Yala i koo ka di Jehova ye wa?

1. N’a sɔrɔ Jehova sagokɛla kantigi dɔw b’u yɛrɛ ɲininga mun lo la?

K’A LƆN ko Jehova b’a sagokɛlaw jamakulu kanu, o b’an hakili sigi yɛrɛ le! Bibulu b’a fɔ ko: “Masaba [Jehova] ka mɔgɔw koo ka d’a ye.” (Zab. 149:4). Nka tuma dɔw la, dɔw fari be faga fɔɔ u b’u yɛrɛ ɲininga ko: “Yala Jehova be ne kanu wa? Jehova sagokɛla kantigi caaman kofɔra Bibulu kɔnɔ minw tun be n’o miiriya ɲɔgɔn ye tuma dɔw la.—1 Sam. 1:6-10; Zɔbu 29:2, 4; Zab. 51:11.

2. Jɔnw lo koo ka di Jehova ye?

² Bibulu b’a yira ka gwɛ ko adamaden dafabaliw koo be se ka diya Jehova ye. Cogo di do? An ka ɲi ka limaniya Yezu Krista la ani ka batize (Zan 3:16). O cogo la, an b’a yira tɔɔw la ko an nimisara an ka jurumuw na ani ko an y’an daa di Ala ma ko an bena a sago kɛ (Kɛw. 2:38; 3:19). N’an b’o koow kɛ walisa ka kɛ Jehova teri sɔbɛw ye, o ka di a ye kosɔbɛ. An ye layidu min ta ko an bena Jehova sago kɛ, an ka to k’an seko bɛɛ kɛ walisa k’o dafa. O la, an koo bena diya a ye ani a bena an jati a teri sɔbɛw ye.—Zab. 25:14.

3. An bena mun lo lajɛ sisan?

³ Nka, mun na tuma dɔw la dɔw b’a miiri ko u koo man di Ala ye? Jehova b’a yira cogo di ko a b’an kanu? Kerecɛn be se ka la a la cogo di ko a koo ka di Ala ye?

MUN NA DƆW B’A MIIRI KO U KOO MAN DI JEHOVA YE?

4-5. Hali n’an b’a miiri ko nafa foyi t’an na, an be se ka la mun lo la?

⁴ Kabi an denmisɛn tuma, an caaman b’a miiri ko nafa foyi t’an na (Zab. 88:16). Balimacɛ Adrian ko: “Kabi wagatijan, n’ b’a jati ko nafa foyi tɛ n’ na. N’ hakili b’a la ko n’ denmisɛn tuma, n’ ye Ala deli ko a k’a to n’ somɔgɔw be don alijɛnɛ kɔnɔ. Nka, n’ tun lanin t’a la ko ne ka kan ni alijɛnɛ ye.” Tony bangebagaw tɛ Jehova Seerew ye ani a ko: “N’ bangebagaw ma deli k’a fɔ n’ ye abada ko n’ koo ka di u ye wala ko u dusu ka di n’ kɔrɔ. O y’a to n’ tun b’a miiri ko n’ tɛ se k’u dusu diya cogo si la.”

⁵ Tuma dɔw la, n’an b’a miiri ko nafa si t’an na, an k’a to an hakili la ko Jehova yɛrɛ lo y’an sama ka na ale fɛ (Zan 6:44). A ɲɛɛ b’an ka jogo ɲumanw na ani an ye mɔgɔ min ye tigitigi, a b’o lɔn ka tɛmɛ an yɛrɛ kan (1 Sam. 16:7; 2 Til. Kib. 6:30). O kama, n’a ko an koo ka gwɛlɛ ale ma, an ka la o la.—1 Zan 3:19, 20.

6. Ciden Pol tun be ni miiriya juman lo ye a ka jurumu tɛmɛninw koo la?

⁶ Sanni an ka tiɲɛn lɔn, an dɔw ye koo dɔw kɛ minw b’a to an bele b’an yɛrɛ jalaki (1 Piyɛri 4:3). Hali kerecɛn kantigi dɔw be bondori kɛ ni barikantanya dɔw ye. Yala ele fana b’i yɛrɛ jalaki tuma dɔw la wa? N’o lo, k’a lɔn ko Jehova sagokɛla kantigi dɔw ye bondori kɛ n’o dusukunnakow ɲɔgɔn ye, o be se k’i dusu saalo. Misali la, ciden Pol tun mana miiri a ka dafabaliyakow la, a dusu tun be kasi (Ɔrɔm. 7:24). Tiɲɛn lo ko a tun nimisara a ka jurumuw na ani ka batize. O bɛɛ n’a ta, a ko ale ye “cidenw bɛɛ la fitinin ye” ani ko ale “ka jugu [hakɛkɛlaw] bɛɛ cɛma.”—1 Kor. 15:9; 1 Tim. 1:15.

7. An ka ɲi ka mun lo to an hakili la an ka jurumu tɛmɛninw koo la?

⁷ An sankolola Faa y’a daa di ko n’an nimisara, ale bena yafa an ma (Zab. 86:5). O la, n’an nimisara an ka jurumuw na, an be se ka la a la ko Jehova yafara an ma i ko a y’a fɔ cogo min na.—Kɔlɔs. 2:13.

8-9. N’an b’a miiri ko an tɛ se abada ka Jehova ɲɛɛ fa, an be se ka see sɔrɔ o miiriya kan cogo di?

⁸ An bɛɛ b’a fɛ ka Jehova sago kɛ n’an seko bɛɛ ye. Nka, dɔw b’a miiri ko u tɛ se abada ka Jehova ɲɛɛ fa. Balimamuso dɔ tɔgɔ ko Amanda ani a ko: “N’ b’a miiri tuma bɛɛ ko ka n’ seko bɛɛ kɛ Jehova ye, o kɔrɔ ko n’ be min kɛra, n’ ka ɲi ka to ka dɔ fara o kan. Tuma caaman na, n’ b’a ɲini ka tɛmɛ n’ seko daan kan. Ni n’ ma se k’o kɛ, n’ dusu be tiɲɛ n’ yɛrɛ kɔrɔ ani n’ b’a miiri ko Jehova fana dusu man di n’ kɔrɔ.”

⁹ N’an b’a miiri ko an tɛ se abada ka Jehova ɲɛɛ fa, an be se ka see sɔrɔ o miiriya kan cogo di? A to i hakili la ko Jehova ka koo man gwɛlɛ. An tɛ se min na, a t’o ɲini an fɛ abada! A mana koo o koo ɲini an fɛ, n’an b’o kɛ n’an seko bɛɛ ye, o ka di a ye. Mɔgɔ minw kofɔra Bibulu kɔnɔ ani u ye Jehova sago kɛ n’u dusu bɛɛ ye, miiri olu koo la. U la dɔ ye Pol ye. A ye baaraba kɛ saan caaman kɔnɔ. A ye kilomɛtɛrɛ waa caaman kɛ ka taga dugu ni duguw la ani ka kafo caaman juu sigi. Nka tuma min na a ka koow cogoya y’a to a tun tɛ se ka caaman kɛ tugun waajuli baara la, yala a koo gwoyara Jehova ye wa? Ayi. A tora k’a seko bɛɛ kɛ ani Jehova y’a duga (Kɛw. 28:30, 31). O cogo kelen na, an be se ka min kɛ Jehova ye, o be se ka yɛlɛma tuma dɔw la. Nka min kɔrɔtanin lo a fɛ, o ye an be baara kɛ a ye ni ŋaniya min ye. Jehova b’a yira cogo minw na ko an koo ka di a ye, an k’u dɔw lajɛ sisan.

JEHOVA B’A YIRA COGO DI KO AN KOO KA DI A YE?

10. Jehova b’a fɔ an ye cogo di ko a b’an kanu? (Zan 16:27).

¹⁰ Bibulu sababu fɛ. Jehova be mɔgɔ minw kanu, a ka di a ye k’a yira u la ko u koo ka di a ye. Bibulu b’a fɔ siɲɛ fila ko a y’a fɔ Yezu ye ko a ye a Dencɛ kanulen ye ani ko a koo ka di ale ye (Mat. 3:17; 17:5). Yala a bena diya i ye Jehova k’a fɔ i ye ko i koo ka di ale ye wa? An tɛ se ka Jehova kumakan mɛn bi, nka a kumana an fɛ Bibulu kɔnɔ. N’an be Yezu ka kumaw kalanna Evanziliw kɔnɔ, a be komi Jehova lo b’a fɔra an ye ko an koo ka di a ye (Zan 16:27 kalan). Yezu b’a Faa ladegi cogo dafanin na. A y’a fɔ a ka kalanden kantigiw ye ko u koo ka di a ye u ka dafabaliya bɛɛ n’a ta. N’an b’o kumaw kalanna, a be komi Jehova b’o fɔra anw lo ye.—Zan 15:9, 15.

11. Ni kɔrɔbɔliw b’an kan, mun na o t’a yira ko an koo man di Jehova ye? (Zaki 1:12).

¹¹ A ka kɛwalew sababu fɛ. Jehova b’a fɛ k’an dɛmɛ. Misali la, a b’an makoɲɛfɛnw di an ma. Tuma dɔw la, a b’a to an be tɔɔrɔ i ko cɛɛ kantigi Zɔbu ka koo b’a yira cogo min na (Zɔbu 1:8-11). N’an be tɔɔrɔla, o kɔrɔ tɛ ko an koo man di Ala ye tugun. Nka, o be sababu di an ma k’a yira Ala la ko an b’a kanu kosɔbɛ ani ko an jigi lanin b’a kan (Zaki 1:12 kalan). Kɔrɔbɔliw tuma na, an bena a ye ko Jehova b’an kanu kosɔbɛ ani ko a b’an dɛmɛ yɛrɛ le ka muɲuli kɛ!

12. An be kalan juman lo sɔrɔ Dimitri ka koo la?

¹² An ka balimacɛ dɔ ka koo lajɛ. A be Azi mara la ani a tɔgɔ ko Dimitri. A ka baara tiɲɛna ani a tun tɛ sera ka baara wɛrɛ sɔrɔ kalo caaman kɔnɔ. O la, a y’a latigɛ k’a jigi la Jehova kan, a kɛtɔ ka dɔ fara a ka waajuli baara kan. Kalo caaman tɛmɛnin kɔ, a bele tun ma baara sɔrɔ. O kɔ, a banana fɔɔ a tun tɛ se ka wuli ka bɔ a ka dilan kan. A y’a daminɛ k’a miiri ko ale tɛ furucɛ ni faa ɲuman ye tugun ani a tun b’a yɛrɛ ɲiningara n’a koo bele ka di Jehova ye. Loon dɔ sufɛ, a denmuso ye Ezayi 30:15 kɔnɔkumaw sɛbɛ ka n’a di a ma. A fɔra yen ko: “K’aw hakili sigi, ani k’aw jigi la ne kan, o le bena fanga d’aw ma.” A y’a fɔ a facɛ ye ko: “Baba, n’i dusu man di, miiri vɛrise nin na.” Dimitri y’a faamu ko Jehova barika la, a somɔgɔw bele b’u daradumuni ni fani donta sɔrɔla ani siyɔrɔ b’u fɛ. A ko: “N’ ka ɲi ka min kɛ, o ye ka n’ hakili sigi, ani ka to ka n’ jigi la n’ ka Ala kan.” N’o gwɛlɛya ɲɔgɔn b’i kan, i be se ka la a la ko Jehova b’a janto i la ani ko a bena i dɛmɛ k’o muɲu.

13. Jehova be se ka tɛmɛ jɔnw lo fɛ k’a yira ko an koo ka di a ye ani a b’o kɛ cogo di?

¹³ An balimaw sababu fɛ. Jehova be tɛmɛ an balimaw fɛ k’a yira an na ko an koo ka di a ye. Misali la, a be se ka tɛmɛ u fɛ k’an jija wagati bɛnnin na. Balimamuso dɔ be bɔ Azi mara la ani balimaw y’a jija wagati min na a hakili tun ɲagaminin lo kosɔbɛ. A ka baara tiɲɛna ani a banana ka juguya. O kɔ, a cɛɛ ye jurumuba dɔ kɛ ani u y’a bɔ a ka diinan mɔgɔkɔrɔ baara la. A ko: “N’ tun t’a faamu fɛɛn min kama o koo be n’ sɔrɔla. N’ tun b’a miiri ko n’a sɔrɔ n’ ye koo jugu dɔ lo kɛ ani Jehova banna n’ na.” An balimamuso ye Jehova deli kosɔbɛ a k’a yira ale la ko a bele b’ale kanu. Jehova y’o kɛ cogo di? Balimamuso ko: “Kafo ka diinan mɔgɔkɔrɔw kumana ni n’ ye ani u ye n’ hakili sigi ko Jehova bele be n’ kanu.” Wagati damanin o kɔ, a ye Jehova deli tugun ko a k’a yira ale la ko a b’a kanu. A ko: “O loon bɛɛ, kafo balima dɔw ye lɛtɛrɛ ci n’ ma. U ka dususalo kumaw kalantɔ, n’ y’a ye ko Jehova ye n’ ka delili jaabi.” Tiɲɛn na, Jehova be tɛmɛ tɔɔw ka jijali kumaw fɛ tuma caaman na, k’a yira ko an koo ka di a ye.—Zab. 10:17.

14. Jehova b’a yira cogo wɛrɛ juman lo la ko an koo ka di a ye?

¹⁴ Walisa k’a yira an na ko an koo ka di a ye, Jehova be tɛmɛ an balimaw fɛ fana k’an ladi n’an mako b’o la. Misali la, saan kɛmɛkulu fɔlɔ la, Jehova tɛmɛna ciden Pol fɛ ka bataki 14 sɛbɛ ani k’u ci a balimaw ma. O batakiw kɔnɔ, Pol ye ladili barikamanw di a balimaw ma ani a y’o kɛ ni kanuya ye. Mun na Jehova ye Pol lasun k’o ladiliw sɛbɛ? Jehova ye Faa ɲuman ye ani a b’a ‘deen kanuninw’ kolo (Talenw 3:11, 12). O la, ni dɔ basigira Bibulu kan k’an ladi, o kɔrɔ tɛ ko an koo man di Jehova ye dɛ! Ayi, o b’a yira le ko a b’an kanu (Eburuw 12:6). Koo wɛrɛ jumanw lo b’a yira ko an koo ka di Jehova ye?

KOO WƐRƐ MINW B’A YIRA KO AN KOO KA DI JEHOVA YE

15. Jehova b’a ka hakili senu di jɔnw lo ma ani o b’an dɛmɛ ka la mun lo la?

¹⁵ Mɔgɔ minw koo ka di Jehova ye, a b’a ka hakili senu di olu lo ma (Mat. 12:18). An be se k’an yɛrɛ ɲininga ko: “N’ ka ɲɛnamaya kɔnɔ, yala n’ b’a yira ko n’ be ni jogo dɔw ye minw ye hakili senu deen faan dɔw ye wa?” Yala i y’a kɔrɔsi ko i be muɲu tɔɔw kɔrɔ sisan ka tɛmɛ wagati min na i tun tɛ Jehova lɔn wa? Tiɲɛn na, n’i tora k’a yira ko i be ni hakili senu deen faanw ye, i bena la a la kosɔbɛ ko i koo ka di Jehova ye!—Koorilen nin lajɛ: “Hakili senu deen faanw.”

16. Jehova be tɛmɛ jɔnw lo fɛ ka kibaro diiman lase mɔgɔw ma ani o be mun lo kɛ i la? (1 Tesalonikaw 2:4).

¹⁶ Minw koo ka Jehova ye, a y’a ɲini olu le fɛ u ka kibaro diiman lase mɔgɔw ma (1 Tesalonikaw 2:4 kalan). A kɔrɔsi fɛɛn min ye balimamuso Jocelyn dɛmɛ ka la o la. Loon dɔ a wulila ani a dusu tun man di fewu. A ko: “Fanga si tun tɛ n’ na ani n’ tun b’a miiri ko nafa foyi tɛ n’ na. Nka n’ tun ye piyɔniye ye ani n’ tun ka ɲi ka bɔ waajuli la o loon na. O kama, n’ ye delili kɛ ani n’ tagara waajuli la.” O loon sɔgɔma, Jocelyn ye muso ɲuman dɔ kunbɛn min tɔgɔ ko Mary ani a sɔnna bibulukalan na. Kalo damanin o kɔ, a y’a fɔ Jocelyn ye ko loon min na a y’ale ka daa kɔkɔ, ale tun be dɛmɛ ɲinina Ala fɛ delili la. Jocelyn miirila o koo la ani a ko: “A be komi Jehova tun b’a fɔra n’ ye le ko: ‘I koo ka di n’ ye.’” Tiɲɛn lo ko bɛɛ lo tɛna sɔn k’an lamɛn waajuli la. Nka an be se ka la a la ko n’an b’an seko bɛɛ kɛ ka kibaro diiman lase mɔgɔw ma, o ka di Jehova ye.

17. Vicky ye min fɔ kunmabɔsara koo la, o b’i dɛmɛ ka mun lo faamu? (Zaburuw 5:13).

¹⁷ Minw koo ka di Jehova ye, olu lo be kunmabɔsara nafa sɔrɔ (1 Tim. 2:5, 6). Hali n’an limaniyanin lo kunmabɔsara koo la ani an batizera, n’a sɔrɔ an bele lanin t’a la ko Jehova b’an kanu. N’o lo, mun lo be se k’an dɛmɛ? A to i hakili la ko an man ɲi ka la an dusukunnakow la tuma dɔw la. Nka, an be se ka la Jehova la tuma bɛɛ. Minw limaniyanin lo kunmabɔsara koo la, Jehova b’olu jati mɔgɔ tilenninw ye ani a y’a daa di ko a bena u duga (Zaburuw 5:13 kalan; Ɔrɔm. 3:26). Balimamuso Vicky kɛtɔ ka miiri kunmabɔsara koo la, o y’a dɛmɛ. Loon dɔ, a miirila o koo la kosɔbɛ ani a ko: “Jehova muɲuna n’ kɔrɔ kabi wagatijan. . . . Nka, a tun be komi ne b’a fɔra a ye le ko: ‘I ka kanuya barika man bon walisa i ka se ka ne kanu. I Dencɛ ka saraka tɛ se ka ne ka jurumuw bɛɛ datugu.’” A kɛtɔ ka miiri kunmabɔsara koo la, a y’a daminɛ k’a faamu ko Jehova b’ale kanu. N’an fana tora ka miiri kunmabɔsara koo la, an bena a ye ko Jehova b’an kanu.

18. N’an tora k’an sankolola Faa kanu, an be se ka la mun lo la?

¹⁸ An ye ladili minw sɔrɔ barokun nin na, n’a sɔrɔ an bena an jija kosɔbɛ k’u sira tagama. Nka tuma dɔw la, an fari be se ka faga ani an b’an yɛrɛ ɲininga n’an koo ka di Jehova ye. N’o kɛra, a to i hakili la ko Jehova “kanubagaw” koo ka di a ye (Zaki 1:12). O la, to k’i magwɛrɛ Jehova la ani a ɲini k’a lɔn a b’a yira cogo minw na ko a b’i kanu. Kana ɲinɛ abada ko Jehova “yɔrɔ man jan an si la.”—Kɛw. 17:27.