Dugukolo be nagasira ka taga: Bibulu be mun lo fɔ o koo la?

“Balawokobaw le be kɛra yan dugukolo kan, ani o be juguyara le ka taga. Duguba caaman be jii kɔnɔ. Funteni ka fari. Sanfɔɲɔbaw be tiɲɛni kɛra yɔrɔ bɛɛ. Jii koo be yɔrɔ bɛɛ. Bɛgɛnw ni falenfɛn siya caaman be tununa. O tɛ nsiirin ye wala o tɛ damatɛmɛko ye. Ka kɛɲɛ ni lɔnnikɛlaw ka fɔtaw ye, o koow ye adamadenw ka dugukolo baaracogo nɔfɛkow lo ye.” (O ye Nasiyɔn Zini ka sekeretɛri zeneral António Guterres ka kumaw ye. A y’o fɔ saan 2022 awirilikalo tile 4, tuma min na gofɛrɛnɛman ɲɛmɔgɔw ye ɲɔgɔn lajɛn walisa ka kuma dugukolo tiɲɛnko koo la.)

“Lɔnnikɛlaw ye lasɔmini kɛ ko saan nataw la, tiɲɛni ka teli ka kɛ yɔrɔ cogoya yɛlɛmako kosɔn fɔɔ ka se [Etazini] zaradɛn kɛmɛ naani ni mugan ni saba ɲɔgɔn na, k’a ma sɔrɔ funteni ka jugu kosɔbɛ o yɔrɔw ma. O faratikow be i na fɔ siranyako minw kofɔra Bibulu kɔnɔ: tasuma ni sanjibaw, glasiw yelenko, kɔgɔjiw kariko ani funteni farimanw.” (O lo fɔra zurunali The New York Times kɔnɔ, saan 2022 zuwɛnkalo tile 15.)

Dugukolo nagasiko be nana ni gwɛlɛya minw ye, o be se ka ɲɛnabɔ wa? N’o be se, jɔn lo bena o ɲɛnabɔ? A filɛ Bibulu be min fɔ o koo la.

Bibulu tun kɔnna ka kuma dugukolo tiɲɛnko koo la

Bibulu b’a fɔ ko Ala bena “dugukolo tiɲɛbaaw halaki.” (Yirali 11:18, Bible senuma). O vɛrise b’an dɛmɛ ka koo saba faamu:

1. 1. Adamadenw ka kɛwalew bena dugukolo nagasi kojugu.

2. 2. Dugukolo nagasiko bena ban loon dɔ.

3. 3. Ala kelenpe lo bena daan sigi dugukolo nagasiko kan, adamadenw tɛ.

Ala tɛna a to mɔgɔw be dugukolo halaki pewu

Bibulu b’a fɔ ko “dugukolo be to a nɔɔ na tuma bɛɛ.” (Waajulikɛla 1:4). Mɔgɔw bena sigi dugukolo kan tuma bɛɛ.

• “Mɔgɔtilenninw le bena jamana nin tigiya kɛ, u bena to yen kudayi.”—Zaburuw 37:29.

Ala bena dugukolo lalaga kokura.

• “Nisɔndiya ka sɔrɔ kongokolon la ni dugukolo janin kan. Ɲanagwɛ ka kɛ dugukolo lakolon kan, feeren ka bɔ yen.”—Ezayi 35:1.