Fariyako minw be kɛ ni marifa ye duniɲa kuru bɛɛ kɔnɔ: Bibulu be mun lo fɔ o koo la?

Saan 2022 zuwekalo la, marifa fariyako caaman kɛra duniɲa kuru bɛɛ kɔnɔ:

• “Politiki ɲɛmɔgɔba min tɔgɔ bɔra kosɔbɛ Zapɔn jamana na [a tɔgɔ ko Shinzo Abe, minisiriw ɲɛmɔgɔ kɔrɔ dɔ tun lo], ale fagako y’o jamana mɔgɔw dusu kasi fɔɔ ka se duniɲa kuru bɛɛ kɔnɔ sabu fagarikow man teli ka kɛ Zapɔn jamana na ani fana u ye sariya gwɛlɛw sigi marifaw koo la.” (The Japan Times, saan 2022, zuwekalo tile 10.)

• “Danemarki jamana mɔgɔw fana dusu kasira kosɔbɛ tuma min na kojugukɛla dɔ ye mɔgɔ saba ci k’u faga Kopenagi dugu jagokɛyɔrɔ dɔ la.” (Reuters, saan 2022, zuwekalo tile 4.)

• “Afirikidisidi: Kojugukɛla dɔw ye marifa ci bari dɔ kɔnɔ Soweto dugu la ka mɔgɔ 15 faga.” (The Guardian, saan 2022, zuwekalo tile 10.)

• “Etazini jamana na, u ye mɔgɔ 220 ni kɔ ci ni marifa ye k’u faga zuwekalo tile 4 ka wikɛni na.” (CBS News, saan 2022, zuwekalo tile 5.)

Yala o fariyakow ɲɔgɔn bena ban loon dɔ wa? Bibulu be mun lo fɔ o koo la?

Fariyakow bena ban

Bibulu b’a fɔ ko an be “laban tuma” lo la. O ye wagati ye o min na mɔgɔw bena juguya ani ka fariya kojugu (2 Timote 3:1, 3). O fariyakow be siranya bila mɔgɔw la (Luka 21:11). Nka, Bibulu b’a fɔ ko fariyakow bena ban loon dɔ ani ko “mɔgɔw bena sigi hɛrɛyɔrɔ la, yɔrɔ sutaranin la, lafiɲɛyɔrɔ, yɔrɔ malanin la.” (Ezayi 32:18). Fariyakow bena ban cogo di do?

Ala bena mɔgɔ juguw bɛɛ halaki ani ka kɛlɛkɛminanw bɛɛ halaki.

• “Nga mɔgɔjuguw bena halaki ka ban dugukolo kan.”—Talenw 2:22.

• “[Ala] bɛ kɛlɛ ban fo ka taa se dugukolo dan na, ka bɔnnikɛ kala ni tama kari, ka kɛlɛkɛ wotorow jeni ni tasuma ye.”—Zaburuw 46:9, Bible senuma.

Walisa ka fariyakow jujɔn ban pewu, Ala bena mɔgɔw kalan u ka sigi hɛɛrɛ la ɲɔgɔn fɛ.

• “Cɛnni tena kɛ, halakili tena kɛ tugu Masaba ka kulu senuman yɔrɔ bɛɛ la. Bari Masaba lɔnni bena yɔrɔ bɛɛ fa i ko jii be baa fa cogo min na.”—Ezayi 11:9.

• Hali sisan yɛrɛ, Ala be mɔgɔw kalanna duniɲa kuru bɛɛ kɔnɔ u ka kɛlɛ dabila, u ka kɛlɛkɛminanw bila ani k’u ka “murujanjanw bugɔ k’u kɛ dabaw ye, u bena u ka tamanw kɛ wɔrɔsɔw ye.”—Mise 4:3.

Bibulu b’a fɔ ko siranya tɛna mɔgɔ si minɛ duniɲa kuru bɛɛ kɔnɔ. Walisa ka dɔ lɔn o koo la, barokun nin kalan: “Affranchis de la peur : est-​ce possible?”

Fariyakow bena ban pewu. Walisa ka dɔ lɔn o koo la, barokun nin kalan: “Enfin la paix sur la terre!”