Marifaci lakɔlisow la: Bibulu be mun lo fɔ o koo la?

Saan 2022, mɛkalo tile 24nan na, gwɛrɛgwɛrɛko dɔ cunna Uvalde dugu kan, Texas mara la Etazini. Zurunali New York Times ka fɔta la, “cɛɛ dɔ ye denmisɛn 19 ani kalanfa 2 faga . . . Robb lakɔliso la.”

A fɔ man di, nka o koo ɲɔgɔn siɲɛ fɔlɔ tɛ. Zurunali USA Today ka fɔta la, Etazini jamana dɔrɔn na, “marifaci kɛra lakɔlisow la siɲɛ 249 salon dɔrɔn. O hakɛ tɛmɛna saan tɔɔw ta kan kabi saan 1970.”

Mun na o kojugubaw ɲɔgɔn be kɛ? An be se k’o koo jugu muɲu cogo di? Yala fariyakow bena ban loon dɔ la wa? O jaabiliw be sɔrɔ Bibulu kɔnɔ.

Mun na duniɲa be juguyara ka taga ten?

• An be wagati min na, Bibulu b’a fɔ k’o ye “laban tuma” lo ye, ani k’o wagati la mɔgɔw bena kɛ “mɔgɔ farimanw” ye, “makari tena sɔrɔ u la.” O lo y’a to u be koow kɛ i ko kongosogow. Bibulu b’a fɔ k’o ɲɔgɔnna mɔgɔw “bena juguya ka taga ɲa.” (2 Timote 3:1-5, 13). N’i be kunnafoni wɛrɛw fɛ o koo la, barokun nin lajɛ faransɛkan na: “La Bible a-​t-​elle prédit la mentalité et la conduite des gens de notre époque ?”

Mɔgɔ caaman b’u yɛrɛ ɲininga ko: “Mun na Ala b’a to gwɛrɛgwɛrɛkow ka kɛ, i n’a fɔ marifaci minw be kɛ lakɔlisow la?” N’i b’a fɛ k’a lɔn Bibulu be min fɔ o koo la, barokun nin lajɛ faransɛkan na: “Pourquoi les innocents souffrent-ils ?”

An be se k’o juguya ɲɔgɔn muɲu cogo di?

• “Koo minw bɛɛ tun fɔra Ala ka kuma na kabini fɔlɔfɔlɔ, o fɔra ka hakili d’an ma, janko an jaa ka gwɛlɛya ani ka muɲu, ka jigi sɔrɔ o barika la.”—Ɔrɔmukaw 15:4.

Bibulu ka ladiliw be se k’an dɛmɛ an kana an fari faga duniɲa fariman nin na. Kunnafoni wɛrɛw be sɔrɔ barokun nin na: “La violence cessera-t-elle un jour ?” O barokun be sɔrɔ zurunali Réveillez-vous ! kɔnɔ.

Denmisɛnw be jatigɛko minw kuma mɛn, u bangebagaw be se k’u dɛmɛ cogo di walisa u hakili kana ɲagami? Ladili dɔw be sɔrɔ o koo la barokun nin na: “Enfants et actualités troublantes.”

Fariyakow bena ban loon dɔ la wa?

• “A bena u tanga benkannikɛlaw, ni mɔgɔ farimanw ma.”—Zaburuw 72:14.

• “U bena u ka murujanw bugɔ k’u kɛ dabaw ye, u bena u ka tamanw kɛ wɔrɔsɔw ye. Jamanaw tena murujanw ta ɲɔgɔnw kama tugu. Mɔgɔw tena kɛlɛ kɛcogo dege tugu.”—Mise 4:3.

Adamadenw dɛsɛra ka min ɲɛnabɔ, Ala bena o ɲɛnabɔ. A bena tɛmɛ a ka Masaya fɛ, o min ye sankolola gofɛrɛnɛman ye, ka kɛlɛkɛminanw bɛɛ halaki ani ka fariyakow bɛɛ ban. Ala ka Masaya bena min kɛ, n’i be kunnafoni wɛrɛw fɛ o koo la, barokun nin kalan: “Sous le royaume de Dieu, ‘la paix abondera.’”