KALANSEN 20

Kerecɛn kafo labɛnnin lo cogo di?

Édition imprimée

Jehova Ala ka koow bɛɛ labɛnnin lo (1 Korɛntikaw 14:33). O kama, a ka ɲi a sagokɛlaw ka koow labɛnnin ka to. Kerecɛn kafo labɛnnin lo cogo di? Bɛɛ be se ka dɛmɛ don o koo la cogo di?

1. Jɔn lo ye kafo kuntigi ye?

“Krista ye a ka jama kuntigi ye.” (Efɛzikaw 5:23). K’a to sankolo la, a be Jehova Seerew ka baara ɲɛminɛna duniɲa kuru bɛɛ kɔnɔ. Yezu ye “jɔncɛ kantigiman hakiliman” sigi Ala ka jama kun na. O jɔncɛ kantigiman ye diinan mɔgɔkɔrɔ kolɔnbagaw jɛnkuludennin dɔ ye, min be weele fana ko Koow Ɲɛnabɔla Jɛnkulu (Matiyo 24:45-47, NW. O vɛrisew kalan). Olu lo be cikanw di kafow bɛɛ ma duniɲa kuru bɛɛ kɔnɔ i ko cidenw ni Zeruzalɛmu diinan mɔgɔkɔrɔw tun b’a kɛ cogo min na saan kɛmɛkulu fɔlɔ la (Kɛwaliw 15:2). Nka, o cɛɛw lo tɛ an ka ɔriganisasiyɔn kuntigiw ye. U b’a to Jehova lo k’u ɲɛminɛ, u be basigi a ka Kuma lo kan ka cikanw di an ma, ani u be sɔn Yezu ka kuntigiya ma.

2. Diinan mɔgɔkɔrɔw ka baara ye juman ye?

Diinan mɔgɔkɔrɔw ye kerecɛn kolɔnbagaw ye minw be basigi Bibulu kan ka Jehova sagokɛlaw kalan, k’u ɲɛminɛ, k’u dɛmɛ ani k’u jija. U t’o baara kɛ sara kama. Nka, u b’o kɛ “ni dusuɲuman ye ka kɛɲɛ ni Ala sago ye.” U t’o kɛ “tɔnɔɲini” kama (1 Piyɛri 5:1, 2). Kɔrɔsigi cidenw be yen ka diinan mɔgɔkɔrɔw dɛmɛ. Olu fana be se ka kɛ diinan mɔgɔkɔrɔw ye.

Koow Ɲɛnabɔla Jɛnkulu be diinan mɔgɔkɔrɔ dɔw kɛ kafokulu kɔrɔsibagaw ye. U be taga bɔ kafo dɔw ye walisa ka cikanw di balimaw ma ani k’u jija. Balimacɛ minw be Bibulu ka saratiw dafa, u b’olu kɛ kɔrɔsigi cidenw wala diinan mɔgɔkɔrɔw ye.—1 Timote 3:1-10, 12; Titi 1:5-9.

3. Jehova Seere kelen kelen bɛɛ ka ɲi ka mun lo kɛ?

Kafomɔgɔw bɛɛ ka ɲi ka Jehova tɔgɔ “tando” u kɛtɔ k’u daa don kafo ka lajɛnw na ani k’u seko bɛɛ kɛ waajuli la.—Zaburuw 148:12, 13 kalan.

A ƝINI KA DƆ LƆN TUGUN

An k’a filɛ Yezu ye kuntigi sifa min ye, diinan mɔgɔkɔrɔw b’a ladegi cogo min na, ani an be se k’a yira cogo min na ko an be sɔn u ta ma.

4. Yezu ye kuntigi ye min b’a janto mɔgɔw la

Yezu ye welekan diiman dɔ lase an ma. Matiyo 11:28-30 kalan. O kɔ, a’ ye ɲiningali nin kɛ ani ka baro kɛ o kan:

Yezu ka kuntigiya be mɔgɔ nafa cogo di?

Diinan mɔgɔkɔrɔw be Yezu ladegi cogo di? A’ ye VIDEWO filɛ.

VIDEWO: Nepali: Diinan mɔgɔkɔrɔw be dɛmɛ lase dugukoloyɛrɛyɛrɛ dɔ kɛnin kɔ (4:56)

Bibulu b’a yira ka gwɛ diinan mɔgɔkɔrɔw ka ɲi k’u ka kunkanbaara dafa cogo min na.

Ezayi 32:2 ani 1 Piyɛri 5:1-3 kalan. O kɔ, a’ ye ɲiningali nunu kɛ ani ka baro kɛ u kan:

I ko Yezu, diinan mɔgɔkɔrɔw b’u jija ka tɔɔw dusu saalo. N’i miirila o la, o be mun lo kɛ i la?
Diinan mɔgɔkɔrɔw be Yezu ladegi cogo wɛrɛ jumanw na?

5. Diinan mɔgɔkɔrɔw ye ɲɛyirali ye tɔɔw fɛ

Yezu b’a fɛ diinan mɔgɔkɔrɔw k’u ka baara jati cogo di? A’ ye VIDEWO filɛ.

VIDEWO: Diinan mɔgɔkɔrɔw, aw ka kɛ ɲɛyirali ye! (7:39)

Balimacɛ minw be kafo ɲɛminɛ, Yezu y’a yira ka gwɛ u ka ɲi k’o kɛ cogo min na. Matiyo 23:8-12 kalan. O kɔ, a’ ye ɲiningali nunu kɛ ani ka baro kɛ u kan:

Bibulu ka fɔta la, diinan mɔgɔkɔrɔw ka ɲi ka koow kɛ cogo di? E ka miiri la, diinan kuntigiw be koow kɛ o cogo la wa?

A. Jaaw: Diinan mɔgɔkɔrɔ b’a janto a yɛrɛ n’a ka denbaya ka Alakow la. Jaa fɔlɔ: A be delili kɛ ka sɔrɔ Bibulu kalan. Jaa 2nan: A muso ka dɛmɛ sababu la, a b’a denmuso kalanna.

B. O diinan mɔgɔkɔrɔ n’a muso tagara bɔ u ka kafo balimamuso dɔ ye min lanin be dɔgɔtɔrɔso.

Diinan mɔgɔkɔrɔw b’u jija olu n’u ka denbayamɔgɔw ka jɛnɲɔgɔnya barikaman kɛ ni Jehova ye.
Diinan mɔgɔkɔrɔw b’u janto kafoden kelen kelen bɛɛ la.
Diinan mɔgɔkɔrɔw be waajuli kɛ tuma o tuma.
Diinan mɔgɔkɔrɔw be kafo kalan. U fana be dɛmɛ don ka batolibon saniya ani ka baara wɛrɛw kɛ.

6. An ka ɲi ka mɛnni kɛ diinan mɔgɔkɔrɔw fɛ

Bibulu b’a yira fɛɛn min kama a kɔrɔtanin lo an ka mɛnni kɛ diinan mɔgɔkɔrɔw fɛ. Eburuw 13:17 kalan. O kɔ, a’ ye ɲiningali nunu kɛ ani ka baro kɛ u kan: