KALANSEN 21
Kibaro diiman waajuli be kɛra cogo di?
Yanni dɔɔni, Jehova bena tɛmɛ a ka Masaya fɛ k’an ka gwɛlɛyaw bɛɛ ban. O ye kibaro diiman yɛrɛ lo ye! Bɛɛ ka ɲi k’a mɛn. Yezu ko a ka kalandenw k’o kibaro fɔ mɔgɔw bɛɛ ye! (Matiyo 28:19, 20). Jehova Seerew b’o cikan labato cogo di?
1. Min fɔra Matiyo 24:14 kɔnɔ, o be dafara cogo di bi?
Yezu tun kɔnna k’a fɔ ko: “Ala ta Masaya Kibaro Diman bɛna fɔ dunuɲa yɔrɔ bɛɛ ra.” (Matiyo 24:14, Biblu Ala ta Kuma). O ye baara ye min kɔrɔtanin lo. Jehova Seerew ninsɔndiyanin lo k’o kɛ. An be kibaro diiman fɔra duniɲa kuru bɛɛ kɔnɔ kaan 1 000 ni kɔ la! O baaraba tɛ ɲɛ jijaliba ni labɛnko ɲuman kɔ. A fana tɛ ɲɛ Jehova ka dɛmɛ kɔ.
2. An be jijali juman lo kɛra ka se ka waajuli kɛ?
Mɔgɔw be sɔrɔ yɔrɔ o yɔrɔ, an be waajuli kɛ yen. An be waajuli kɛ mɔgɔw “ka soow kɔnɔ” i ko kerecɛn fɔlɔw tun b’a kɛ cogo min na (Kɛwaliw 5:42). O waajuli kɛcogo b’a to an be sera ka kibaro diiman fɔ mɔgɔ miliyɔn caaman ye saan o saan. Komi mɔgɔw tɛ sɔrɔ u ka soo tuma bɛɛ, o kama yɔrɔ caaman na, an be waajuli kɛ jamayɔrɔw la fana. An be sababuw ɲini tuma bɛɛ ka kuma mɔgɔw fɛ Jehova n’a sagonata koo la.
3. Kibaro diiman waajuli koo kalifara jɔn lo ma?
Kerecɛn sɔbɛw bɛɛ lo ka kan ka kibaro diiman fɔ mɔgɔw ye. An b’o kunkanbaara ta sɔbɛ la. An b’an seko bɛɛ lo kɛ o baara la sabu an b’a lɔn ko mɔgɔw niin be farati la (1 Timote 4:16 kalan). An t’o baara kɛ sara kama sabu Bibulu b’a fɔ ko: “Aw ka a sɔrɔ gbansan, aw fana ye a di gbansan.” (Matiyo 10:7, 8, Biblu Ala ta Kuma). Bɛɛ tɛ sɔn k’an lamɛn. Nka, an b’an jija o baara la sabu an ka batoli faan dɔ lo, ani o baara be Jehova dusu diya.
A ƝINI KA DƆ LƆN TUGUN
An k’a filɛ Jehova Seerew be jijali min kɛra walisa ka waajuli kɛ duniɲa kuru bɛɛ kɔnɔ. Ani, an k’a filɛ fana Jehova b’an dɛmɛna cogo min na.
U be waajuli kɛ duniɲa faan bɛɛ la: A) Kɔsta Rika, B) Etazini, C) Benɛn, D) Tayilandi, E) Yap, F) Suwɛdi
4. An b’an seko bɛɛ kɛ ka bɛɛ waaju
Jehova Seerew b’u seko bɛɛ kɛ walisa ka kibaro diiman fɔ mɔgɔw ye yɔrɔ bɛɛ la. A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Jehova Seerew be jijali min kɛra waajuli baara la, mun lo b’i kabakoya o la?
Matiyo 22:39 ani Ɔrɔmukaw 10:13-15 kalan. O kɔ, a’ ye ɲiningali nunu kɛ ani ka baro kɛ u kan:
An ka waajuli baara b’a yira cogo di ko an b’an mɔgɔɲɔgɔnw kanu?
Minw be kibaro diiman waajuli kɛ, Jehova be mun lo miiri olu koo la?—Vɛrise 15 lajɛ.
5. An ye Ala baarakɛɲɔgɔnw lo ye
Koo caaman b’a yira ko Jehova lo b’an ɲɛminɛna an ka baara la. Loon dɔ wulafɛ, balimacɛ Pol tun be waajuli kɛra soo ni soo Nuvɛli Zelandi jamana na. A ye muso dɔ sɔrɔ a ka soo. O loon yɛrɛ sɔgɔma, o muso tun ye Ala deli ko a ka mɔgɔ dɔ ci ka na ale dɛmɛ. A ka delili la, a tun ye Ala tɔgɔ weele ko Jehova. Balimacɛ Pol ko: “Lɛri saba o kɔ, n’ sera o muso ka daa la.”
Vɛrise nin kalan: 1 Korɛntikaw 3:9 kalan. O kɔ, a’ ye ɲiningali nin kɛ ani ka baro kɛ o kan:
Koo min kɛra Nuvɛli Zelandi, o ɲɔgɔnw b’a yira cogo di ko Jehova lo b’an ɲɛminɛna waajuli baara la?
Kɛwaliw 1:8 kalan. O kɔ, a’ ye ɲiningali nin kɛ ani ka baro kɛ o kan:
Mun na an mako be Jehova ka dɛmɛ na walisa ka se k’an ka waajuli baara kɛ?
I b’a lɔn wa?
Lɔgɔkun o lɔgɔkun, kerecɛnw ka ɲɛnamaya n’u ka waajuli baara lajɛn na, an be fɔrɔmasɔn sɔrɔ waajuli baara kama. N’i nana o lajɛn dɔ la ka ye, i be mun lo miiri o fɔrɔmasɔn koo la?
6. An be Ala ka cikan labato waajuli koo la
Kerecɛn fɔlɔw kɛlɛbagaw y’a ɲini k’u bali ka waajuli kɛ. Joo min tun b’u fɛ ka waajuli kɛ, u y’o lafasa kititigɛsow la walisa ‘Kibaru Duman . . . sabatinin’ ka to (Filipikaw 1:7, Bible senuma). Jehova Seerew b’o kelen lo kɛ bi.a
Kɛwaliw 5:27-42 kalan. O kɔ, a’ ye ɲiningali nin kɛ ani ka baro kɛ o kan:
Mun na an tɛna waajuli dabila abada?—Vɛrise 29, 38, ani 39 lajɛ.
NI MƆGƆ DƆ Y’I ƝININGA KO: “Mun na Jehova Seerew be taga bɔ mɔgɔw ye soo ni so?”
I bena a tigi jaabi cogo di?
MIIRIYA JƆNJƆN
Yezu y’a ɲini a ka kalandenw fɛ u ka kibaro diiman waajuli kɛ duniɲa faan bɛɛ la. Jehova b’a sagokɛlaw dɛmɛna o baara la.
I ye mun lo faamu?
Kibaro diiman waajuli be kɛra duniɲa faan bɛɛ la cogo di?
An ka waajuli baara b’a yira cogo di ko an b’an mɔgɔɲɔgɔnw kanu?
E ka miiri la, waajuli baara be se ka mɔgɔ wasa wa? Mun na i ko ten?
NUNU LAJƐ FANA
A filɛ cogo min na Jehova Seerew be waajuli kɛ dugubaw kɔnɔ.
Paris : Témoignage public spécifique aux grandes villes (5:11)
Mɔgɔ minw bolila ka na kalifa, Jehova Seerew be jijali juman lo kɛra k’olu waaju?
Mɔgɔ minw bolila ka na kalifa, u b’olu ka Alako nege wasa (5:59)
Kudayi waajulikɛla dɔ b’a lakali a be ninsɔndiya min sɔrɔla o baara la.
An ye see sɔrɔ kitiko dɔw la minw y’a to waajuli baara sabatira.
a Ala lo ye cii di an ma ko an ka waajuli kɛ. O kama, an mako t’a la ka sira deli faamanw fɛ ka sɔrɔ ka kibaro diiman waajuli kɛ.