Batɛmu: O ye laɲinita ye kuun be min na!

Yezu y’a fɔ ko a ka kalandenw ka kan ka batize (Matiyo 28:19, 20 kalan). Nka, n’u ko ka batize, o kɔrɔ ko di? Ani, mɔgɔ ka kan ka mun lo kɛ walisa ka se ka batize?

1. Batɛmu kɔrɔ ko di?

Kumaden min bayɛlɛmana ko “ka batize,” o ye gɛrɛkikan kumaden dɔ ye min kɔrɔ ko “k’a kuturu bɛɛ don jii kɔnɔ.” Tuma min na u ye Yezu batize, u y’a fari kuturu bɛɛ tunu Zurudɛn baji la, ani o kɔ, Yezu ‘bɔra jii la.’ (Mariki 1:9, 10). Kerecɛn sɔbɛw be batize o cogo kelen lo la: u batize tuma na, u fari kuturu bɛɛ be tunu jii kɔnɔ.

2. Mɔgɔ be mun lo yira a ka batɛmu fɛ?

Ni mɔgɔ batizera, o tigi b’a yira ko a y’a yɛrɛkun di Jehova Ala lo ma. K’i yɛrɛkun di Ala ma, o be kɛ cogo di le? Ka kɔn batɛmulon ɲɛ, a tigi be Jehova Ala deli k’a fɔ a ye ko a b’a fɛ ka baara kɛ a ye fɔɔ abada. A b’a daa di Jehova Ala ma ko a bena ale kelenpe lo bato ani k’a sago kɛli kɛ a ɲɛnako fɔlɔ ye. A tigi b’a latigɛ ka “ban a yɛrɛ ra . . . ka tugu” Yezu kɔ, ani k’a ka kalanw labato (Matiyo 16:24, Biblu Ala ta Kuma). A tigi kɛtɔ k’a yɛrɛkun di Ala ma ani ka batize, o b’a to a be nɛɛma sɔrɔ ka jɛnɲɔgɔnya teriman kɛ ni Jehova Ala ye, ani fana k’a magwɛrɛ Jehova sagokɛlaw la.

3. I ka kan ka mun lo kɛ walisa ka se ka batize?

Sanni i ka batize, i ka kan k’a ɲini ka Jehova Ala lɔn ani ka limaniya a la kosɔbɛ (Eburuw 11:6 kalan). Ni dɔ tora ka fara i ka lɔnniya n’i ka limaniya kan, i be ni kanuya min ye Jehova Ala koo la, o barika bena bonya fana. O la, a bena diya i ye ka waajuli kɛ ani ka Ala ka sariyaw sira tagama (2 Timote 4:2; 1 Zan 5:3). Ni mɔgɔ tagamacogo be “bɛn ni Matigi sago ye,” ani n’a b’a ɲini k’a “koo diya a ye tuma bɛɛ,” a tigi ka teli k’a yɛrɛkun di Ala ma ani ka batize.—Kɔlɔsikaw 1:9, 10.a

A ƝINI KA DƆ LƆN TUGUN

4. An be kalan min sɔrɔ Yezu ka batɛmu koo la

Matiyo 3:13-17 kalan walisa k’a lɔn Yezu batizera cogo min na. O kɔ, a’ ye ɲiningali nunu kɛ ani ka baro kɛ u kan:

• Yezu batize tuma na, a tun ye denɲɛnin ye wa?

• U y’a batize cogo di le? U ye jii dɔɔni lo bɔn a kuun na wa?

Ala tun ye baara min kalifa Yezu ma, a y’o daminɛ a batizenin kɔ. Luka 3:21-23 ani Zan 6:38 kalan. O kɔ, a’ ye ɲiningali nin kɛ ani ka baro kɛ o kan:

• Yezu batizenin kɔ, baara juman lo kɛra a ɲɛnako fɔlɔ ye?

5. I be se ka batɛmu saratiw dafa

N’a sɔrɔ i be siranna dɔɔni k’i yɛrɛkun di Ala ma ani ka batize. Nka dɔɔni dɔɔni, i bena ɲɛtaga kɛ, ani loon dɔ, i ben’a ye ko i prɛnin lo ka batize. N’i b’a fɛ k’a lɔn dɔw sera k’o desizɔnba ta cogo min na, VIDEWO nin filɛ.

VIDEWO: I be se ka jɛnɲɔgɔnya sigi e ni Jehova cɛ cogo min na (1:11)

Zan 17:3 ani Zaki 1:5 kalan. O kɔ, a’ ye ɲiningali nin kɛ ani ka baro kɛ o kan:

• Mɔgɔ be se k’a yɛrɛ labɛn cogo di batɛmu kama?

1. K’i yɛrɛkun di Jehova ma, o kɔrɔ ko k’a fɔ a ye ko i b’a fɛ ka baara kɛ a ye fɔɔ abada.

2. An ka batɛmu fɛ, an b’a yira bɛɛ ɲɛɛ na ko an y’an yɛrɛkun di Ala ma.

6. Batɛmu b’a to an be kɛ Jehova ka denbayamɔgɔ dɔ ye

Batɛmu b’a to an be kɛ denbaya dɔ kɔnɔ min mɔgɔw be duniɲa kuru bɛɛ kɔnɔ. Hali n’an bɔyɔrɔ tɛ kelen ye, an kaan bɛnnin lo, an bɛɛ ka lannakow ye kelen ye, ani an bɛɛ be sariya kelen lo labato tagamacogo ta fan fɛ. Zaburuw 25:14 ani 1 Piyɛri 2:17 kalan. O kɔ, a’ ye ɲiningali nin kɛ ani ka baro kɛ o kan:

• N’i batizera, e ni Jehova ka jɛnɲɔgɔnya bena kɛ cogo di? E n’a sagokɛlaw fana ka jɛnɲɔgɔnya bena kɛ cogo di?

MIIRIYA JƆNJƆN

Yezu y’a fɔ ko kerecɛnw ka kan ka batize. Mɔgɔ min b’a fɛ k’o laɲinita dafa, a tigi ka kan ka limaniya Jehova la kosɔbɛ, k’a ka sariyakolow labato, ani k’a yɛrɛkun di Jehova Ala ma.

I ye mun lo faamu?

• Batɛmu kɔrɔ ye mun ye, ani mun na a kɔrɔtanin lo mɔgɔ ka batize?

• Ni mɔgɔ batizera, a be mun lo yira a ka batɛmu fɛ?

• Mɔgɔ ka ɲi ka mun ni mun lo kɛ walisa ka se k’a yɛrɛkun di Ala ma ani ka batize?

NUNU LAJƐ FANA

A filɛ batɛmu kɔrɔ tigitigi ye min ye.

“Batɛmu kɔrɔ ye mun ye?” (A be sɔrɔ jw.org kan)

Ladili dɔw, minw be mɔgɔ dɛmɛ ka batɛmu saratiw dafa.

“N’an be Jehova kanu ani k’a waleɲuman lɔn, o bena an lasun ka batize” (Saan 2020, marisikalo ka Kɔrɔsili Sangaso)

Cɛɛ dɔ y’a faamu ko a dusukunnakow dama lo man kan k’a lasun ka batize.

“Ils voulaient que je découvre la vérité par moi-même” (Saan 2013, feburukalo tile fɔlɔ ka Kɔrɔsili Sangaso)

Mun na batɛmu ye laɲinita ɲuman ye, ani i be se k’i yɛrɛ labɛn o kama cogo di?

“Devrais-je me faire baptiser ?” (Les jeunes s’interrogent. Réponses pratiques [volume 2], sapitiri 37nan)