔn Zan 16:26, 27 ɲɛ, u b’an dɛmɛ k’a faamu ko Yezu tun tɛ kumana a ka kalandenw dusukunnakow lo la. Nga, a tun be kumana delili lo koo la.

¹⁰ Dɔɔni ka kɔn o ɲɛ, Yezu tun y’a fɔ a ka kalandenw ye ko u ka kan ka delili kɛ ale tɔgɔ la, nga u man kan ka ale lo deli (Zan 16:23, 24). A tun kɔrɔtanin lo u k’o faamu. Yezu suu kununin kɔ, n’a sɔrɔ a ka kalandenw tun bena a ɲini k’a deli. Mun na do? Sabu Yezu tun y’u teri sɔbɛ ye. O kama, u tun be se k’a miiri ko komi a b’u kanu kosɔbɛ a bena u ka delili lamɛn ani k’a ɲini a Faa fɛ a k’u dɛmɛ. Nga Yezu y’a fɔ u ye ko u man kan ka miiri o cogo la. A y’a ɲɛfɔ u ye ko: “N Faa yɛrɛ fana b’aw kanu.” O tiɲɛnko ye Bibulu ka kalan jɔnjɔn dɔ lo ye delili koo la. Miiri k’a filɛ o ɲɛsinna ele ma cogo min na. I ka bibulukalan y’i dɛmɛ ka Yezu lɔn ani k’a kanu (Zan 14:21). Nga i ko Yezu ka kalandenw saan kɛmɛkulu fɔlɔ la, i be se ka Ala deli ni hakilisigi ye sabu i b’a lɔn ko ale ‘yɛrɛ fana b’i kanu.’ Tuma o tuma i be Jehova deli, i b’a yira ko i lanin lo o kumaw na.—1 Zan 5:14.

MUN LO BE SE K’A TO AN BE SIGASIGA JEHOVA KA KANUYA KOO LA?

11. N’an be sigasiga Jehova ka kanuya koo la, mun na o bena Sutana dusu diya?

¹¹ Mun lo be se k’a to an be sigasiga Jehova ka kanuya koo la? N’a sɔrɔ an bena a fɔ ko Sutana lo b’a to an be sigasiga o koo la. Ani tiɲɛn dɔɔni b’o la. Sutana “b’a fɛ ka dɔ le minɛ k’a ɲimi” ani a bena diya a ye n’an y’a daminɛ ka sigasiga Jehova ka kanuya koo la (1 Piyɛri 5:8). Jehova b’an kanu minkɛ, a ye kunmabɔsara di an kosɔn. Nga Sutana b’a fɛ an k’a miiri ko an man kan n’o ye (Eburuw 2:9). N’an be sigasiga Jehova ka kanuya koo la, o be jɔn lo nafa? O be Sutana lo nafa. N’an ye Jehova sago kɛli dabila gwɛlɛyaw kosɔn, o bena diya jɔn lo ye? Sutana lo. A b’a fɛ an k’a miiri ko Jehova t’an kanu, k’a sɔrɔ Jehova tɛ ale yɛrɛ lo kanu. Ale lo bɔnɛna Jehova ka kanuya la. ‘Sutana ka namarako’ dɔ ye k’a kɛ an b’a miiri ko Jehova tɛ anw lo kanu ani ko a banna an na (Efɛz. 6:11). N’an y’a faamu an jugu ka laɲinita ye min ye, an bena se ka lɔ kelen kan “ka ban Sutana ma.”—Zaki 4:7.

12-13. Cogo juman na an ka dafabaliya be se k’a to an be sigasiga Jehova ka kanuya koo la?

¹² Koo wɛrɛ be se k’a to an be sigasiga Jehova ka kanuya koo la. O ye mun lo ye? O ye an ka dafabaliya lo ye (Zab. 51:7; Ɔrɔm. 5:12). Jurumu ye an n’an Danbaga ka jɛnɲɔgɔnya nagasi. A y’an hakili, an dusukun ani an farisogo fana nagasi.

¹³ Jurumu be nɔɔ jugu to an dusukunnakow kan. O b’a to an b’an yɛrɛ jalaki, an be hami, an be maloya ani an b’a ye ko an latanganin tɛ. N’an ye jurumu kɛ, an be kɛ n’o dusukunnakow ɲɔgɔn ye. An be se ka kɛ n’o dusukunnakow ye fana n’an be miiri tuma bɛɛ an ka dafabaliya koo la. Jehova tun m’an dan walisa an ka kɛ mɔgɔ dafabaliw ye (Ɔrɔm. 8:20, 21). Ni mobili pine jigira, a tɛ se ka boli ka ɲɛ. O cogo kelen na, an ka dafabaliya kosɔn, an tɛ se ka koow kɛ cogo dafanin na i ko an tun danna cogo min na a daminɛ na. A tɛ bari an na k’a ye ko tuma dɔw la, an be sigasiga Jehova ka kanuya koo la. N’o kɛra, an k’a to an hakili la ko Jehova ye ‘Masa Ala . . . ye, a ka bon, mɔgɔ ka kan ka siran a ɲa, a koo ka di mɔgɔ minw ye n’u b’a ka sariya bato, a be koɲuman kɛ [wala kanuya kantigiman yira] olu ye k’a ka layidu dafa.’—Neemi 1:5.

14. N’an be miiri kunmabɔsara koo la, o be se k’an dɛmɛ cogo di an kana a miiri ko Jehova tɛna an kanu abada? (Ɔrɔmukaw 5:8; koorilen nin fana lajɛ: “An k’an janto walisa hakɛ kana an ‘bila tulogwɛlɛya la’”).

¹⁴ N’a sɔrɔ tuma dɔw la an b’a miiri ko an man kan ni Jehova ka kanuya ye. Tiɲɛn fɔ ka di, an man kan n’o ye. Nga, o yɛrɛ lo b’a to Jehova ka kanuya ɲɔgɔn tɛ yen. A ma kɛ komi an ka kan ni Jehova ka kanuya sabu an joo lo. Nga, Jehova ye kunmabɔsara di walisa an ka se k’an ka jurumuw yafa sɔrɔ. A y’o kɛ sabu a b’an kanu (1 Zan 4:10). A to i hakili la fana ko Yezu ma na mɔgɔ dafaninw lo kisi, nga a nana walisa ka jurumukɛlaw lo kisi (Ɔrɔmukaw 5:8 kalan). An si tɛ se ka koow kɛ cogo dafanin na ani Jehova fana t’o ɲini an fɛ. An ka ɲi k’a faamu ko an ka dafabaliya be se k’a to an be sigasiga Jehova ka kanuya koo la. O la, an bena an jija kosɔbɛ walisa an ka dafabaliya kana nɔɔ jugu to an ka miiriya kan.—Ɔrɔm. 7:24, 25.

A LATIGƐ KA TO KANTIGIYA LA

15-16. N’an tora ka kantigiya kɛ Jehova ye, an be se ka la mun lo la ani mun na? (2 Samuyɛli 22:26).

¹⁵ Jehova b’a fɛ an ka desizɔn ɲuman ta. O ye ko ‘an nɔrɔnin ka to ale la.’ (Deter. 30:19, 20). N’an y’o kɛ, an be se ka la a la ko a bena to ka kantigiya kɛ an ye (2 Samuyɛli 22:26 kalan). N’an tora ka kantigiya kɛ Jehova ye, an be se ka la a la ko gwɛlɛya o gwɛlɛya mana an sɔrɔ, a bena an dɛmɛ walisa an k’o muɲu.

¹⁶ I ko an y’a ye cogo min na, gwɛlɛyaw tuma na, an be se ka lɔ kelen kan kuun caaman kosɔn. An b’a lɔn ko Jehova b’an kanu ani ko a bena an dɛmɛ. Bibulu yɛrɛ b’o lo fɔ an ye. Yala an be sigasiga Jehova ka kanuya koo la wa? N’o lo, an be tiɲɛn min lɔn Jehova koo la, an ka sinsin o kan sanni ka sinsin an dusukunnakow kan. An b’a fɛ ka la a la tuma bɛɛ ko Jehova ka kanuya kantigiman tɛ ban abada i ko Bibulu b’a fɔ cogo min na.