Deuteronomy
16 “Ti ọfiọn̄ Abib,+ nyụn̄ nịm usọrọ passover nọ Jehovah Abasi fo,+ koro ke ọfiọn̄ Abib ke Jehovah Abasi fo okosio fi ke Egypt ke okoneyo.+ 2 Afo onyụn̄ enyene ndiwa passover, eke osiode ke otuerọn̄ ye ke otu enan̄,+ nnọ Jehovah Abasi fo,+ ke ebiet emi Jehovah edimekde ndinam enyịn̄ esie odu.+ 3 Kûdia baba n̄kpọ kiet eke leaven odude ukọrọ ye enye ke usen itiaba.+ Afo edita enye ye uyo eke leaven mîdụhe, kpa uyo ukụt, koro mbufo ẹkewọrọde itọk itọk ke isọn̄ Egypt,+ man afo ekpeti usen emi ọkọwọrọde ke isọn̄ Egypt kpukpru usen uwem fo.+ 4 Ndomuyo eke leaven odude inyeneke ndidu ye afo ke ofụri obio fo ke usen itiaba,+ obụk unam ekededi emi afo ediwade ke mbubreyo akpa usen inyụn̄ inyeneke ndidu ofụri okoneyo tutu eyo esiere.+ 5 Owo idiyakke fi awa passover ke ekededi ke otu mme obio fo emi Jehovah Abasi fo ọnọde fi. 6 Edi ke ebiet emi Jehovah Abasi fo edimekde ndinam enyịn̄ esie odu+ ke afo ediwa passover ke mbubreyo ke ndondo oro utịn osopde,+ ke n̄kemn̄kem ini emi afo ọkọwọrọde ke Egypt. 7 Ndien afo editem onyụn̄ ata+ enye ke ebiet emi Jehovah Abasi fo edimekde,+ ndien ke usenubọk afo ọyọwọn̄ọde iso ọnyọn̄ mme tent fo. 8 Afo edita uyo eke leaven mîdụhe ke usen itiokiet; ndien ke ọyọhọ usen itiaba nịm edisana esop nọ Jehovah Abasi fo.+ Kûnam utom ke esịt.
9 “Bat urua itiaba nọ idemfo. Ọtọn̄ọde ke akpa usen emi ẹsịnde ofụt ukpen̄e ke barley emi adade ke etak, afo ọyọtọn̄ọ ndibat urua itiaba.+ 10 Ndien afo enyene ndinịm usọrọ mme urua nnọ Jehovah Abasi fo,+ nte ekemde ye uwa unyịmesịt emi afo edinọde, kpa nte Jehovah Abasi fo ọdiọn̄de fi.+ 11 Afo onyụn̄ enyene ndidat esịt ke iso Jehovah Abasi fo,+ afo ye eyeneren fo ye eyenan̄wan fo ye ofụn eren fo ye ofụn an̄wan fo ye eyen Levi emi odude ke obio fo ye esenowo+ ye eyenakpa+ ye ebeakpa,+ emi ẹdude ke otu fo, ke ebiet emi Jehovah Abasi fo edimekde ndinam enyịn̄ esie odu.+ 12 Nyụn̄ ti ete ke afo ekedi ofụn ke Egypt,+ afo onyụn̄ enyene ndinịm nnyụn̄ nnam mme ewụhọ emi.+
13 “Afo enyene ndinịm usọrọ mme ataya+ usen itiaba ke ini afo atan̄de mbun̄wụm fo ke ọtọ udịghi wheat fo ye ke ọtọ unyịmi aran fo ye obube unyịmi wine. 14 Ndien afo enyene ndidat esịt ke ini usọrọ fo,+ afo ye eyeneren fo ye eyenan̄wan fo ye ofụn eren fo ye ofụn an̄wan fo ye eyen Levi ye esenowo ye eyenakpa ye ebeakpa, emi ẹdude ke obio fo. 15 Afo edinịm usọrọ ke usen itiaba+ ọnọ Jehovah Abasi fo ke ebiet emi Jehovah edimekde, koro Jehovah Abasi fo ọyọdiọn̄+ fi ke kpukpru mbun̄wụm fo ye ke kpukpru utom ubọk fo, ndien kûtre ndidat esịt.+
16 “Yak kpukpru nditọiren fo ẹdi ke iso Jehovah Abasi fo utịm ikata ke isua ke ebiet emi enye edimekde:+ ke usọrọ uyo eke leaven mîdụhe+ ye ke usọrọ mme urua+ ye ke usọrọ mme ataya,+ ndien yak baba owo kiet okûdi ke iso Jehovah ubọk ubọk.+ 17 Enọ emi owo kiet kiet edidade edi ekpenyene ndikem ye edidiọn̄ emi Jehovah Abasi fo ọnọde fi.+
18 “Mek mme ebiereikpe+ ye ikpọ owo+ nịm ke kpukpru inuaotop obio fo emi Jehovah Abasi fo ọnọde fi ke esien ke esien, man mmọ ẹkpe ikpe mbio obio ke edinen ido. 19 Kûkwan̄a ikpe.+ Kûnam asari,+ kûnyụn̄ ubọ ubọkedem, koro ubọkedem ekịmde mbon ọniọn̄ enyịn+ onyụn̄ anamde ndinen owo ẹkwan̄a ikọ. 20 Nam se inende+ man okpodu uwem, okponyụn̄ ada isọn̄ oro Jehovah Abasi fo ọnọde fi enyene.+
21 “Kûtọ orụk eto ekededi nte eto utuakibuot ukpere itieuwa Jehovah Abasi fo emi afo edinamde.+
22 “Kûnyụn̄ uwụk adaha utuakibuot+ unọ idemfo, kpa n̄kpọ emi Jehovah Abasi fo asuade.+