KALANSEN 22
I be se ka kibaro diiman fɔ mɔgɔw ye cogo di?
I kɛtɔ ka Bibulu ka tiɲɛnkalanw faamu, n’a sɔrɔ i b’a fɔ i yɛrɛ ye ko: “Bɛɛ ka ɲi ka nin mɛn!” Tiɲɛn lo, bɛɛ ka ɲi k’o mɛn! Nka, i ye min kalan, n’a sɔrɔ i sirannin lo dɔɔni k’o fɔ mɔgɔw ye. An k’a filɛ cogo min na i be se ka see sɔrɔ o siranya kan ani ka kibaro diiman fɔ mɔgɔw ye ni dusudiya ye.
1. I be min kalanna, i be se k’o fɔ i lɔnbagaw ye cogo di?
Yezu ka kalandenw y’a fɔ ko: “Anw ye min ye, ka min mɛn, anw te se ka to o fɔbali ye.” (Kɛwaliw 4:20). Yezu tun y’u kalan min na, o diyara u ye fɔɔ u tun b’a fɛ k’o kofɔ mɔgɔ caamanba ye. O kelen lo ele fana fɛ wa? N’o lo, i be min kalanna, sababu dɔw ɲini k’o kofɔ nɛmɛnɛmɛ i somɔgɔw n’i teriw ye.—Kɔlɔsikaw 4:6 kalan.
I be se k’a daminɛ cogo min na
Baro kɛtɔ n’i somɔgɔ dɔ ye, baro dadon Bibulu koo la nin cogo la: “N’ ye fɛɛn diiman dɔ kalan lɔgɔkun nin na.”
N’i teri dɔ man kɛnɛ wala ni hami b’a kan, vɛrise dɔ kalan a ye k’a jija.
N’i baarakɛɲɔgɔn dɔ ye i ɲininga ko ‘koow be di?,’ i ye min kalan lajɛn na wala i ka bibulukalan na, o kofɔ a ye.
Site jw.org yira i teriw la.
A ɲini dɔw fɛ u ka fara i kan i ka bibulukalan na. Wala, a yira u la u be se ka bibulukalan deli cogo min na jw.org kan.
2. Ka waajuli kɛ ni kafo ye, mun na o ye laɲinita ɲuman ye?
Yezu ka kalandenw tun tɛ dan k’u lɔnbagaw dɔrɔn waaju. Yezu “tun ka kan ka taga duguba ni dugudennin minw na, a y’u ci ka taga o yɔrɔw la a yɛrɛ ɲa mɔgɔ fila fila.” (Luka 10:1). O waajuli baara tun labɛnnin lo minkɛ, o ye sababu di mɔgɔ caaman ma ka kibaro diiman mɛn. Yezu ka kalandenw kɛtɔ ka waajuli kɛ ɲɔgɔn fɛ fana, u ye ninsɔndiyaba sɔrɔ o la (Luka 10:17). Yala, e fana be se k’a laɲini ka waajuli kɛ ni kafo ye wa?
A ƝINI KA DƆ LƆN TUGUN
An k’a filɛ i be se ka see sɔrɔ i ka siranya kan cogo min na ani ka ninsɔndiya sɔrɔ kibaro diiman waajuli baara la.
3. Jehova bena i dɛmɛ
Dɔw b’a fɛ ka waajuli kɛ, nka u be siranna tɔɔw bena min fɔ wala u bena min miiri u koo la.
I be min kalanna, i sirannin lo k’o kofɔ tɔɔw ye wa? Mun na do?
A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
O sunguru fila ani kanbele nin ye see sɔrɔ u ka siranya kan cogo di?
Ezayi 41:10 kalan. O kɔ, a’ ye ɲiningali nin kɛ ani ka baro kɛ o kan:
N’i be siran ka waajuli kɛ, delili be se k’i dɛmɛ cogo di?
I b’a lɔn wa?
Jehova Seere caaman tun b’a miiri k’olu tɛna se ka waajuli kɛ ka ye abada. Misali la, Sergey tun be jɔ a yɛrɛ la, ani a tun ka gwɛlɛ a ma ka kuma mɔgɔw fɛ. A y’a fɔ ko: “Hali ni n’ tun sirannin lo, n’ tun be min kalanna Bibulu kɔnɔ, n’ y’a daminɛ k’o fɔ mɔgɔw ye. A barila n’ na k’a ye ko n’ hakili sigira kosɔbɛ, ani n’ ka limaniya ye barika sɔrɔ.”
4. Kuma mɔgɔw fɛ ni bonya ye
N’i b’a fɛ ka kibaro diiman fɔ mɔgɔw ye, miiri k’a filɛ i bena min fɔ, ani i be se k’o fɔ cogo min na fana. 2 Timote 2:24 ani 1 Piyɛri 3:15 kalan. O kɔ, a’ ye ɲiningali nunu kɛ ani ka baro kɛ u kan:
I be se k’o vɛrisew sira tagama cogo di n’i be kumana ni mɔgɔw ye Bibulu koo la?
I ye min fɔ, n’i somɔgɔw wala i teri dɔw ma sɔn o ma, i be se ka mun lo kɛ? Nka, i man kan ka mun lo kɛ?
Mun na a ka fisa i kana ja kelen kan, nka i ka kuma nɛmɛnɛmɛ?
5. Ka waajuli kɛ, o be mɔgɔ ninsɔndiya
Jehova y’a ɲini Yezu fɛ a ka kibaro diiman fɔ mɔgɔw ye. Yezu tun b’o waajuli baara jati cogo di? Zan 4:34 kalan. O kɔ, a’ ye ɲiningali nunu kɛ ani ka baro kɛ u kan:
Dumuni ɲuman be mɔgɔ nafa, ani a dumu ka di. Ka Ala sago kɛ, i n’a fɔ ka mɔgɔw waaju, mun na Yezu y’o suma ni dumuni ye?
Ka kibaro diiman fɔ mɔgɔw ye, mun na o be se k’i ninsɔndiya?
Ladili dɔw
An ka lajɛn na lɔgɔkun kɔnɔ, miiriya dɔw sɛbɛ minw bena i dɛmɛ ka baro daminɛ ni mɔgɔw ye.
Lakɔli dɔ be kɛ o lajɛn na. I bena kalan minw kɛ o lakɔli la, u bena i dɛmɛ i k’i hakili sigi ka kibaro diiman fɔ mɔgɔw ye.
Gafe nin ka barokun nunu be se k’i dɛmɛ i k’i yɛrɛ labɛn ka ɲiningaliw ani sɔsɔli kuma dɔw jaabi: “Ni mɔgɔ dɔ y’a fɔ i ye ko,” ani “Ni mɔgɔ dɔ y’i ɲininga ko.”
NI MƆGƆ DƆ Y’I ƝININGA KO: “A kɛra lafila ye, koow be di?”
I be se ka tɛmɛ o sababu fɛ cogo di k’a fɔ a tigi ye i be min kalanna Bibulu kɔnɔ?
MIIRIYA JƆNJƆN
Ka kibaro diiman fɔ, o be mɔgɔ ninsɔndiya. N’a sɔrɔ i ben’a ye ko a yɛrɛ man gwɛlɛ i ko i tun b’a miiri cogo min na.
I ye mun lo faamu?
Mun na i ka ɲi ka kibaro diiman fɔ mɔgɔw ye?
I be se k’o kɛ cogo di ni bonya ye?
N’i be siran ka waajuli kɛ, i be se ka mun lo kɛ?
NUNU LAJƐ FANA
I be se ka baara kɛ ni jw.org ka ladɛrɛsi sɛbɛ ye ka kibaro diiman fɔ mɔgɔw ye. O kɛcogo naani lajɛ minw ka nɔgɔ.
Jogo naani dɔw, minw be se k’i dɛmɛ ka kibaro diiman fɔ mɔgɔw ye.
“Yala i labɛnnin lo ka kɛ mɔgɔ ɲinila ye wa?” (Saan 2020, sɛtanburukalo ka Kɔrɔsili Sangaso)
Bibulu ka maana dɔ, min be se k’i dɛmɛ ka jagwɛlɛya sɔrɔ ka kibaro diiman fɔ mɔgɔw ye hali n’i ye denmisɛn ye.
I somɔgɔ minw tɛ Jehova lɔn fɔlɔ, i be se ka Jehova kofɔ olu ye cogo min na.
“Touchons le cœur de nos parents non Témoins” (Saan 2014, marisikalo tile 15 ka Kɔrɔsili Sangaso)