KALANSEN 29

Mun lo be kɛ saya kɔ?

Édition imprimée

I ka mɔgɔ sɔbɛ dɔ sara ka ye wa? O be mɔgɔ dusu kasi yɛrɛ le! O koo ɲɔgɔn na, n’a sɔrɔ i b’i yɛrɛ ɲininga ko: “Mun lo be kɛ saya kɔ? N’ ka mɔgɔ sɔbɛ minw sara, n’ bena u ye tugun loon dɔ wa?” Kalansen nin na ani kalansen nata la, i ben’a ye Bibulu be min fɔ o koo la. O ɲiningaliw jaabili be mɔgɔ dusu saalo yɛrɛ le!

1. Mun lo be kɛ saya kɔ?

Yezu ye saya suma ni sinɔgɔba ye. Mun na do? Mɔgɔ min be sinɔgɔba la, a t’a lɔn koo minw be kɛra a gɛrɛfɛ. O cogo kelen na, mɔgɔ saninw tɛ foyi kala ma, ani u tɛ tɔɔrɔ la. Bibulu b’a fɔ ko: “Minw sara ka ban, olu te foyi lɔnna tugu.”—Waajulikɛla 9:5 kalan.

2. Nafa juman b’a la ka tiɲɛn lɔn saya koo la?

Mɔgɔ caaman be siran saya ɲɛ. Dɔw yɛrɛ be siran suuw ɲɛ. Nka Bibulu be min fɔ saya koo la, o be mɔgɔ hakili sigi. Yezu y’a fɔ ko: “Aw bena tiɲɛ lɔn, o tiɲɛ le bena aw kɛ hɔrɔnw ye.” (Zan 8:32). Diinan dɔw b’a fɔ ko ni mɔgɔ sara, fɛɛn dɔ be bɔ a tigi la ka to niin na. Nka, Bibulu kɔni t’o fɔ. Komi mɔgɔ saninw tɛ foyi kala ma, u tɛ tɔɔrɔ la, ani u tɛ se ka koo jugu kɛ an na. O kama, kuun t’a la an k’a ɲini ka koo dɔw kɛ walisa k’u dusu suma. Kuun t’a la fana an k’u bato, wala ka delili kɛ u ye.

Mɔgɔ dɔw b’a miiri k’u be se ka kuma ni mɔgɔ saninw ye. Nka, o tɛ se ka kɛ. I ko an y’a ye cogo min na, “minw sara ka ban, olu te foyi lɔnna tugu.” Minw b’a miiri k’u be kumana ni mɔgɔ saninw ye, tiɲɛn na u be kumana ni jinaw lo ye. O jinaw b’u yɛrɛ kɛ i n’a fɔ minw sara. O la, n’an be tiɲɛn lɔn saya koo la, o bena an latanga jinaw ma. Jehova b’an lasɔmi ko an kan’a ɲini ka kuma ni mɔgɔ saninw ye sabu a b’a lɔn ko farati b’a la ka kumaɲɔgɔnya kɛ ni jinaw ye.—Deteronɔmu 18:10-12 kalan.

A ƝINI KA DƆ LƆN TUGUN

An k’a filɛ Bibulu be kunnafoni wɛrɛ minw di an ma saya koo la. Ani, an k’a filɛ fana fɛɛn min kama an be se ka la a la ko kanutigi Ala tɛ mɔgɔ saninw tɔɔrɔla.

Cɛɛ dɔ n’a denmisɛn fila siginin be baan kan a muso sanga la. U teriw n’u somɔgɔw nana u dusu saalo ani k’u dɛmɛ.

3. Ni mɔgɔ sara, a be kɛ cogo di?

Mɔgɔ saninw be cogoya min na, bɛɛ ka miiriya tɛ kelen ye o koo la. O miiriyaw bɛɛ kɔni tɛ se ka kɛ tiɲɛn ye.

E ka mara la, mɔgɔw be mun lo miiri mɔgɔ saninw cogoya koo la?

Walisa ka Bibulu ka fɔta lɔn o koo la, a’ ye VIDEWO filɛ.

VIDEWO: Mɔgɔ saninw cogoya be di?—A yɔrɔ dennin dɔ (1:19)

Jaa dɔw, minw bɔra videwo nin na: “Mɔgɔ saninw cogoya be di?—A yɔrɔ dennin dɔ.” Jaa fɔlɔ: Suu dɔ be lii kan dɔgɔtɔrɔso. Jaa 2nan: Cɛɛ dɔ be sinɔgɔra mɔgɔ fila cɛma voyazi tuma na tɛrɛn kɔnɔ.

Waajulikɛla 3:20 kalan. O kɔ, a’ ye ɲiningali nunu kɛ ani ka baro kɛ u kan:

Ka kɛɲɛ n’o vɛrise ye, ni mɔgɔ sara, a be kɛ cogo di?
Fɛɛn dɔ be bɔ a tigi la ka to niin na wa?

Bibulu b’a yira min kɛra Yezu teri sɔbɛ Lazari sanin kɔ. Lazari tun be cogo min na a sanin kɔ, Zan 11:11-14 kalan k’a filɛ Yezu ye min fɔ o koo la. O kɔ, a’ ye ɲiningali nunu kɛ ani ka baro kɛ u kan:

Yezu ye saya suma ni mun lo ye?
O b’an dɛmɛ ka mun lo faamu mɔgɔ saninw cogoya koo la?
Bibulu be min fɔ saya koo la, o be mun lo kɛ i la?

4. Ka tiɲɛn lɔn saya koo la, o be mɔgɔ hɔɔrɔnya

Ka tiɲɛn lɔn saya koo la, o b’a to an tɛ siran tugun suuw ɲɛ. Waajulikɛla 9:10 kalan. O kɔ, a’ ye ɲiningali nin kɛ ani ka baro kɛ o kan:

Mɔgɔ saninw be se ka koo jugu kɛ an na wa?

Bibulu be min fɔ saya koo la, o b’an hɔɔrɔnya ka bɔ ngalon lannakow la. O la, an t’a ɲini tugun ka koo dɔw kɛ walisa ka mɔgɔ saninw dusu suma wala k’u bato yɛrɛ. Ezayi 8:19 ani Yirali 4:11 kalan. O kɔ, a’ ye ɲiningali nin kɛ ani ka baro kɛ o kan:

Minw be mɔgɔ saninw bato wala ka dɛmɛ ɲini u fɛ, e ka miiri la, Jehova be mun lo miiri u koo la?

Jaaw: Landako dɔw, minw ɲɛsinna sukɔrɔw batoliko ma. Jaa fɔlɔ: Cɛɛ dɔ ye dumunifɛnw bila kaburu kan k’u kɛ saraka ye ani a y’a ɲɔngiri u kɔrɔ ka to delili kɛ. Jaa 2nan: Cɛɛ saba dɔw ye loo don ani u be dɔɔn kɛra. Jaa 3nan: Mɔgɔ dɔw be tagamana, u ye loo don ani kolojalan bisigi dɔw b’u bolo. — Ka tiɲɛn lɔn saya koo la, o b’an hɔɔrɔnya ka bɔ landako dɔw la minw man di Jehova ye.

5. Ka tiɲɛn lɔn saya koo la, o be mɔgɔ dusu saalo

U ye mɔgɔ caaman kalan ko n’u sara, Ala bena u ɲangi u ka kɛwale juguw kosɔn. Nka i ko an y’a ye cogo min na, ni mɔgɔ sara a tɛ tɔɔrɔ la, hali n’a tun ye jurumubaw kɛ. O b’an dusu saalo yɛrɛ le! Ɔrɔmukaw 6:7 kalan. O kɔ, a’ ye ɲiningali nin kɛ ani ka baro kɛ o kan:

I ko Bibulu b’a fɔ cogo min na, ni mɔgɔ sara, a ka jurumuw juru t’a la tugun. O la do, e ka miiri la, minw sara u be tɔɔrɔla u ka kɛwale jugu tɛmɛninw kosɔn wa?

N’an tora ka dɔ fara an ka lɔnniya kan Jehova koo la, o ben’a to an be la a la kosɔbɛ ko a tɛna mɔgɔ saninw tɔɔrɔ abada. Deteronɔmu 32:4 ani 1 Zan 4:8 kalan. O kɔ, a’ ye ɲiningali nunu kɛ ani ka baro kɛ u kan:

Ala ka jogo minw kofɔra vɛrise nunu na, n’an ye jatiminɛ kɛ u koo la, yala an be se k’a miiri ko Ala be sɔn ka mɔgɔ saninw tɔɔrɔ wa?
Ka tiɲɛn lɔn saya koo la, o be mɔgɔ dusu saalo wa? Mun na i ko ten?

NI MƆGƆ DƆ Y’A FƆ I YE KO: “N’ be siranna suuw kana n’ kɛlɛ.”