Yak mme owo ẹdiọn̄ọ fi nte owo emi enyenede eti ibuot. Bụp idemfo: ‘Ndi mme owo ẹda mi nte owo emi enyenede eti ibuot, owo emi mîsidọhọke yak ọsọn̄ ke eke esie, owo emi mîsidaha owo efen emi mînamke n̄kpọ nte enye akpanamde nte asua? Ndi ẹda mi nte owo emi edide mma ntọ mmọtọ, owo emi esitopde mbon en̄wen nte ata, owo emi edide ẹtịn̄ ẹkak anam se ekerede? Ndi mmesikpan̄ utọn̄ n̄kop se mbon en̄wen ẹkerede, eke mmọ mîdiọkke, ami nnyịme?’ Adan̄a nte iwụtde ke imenen̄ede inyene eti ibuot, ntre ke itetịm ikpebe Jehovah ye Jesus. Ọfọn inyene eti ibuot ini n̄kpọ okpụhọrede ke uwem nnyịn. Mfịna m̀mê idiọk udọn̄ọ emi nnyịn mîkodorike enyịn ekeme ndisịm nnyịn. Mîdịghe, nte n̄kpọ ọsọn̄de m̀mê ndutịme ke ukara ekeme ndinam uwem enen̄ede ọsọn̄ ye nnyịn. (Eccl. 9:11) Ẹkpekpụhọ utom nnyịn ke esop Abasi mîdịghe ẹdọhọ ikodu ke ebiet en̄wen inam n̄kpọ Abasi, enye oro n̄ko ekeme ndidi n̄kpọ mfịna nnọ nnyịn. Edieke inamde n̄kpọ inan̄ emi idisiakde mi, ebiet emi uwem ọwọn̄ọrede aka, iyọwọn̄ọde itiene nte n̄kpọ itịbeke: (1) da uwem nte okụtde idahaemi, (2) sio ekikere fep ke se ima ikebebe, sịn ekikere ke ini iso, (3) sịn ekikere ke nti n̄kpọ emi ẹtịbede ẹnọ fi, (4) nam n̄kpọ nọ mbon en̄wen. w23.07 22 ¶7-8

Ini mbon Babylon ẹmụmde prọfet Daniel ke Jerusalem ẹka Babylon emi okoyomde usụn̄ etieti, Daniel ekedi ekpri akparawa. Edi se ikanamde Daniel odụk mmọ enyịn ekedi ke enye ‘ikobiomoke baba ndo kiet, ẹye idem,’ afiak oto udịm ubon ndidem. (1 Sam. 16:7) Oro akanam mbon Babylon ẹkpep enye n̄kpọ man enye odu ke ufọk ubọn̄ edidem mmọ. (Dan. 1:3, 4, 6) Jehovah akama Daniel ke ntak utọ owo emi ekpri akparawa oro ekemekde ndidi. Ini Jehovah etịn̄de eti ikọ aban̄a Noah ye Job emi ẹma ẹkenam n̄kpọ Abasi ke ediwak isua ẹnyụn̄ ẹnyene eti enyịn̄ ye Abasi, Jehovah ama asiak Daniel. Ini Jehovah etịn̄de ikọ oro, etie nte Daniel ikọyọhọke kan̄a isua 20; ekpededi ama ọyọhọ, ikesịmke isua 25. (Gen. 5:32; 6:9, 10; Job 42:16, 17; Ezek. 14:14) Jehovah ama aka iso ama Daniel ke ofụri eyouwem esie. Mme akpan n̄kpọ ẹma ẹtịbe ke eyouwem Daniel, enye ama onyụn̄ ebịghi uwem.​—Dan. 10:11, 19. w23.08 2 ¶1-2

Okpoyom ndidep ufọk, akpama ndika ke idem n̄kese man ọdiọn̄ọ kpukpru n̄kpọ aban̄a ufọk emi oyomde ndidep do ndụn̄. Imekeme ndinam mbiet n̄kpọ oro ima ikot inyụn̄ ikpep Bible. Okpokot Bible itọk itọk, eyekpep n̄kpọ. Edi etie nte n̄kukụre se edikpepde edidi “mme akpa editọn̄ọ n̄kpọ ke edisana ikọ Abasi.” (Heb. 5:12) Utu ke anam ntre, nam se akpanamde ye ufọk emi oyomde ndidep, dụk “esịt,” oro edi, da ini dụn̄ọde se idude ke Bible man enen̄ede an̄wan̄a fi. Ata eti usụn̄ ndikpep Bible edi ndise nte nsio nsio etop ke esịt esie ẹsan̄ade n̄kpọ. Domo ndinen̄ede ndiọn̄ọ mme akpanikọ emi afo enịmde ye ntak emi enịmde mmọ. Ikpoyom Ikọ Abasi an̄wan̄a nnyịn mfọn mfọn, enyene ndusụk akpan n̄kpọ ke esịt esie emi anade ida ini ikpep. Apostle Paul ọkọdọhọ nditọete esie ẹtịm ekpep Ikọ Abasi man mmọ ẹkpekeme nditiene “mfiọk ọyọhọ ọyọhọ se idide ubom ye uniọn̄ ye ukon̄ ye utụn̄ọ” akpanikọ. Mmọ ẹma ẹnam ntre, mmọ ẹyenen̄ede “[ẹdọn̄] n̄kam ẹnyụn̄ ẹsọn̄ọ ẹwụhọ” ke mbuọtidem mmọ. (Eph. 3:14-19) Se anade nnyịn n̄ko inam edi oro. w23.10 18 ¶1-3