KALANSEN 36
I ka kɛ mɔgɔ hɔɔrɔn ye koo bɛɛ la
An bɛɛ b’a fɛ an teriw ka kɛ mɔgɔ hɔɔrɔnw ye. Jehova fana b’a fɛ a teriw ka kɛ mɔgɔ hɔɔrɔnw ye. Nka, a man nɔgɔ ka kɛ mɔgɔ hɔɔrɔn ye duniɲa nin na sabu mɔgɔ caaman ye nanbaratɔw ye. Nafa juman b’a la ka kɛ mɔgɔ hɔɔrɔn ye koo bɛɛ la?
1. Kuun jɔnjɔn juman kama an ka ɲi ka kɛ mɔgɔ hɔɔrɔn ye?
N’an ye mɔgɔ hɔɔrɔn ye, an b’a yira Jehova la ko an b’a kanu ani ko an be bonya la a kan. Kana ɲinɛ ko Jehova b’an kɔnɔkow n’an ka kɛwalew bɛɛ kala ma (Eburuw 4:13). N’an y’a latigɛ ka kɛ mɔgɔ hɔɔrɔn ye, a b’o lɔn ani o b’a ninsɔndiya. A fɔra a ka Kuma kɔnɔ ko: “Matigi bɛ ɲigin mɔgɔ tilenbaliw la, nka mɔgɔ tilennenw teri don.”—Talenw 3:32, Bible senuma.
2. An b’a yira cogo di ko an ye mɔgɔ hɔɔrɔn ye loon o loon?
Jehova b’a fɛ an ka kɛ ‘tiɲɛnfɔbagaw ye an ni ɲɔgɔn cɛ.’ (Zakari 8:16, 17). O kɔrɔ ko di? N’an be kumana n’an somɔgɔ, an balima, an ka baarakɛɲɔgɔn wala faaman dɔ ye, an tɛ ngalon tigɛ ani an tɛ kunnafoni dɔw di u ma minw be se k’u lafili. Mɔgɔ hɔɔrɔn tɛ mɔgɔ sonya wala k’a nanbara (Talenw 24:28 ani Efɛzikaw 4:28 kalan). A fana b’a ka lanpow bɛɛ sara (Ɔrɔmukaw 13:5-7). An b’a yira o cogo la ani cogoya wɛrɛw la ko an ‘tagamacogo ka ɲi tuma bɛɛ.’—Eburuw 13:18.
3. Nafa juman b’a la ka kɛ mɔgɔ hɔɔrɔn ye?
Ni tɔɔw b’a lɔn ko an ye mɔgɔ hɔɔrɔn ye, u be la an na. O b’a to bɛɛ hakili be sigi kafo kɔnɔ ani kafomɔgɔw be ɲɔgɔn kanu i ko denbayamɔgɔw. O b’a to fana an be kɛ ni dusukun ɲuman ye. N’an ye mɔgɔ hɔɔrɔn ye, o b’an “kisibaga Ala ka [kalan] boɲa.” Ani, o be mɔgɔw lasun u k’a ɲini ka Jehova lɔn.—Titi 2:10.
A ƝINI KA DƆ LƆN TUGUN
N’an ye mɔgɔ hɔɔrɔn ye, o be mun lo kɛ Jehova la ani an yɛrɛ la fana? An k’o koo lajɛ sisan. Ani, an k’a filɛ cogo min na an be se ka kɛ mɔgɔ hɔɔrɔn ye koo tigitigi dɔw la.
4. Ka kɛ mɔgɔ hɔɔrɔn ye, o be Jehova ninsɔndiya
Zaburuw 44:22 ani Malasi 3:16 kalan. O kɔ, a’ ye ɲiningali nunu kɛ ani ka baro kɛ u kan:
K’a miiri ko an be se ka tiɲɛn munumunu, mun na o tɛ hakilitigiyako ye?
E ka miiri la, n’an y’a latigɛ ka tiɲɛn fɔ hali n’a ka gwɛlɛ an ma k’o kɛ, o be mun lo kɛ Jehova la?
Ni denmisɛnw be tiɲɛn fɔ, o b’u wolobagaw ninsɔndiya. O cogo kelen na, n’an be tiɲɛn fɔ, o be Jehova ninsɔndiya.
5. I ka kɛ mɔgɔ hɔɔrɔn ye tuma bɛɛ
Mɔgɔ caaman b’a miiri ko ka koow kɛ hɔɔrɔnya la, o tɛ mɔgɔ nafa tuma bɛɛ. Nka, an k’a filɛ fɛɛn min kama an ka ɲi ka kɛ mɔgɔ hɔɔrɔnw ye tuma bɛɛ. A’ ye VIDEWO filɛ.
Eburuw 13:18 kalan. Ani, a’ ye baro kɛ k’a filɛ cogo min na an be se ka kɛ mɔgɔ hɔɔrɔn ye . . .
denbaya kɔnɔ,
baarakɛyɔrɔ wala lakɔliso la,
koo wɛrɛw la.
6. Ka kɛ mɔgɔ hɔɔrɔn ye, o be mɔgɔ nafa
A daminɛ na, a be se ka kɛ i ɲɛɛ na ko n’i be koow kɛ hɔɔrɔnya la, i bena gwɛlɛyaw lo sɔrɔ. Nka kɔfɛ, i bena a ye k’o lo ɲɔgɔn tɛ yen. Zaburuw 34:13-17 kalan. O kɔ, a’ ye ɲiningali nin kɛ ani ka baro kɛ o kan:
Ka koow kɛ hɔɔrɔnya la, o be mɔgɔ ka ɲɛnamaya kɛcogo fisaya cogo di?
Ni cɛɛ n’a muso be koow kɛ hɔɔrɔnya la, u ka furu be sabati.
Ni baaraden ye mɔgɔ hɔɔrɔn ye, o b’a to a ka patɔrɔn be la a la.
N’an be koow kɛ hɔɔrɔnya la, an be tɔgɔ ɲuman sɔrɔ faamanw ɲɛɛ kɔrɔ
NI MƆGƆ DƆ Y’A FƆ I YE KO: “Ngalon dennin tɛ koo jugu ye.”
E ka miiri la, mun na ngalon sifaw bɛɛ ka gwo Jehova ye?
MIIRIYA JƆNJƆN
Jehova b’a fɛ a teriw ka kɛ mɔgɔ hɔɔrɔnw u ka kumaw n’u ka kɛtaw bɛɛ la.
I ye mun lo faamu?
Cogoya jumanw na an b’a yira ko an ye mɔgɔ hɔɔrɔn ye?
K’a miiri ko an be se ka tiɲɛn munumunu, mun na o tɛ hakilitigiyako ye?
Mun na i ka ɲi ka kɛ mɔgɔ hɔɔrɔn ye tuma bɛɛ?
NUNU LAJƐ FANA
Cogo juman na bangebagaw be se k’u deenw dɛmɛ u ka kɛ mɔgɔ hɔɔrɔnw ye?
Nafa juman b’a la k’an ka layiduw dafa?
A filɛ fɛɛn min kama i ka ɲi k’i ka lanpow sara hali n’a b’i ɲɛɛ na ko faamanw tɛ baara ɲuman kɛ ni mɔgɔw ka lanpow ye.
“Faut-il payer ses impôts ?” (Saan 2011, sɛtanburukalo tile fɔlɔ ka Kɔrɔsili Sangaso)
A filɛ fɛɛn min ye cɛɛ nanbaratɔ dɔ dɛmɛ k’a ka ɲɛnamaya kɛcogo yɛlɛma.