Ka zurunaliw to mɔgɔw fɛ ani k’o yɛlɛma ka kɛ bibulukalanw ye
1 Samedi loonw na, an be to ka La Tour de Garde ni Réveillez-vous ! yira mɔgɔw la waajuli la. Nka an ka laɲinita tɛ dan o dɔrɔn ma: an b’a fɛ ka mɔgɔ kɔnɔgwɛw kalan tiɲɛn koo la. Ladili dɔw filɛ jukɔrɔ. U b’a yira cogo min na an be se ka gafe Qu’enseigne la Bible to mɔgɔw ye ani ka bibulukalanw daminɛ n’u ye. I be se k’u yɛlɛma ka kɛɲɛ n’i ka kiinw cogoya ye ani k’u fɔ i yɛrɛ ka kumacogo la. I kana sigasiga ka yiracogo wɛrɛ kɛ n’i be sanga sɔrɔ o la.
2 I ka baara kɛ ni gafe ɲɛɛ 4-6nan ye: I mana segi ka taga, i be se k’a fɔ ko: “Ne tun ye zurunali minw di i ma u be mɔgɔ ɲɛsin Bibulu ma. A kɔrɔsi fɛɛn min kama Bibulu kalan kɔrɔtalen be kosɔbɛ.” I ka Esayi 48:17, 18; Yuhana 17:3 kalan, wala vɛrise wɛrɛ, min bɛnnen be. I mana gafe Qu’enseigne la Bible yira a tigi la ani ka kelen di a ma, i be se k’a fɔ ko:
◼ “Bibulu be siniɲasigi jigiya sɔbɛ di an ma.” I ka gafe ɲɛɛ 4-5nan yira a tigi la, ani i k’a ɲininga ko: “Layidu minw kofɔra yan, e b’a fɛ juman ka dafa e ɲɛɛ na?” N’a tigi ye dɔ yira, i k’a ɲɛsin gafe ka kalansen ma min be ɲɛfɔli kɛ o layidu kan. Ani, i ka baro kɛ dɔɔni dakun kelen wala fila kan n’a tigi sɔnna.
◼ I fana be se k’a fɔ ko: “Bibulu be ɲɛnamaya ka ɲiningali kɔrɔtalenbaw jaabi.” I k’a tigi ɲɛsin gafe ɲɛɛ 6nan ma. Ani, i k’a ɲininga n’a ma deli k’o jukɔrɔla ɲiningali dɔ bila a yɛrɛ ye. N’a tigi ye dɔ yira, sapitiri min b’o jaabili di i k’o ta. Ani, i ka baro kɛ dɔɔni dakun kelen wala dakun fila kan.
◼ Wala i be se ka sapitiri dɔw tɔgɔ yira a tigi la. Ani, i k’a ɲininga juman lo ka di ale ye. N’a tigi ye dɔ yira, i k’o sapitiri ta ani i ka bibulukalan kɛcogo yira a la dɔɔni.
3 A’ ye ɲiningali dɔ lawuli aw tɛmɛko fɔlɔ la: Fɛɛrɛ dɔ ye ka koow labɛn viziti kura nata kama an tɛmɛko fɔlɔ la. N’i lamɛnnikɛla sɔnna zurunaliw la, i ka ɲiningali dɔ lawuli ani i k’a fɔ ko i bena segi ka na a jaabi siɲɛ wɛrɛ. I jija ka labɛn tigitigi kɛ o viziti kama. Ani, i janto ka segi ka na i ko i y’a fɔ cogo min na (Mat. 5:37). N’i segira ka na, i k’a tigi hakili jigi o ɲiningali la. Ani, i ka jaabili kalan gafe Qu’enseigne la Bible kɔnɔ ka baro kɛ o kan dɔɔni. I k’o gafe kelen di a ma walisa a ka se k’i nɔminɛ kalan kɛtɔ. Ɲɛyirali dɔw filɛ:
◼ I ye zurunali min di, n’a be kumana duniɲa ka koow juguyali kan, i be se k’a fɔ ko “Siɲɛ wɛrɛ, an bena Bibulu ka fɔta filɛ ɲiningali nin kan: ‘Ala bena yɛlɛmani jumanw kɛ dugukolo ka koow la?’” I mana segi ka na, i ka baro kɛ n’a tigi ye gafe ɲɛɛ 4-5nan kan. I fana be se ka ɲiningali lawuli ko: “Yala balawow ye Ala nɔɔ ye wa?” Viziti kura kɛtɔ i ka sapitiri fɔlɔ ka dakun 7-8nan yira a tigi la.
◼ I ye zurunali min di, n’a be kumana denbayako kan, sanni i ka taga, i be se ka ɲiningali nin lawuli ko: “denbaya mɔgɔ kelen-kelen be se ka mun lo kɛ walisa dɔ ka fara denbaya ka hɛɛrɛ kan?” I mana segi ka na, i ka sapitiri 14nan ka dakun 4nan lajɛ n’a tigi ye.
◼ I ye zurunali min di, n’a be kumana Bibulu ka tiɲɛntigiya kan, i be se ka ɲiningali nin lawuli baro nata kama: “Yala Bibulu ka fɔta ye tiɲɛn ye lɔnnikow ta fan fɛ wa?” I mana segi ka na, i ka sapitiri 2nan ka dakun 8nan lajɛ n’a tigi ye.
4 Baro kelen-kelen banni kɔ, i ka ɲiningali wɛrɛ lawuli i bena min jaabi siɲɛ wɛrɛ. Kalan mana sabati, a’ ye sapitiriw lajɛ ka tugutugu ɲɔgɔnw kɔ, ka ta gafe daminɛ na ka taga a laban na. Nka n’a tigi ma sɔn gafe Qu’enseigne la Bible la do? I be se ka to ka zurunaliw di a ma hali bi ani ka baro kɛ n’a ye Bibulu kan. I kɛtɔ ka Alakow diya don a la, n’a sɔrɔ a bena na sɔn ka Bibulu kalan kɛ kɔfɛ.
5 La Tour de Garde ni Réveillez-vous ! be se ka mɔgɔw jija u k’a ɲini k’a lɔn Bibulu be kalan min kɛ tiɲɛn na. O kama, an k’an jija sɔbɛ la ka bibulukalanw daminɛ ni mɔgɔw ye minw sɔnna ka zurunaliw ta. O la, an bena Yesu ka cikan bato ka mɔgɔw kɛ “kalandenw ye . . . ka u kalan.” (Mat. 28:19, 20).
[Study Questions]
1. An ka laɲinita ye mun ye n’an ye zurunaliw to mɔgɔw ye?
2. An be se ka baara kɛ cogo di ni gafe Qu’enseigne la Bible ɲɛɛ 4-6nan ye walisa ka bibulukalan daminɛ?
3. An be se ka bibulukalan daminɛ cogo di n’an ye zurunali dɔw di minw be kuma (a) duniɲa ka koow juguyali kan? (b) denbayako kan? (c) Bibulu ka tiɲɛntigiya kan?
4. N’a tigi ma sɔn gafe Qu’enseigne la Bible la, an be se ka mun lo kɛ do?
5. Mun na an man kan ka dan ka zurunaliw di mɔgɔw ma dɔrɔn?