Ikwọ Solomon
5 “O eyeneka mi an̄wan,+ n̄wanndọ+ mi, mmodụk in̄wan̄+ mi. Mmetet myrrh+ mi ọkọrọ ye ufuọn̄n̄kpọ mi. Mmadia obukpa ọkwọk mi ọkọrọ ye aranọkwọk+ mi; mmọn̄wọn̄ wine mi ọkọrọ ye mmọn̄eba mi.”
“O mme ufan mi, mbufo ẹdia! Ẹn̄wọn̄ ẹnyụn̄ ẹyụhọ ima!”+
2 “Ami mmede, edi esịt mi idehe.+ N̄kop nte ama mi ọkọn̄de usụn̄!”+
“Berede nọ mi,+ O eyeneka mi an̄wan, ufan mi an̄wan, ibiom mi, emi mînyeneke ndo!+ Koro mbara ọyọhọde mi ibuot, mbara okoneyo+ ọyọhọ mi idet.”
3 “‘Mmosio ewụra mi. N̄keme didie ndifiak nsịne enye? Mmeyet ukot mi. N̄keme didie ndidehe mmọ?’ 4 Ama mi osio ubọk esie ke odudu usụn̄ efep, ndien esịtidem+ etịmede mi. 5 Ami ndaha ke enyọn̄ nte mberede usụn̄ nnọ ama mi, ndien ubọk mi ọtọi myrrh, nnuenubọk mi onyụn̄ ọtọi mmọn̄ mmọn̄ myrrh ke odudu usịnusụn̄. 6 Ami mberede usụn̄ nnọ ama mi, edi ama mi ama adaha, enye ama ebe ọnyọn̄. Ukpọn̄ mi ama eyemede ke ini enye etịn̄de ikọ. Ami nyom enye, edi n̄kwe.+ N̄kot enye, edi enye iyereke mi. 7 Mbon ukpeme+ emi ẹsan̄ade ẹkanade obio ẹkụt mi. Mmọ ẹmia mi, ẹnọ mi unan. Mbon ukpeme ibibene+ ẹfụhọde mi akamba ufụkiso mi.
8 “O nditọiban Jerusalem,+ mmowụk+ mbufo nte, edieke mbufo ẹkụtde ama mi,+ mbufo ẹdọhọ enye ẹte ke ami ndọn̄ọ ima.”+
9 “O afo emi eyede akan ke otu iban,+ ama fo akan ama efen ke nso?+ Ama fo akan ama efen ke nso, emi anamde fi owụk nnyịn utọ ewụhọ emi?”+
10 “Ama mi afia onyụn̄ eyịbe, ata n̄wọrọnda ke otu tọsịn duop.+ 11 Ibuot esie edi gold, kpa gold emi ẹdụhọrede. Idet esie ebiet uyọ mfri date. Obubịt idet esie ebiet raven. 12 Enyịn esie ẹbiet mme ibiom emi ẹsọrọde ke mben mmọn̄, emi ẹyerede idem ke mmọn̄eba. 13 Mfụk esie ebiet in̄wan̄ ufuọn̄n̄kpọ,+ tọwa edifuọn̄ ikọn̄. N̄kpọkinua esie ẹdi ekpon̄idịm emi ẹtọide mmọn̄ mmọn̄ myrrh.+ 14 Ubọk esie ẹdi gold, ọyọhọ ye chrysolite. Idịbi esie edi ubak nnụkenen emi ẹfụkde sapphire. 15 Ukot esie ẹdi mme adaha marble emi ẹwụhọde ke etak emi ẹdade gold emi ẹdụhọrede ẹnam. Idem esie etie nte Lebanon, eye nte eto cedar.+ 16 Nsịn̄ esie enịn̄e, ndien kpukpru n̄kpọ ke idem esie ẹyeye ke kpukpru usụn̄.+ Ama mi edi emi, ufan mi eren edi emi, O nditọiban Jerusalem.”