La a la ko Jehova b’i kanu

1. Mun na i ye i yɛrɛkun di Jehova ma? (jaa lajɛ fana).

I HAKILI b’a la tuma min na i ye i yɛrɛkun di Jehova ma wa? I y’o desizɔn ta sabu i sera ka Jehova lɔn ani a koo diyara i ye. I y’i daa di a ma ko i bena a sago kɛ i ɲɛnako fɔlɔ ye i ka ɲɛnamaya kɔnɔ ani ko i bena to k’a kanu n’i dusu bɛɛ, i niin bɛɛ, i hakili bɛɛ ani i barika bɛɛ ye (Mariki 12:30). Kabi o wagati, i ka kanuya barika tora ka bonya kosɔbɛ a koo la. O la do, i bena mun lo fɔ ni dɔ y’i ɲininga ko: “I lanin b’a la sɔbɛ la ko i be Jehova kanu wa?” I bena a fɔ hali i tɛ sigasiga ko: “N’ b’a kanu ka tɛmɛ mɔgɔ bɛɛ kan ani ka tɛmɛ fɛɛn bɛɛ kan!”

2-3. Jehova b’a fɛ an ka la mun lo la, ani an bena mun lo ye barokun nin na? (Zeremi 31:3).

² Nga i bena mun lo fɔ ni dɔ y’i ɲininga ko: “I lanin b’a la sɔbɛ la ko Jehova be ele kanu wa?” Yala i bena sigasiga k’o tigi jaabi sabu i b’a miiri ko i man kan ni Jehova ka kanuya ye wa? Balimamuso dɔ min tɔɔrɔla a denmisɛn tuma na, a y’a fɔ ko: “N’ b’a lɔn ko n’ be Jehova kanu. N’ tɛ sigasiga o la hali dɔɔni. Nga n’ be siga min na tuma caaman na, o ye ko yala Jehova be ne kanu wa?” Jehova be mun lo miiri i koo la tiɲɛn tiɲɛn na?

³ Jehova b’a fɛ i ka la a la kosɔbɛ ko a b’i kanu (Zeremi 31:3 kalan).a Ka tiɲɛn fɔ, Jehova lo ye i sama ka na ale ma. Tuma min na i y’i yɛrɛkun di a ma ani ka batize, a y’i kanu cogo kɛrɛnkɛrɛnnin na, o min ye a ka kanuya kantigiman ye. O ye kanuya barikaman ye min b’a to i b’i masiri mɔgɔ dɔ la wagati bɛɛ. O kanuya b’a to Jehova b’a sagokɛla kantigiw jati a ‘ka mɔgɔw ye, mɔgɔ minw koo ka gwɛlɛn a ma.’ A be ele jati o cogo le la (Mal. 3:17, Biblu Ala ta Kuma). Jehova b’a fɛ i ka la a la sɔbɛ la ko a b’i kanu i ko ciden Pol tun lanin b’a la cogo min na ko Jehova b’ale kanu. Pol tun lanin b’o la kosɔbɛ minkɛ, a y’a fɔ ko: “Ne jigi b’a la ko hali saya yɛrɛ, walima sijan, walima mɛlɛkɛw, walima jinaw, walima fɛɛn minw be diɲɛ na bii, walima minw bena kɛ yen sini, walima setigiw, hali fangatigi minw be sanfɛ, walima minw be dugukolo jukɔrɔ, walima danfɛn wɛrɛw, fɛɛn si te yen min be se k’an faran ka bɔ Ala ka kanuya la.” (Ɔrɔm. 8:38, 39). Barokun nin na, an bena a ye fɛɛn min kama an ka ɲi ka la a la ko Jehova b’an kanu. An bena a ye fana fɛɛn min be se k’an dɛmɛ ka la o la kosɔbɛ.

MUN NA A KƆRƆTANIN LO KOSƆBƐ AN KA LA A LA KO JEHOVA B’AN KANU?

4. Sutana b’a fɛ an ka la ngalon juman lo la, ani an be se ka ban o ngalon ma cogo di?

⁴ N’an lanin b’a la ko Jehova b’an kanu, o bena an dɛmɛ ka Sutana ka “namaraw” kɛlɛ (Efɛz. 6:11). Sutana b’a fɛ an ka Jehova sago kɛli dabila. A be koo bɛɛ kɛ walisa ka se k’o laɲinita dafa. A b’o kɛ cogo minw na, u la dɔ ye k’a kɛ an b’a miiri ko Jehova t’an kanu. Nga o ye ngalonfin lo ye. Bibulu be Sutana suma ni jara ye (1 Piyɛri 5:8, 9). Bɛgɛn minw barika man bon ani u tɛ se k’u yɛrɛ latanga, jaraw ka teli ka olu lo gwɛn. O cogo kelen na, Sutana ka teli k’an kɛlɛ tuma min na an barika ka dɔgɔ wala an sɛgɛnnin lo. A b’o kɛ fana tuma min na an dusu man di sabu gwɛlɛya dɔw y’an sɔrɔ, wala gwɛlɛya dɔw b’an kan bi, wala fana an be siranna sinikow ɲɛ (Talenw 24:10). Sutana b’a miiri ko a be se k’a kɛ an barika be dɔgɔya fɔɔ an be Jehova sago kɛli dabila. Nga an be se ka “ban Sutana,” n’a ka namarakow ma n’an b’an seko bɛɛ kɛ ka la a la kosɔbɛ ko Jehova b’an kanu.—Zaki 4:7.

5. Mun na an mako b’a la Jehova k’a yira an na ko a b’an kanu ani ko an koo ka gwɛlɛ a ma?

⁵ N’an lanin b’a la ko Jehova b’an kanu, an bena an magwɛrɛ a la kosɔbɛ. Mun na an be se k’o fɔ? Jehova y’an dan cogo dɔ la min b’a to an mako b’a la ka tɔɔw kanu ani an mako b’a la tɔɔw fana k’an kanu. Mɔgɔ min b’an kanu, an ka teli k’o tigi kanu. O la, n’an b’a ye ko Jehova b’an kanu ani ko an koo ka gwɛlɛ a ma, an fana bena a kanu kosɔbɛ (1 Zan 4:19). Ani n’an ka kanuya barika tora ka bonya a koo la, ale fana ka kanuya barika bena bonya an koo la. Bibulu b’o lo fɔ an ye ka gwɛya ko: “Aw ye gwɛrɛ Ala la, ale fana bena gwɛrɛ aw la.” (Zaki 4:8). Nga an be se ka la a la kosɔbɛ cogo di ko Jehova b’an kanu?

MUN LO BE SE K’AN DƐMƐ KA LA A LA KO JEHOVA B’AN KANU?

6. N’i lanin t’a la ko Jehova b’i kanu, i be se ka mun lo kɛ?

⁶ To ka Jehova deli walisa a k’i dɛmɛ k’a faamu fɛɛn min kama a b’i kanu (Luka 18:1; Ɔrɔm. 12:12). Jehova deli a k’i dɛmɛ i k’i yɛrɛ jati i ko ale b’i jati cogo min na. N’a sɔrɔ i mako bena kɛ a la k’o kɛ siɲɛ caaman na loon o loon. Tuma dɔw la, n’i b’i yɛrɛ jalaki, a be se ka gwɛlɛya i ma ka la a la ko Jehova b’i kanu. Nga a to i hakili la ko Jehova ka bon n’i kɔnɔnako ye (1 Zan 3:19, 20). A b’i lɔn koɲuman ka tɛmɛ i yɛrɛ kan ani a ɲɛɛ be jogo dɔw la i la, n’a sɔrɔ i yɛrɛ tɛ minw kala ma (1 Sam. 16:7; 2 Til. Kib. 6:30). O kama kana siga k’i dusukunnakow bɛɛ fɔ a ye, ani k’a deli a k’i dɛmɛ i ka la a ka kanuya la (Zab. 62:9). O kɔ, koow kɛ ka kɛɲɛ n’i ka deliliw ye i kɛtɔ ka tugu ladili nunu kɔ.

7-8. Zaburuw ka kitabu b’an hakili sigi cogo di ko Jehova b’an kanu?

⁷ La Jehova ka fɔta la. Cɛɛ minw ye Bibulu sɛbɛ, Jehova lo y’a ka hakili senu di u ma walisa u k’o kɛ. O la, an be se ka la a la ko u ye min sɛbɛ Jehova koo la o ye tiɲɛn lo ye. A filɛ Zaburu sɛbɛbaga Dawuda y’a lakali cogo ɲuman min na Jehova b’a janto an na. A ko: “Masaba be dusukasibagaw gɛrɛfɛ. A be mɔgɔ jigitigɛninw kisi.” (Zab. 34:19). N’i dusu kasinin lo, a be se ka kɛ i ɲɛɛ na ko i b’i kelen na. Nga Jehova ye layidu ta ko o wagati la, ale be i gɛrɛfɛ sabu a ɲɛɛ b’a la ko i mako gwɛlɛ b’a la o tuma le la. Zaburu wɛrɛ kɔnɔ, Dawuda y’a sɛbɛ ko: “Ne ɲɛji mara minɛn kɔnɔ.” (Zab. 56:9, Bible senuma). N’i dusu kasinin lo wala n’i be tɔɔrɔla, Jehova b’o kala ma. A b’a janto i la kosɔbɛ, ani a man di a ye k’a ye ko i be tɔɔrɔla. A kɛra i n’a fɔ Jehova b’i ɲɛji mara minan dɔ kɔnɔ ani a b’a jati fɛɛn nafamanba ye. O be i n’a fɔ tagamakɛla min be kongokolon kɔnɔ ale ka jiforoko koo ka gwɛlɛ a ma cogo min na. A fɔra Zaburuw 139:3 kɔnɔ ko: “I be n ka kɛtaw bɛɛ kala ma.” Jehova ɲɛɛ b’i ka kɛtaw bɛɛ la, nga i be koo ɲuman minw kɛ, a b’a janto o lo la (Eburuw 6:10). Mun na do? Sabu i be jijali minw bɛɛ kɛra walisa k’i koo diya a ye, o ka di a ye kosɔbɛ.b

⁸ Jehova y’a kɛ u y’o dususalo kumaw sɛbɛ Bibulu kɔnɔ minkɛ, a be komi a b’a fɔra le ko: “N’ b’a fɛ i k’a lɔn i koo ka di n’ ye ani n’ be n’ janto i la fɔɔ ka se hakɛ min na.” Nga i ko an y’a fɔ ka tɛmɛ cogo min na, Sutana be to k’a kɛ i b’a miiri ko Jehova t’i kanu. O la n’i be sigasiga tuma dɔw la ko Jehova t’i kanu, i hakili sigi ani k’i yɛrɛ ɲininga ko: ‘N’ bena la jɔn lo la? “Galon faa” walima “Ala tiɲɛtigi”?’— Zan 8:44; Zab. 31:6.

9. Minw be Jehova kanu, a b’u hakili sigi cogo di? (Ɛkizɔdi 20:5, 6).

⁹ Minw be Jehova kanu, a be min kɛ olu ye, miiri o la. A filɛ Jehova ye min fɔ Musa ni Israɛldenw ye (Ɛkizɔdi 20:5, 6 kalan). Jehova ye layidu ta ko minw b’ale kanu, a bena to k’a ka kanuya kantigiman yira olu la. O kumaw b’an dɛmɛ k’a faamu ko ni an ka Ala kantigi batobagaw y’a yira a la ko u b’a kanu, ale fana bena a yira u la ko a b’u kanu (Neemi 1:5). O la, n’i y’a daminɛ k’a miiri ko Jehova t’i kanu, i lɔ dɔɔni ani i yɛrɛ ɲininga ko: “Yala ne be Jehova kanu wa?” O kɔ, miiri nin na: N’i b’a kanu ani n’i b’i seko bɛɛ kɛra walisa k’i koo diya a ye, i k’a lɔn ko ale fana b’i kanu n’a dusu bɛɛ ye siga si t’o la (Dan. 9:4; 1 Kor. 8:3). N’i lanin b’a la ko i be Jehova kanu, mun na i be siga ko ale t’i kanu do? A b’i kanu ani a tɛna i to yen abada siga si t’o la.

10-11. Jehova b’a fɛ i ka kunmabɔsara jati cogo di? (Galatikaw 2:20).

¹⁰ Miiri kunmabɔsara koo la. Yezu Krista ka kunmabɔsara ye Jehova ka nilifɛnw bɛɛ la fisaman lo ye, a ye min di adamadenw kosɔn (Zan 3:16). Nga yala a y’o nilifɛn di ele fana kosɔn wa? Ɔnhɔn! Ciden Pol ka koo lajɛ. I hakili jigi ko sanni a ka kɛ kerecɛn ye, a tun ye jurumuba dɔw kɛ ani a tun ka ɲi ka bondori kɛ n’a ka dafabaliyakow ye (Ɔrɔm. 7:24, 25; 1 Tim. 1:12-14). O bɛɛ n’a ta, a sera ka kunmabɔsara jati i ko nilifɛn dɔ Jehova ye min di ale fana kosɔn (Galatikaw 2:20 kalan). Kana ɲinɛ ko Jehova lo ye hakili senu di Pol ma walisa a k’o kumaw sɛbɛ. Ani kuma o kuma be sɔrɔ Bibulu kɔnɔ, o sɛbɛra walisa ka hakili lo di an ma (Ɔrɔm. 15:4). Pol ka kumaw b’a yira Jehova b’a fɛ ele ka kunmabɔsara jati cogo min na: o ye nilifɛn lo ye a ye min di e fana kosɔn. N’i sera ka kunmabɔsara jati o cogo la, o bena i dɛmɛ ka la a la kosɔbɛ ko Jehova b’i kanu.

¹¹ An be Jehova fo sabu a ye Yezu ci ka na dugukolo kan walisa ka sa an kosɔn. Nga kuun wɛrɛ min kosɔn Yezu nana dugukolo kan, o ye ka tiɲɛn fɔ mɔgɔw ye Ala koo la (Zan 18:37). O tiɲɛn dɔ ye k’a yira Jehova be min miiri a deenw koo la.

YEZU B’AN DƐMƐ COGO DI KA LA A LA KO JEHOVA B’AN KANU?

12. Yezu ye min fɔ Jehova koo la, mun na an be se ka la o la?

¹² Tuma min Yezu tun be dugukolo kan, a tun ka di a ye k’a yira mɔgɔw la Jehova ye Ala sugu min ye (Luka 10:22). A ye min fɔ a Faa koo la, an be se ka la o la. Mun na do? Sabu Yezu ye saan miliyari caaman kɛ ni Jehova ye sankolo la ka sɔrɔ ka na dugukolo kan (Kɔlɔs. 1:15). A tun b’a lɔn Jehova b’a deen kantigiw kanu fɔɔ ka se hakɛ min na sabu ale yɛrɛ y’o kanuya seere ye. Yezu ye tɔɔw dɛmɛ cogo di u ka la a la ko Ala b’u kanu?

13. Yezu b’a fɛ an ka Jehova jati cogo di?

¹³ Yezu b’a fɛ an ka Jehova jati i ko ale b’a jati cogo min na. Evanziliw kɔnɔ, a ye Jehova weele ko “Faa” siɲɛ 160 ni kɔ. Ani n’a tun be Jehova kofɔ a ka kalandenw ye a tun b’a fɔ ko “aw Faa” wala “aw sankolo la Faa.” (Mat. 5:16; 6:26). Kunnafoni dɔ be sɔrɔ Matiyo 5:16 yɔrɔ la Bible d’étude kɔnɔ. A fɔra yen ko: “Galen, Jehova sagokɛlaw tun b’a weele ni bonya tɔgɔ caaman ye i n’a fɔ ‘Setigi,’ ‘Fɛɛn bɛɛ kuntigi,’ ani ‘Danbaga.’ Nga Yezu tun ka teli ka Jehova weele ni bonya tɔgɔ nɔgɔman dɔ ye mɔgɔ caaman tun be min fɔ. A tun b’a weele ko ‘Faa,’ k’a yira ko jɛnɲɔgɔnya kɛrɛnkɛrɛnnin be Jehova n’a sagokɛlaw cɛ.” Tiɲɛn na, Yezu b’a fɛ an ka Jehova jati i ko ale b’a jati cogo min na. A b’a fɛ an k’a jati an Faa kanutigi ye, min deenw koo ka gwɛlɛ a ma. An ka koo fila lajɛ minw na Yezu ye Jehova weele ko “Faa.”

14. Yezu y’a yira cogo di ko an kelen kelen bɛɛ koo ka gwɛlɛ an sankolola Faa ma? (Matiyo 10:29-31; jaa lajɛ fana).

¹⁴ A fɔlɔ, Yezu ye min fɔ Matiyo 10:29-31 kɔnɔ, an k’o lajɛ (o vɛrisew kalan). Yezu y’a yira ko kɔnɔnin dennin kelen kelen bɛɛ mana kɛ yɔrɔ o yɔrɔ, an Faa b’o lɔn tigitigi. Nga kɔnɔnin tɛ Jehova kanu, a t’a bato fana. Ni Jehova b’a janto o kɔnɔnin denninw na ten, an be se ka la a la ko an minw b’a kanu ani an b’a bato, a b’a janto an kelen kelen bɛɛ la kosɔbɛ! A fɔra vɛrise 30nan na ko: “Hali aw kunsigi yɛrɛ, Ala b’o bɛɛ daa lɔn.” Bible d’étude kɔnɔ, kunnafoni dɔ ɲɛsinna o kuma ma. A fɔra yen ko: “Jehova b’o koo den-denninw lɔn koɲuman minkɛ, o b’a yira ko a b’a janto Krista ka kalanden kelen kelen bɛɛ la.” Tiɲɛn na, Yezu b’a fɛ an ka la a la ko an kelen kelen bɛɛ koo ka gwɛlɛ an sankolola Faa ma.

15. Yezu ye min fɔ Zan 6:44 na, o be mun lo yira i la i sankolola Faa koo la?

¹⁵ An ka koo filanan lajɛ min na Yezu ye Jehova weele ko “Faa.” (Zan 6:44 kalan). I sankolola Faa ye ele sama ka na tiɲɛn sira kan. Mun na a y’o kɛ? Sabu a y’a ye ko i dusukun ka ɲi (Kɛw. 13:48). Tuma min na Yezu ye Zan 6:44 kɔnɔkumaw fɔ, n’a sɔrɔ a tun be miirila Zeremi 31:3 ka kumaw le la. O yɔrɔ la, Jehova y’a fɔ a ka jama ye ko: “Ne y’i sama ka na ne ma n’ ka kanuya kantigiman barika la.” (Zer. 31:3, NW; Oze 11:4). Miiri k’a filɛ o kumaw kɔrɔ ye min ye. An sankolola Faa kanutigi be to k’i jogo ɲumanw lo filɛ n’a sɔrɔ i yɛrɛ tɛ minw kala ma.

16. a) Yezu y’an kalan mun lo la, ani mun na an ka ɲi ka la a la? b) An be se ka mun lo kɛ walisa ka la a la kosɔbɛ ko Jehova ye Faa ɲuman ye an mako be min na? (koorilen nin lajɛ: “Faa ɲuman, an bɛɛ mako be min na”).

¹⁶ Yezu kɛtɔ k’a yira ko Jehova ye an Faa ye, a be komi a tun b’a fɔra le ko: “Jehova tɛ ne dɔrɔn Faa ye, a ye aw fana Faa ye. Aw ye la a la ko a b’aw kanu ani ko a b’a janto kosɔbɛ aw kelen kelen bɛɛ la.” O la, ni tuma dɔw la i be sigasigara ko Jehova t’i kanu, i lɔ dɔɔni ani i yɛrɛ ɲininga ko: “Dencɛ min be an Faa lɔn koɲuman ani a be tiɲɛn fɔ tuma bɛɛ, a man fisa n’ ka la ale ka kumaw na wa?”—1 Piyɛri 2:22.

I SEKO KƐ WALISA KA LA A LA KO JEHOVA B’I KANU

17. Mun na an ka ɲi ka to k’an seko kɛ walisa ka la a la ko Jehova b’an kanu?

¹⁷ An ka ɲi ka to k’an seko kɛ walisa ka la a la ko Jehova b’an kanu. I ko an y’a ye ka tɛmɛ cogo min na, an jugu nanbaramɔgɔ Sutana bena koo bɛɛ kɛ walisa k’an lasun ka Jehova sago kɛli dabila. A b’a fɛ k’an fari faga minkɛ, a bena to k’a ɲini k’an lasun an k’a miiri ko Jehova t’an kanu. An ma ɲi k’a to Sutana ka se an kɔrɔ!—Zɔbu 27:5.

18. I be se ka mun lo kɛ walisa ka la a la kosɔbɛ ko Jehova b’i kanu?

¹⁸ Walisa ka la a la kosɔbɛ ko Jehova b’i kanu, to k’a deli a k’i dɛmɛ i k’i yɛrɛ jati i ko ale b’i jati cogo min na. Bibulu sɛbɛbagaw ye Jehova ka kanuya koo lakali cogo min na hakili senu barika la, miiri o la kosɔbɛ. Jehova be min kɛ ni dɔ y’a yira ko a b’a kanu, miiri o fana na. A tɛna ban fewu k’a ka kanuya yira a kanubaga la. Kana ɲinɛ ko Jehova ye kunmabɔsara di ele fana kosɔn. La a la ko Jehova ye ele sankolola Faa ye i ko Yezu y’a fɔ cogo min na. O la, ni mɔgɔ dɔ y’i ɲininga ko “yala i lanin b’a la tiɲɛn na ko Jehova b’i kanu wa?” i bena se k’a fɔ hali i tɛ sigasiga ko: “Ɔnhɔn, n’ lanin b’o la! Loon o loon n’ be n’ seko bɛɛ kɛ walisa k’a yira a la ko n’ b’a kanu.”