KALANSEN 35
An be se ka desizɔn ɲumanw ta cogo min na
An bɛɛ ka teli ka desizɔnw ta. O desizɔn caaman be se k’an dɛmɛ wala ka gwɛlɛyaw lase an ma. U fana be se k’a to an b’an magwɛrɛ Jehova la wala an b’an yɔrɔ janya a la. Misali la, an be se k’a latigɛ n’an bena furu, an bena sigi yɔrɔ min na, wala an bena an ka balo sɔrɔ cogo min na. N’an ye desizɔn ɲumanw ta, an ninsɔn bena diya ani an koo bena diya Jehova ye.
1. Bibulu be se k’an dɛmɛ cogo di ka desizɔn ɲumanw ta?
N’i b’a fɛ ka desizɔn dɔ ta, Jehova deli a k’i dɛmɛ. Ani, Bibulu sɛgɛsɛgɛ walisa k’a lɔn ale be min miiri o koo la (Talenw 2:3-6 kalan). Tuma dɔw la, i bena sariya tigitigi dɔ sɔrɔ o koo la. O la, desizɔn min ka fisa, o ye k’o sariya labato.
Nka ni Bibulu t’a yira ka gwɛ i ka ɲi ka min kɛ do? O bɛɛ n’a ta, Jehova bena i “bila sira” walisa i ka se ka desizɔn ɲuman ta (Ezayi 48:17). Cogo di do? Sariyakolo dɔw be sɔrɔ Bibulu kɔnɔ minw be se k’i dɛmɛ ka Jehova ka miiriya lɔn. N’u ko sariyakolo, o ye hakilinata jɔnjɔn dɔ ye min ye wulibali ye. Bibulu ka maana dɔw be se k’an dɛmɛ k’a lɔn Ala be min miiri koo dɔw la. N’an b’a lɔn Jehova be min miiri, o be se k’an dɛmɛ ka desizɔnw ta minw bɛnnin b’a ma.
2. An ka ɲi ka miiri mun lo la fɔlɔ ka sɔrɔ ka desizɔn dɔ ta?
Bibulu b’a fɔ ko: “Yɛrɛkɔlɔsibaga be jatiminɛ kɛ.” (Talenw 14:15). O kɔrɔ ko n’an b’a fɛ ka desizɔn dɔ ta, an ka ɲi ka wagati ta ka miiri koɲuman fɔlɔ. Jatiminɛ kɛtɔ, i yɛrɛ ɲininga ko: “Bibulu ka sariyakolo juman lo ɲɛsinna o koo ma? Ni n’ y’o desizɔn ta, n’ hakili bena sigi wa? N’ ka desizɔn bena mun lo kɛ tɔɔw la? Min yɛrɛ kɔrɔtanin lo, o bena Jehova ninsɔndiya wa?”—Deteronɔmu 32:29.
Joo be Jehova fɛ k’a fɔ an ye min ka ɲi wala min man ɲi. N’an sera k’a ka sariyaw n’a ka sariyakolow lɔn, ani n’an b’an jija k’u sira tagama, o bena an dɛmɛ ka kɛ ni dusukun ɲuman ye. An kaan be dusukun min ma, o b’an dɛmɛ ka ɲuman ni juguman faranfasi ka lɔn (Ɔrɔmukaw 2:14, 15). N’an y’an dusukun kolo ka ɲɛ, o bena an dɛmɛ ka desizɔn ɲumanw ta.
A ƝINI KA DƆ LƆN TUGUN
An k’a filɛ cogo min na Bibulu ka sariyakolow ani an dusukun be se k’an dɛmɛ ka desizɔnw ta.
3. A to Bibulu k’i ɲɛminɛ
Bibulu ka sariyakolow be se k’an dɛmɛ cogo di ka desizɔn ɲumanw ta? A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Jehova ye see di an ma an ka mun lo kɛ?
Mun na Jehova ye see di an ma an ka desizɔnw ta an yɛrɛ ma?
A ye mun lo di an ma min b’an dɛmɛ ka desizɔn ɲumanw ta?
Efɛzikaw 5:15, 16 kalan. Sariyakolo min be sɔrɔ o vɛrisew kɔnɔ, o ye nin ye: “Waati min b’aw bolo, aw ka banba ka koɲuman kɛ” n’o ye. O sariyakolo be se k’i dɛmɛ cogo di . . .
ka Bibulu kalan tuma o tuma?
ka kɛ furuɲɔgɔn, bangebaga wala deen ɲuman ye?
ka taga kafo ka lajɛnw na?
4. I dusukun kolo walisa i ka se ka desizɔn ɲumanw ta
A ka nɔgɔ ka desizɔn ta koo dɔ la, ni sariya tigitigi dɔ be sɔrɔ Bibulu kɔnɔ o koo la. Nka ni sariya tigitigi si tɛ yen o koo la do? A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Ema ye mun lo kɛ k’a dusukun kolo walisa a ka desizɔn ka diya Jehova ye?
Mun na an man kan k’a ɲini tɔɔw fɛ u ka desizɔn dɔ ta an ye? Eburuw 5:14 kalan. O kɔ, a’ ye ɲiningali nunu kɛ ani ka baro kɛ u kan:
N’a sɔrɔ a ka nɔgɔ ka tɔɔw ɲininga ko u bena mun lo kɛ n’u tun be an nɔɔ na. Nka, an ka ɲi ka banba ka mun lo faranfasi ka lɔn an yɛrɛ ma?
Sɛgɛsɛgɛrikɛ minan jumanw be se k’an dɛmɛ k’an dusukun kolo walisa an ka se ka desizɔn ɲumanw ta?
An dusukun be i n’a fɔ karti, a be sira ɲuman yira an na.
5. I janto tɔɔw dusukun koo la
Mɔgɔw ka desizɔnw tɛ kelen ye. An be se k’a yira cogo di ko an b’an janto tɔɔw dusukun na? An ka koo fila lajɛ:
Koo fɔlɔ: A ka di balimamuso dɔ ye ka pantalɔn don n’a b’a ka baaraw kɛra, wala n’a be n’a teriw ye. Nka, o koo be a ka kafo kura balimaw tɔɔrɔ.
Ɔrɔmukaw 15:1 ani 1 Korɛntikaw 10:23, 24 kalan. O kɔ, a’ ye ɲiningali nunu kɛ ani ka baro kɛ u kan:
Ka kɛɲɛ n’o vɛrisew ye, o balimamuso be se k’a latigɛ ka mun lo kɛ? N’i be ni mɔgɔ dɔ ye, ani i be min kɛra, n’a tigi dusukun tɛ sɔn a k’o ɲɔgɔn kɛ k’a sɔrɔ ele dusukun t’i kɛlɛ, i bena mun lo kɛ do?
Koo 2nan: Ka dɔrɔ min k’a dama kɛɲɛ. Hali ni Bibulu t’o koo kɛlɛ, balimacɛ dɔ y’a latigɛ ko ale tɛna dɔrɔ min. Nka ɲɛnagwɛko dɔ la, a ye balima dɔw ye u be dɔrɔ minna.
Waajulikɛla 7:16 ani Ɔrɔmukaw 14:1, 10 kalan. O kɔ, a’ ye ɲiningali nunu kɛ ani ka baro kɛ u kan:
Ka kɛɲɛ n’o vɛrisew ye, o balimacɛ be se k’a latigɛ ka mun lo kɛ? N’i ye mɔgɔ dɔ ye a be koo dɔ kɛra ele dusukun tɛ sɔn i ka min kɛ, i bena mun lo kɛ do?
N’i b’a fɛ ka desizɔn ɲuman ta:
1. Jehova deli a k’i ɲɛminɛ. —Zaki 1:5.
2. Sɛgɛsɛgɛri kɛ Bibulu n’an ka gafew kɔnɔ walisa k’a lɔn sariyakolo minw ɲɛsinna i ka koo ma. I be se fana ka dɛmɛ ɲini kerecɛn kolɔnbagaw fɛ.
3. Miiri i ka desizɔn nɔfɛkow la: i ka desizɔn bena min kɛ i dusukun na ani mɔgɔ wɛrɛw dusukun na fana.
NI MƆGƆ DƆ Y’A FƆ I YE KO: “Min ka di n’ ye, n’ b’o lo kɛ. Mɔgɔw be min miiri, o tɛ n’ ka sira la.”
Ala be min miiri o koo la, ani mɔgɔw fana be min miiri o koo la, mun na an ka ɲi k’an janto o la?
MIIRIYA JƆNJƆN
N’an b’a fɛ ka desizɔn ɲuman ta, an k’a ɲini k’a lɔn Jehova be min miiri o koo la. Ani fana, an k’a filɛ n’o desizɔn bena tɔɔw dɛmɛ wala n’a bena u tɔɔrɔ.
I ye mun lo faamu?
I be se k’i ka desizɔnw ta cogo di walisa u ka diya Jehova ye?
I be se k’i dusukun kolo cogo di?
I be se k’a yira cogo di ko i b’i janto tɔɔw dusukun koo la?
NUNU LAJƐ FANA
Teriya min be e ni Ala cɛ, n’i b’a fɛ o ka barika sɔrɔ, i ka ɲi ka desizɔnw ta cogo di?
(“Prenons des décisions qui honorent Dieu” Saan 2011, awirilikalo tile 15 ka Kɔrɔsili Sangaso)
A filɛ Jehova b’an ladi cogo caaman minw na.
A filɛ fɛɛn min ye kanbele dɔ dɛmɛ ka desizɔn gwɛlɛn dɔ ta.
Jehova ye garanti di ko a bena fɛɛn ɲuman bɛɛ di an ma (5:46)
Hali ni Bibulu t’a yira ka gwɛ an ka ɲi ka min kɛ, an be se k’an ka desizɔnw ta cogo di walisa u ka diya Jehova ye?
“Vous faut-il un commandement pour tout ?” (Saan 2003, desanburukalo tile fɔlɔ ka Kɔrɔsili Sangaso)