1 Chronicle
14 Ndien Hiram+ edidem Tyre+ ọdọn̄ mme isụn̄utom ọnọ David, onyụn̄ ọnọ mme eto cedar+ ye mme andibọp ibibene ye mme anamusọ eto man ẹkebọp ufọk+ ẹnọ enye. 2 Ndien David edifiọk ete ke Jehovah ọsọn̄ọ+ itie imọ nte edidem Israel, koro ẹma ẹmenede itie edidem esie ke enyọn̄ ke ntak ikọt esie Israel.+
3 Ndien David ọdọ iban+ efen ke Jerusalem, David onyụn̄ obon nditọiren ye nditọiban efen efen.+ 4 Ndien mmọ emi ẹdi enyịn̄ nditọ emi enye ekenyenede ke Jerusalem: Shammua+ ye Shobab,+ Nathan+ ye Solomon,+ 5 ye Ibhar+ ye Elishua ye Elpelet,+ 6 ye Nogah ye Nepheg+ ye Japhia, 7 ye Elishama+ ye Beeliada ye Eliphelet.+
8 Ndien mbon Philistia ẹtie ẹkop ke ẹma ẹyet David aran nte edidem ofụri Israel.+ Ntem kpukpru mbon Philistia ẹdọk ẹdiyom David.+ Ke ini David okopde n̄kpọ emi, enye ọwọrọ aka ndin̄wana ye mmọ. 9 Ndien mbon Philistia ẹbụmede ẹdi en̄wan ke unaisọn̄ itịghede Rephaim.+ 10 Ndien David obụp Abasi,+ ete: “Nte ndọk n̄kan̄wana ye mbon Philistia, nte afo ayada mmọ esịn mi ke ubọk?” Ntem Jehovah ọbọrọ enye ete: “Dọk ka, nyada mmọ nsịn fi ke ubọk.” 11 Ntre David ọdọk aka Baal-perazim+ okowot mmọ do. Ndien David ọdọhọ ete: “Ata Abasi amada ubọk mi asiak odụk ufọt mme asua mi nte ufan̄ emi mmọn̄ asiakde ebe.” Ntak edi oro mmọ ẹkotde ebiet+ oro Baal-perazim. 12 Ntem mmọ ẹkpọn̄ mme abasi mmọ do.+ Ekem David ọnọ uyo, ndien ẹfọp mmọ ke ikan̄.+
13 Ekem mbon Philistia ẹtọn̄ọ ntak ẹbụmede ẹdi en̄wan ke unaisọn̄ itịghede oro.+ 14 Ntem David ọtọn̄ọ ntak obụp+ uyo Abasi, ndien ata Abasi ọbọrọ enye ete: “Kûdọk ubịne mmọ. Wọn̄ọde kọbiọn̄ọ mmọ edem edem, nyụn̄ to n̄kan̄ iso iso ikọt eto baca bịne mmọ.+ 15 Ndien ama ekem, ke ini afo okopde uyom ntịm ikpat ke mbuot eto baca,+ adan̄aoro ke afo ediwọrọ akan̄wana,+ koro ata Abasi edibemde fi+ iso ọwọrọ akan̄wana ye udịmekọn̄ Philistia.” 16 Ntre David anam kpa nte ata Abasi okowụkde enye,+ mmọ ẹnyụn̄ ẹwot mbonekọn̄ Philistia ẹnyụn̄ ẹbịne mmọ ọtọn̄ọde ke Gibeon+ tutu esịm Gezer.+ 17 Ndien etop+ David ọwọrọ ekesịm ofụri isọn̄, Jehovah onyụn̄ anam ndịk esie omụm kpukpru mme idụt.+