Mɔgɔ saninw be min?

1-3. Mɔgɔw be ɲiningali jumanw lo kɛ saya koo la, ani diinan dɔw b’o ɲiningaliw jaabi cogo di?

BIBULU b’a fɔ ko loon dɔ, ‘saya tɛna kɛ yen tugun.’ (Yirali 21:4). An y’a ye kalansen 5nan na ko an be se ka ɲɛnamaya banbali sɔrɔ kunmabɔsara sababu fɛ. Nka, mɔgɔw bele be sa (Waajulikɛla 9:5). O kama, an ka teli k’an yɛrɛ ɲininga ko: N’an sara, an be kɛ cogo di?

² N’an ka mɔgɔ sɔbɛ dɔ sara, an b’a fɛ k’o ɲiningali ka jaabili lɔn. N’a sɔrɔ an b’an yɛrɛ ɲininga ko: ‘A tigi tagara min? A ɲɛɛ b’an na wa? Yala a be se k’an dɛmɛ wa? An bena a ye tugun wa?’

³ Diinanw b’o ɲiningaliw jaabi cogo caaman na. Dɔw b’a fɔ ko n’i kɛra mɔgɔ ɲuman ye, i bena taga sankolo la. Nka, n’i kɛra mɔgɔ jugu ye, i bena jɛni jahanama na. Dɔ wɛrɛw b’a fɔ ko n’i sara, i be taga sukɔrɔw fɛ. Dɔw b’a fɔ fana ko mɔgɔ sanin kɔ, a be segi ka wolo ka kɛ mɔgɔ wɛrɛ ye.

4. Diinanw fanba be mun lo fɔ saya koo la?

⁴ Diinanw ka kalanw tɛ kelen ye hali dɔɔni. Nka o kalanw fanba basiginin be miiriya jɔnjɔn kelen lo kan . U b’a fɔ ko ni mɔgɔ sara, fɛɛn dɔ be bɔ a tigi la ka to niin na. O ye tiɲɛn ye wa?

MƆGƆ SANINW BE MIN?

5, 6. N’an sara, an be kɛ cogo di?

⁵ N’an sara, Jehova b’a lɔn an be kɛ cogo min na. O kama, a y’a fɔ an ye ko ni mɔgɔ sara, a niin be ban. Ni mɔgɔ sara, a tɛ foyi kala ma, a ka miiriyaw be ban.a Mɔgɔ saninw tɛ yeli kɛ, u tɛ mɛnni kɛ ani u tɛ miiri tugun.

⁶ Masacɛ Solomani y’a fɔ ko “minw sara ka ban, olu te foyi lɔnna tugu.” Mɔgɔ saninw tɛ se k’an kanu wala k’an kɔniya. “Baarako, ni jatiminɛ, ni lɔnniya, ani hakilitigiya te” kaburu kɔnɔ (Waajulikɛla 9:5, 6, 10 kalan). Bibulu b’a fɔ fana ko ni mɔgɔ sara, “a ka miirili kow bɛ ban.”—Zaburuw 146:4, ABM.

YEZU YE MIN FƆ SAYA KOO LA

7. Yezu ye mun lo fɔ saya koo la?

⁷ Tuma min na a tericɛ sɔbɛ Lazari sara, Yezu y’a fɔ a ka kalandenw ye ko: “An ka tericɛ Lazari be sinɔgɔra.” Nka Yezu tun t’a fɛ k’a fɔ ko Lazari be sinɔgɔra yɛrɛ yɛrɛ la. A y’a ɲɛfɔ ko: “Lazari sara.” (Zan 11:11-14). O cogo la, Yezu y’a yira ko saya be komi sinɔgɔ. A m’a fɔ ko Lazari tagara sankolo la, wala ko a be sukɔrɔw fɛ. A m’a fɔ fana ko Lazari be tɔɔrɔla jahanama na. A fana m’a fɔ ko Lazari wolola kokura ka kɛ mɔgɔ wɛrɛ ye. Lazari tun be komi mɔgɔ min be sinɔgɔba la. Loon wɛrɛ la tugun, Yezu y’a yira ko saya be komi sinɔgɔ. Tuma min na a tun bena Zayirus denmuso lakunu, a y’a fɔ ko: “Sungurunin ma sa, nga a be sinɔgɔra le.”—Luka 8:52.

8. An b’a lɔn cogo di ko Ala tun t’a fɛ adamadenw ka sa?

⁸ Yala Ala ye Adama ni Awa dan walisa u ka laban ka sa wa? Ayi! Jehova y’u dan walisa u ka to kɛnɛya dafanin na fɔɔ abada. Jehova ye adamadenw dan ka ɲɛnamaya banbali miiriya don u kuun na (Waajulikɛla 3:11). A man di bangebagaw ye k’a ye k’u deenw be bana ani u be sa. A man di Jehova fana ye k’a ye ko an be bana ani an be sa. Nka, ni Ala y’an dan walisa an ka ɲɛnamaya kɛ fɔɔ abada, mun na an do be sa?

MUN NA ADAMADENW BE SA?

9. Jehova ye cikan min di Adama ni Awa ma, mun na o tun bɛnnin lo?

⁹ Edɛn nankɔ kɔnɔ, Jehova y’a fɔ Adama ye ko: “I be se ka yɔrɔ nin yiriw bɛɛ deen dumu fɔɔ yiri kelen dama, min b’a to mɔgɔ be koɲuman ni kojugu lɔn ka bɔ ɲɔgɔn na. N’i y’o deen dumu loon min na, i bena sa, siga t’a la.” (Zɛnɛzi 2:9, 16, 17). O cikan tun gwɛnin lo ani a tun man gwɛlɛ. Min ka ɲi ani min man ɲi, joo tun be Jehova lo fɛ k’o fɔ Adama ni Awa ye. U kɛtɔ ka mɛnni kɛ Jehova fɛ, u tun bena a yira ko u b’a ka kuntigiya bonya. U tun bena a yira fana ko a ye fɛɛn minw bɛɛ di u ma, u b’a waleɲuman lɔn kosɔbɛ o kosɔn.

10, 11. a) Sutana ye Adama ni Awa lafili cogo di? b) Mun na joo sɔrɔ sababu tun tɛ Adama ni Awa fɛ?

¹⁰ A fɔ man di, nka Adama ni Awa y’a latigɛ ka Jehova kaan bila. Sutana y’a fɔ Awa ye ko: “Tiɲɛ na, Ala y’a fɔ ko aw kana yɔrɔ nin yiriw si deen dumu wa?” Awa y’a jaabi ko: “An be se ka yɔrɔ nin yiriw deen dumu. Nga yiri min be yɔrɔ nin cɛmancɛ la, Ala ko an kana ale deenw dumu, ko an kana maga a la. Ko n’o tɛ, an bena sa.”—Zɛnɛzi 3:1-3.

¹¹ Sutana y’a fɔ ko: “Aw tena sa. Ala y’a lɔn ko ni aw y’o yiri nin deen dumu loon min na, aw ɲaa bena yɛlɛ, aw bena kɛ i n’a fɔ ale, ka koɲuman ni kojugu lɔn.” (Zɛnɛzi 3:4-6). Sutana tun b’a fɛ Awa k’a miiri ko min ka ɲi ani min man ɲi, a be se k’o latigɛ a yɛrɛ ma. Sutana ye ngalon tigɛ fana Awa ye ko a tɛna sa n’a banna ka mɛnni kɛ Ala fɛ. O kama, Awa ye yiriden dumu. O kɔ, a ye dɔ di a cɛɛ ma. U tun b’a lɔn ko Jehova tun ko u kana o yiriden dumu. Nka u ye tugubanciya kɛ ka ban Ala ka cikan na. O cikan do tun gwɛnin lo ani a tun man gwɛlɛ. O cogo la, u ma bonya la u Faa kanutigi Jehova kan. U ye min kɛ, joo sɔrɔ sababu tun tɛ u fɛ cogo si la.

12. Mun na Adama ni Awa ka murutili ye dusukasiko ye?

¹² An faa Adama n’an baa Awa ma bonya la u Danbaga kan. O ye dusukasiko ye dɛ! Miiri k’a filɛ: I b’i jija ka deen dɔ lamɔ ka ɲɛ. Nka kɔfɛ, a be muruti i bolo. I ko a ka min kɛ, a be ban o la ani a be koo wɛrɛ kɛ. O bena mun lo kɛ i la do? O tɛna i dusu kasi wa?

13. Jehova y’a fɔ Adama ye ko: “I bena kɔsegi buguri la.” O kɔrɔ ko di?

¹³ Adama ni Awa ka murutili kosɔn, u bɔnɛna ɲɛnamaya banbali jigiya la. Jehova tun y’a fɔ Adama ye ko: “I ye buguri ye, i bena kɔsegi buguri la.” (Zɛnɛzi 3:19 kalan). O kɔrɔ ko Adama tun bena kɔsegi ka kɛ buguri ye i n’a fɔ a ma dan ka ye (Zɛnɛzi 2:7). Adama ka jurumu kɛnin kɔ, a sara ani a ta banna pewu.

14. Mun na an be sa?

¹⁴ Ni Adama ni Awa tun ye mɛnni kɛ Ala fɛ, u tun bena kɛ niin na hali bi. Nka komi u ma mɛnni kɛ Ala fɛ, u ye jurumu kɛ ani u labanna ka sa. Jurumu be se ka suma ni bana jugu ye an ye min sɔrɔ an faa Adama n’an baa Awa fɛ. An bɛɛ jurumutɔ lo wolola. O lo kama an be sa (Ɔrɔmukaw 5:12). Nka Ala tun ma o lo latigɛ adamadenw ye. A tun t’a fɛ abada adamadenw ka sa. Bibulu yɛrɛ b’a fɔ ko saya ye an “jugu” ye.—1 Korɛntikaw 15:26.

KA TIƝƐN LƆN, O B’AN HƆƆRƆNYA

15. N’an ye tiɲɛn lɔn saya koo la, o b’an hɔɔrɔnya cogo di?

¹⁵ N’an ye tiɲɛn lɔn saya koo la, o b’an hɔɔrɔnya ka bɔ ngalon miiriya caaman na. Bibulu b’a fɔ ko tɔɔrɔ ni dusukasi foyi tɛ mɔgɔ saninw kan. An tɛ se ka kuma n’u ye, u fana tɛ se ka kuma n’an ye. An tɛ se k’u dɛmɛ ani u fana tɛ se k’an dɛmɛ. Kuun t’a la an ka siran u ɲɛ sabu u tɛ se ka koo jugu kɛ an na. Nka diinan caaman b’a fɔ ko mɔgɔ saninw be ɲɛnamaya la yɔrɔ wɛrɛ. U b’a fɔ fana ko an be se k’u dɛmɛ n’an ye wari di diinan kuntigiw ma walisa u ka duga kɛ u ye. Nka n’an ye tiɲɛn lɔn saya koo la, o ngalon kumaw tɛ se k’an lafili.

16. Diinan caaman be ngalon juman lo fɔ mɔgɔ saninw koo la?

¹⁶ Sutana be tɛmɛ ngalon diinanw fɛ k’a to an k’a miiri ko mɔgɔ saninw bele be niin na. Ɲɛyirali fɛ, diinan dɔw b’a fɔ ko ni mɔgɔ sara, fɛɛn dɔ be bɔ a tigi la ka to niin na yɔrɔ wɛrɛ. I ka diinan b’o lo fɔ i ye wa? Walima, a b’i dɛmɛ ka Bibulu ka kalan lɔn mɔgɔ saninw koo la wa? Sutana be tɛmɛ ngalon fɛ ka mɔgɔw mabɔ Jehova la.

17. K’a fɔ ko Ala be mɔgɔ jɛni jahanama na, mun na o be Ala tɔgɔ tiɲɛ?

¹⁷ Diinan caaman ka kalanw be mɔgɔ kɔnɔ gwan. Ɲɛyirali fɛ, u dɔw b’a fɔ ko Ala bena mɔgɔ juguw jɛni kudayi jahanama na. O ngalon kuma be Jehova tɔgɔ tiɲɛ. A tɛ se k’a to mɔgɔ ka tɔɔrɔ o cogo la abada! (1 Zan 4:8 kalan). Ni mɔgɔ dɔ b’a deen bolo jɛni tasuma na walisa k’a ɲangi, i bena mun lo miiri o tigi koo la? Ko a ka fari dɛ! I yɛrɛ t’a fɛ k’o tigi koo mɛn. Sutana b’a fɛ an k’a miiri ko Jehova be ten.

18. Mun na an man kan ka siran mɔgɔ saninw ɲɛ?

¹⁸ Diinan dɔw b’a fɔ ko ni mɔgɔ sara, a tigi be taga sankolo la. U b’a fɔ ko mɔgɔ saninw be se k’an dɛmɛ wala k’an mako sa pewu. O kama, an ka kan k’u bonya ani ka siran u ɲɛ yɛrɛ. Mɔgɔ caaman lanin b’o ngalon kuma na. U be siran mɔgɔ saninw ɲɛ. O kama, sanni u ka Jehova bato, u be mɔgɔ saninw lo bato. Kana ɲinɛ ko mɔgɔ saninw tɛ se ka miiri ani u tɛ foyi kala ma. O kama, kuun t’a la an ka siran u ɲɛ. Jehova lo ye an Danbaga ye. Ale lo ye tiɲɛn Ala ye. An ka kan k’ale kelenpe lo bato.—Yirali 4:11.

19. N’an ye tiɲɛn lɔn saya koo la, o b’an nafa cogo di?

¹⁹ N’an ye tiɲɛn lɔn saya koo la, o b’an hɔɔrɔnya ka bɔ ngalon kalanw na. O b’an dɛmɛ ka Jehova ka layidu kabakomanw faamu minw ɲɛsinna an ka ɲɛnamaya n’an ka siniɲasigi koo ma.

20. An bena mun lo ye kalan nata la?

²⁰ Ala sagokɛla Zɔbu tun ye ɲiningali kɛ ko: “Adamaden min sara, o be se ka kunun tugu wa?” (Zɔbu 14:14). Mɔgɔ min sara, o be se ka ɲɛnamaya kɛ kokura tiɲɛn na wa? Bibulu be min fɔ o koo la, o be mɔgɔ ɲagali kosɔbɛ. An bena o lo ye kalan nata la.