KALANSEN 13
Ngalon diinanw be Ala tɔgɔ tiɲɛ
Ni Ala ye kanuya ye, mun na diinanw be koo jugu caaman kɛ ten k’a sɔrɔ u b’a fɔ k’u be Ala sago lo kɛra? Tiɲɛn na, o diinanw ye ngalon diinanw lo ye ani u be Ala tɔgɔ tiɲɛna le. Cogo juman na do? O koo be mun lo kɛ Ala la? Ani a bena mun lo kɛ o diinanw na?
1. Ngalon diinanw be Ala tɔgɔ tiɲɛ u ka kalanw fɛ. Cogo di do?
Ngalon diinanw “ye Ala ka tiɲɛ to yen, ka tugu galon kɔ.” (Ɔrɔmukaw 1:25). Diinan caaman m’u ka diinandenw kalan ko Ala tɔgɔ ko Jehova. K’a sɔrɔ, Bibulu b’a fɔ ko an ka kan ka Ala tɔgɔ fɔ (Ɔrɔmukaw 10:13, 14). Ka fara o kan, ni kojuguba dɔ kɛra, diinan kuntigi dɔw b’a fɔ ko Ala ka latigɛ lo. Nka, o ye ngalon lo ye. Kojugu tɛ Ala nɔɔ ye abada (Zaki 1:13 kalan). A fɔ man di, nka o ngalonw kosɔn, mɔgɔ dɔw y’u mabɔ Ala la.
2. Ngalon diinanw be Ala tɔgɔ tiɲɛ u ka kɛwalew fɛ. Cogo di do?
Ngalon diinanw tɛ mɔgɔw minɛ i ko Jehova Ala b’a kɛ cogo min na. Bibulu b’a fɔ ko ngalon diinanw ka “hakɛ . . . farafarala ɲɔgɔn kan fɔɔ ka se sankolo la.” (Yirali 18:5). Kabi galen, diinanw b’u niin don politikikow la ani u be dɛmɛ don kɛlɛkow la. U y’a kɛ mɔgɔ caamanba sara. Diinan kuntigi dɔw be wari deli u ka diinandenw fɛ walisa ka se k’u ka ɲɛnamaya kɛ faamanya la. O koow bɛɛ b’a yira k’o diinan kuntigiw tɛ Ala lɔn yɛrɛ le, kuma tɛ k’a fɔ ko u ye Ala ka lasigidenw ye.—1 Zan 4:8 kalan.
3. Ala be mun lo miiri ngalon diinanw koo la?
Ngalon diinanw be koo minw kɛ, o t’i dusu gwan wa? Miiri k’a filɛ o be min kɛ Jehova Ala la. Jehova be mɔgɔw kanu. O kama, diinan kuntigi minw b’a tɔgɔ tiɲɛ ani u b’u ka diinandenw niin tɔɔrɔ, a diminin lo olu kɔrɔ. A ye layidu ta ko a bena ngalon diinanw halaki ani ko u “tena ye tugu.” (Yirali 18:21). Yanni dɔɔni, a bena ngalon diinanw bɛɛ halaki.—Yirali 18:8.
A ƝINI KA DƆ LƆN TUGUN
Ala be min miiri ngalon diinanw koo la, an ka koo wɛrɛ lajɛ o koo la. An k’a filɛ ngalon diinanw ye koo wɛrɛ minw kɛ. Ani, an k’a filɛ fɛɛn min kama o man kan k’i bali k’a ɲini ka tiɲɛn lɔn Jehova Ala koo la.
4. Ala tɛ sɔn diinanw bɛɛ la
Mɔgɔ caaman b’a miiri ko hali ni diinanw tɛ sira kelen ye, u bɛɛ be taga Ala kelen lo yɔrɔ. O ye tiɲɛn ye wa? Matiyo 7:13, 14 kalan. O kɔ, a’ ye ɲiningali nin kɛ ani ka baro kɛ o kan:
Bibulu be mun lo fɔ ɲɛnamaya banbali sira koo la?
A’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
Yala Bibulu b’a fɔ ko diinan caaman lo ka di Ala ye wa?
5. Ngalon diinanw tɛ Ala ka kanuya ladegi
Diinanw be Ala tɔgɔ tiɲɛ cogo caaman na. U be Ala tɔgɔ tiɲɛ koo min na yɛrɛ, o ye ko u b’u seen don kɛlɛkow la. A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:
Legilizi caaman ye mun lo kɛ duniɲa ka kɛlɛba 2nan tuma na?
U ye min kɛ, e be mun lo miiri o koo la?
Zan 13:34, 35 ani 17:16 kalan. O kɔ, a’ ye ɲiningali nunu kɛ ani ka baro kɛ u kan:
Ni diinanw b’u seen don marifakɛlɛ koo la, Jehova be mun lo miiri o koo la?
Kojugu caaman minw kɛra, o ye ngalon diinanw nɔɔ lo ye. I be se ka koo dɔw fɔ minw b’a yira ko diinanw ma Ala ka kanuya ladegi wa?
Ngalon diinanw tɛ Ala ka kanuya ladegi.
6. Ala b’a fɛ ka mɔgɔw dɛmɛ u ka bɔ ngalon diinanw na
Yirali 18:4 kalan.a O kɔ, a’ ye ɲiningali nin kɛ ani ka baro kɛ o kan:
I ko o vɛrise b’a yira cogo min na, ngalon diinanw ye mɔgɔ minw lafili, Ala b’a fɛ k’u dɛmɛ. O be mun lo kɛ i la?
7. To k’a ɲini ka tiɲɛn Ala lɔn
Ngalon diinanw ka kɛwalew kosɔn, i ka miiriya ka ɲi ka yɛlɛma Ala koo la wa? Miiri kanbele dɔ koo la min banna a facɛ ka ladili ɲumanw na. A bɔra a faa ka luu kɔnɔ ani a tora ka koo kunntanw kɛ. A ka kɛwalew man di a faa ye. Mun na a bɛnnin tɛ k’o facɛman jalaki a dencɛ ka murutiliko kosɔn?
Ngalon diinanw be min kɛra, yala a bɛnnin lo ka baga Jehova Ala ma o kosɔn ani k’a fɔ ko an tɛn’a ɲini ka Jehova lɔn tugun wa?
NI MƆGƆ DƆ Y’A FƆ I YE KO: “N’ t’a fɛ ka Ala koo mɛn tugun sabu diinanw ka kɛwale juguw ka ca kojugu.”
E fana b’o lo miiri wa?
Mun na ngalon diinanw ka kɛwalew man kan k’a to an be kɛ ni miiriya jugu ye Jehova koo la?
MIIRIYA JƆNJƆN
Ngalon diinanw ye Ala tɔgɔ tiɲɛ u ka kalanw n’u ka kɛwale juguw fɛ. Ala bena u halaki.
I ye mun lo faamu?
I be mun lo miiri ngalon diinanw ka kalanw n’u ka kɛwalew koo la?
Jehova be mun lo miiri ngalon diinanw koo la?
Ala bena mun lo kɛ ngalon diinanw na?
NUNU LAJƐ FANA
Diinan sifa fila minw man di Ala ye.
“Yala diinanw bɛɛ ye kelen ye wa? U bɛɛ be mɔgɔ ɲɛsin Ala ma tiɲɛn na wa?” (A be sɔrɔ jw.org kan)
Mun na Jehova b’a fɛ an ka jɛn ni mɔgɔ wɛrɛw ye k’ale bato?
“Yala kuun b’a la ka kɛ diinan jɛnkulu dɔ la wa?” (A be sɔrɔ jw.org kan)
Mɔnpɛricɛ dɔ y’a daminɛ ka sigasiga a ka diinan koo la. Nka, o m’a bali k’a ɲini ka tiɲɛn lɔn Ala koo la.
“Pourquoi un prêtre a quitté son Église” (Saan 2015, feburukalo ka Réveillez-vous !)
Kabi galen, diinanw be ngalon kalan kɛ Ala koo la. O y’a to mɔgɔw b’a miiri ko Ala t’a janto an na ani ko a ka fari. A filɛ Bibulu be min fɔ o koo la.
“Des mensonges qui empêchent d’aimer Dieu” (Saan 2013, novanburukalo tile fɔlɔ ka Kɔrɔsili Sangaso)
a N’i b’a fɛ k’a lɔn fɛɛn min kama Yirali ka kitabu b’a fɔ ko ngalon diinanw be i n’a fɔ muso dɔ min be weele ko Babilonɛba, kunnafoni wɛrɛw no 1 lajɛ.