Yelifɛn yirala Zan na

Ka Zan to kaso la Patmɔsi guun kan, Yezu ye yelifɛn 16 yira a la ka ɲɛsin siniɲasigi koo ma. O yelifɛnw tun b’a yira cogo min na Jehova tɔgɔ bena saniya, a ka Masaya bena na, ani a sago bena kɛ dugukolo kan i ko a be kɛ sankolo la cogo min na.

Yelifɛn dɔ la, Zan ye Jehova siginin ye sankolo la a ka Masasigilan nɔɔrɔman kan, cɛkɔrɔba 24 y’a lamini. U ye fani gwɛmanw don ani masafugulan sanulamanw b’u kuunw na. Sanpɛrɛn ni sanmanamana tun be bɔ masasigilan yɔrɔ la. O cɛkɔrɔba 24 nunu birila Jehova ɲɛɛ kɔrɔ k’a bato. Yelifɛn wɛrɛ la, Zan ye jamaba dɔ ye min bɔra siyaw bɛɛ ni bɔnsɔnw bɛɛ ni mɔgɔ sifaw bɛɛ ni kaanw bɛɛ la ani u be Jehova batora. Sagaden, o min ye Yezu ye, ale lo tun ye u dɛndɛbaga ye ani a tun be tagara n’u ye ɲɛnamaya jii yɔrɔ la. O kɔ, Zan ye yelifɛn wɛrɛ ye, o min na Yezu ni cɛkɔrɔba 24 nunu y’a daminɛ ka Masaya kɛ sankolo la. Yelifɛn min tugura o kɔ, Zan ye Yezu ye a be dragɔn n’a ka jinaw kɛlɛla. O dragɔn ye Sutana lo ye. Yezu y’u gwɛn ka bɔ sankolo la k’u fili dugukolo kan.

O kɔ, Zan ye fɛɛn cɛɲumanba dɔ ye yelifɛn na: Sagaden ni mɔgɔ 144 000 lɔnin be Siyɔn kulu kan. A ye mɛlɛkɛ dɔ ye fana a be vanna ka dugukolo lamini ani a b’a fɔra mɔgɔw ye k’u ka siran Ala ɲɛ ani ka nɔɔrɔ la a kan.

Yelifɛn min tugura o kɔ, Zan ye Arimagedɔn kɛlɛ ye: Yezu n’a ka kɛlɛbolo ye see sɔrɔ Sutana ka duniɲa juguman kan. Yelifɛn laban na, Zan y’a ye ko dugukolo kan fɛɛnw ni sankolola fɛɛnw kanbɛnnin lo kosɔbɛ. Sutana n’a kɔmɔgɔw bɛɛ halakira pewu. Dugukolo kan ani sankolo la, bɛɛ be Jehova dɔrɔn lo bato ani k’a tɔgɔ jati fɛɛn senuman ye.