To ka tugu Yezu kɔ i batizenin kɔ

1-2. Mun na an ka ɲɛnamaya be fisaya an batizenin kɔ?

KA BATIZE ka kɛ Jehova ka denbayamɔgɔ dɔ ye, o be mɔgɔ ninsɔn diya yɛrɛ le! Nɛɛma lo an fɛ ka jɛnɲɔgɔnya teriman kɛ ni Jehova ye. Zaburu sɛbɛbaga Dawuda ye min fɔ, an b’o lo miiri fana. A ko: “Ala, e mana sɔn min ma, ko a ka to e ka soo kɔnɔ, o tigi dagamunin [wala ninsɔndiyanin] lo.”—Zab. 65:5.

² Jehova tɛ sɔn mɔgɔ sugu bɛɛ la a ka denbaya kɔnɔ. I ko an y’a ye barokun tɛmɛnin na cogo min na, minw b’a fɛ ka teriya kɛ n’a ye, a b’a magwɛrɛ olu lo la (Zaki 4:8). N’i ye i yɛrɛkun di Jehova ma ani ka batize, i b’i magwɛrɛ a la cogo kɛrɛnkɛrɛnnin na. La a la ko i batizenin kɔ, a bena a kɛ a ‘ka hɛrɛ ka jigi i kan kosɔbɛ.’—Mal. 3:10; Zer. 17:7, 8.

3. Kerecɛn minw y’u yɛrɛkun di Jehova ma ani ka batize, olu be ni kunkanbaaraba juman lo ye? (Waajulikɛla 5:4, 5).

³ Ayiwa, batɛmu ye koow daminɛ dɔrɔn lo ye. I batizenin kɔ, i bena a ɲini k’i seko bɛɛ kɛ walisa k’i ka yɛrɛkundili layidu dafa kɔrɔbɔliw bɛɛ n’a ta (Waajulikɛla 5:4, 5 kalan). Komi i kɛra Yezu ka kalanden dɔ ye, i bena i seko bɛɛ kɛ fana k’a ladegi ani k’a ka cikanw labato (Mat. 28:19, 20; 1 Piyɛri 2:21). Barokun nin bena i dɛmɛ k’o kɛ.

TO KA TUGU YEZU KƆ GWƐLƐYAW NI KƆRƆBƆLIW BƐƐ N’A TA

4. Kɔrɔ juman na Yezu ka kalandenw b’u ka “gwengwenlɔgɔ ɲun”? (Luka 9:23).

⁴ I bena gwɛlɛya dɔw sɔrɔ i batizenin kɔ. Yezu yɛrɛ y’a yira ka gwɛ ko a ka kalandenw bena u ka “gwengwenlɔgɔ ɲun” ani a ko u bena o kɛ “loon o loon.” (Luka 9:23 kalan). Yala a tun b’a fɔra ko a ka kalandenw bena tɔɔrɔ tuma bɛɛ le wa? Ayi, o tɛ. A tun b’a yirala u la le ko tiɲɛn lo ko u bena dugaw sɔrɔ, nka u bena gwɛlɛya dɔw sɔrɔ fana. U tun bena tɔɔrɔ kosɔbɛ gwɛlɛya dɔw yɛrɛ kosɔn.—2 Tim. 3:12.

5. Minw karila fɛɛn dɔw ka tugu Yezu kɔ, a ko olu bena duga jumanw lo sɔrɔ?

⁵ N’a sɔrɔ i somɔgɔw y’i kɛlɛ tiɲɛn batoli kosɔn, wala sababu tun b’i fɛ ka wari ani bololafɛn caaman sɔrɔ. Nka, i karila o bɛɛ kɔ walisa ka Ala ka Masaya kɛ i ɲɛnako fɔlɔ ye (Mat. 6:33). N’o lo, la a la ko i ye koo minw bɛɛ kɛ Jehova kosɔn, a tɛna ɲinɛ o kɔ abada! (Eburuw 6:10). N’a sɔrɔ i y’a ye ko Yezu ka kuma nunu ye tiɲɛn ye: “Mɔgɔ o mɔgɔ y’a ka dugu to, walima a balimacɛw, walima a balimamusow, walima a faa, walima a baa, walima a deenw, walima a ka forow to yen, ne ni kibaru diman kosɔn, siga t’a la, o tigi bena olu bɛɛ ɲɔgɔn kɛmɛ kɛmɛ sɔrɔ diɲɛ nin na. A bena duguw sɔrɔ, ka dɔgɔ ni kɔrɔw sɔrɔ, ka baaw sɔrɔ, ka deenw sɔrɔ, ka forow sɔrɔ. A bena tɔɔrɔ fana sɔrɔ, nga a bena nii banbali sɔrɔ sini.” (Mariki 10:29, 30). Tiɲɛn na i ye duga minw sɔrɔ, u ka ca kosɔbɛ ka tɛmɛ i karila fɛɛn minw kɔ.—Zab. 37:4.

6. Mun na i ka ɲi ka to ka “farisogo nigɛlakow” kɛlɛ i batizenin kɔ?

⁶ I bele ka ɲi ka to ka “farisogo nigɛlakow” kɛlɛ i batizenin kɔ (1 Zan 2:16). I ka ɲi ka to k’o kɛ sabu i bele ye jurumutɔ ye. Tuma dɔw la, n’a sɔrɔ i ni ciden Pol dusukunnakow bena kɛ kelen ye. Ale y’a sɛbɛ ko: “Ne dusu la kɔni, Ala ka sariya koo ka di ne ye. Nga n y’a ye, koo min ka di ne ye ni ne b’a fɛ k’o kɛ, fɛɛn dɔ be ne bali k’o kɛ. Ale lo b’a kɛ hakɛ be fanga sɔrɔ ne kan.” (Ɔrɔm. 7:22, 23). Tuma dɔw la, i fari be se ka faga sabu i bele be bondori kɛra n’i ka nege juguw ye. Nka miiri i ka layidu la, i ye min ta Jehova ye tuma min na i ye i yɛrɛkun di a ma. O bena a to i b’i jija kosɔbɛ ka lɔ kelen kan kɔrɔbɔliw ɲɛ. Tiɲɛn na, i ka yɛrɛkundili layidu bena koow nɔgɔya i ma kɔrɔbɔliw tuma na. Cogo di do?

7. I y’i yɛrɛkun di Jehova ma minkɛ, o b’i dɛmɛ cogo di ka to kantigiya la a ye?

⁷ N’i y’i yɛrɛkun di Jehova ma, i be ban i yɛrɛ la. O kɔrɔ ko i tɛ miiri i negelakow la ani i tɛ sɔn ka koo si kɛ min man di Jehova ye (Mat. 16:24). O la ni kɔrɔbɔli b’i kan, wala n’u b’i lasunna ka koo jugu kɛ, i tɛna i yɛrɛ ɲininga i ka ɲi ka min kɛ. Mun na do? Sabu i y’a latigɛ ka ban ko i bena to kantigiya la Jehova ye. I cɛsirinin lo k’i koo diya Jehova ye minkɛ, i bena kɛ komi Zɔbu. Gwɛlɛyabaw bɛɛ n’a ta, ale lɔra kelen kan ko: “N ka tilenninya le be n daa”!—Zɔbu 27:5.

8. N’i be miiri i ka yɛrɛkundili koo la, cogo juman na o be se k’i dɛmɛ ka lɔ kelen kan kɔrɔbɔli tuma na?

⁸ N’i be miiri i ka yɛrɛkundili koo la, kɔrɔbɔli o kɔrɔbɔli mana i sɔrɔ, i bena fanga sɔrɔ ka lɔ kelen kan. Misali la, i tɛna ɲɛbɔ mɔgɔ wɛrɛ furuɲɔgɔn fɛ sabu i y’i daa di Jehova ma ko i tɛna o kɛ. N’i t’a to miiriya juguw ka don i kuun na, i mako tɛna kɛ a la k’u kɛlɛ kɔfɛ. I bena “i yɛrɛ kɔlɔsi” “mɔgɔjuguw ka sira” ma.—Talenw 4:14, 15.

9. N’i be miiri i ka yɛrɛkundili koo la, cogo juman na o be se k’i dɛmɛ ka Alakow kɛ i ɲɛnako fɔlɔ ye?

⁹ N’u b’a fɛ k’i ta baara dɔ la min bena i bali ka taga lajɛnw na tuma o tuma, i bena mun lo kɛ do? I bena a lɔn i ka ɲi ka min kɛ sabu i kɔnna k’a latigɛ wagatijan ko i tɛna sɔn o baara ɲɔgɔn na. O la, i tɛna i ɲɛɛ tugu ka sɔn o baara ma ani kɔfɛ, i b’a ɲini ka Alakow kɛ i ɲɛnako fɔlɔ ye. Yezu tun cɛsirinin lo cogo min na k’a koo diya a Faa ye, kana ɲinɛ o kɔ. O la, koo o koo man di Ala ye, i bena i cɛsiri ka ban o la yɔrɔnin kelen sabu i y’i yɛrɛkun di a ma.—Mat. 4:10; Zan 8:29.

10. I batizenin kɔ, Jehova bena i dɛmɛ cogo di i ka to “ka tugu” Yezu kɔ?

¹⁰ Gwɛlɛyaw ni kɔrɔbɔliw be sababu di i ma i k’a yira ko i cɛsirinin lo “ka tugu” Yezu kɔ. La a la ko Jehova bena i dɛmɛ i ka to k’o kɛ. Bibulu b’a fɔ ko: “Ala ye kantigi ye, ale tena sɔn aw ka kɔrɔbɔ fɔɔ ka taga tɛmɛ aw barika danyɔrɔ kan. Ni kɔrɔbɔli sera, a bena bɔyɔrɔ d’aw ma ani ka barika don aw la ka se k’o muɲu.”—1 Kor. 10:13.

MUN LO BENA I DƐMƐ I KA TO KA TUGU YEZU KƆ?

11. I be se ka to ka tugu Yezu kɔ cogo fisaman minw na, u la dɔ ye juman ye? (jaa lajɛ fana).

¹¹ Yezu tun kisɛyanin lo ani a magwɛrɛnin tora Jehova la delili sababu fɛ (Luka 6:12). I be se ka to ka tugu Yezu kɔ cogo fisaman minw na i batizenin kɔ, u la dɔ ye ka to ka koow kɛ minw bena i magwɛrɛ kosɔbɛ Jehova la. Bibulu b’a fɔ ko: “An ye koo minw kɛ fɔɔ ka na se sisan ma, an ka banba ka taga ɲa n’o koow ye.” (Filip. 3:16). Balima minw y’a latigɛ ka dɔ fara u ka cidenya baara kan, i bena to k’u ka walew mɛn tuma kelen kelen. N’a sɔrɔ u ye Masaya waajulikɛlaw ka lakɔli kɛ wala u yɛlɛmana yɔrɔ min na weleweledalaw man ca. N’i be se k’o laɲinita ɲɔgɔn latigɛ, kana sigasiga k’o kɛ. Jehova sagokɛlaw b’a fɛ ka dɔ fara u ka cidenya baara kan (Kɛw. 16:9). Nka n’i tɛ se k’o kɛ sisan do? Kana a miiri ko minw be se k’o kɛ, olu ka fisa n’i ye. Min kɔrɔtanin lo, o ye ka to ka muɲuli kɛ (Mat. 10:22). Kana ɲinɛ ko n’i be i seko kɛra Jehova ka baara la, o ka di a ye kosɔbɛ. A kɔrɔtanin lo i k’o kɛ walisa ka to ka tugu Yezu kɔ i batizenin kɔ.—Zab. 26:1.

12-13. N’i y’a ye ko dɔ be bɔra i ka kisɛya la Jehova ka baara la, i be se ka mun lo kɛ do? (1 Korɛntikaw 9:16, 17; koorilen nin fana lajɛ: “Kana boli dabila”).

¹² I batizenin kɔ, n’i y’a ye ko i tɛ delili kɛ n’i dusu bɛɛ ye tugun, ko waajuli wala Bibulu kalan man di i ye i ko fɔlɔ la, i ka ɲi ka mun lo kɛ do? Kana sin k’a miiri ko Jehova tɛ n’i ye tugun. I ye mɔgɔ dafabali ye ani i dusukunnakow be yɛlɛma tuma dɔw la. N’i y’a ye ko dɔ bɔra i ka kisɛya la, miiri ciden Pol ka koo la. A tun ka ɲi ka min kɛ, a tun b’a lɔn ko tuma dɔw la, a nege tun tɛna kɛ a la k’o kɛ hali n’a tun b’a jijara ka Yezu ladegi (1 Korɛntikaw 9:16, 17 kalan). A ko: “Ni ne b’o kɛ ni jagoya ye, o ye karabako ye n ma.” Pol dusukunnakow tun mana kɛ min o min ye, a tun jijanin lo k’a ka cidenya baara dafa.

¹³ O cogo kelen na, kana basigi i dusukunnakow dɔrɔn kan ka koow latigɛ. I dusukunnakow mana kɛ min o min ye, i cɛsiri ka koo tilennin kɛ. N’i tora k’o kɛ, i dusukunnakow bena laban ka yɛlɛma. Yanni o cɛ, n’i tora ni delinanko ɲumanw ye Alako ta fan fɛ, o bena i dɛmɛ i ka to ka tugu Yezu kɔ i batizenin kɔ. N’i tora k’i jija Jehova ka baara la, o bena i balimaw jija fana.—1 Tes. 5:11.

TO K’I “YƐRƐ SƐGƐSƐGƐ”

14. I ka ɲi ka to ka mun lo kɛ tuma o tuma ani mun na? (2 Korɛntikaw 13:5).

¹⁴ I batizenin kɔ, a kɔrɔtanin lo fana i ka to k’i yɛrɛ sɛgɛsɛgɛ tuma o tuma (2 Korɛntikaw 13:5 kalan). Tuma kelen kelen, a ka ɲi i k’i yɛrɛ sɛgɛsɛgɛ k’a filɛ n’i be koo nunu kɛra: ka delili kɛ loon o loon, ka Bibulu kalan ani k’a sɛgɛsɛgɛ, ka taga lajɛnw na ani ka waajuli kɛ. I jija walisa o koow ka diya i ye ani a ɲini ka nafa sɔrɔ u la bɛrɛbɛrɛ. Misali la, i yɛrɛ ɲininga ko: “Yala n’ be se ka Bibulu ka kalan jɔnjɔnw ɲɛfɔ mɔgɔw ye wa? N’ be se ka mun ni mun lo kɛ walisa waajuli baara ka diya n’ ye bɛrɛbɛrɛ? Yala n’ ka deliliw gwɛnin lo ani u b’a yira ko n’ jigi bɛɛ lanin be Jehova lo kan wa? N’ be taga lajɛnw na tuma o tuma wa? N’ be se ka mun lo kɛ walisa ka n’ hakili sigi ka lamɛnni kɛ koɲuman lajɛnw na ani ka n’ daa don u la?”

15-16. I be kalan juman lo sɔrɔ balimacɛ dɔ fɛ min lɔra kelen kan kɔrɔbɔli tuma na?

¹⁵ A kɔrɔtanin lo fana i k’i ka fiɲɛw lɔn. Balimacɛ Robert ye koo dɔ lakali min b’o yira. A ko: “Tuma min na n’ tun be ni saan 20 ɲɔgɔn ye, n’ tun be baara dɔ kɛ tuma kelen kelen. Sunguru dɔ tun be n’ ka baarakɛyɔrɔ la ani loon dɔ baara jiginin kɔ, a ye n’ weele a ka soo. A ko an dama lo bena kɛ yen ani ko an bena wagati diiman kɛ ɲɔgɔn fɛ. A daminɛ na, n’ m’a fɔ a ye ka gwɛ fɛɛn min kama n’ tun t’a fɛ ka taga. Nka a laban, n’ ko n’ tɛna taga a ka soo ani n’ y’a ɲɛfɔ a ye fɛɛn min kama.” Robert sera ka lɔ kelen kan o kɔrɔbɔli tuma na ani an b’a tando o kosɔn. Nka kɔfɛ, ale yɛrɛ miirila o koo la ani a y’a ye ko a tun be se ka koow kɛ cogo fisaman na. A ko: “N’ ma sin ka ban yɔrɔnin kelen i ko Yusufu banna Potifar muso la cogo min na (Zɛnɛzi 39:7-9). Tiɲɛn na, a barila n’ na k’a ye ko a gwɛlɛyara n’ ma ka ban. O koo ye n’ dɛmɛ k’a faamu ko n’ ka ɲi ka n’ ka teriya sabati ni Jehova ye.”

¹⁶ N’i ye i yɛrɛ sɛgɛsɛgɛ i ko Robert y’a kɛ cogo min na, o bena i nafa. Hali n’i sera ka lɔ kelen kan kɔrɔbɔli tuma na, i yɛrɛ ɲininga ko: “Yala n’ sinna ka ban wala n’ mɛɛnna ka sɔrɔ ka ban?” N’i y’a ye ko i ka ɲi ka koow fisaya, kana i fari faga. Ninsɔndiya sabu i bɔra i ka fiɲɛ kala ma sisan. Delili kɛ o koo la ani dɔ kɛ dɔ ye walisa k’i cɛsiri kosɔbɛ ka Jehova ka sariyaw labato tagamacogo ta fan fɛ.—Zab. 139:23, 24.

17. Robert tora kantigiya la minkɛ, o ye nɔɔ juman lo to Jehova tɔgɔ kan?

¹⁷ Robert ka koo b’an dɛmɛ ka koo wɛrɛ faamu. A ko: “Tuma min na n’ banna n’ baarakɛɲɔgɔn ka welekan na, a y’a fɔ n’ ye ko: ‘I ma ben jaan kɔnɔ!’ N’ y’a ɲininga a b’a fɛ ka mun lo fɔ. A y’a ɲɛfɔ n’ ye ko Jehova Seere kɔrɔ dɔ ye ale teri ye. O teri ko kanbelew ni sunguru minw ye Jehova Seerew ye, u bɛɛ be koo juguw kɛ dogo la. O la, a y’a fɔ a teri ye ko a bena ne kɔrɔbɔ k’a filɛ. N’ ninsɔn diyara kosɔbɛ sabu n’ ye nɔɔrɔ la Jehova tɔgɔ kan.”

18. I jijanin lo ka mun lo kɛ i batizenin kɔ? (koorilen nin fana lajɛ: “Barokun dɔw, minw bena diya i ye”).

¹⁸ N’i ye i yɛrɛkun di Jehova ma ani ka batize, i b’a yira ko i b’a fɛ k’a tɔgɔ saniya a mana kɛ min o min ye. Gwɛlɛya minw b’i kan ani i ye see sɔrɔ kɔrɔbɔli minw kan, la a la ko Jehova b’o bɛɛ lɔn. I be jijali minw kɛra ka to kantigiya la, a bena i duga o kosɔn. La a la ko a bena barika don i la a ka hakili senu sababu fɛ walisa i ka to kantigiya la (Luka 11:11-13). Jehova ka dɛmɛ barika la, i bena to ka tugu Yezu kɔ i batizenin kɔ.