Barokun sifa kura dɔ, min bena an dɛmɛ ka bibulukalanw daminɛ
1. An be La Tour de Garde min yira mɔgɔw la, barokun sifa kura juman bena to ka bɔ o kɔnɔ, ani a kuun ye mun ye?
1 K’a ta kalo nata ma, barokun sifa kura dɔ bena to ka bɔ La Tour de Garde kɔnɔ an be min yira mɔgɔw la. A tɔgɔ ko “ Ce qu’enseigne la Parole de Dieu ” (Kalan min be sɔrɔ Ala ka Kuma kɔnɔ). A bena an dɛmɛ ka bibulukalanw daminɛ. Siga t’a la, o barokun kelen kelen kalan bena diya kiinmɔgɔ dɔw ye. Nka, a kuun yɛrɛ yɛrɛ ye k’an dɛmɛ ka baro kɛ ni mɔgɔw ye.
2. O barokun kɔnɔko dɔw ye jumanw ye?
2 A kɔnɔkow: O barokun tɔgɔ n’a cɛtigɛw bena kɛ ɲiningaliw ye an be se ka minw bila an barokɛɲɔgɔn ye. Vɛrise jɔnjɔnw kofɔra, nka u kɔnɔkow ma sɛbɛ. O la, a bena diya an barokɛɲɔgɔn ye k’u kalan Ala ka Kuma yɛrɛ kɔnɔ ani ka lɔnniya sɔrɔ. Dakunw man jan. O la, an be se k’u lajɛ n’a tigi ye soda yɛrɛ la. Barokun kelen kelen bɛɛ be gafe Bibulu ka kalan kofɔ walisa k’an dɛmɛ ka kalan yɛlɛma ka kɛ o gafe kɔnɔ wagati bɛnnen na.
3. Waajuli kɛtɔ soo ni soo, an be se ka baara kɛ n’o barokun ye cogo di ka bibulukalan daminɛ sodaw la?
3 Baara kɛcogo n’o barokun ye: Zurunaliw yiratɔ, i be se ka ɲiningali dɔ kɛ walisa ka barokun nege don mɔgɔ la. Ɲɛyirali fɛ, zanwiye tile fɔlɔ ka La Tour de Garde bena kuma Bibulu ka nafa koo la. I be se k’a tigi ɲininga ko: “E fɛ, Bibulu ye Ala ka Kuma ye, wala gafe ɲuman gwansan lo? [Mɛnni kɛ a tigi fɛ.] Fɛɛn ɲuman dɔ be n bolo o koo la.” Ɲiningali fɔlɔ yira a tigi la, dakun fɔlɔ kalan ani vɛrise min kofɔra, i k’o kalan. Ɲiningali kalan tugun, ani a ɲini a tigi fɛ a k’a jaabi. N’aw be se, a’ ye dakun caaman lajɛ aw kɛtɔ ka baara kɛ ni barokun ka ɲiningaliw ye. Sanni i ka taga, ɲiningali nɔfɛta min sɛbɛra, i k’o bila a tigi ye ani i ka labɛn tigitigi dɔ kɛ ka segi ka na baro kɛ o kan. Segi ka na dakun caaman wɛrɛw lajɛ lɔgɔkun o lɔgɔkun fɔɔ La Tour de Garde wɛrɛ ka na. Kɛcogo wɛrɛ ye ka sin ka bibulukalan kofɔ a tigi ye dɔrɔn. Ani, i ka tɛmɛ La Tour de Garde ka barokun fɛ ka kalan kɛcogo ɲɛyira a tigi la.
4. Viziti kuraw kɛtɔ, an be se ka baara kɛ cogo di n’o barokun kura ye?
4 N’an be taga zurunaliw di makodon mɔgɔw ma wala viziti kuraw kɛtɔ, an be se ka baara kɛ koɲuman n’o barokun kura ye. I be se k’a fɔ dɔrɔn ko: “Barokun kura dɔ bɔra La Tour de Garde kɔnɔ. A to n b’a yira i la baara be kɛ n’a ye cogo min na.” An be Jehova deli a k’a to o barokun kura ka mɔgɔ caaman wɛrɛw dɛmɛ u ka “se ka tiɲɛ dɔn.”—1 Tim. 2:4.