1 Thessalonica
4 Ke akpatre, nditọete, nnyịn iben̄e mbufo inyụn̄ iteme mbufo ke Ọbọn̄ Jesus ite, kpa nte mbufo ẹkebọde item ẹto nnyịn ke nte mbufo ẹkpesan̄ade+ ẹnem Abasi esịt, kpa nte mbufo ẹsụk ẹsan̄ade, mbufo ẹka iso ẹnam ntre ata ọyọhọ ọyọhọ.+ 2 Koro mbufo ẹmefiọk mme ewụhọ+ oro nnyịn ikọnọde mbufo ke enyịn̄ Ọbọn̄ Jesus.
3 Koro emi edi uduak Abasi, ete mbufo ẹkabade ẹsana,*+ ete mbufo ẹbet use;+ 4 man owo mbufo kiet kiet ọkpọfiọk nte akpakarade ndido+ esie ke edisana ido+ ye ukpono, 5 idịghe ke idiọk udọn̄ idan̄+ utọ nte oro mme idụt+ emi mîfiọkke Abasi+ ẹnyenede; 6 mbak owo ndomokiet edinam n̄kpọ ekesịm idaha edinọ eyenete esie unan nnyụn̄ mbọ enye unen esie ke n̄kpọ emi,+ koro Jehovah edi enye emi edinọde ufen ke kpukpru n̄kpọ emi,+ kpa nte nnyịn ikebemde iso itịn̄ inọ mbufo ikonyụn̄ inọde mbufo ọyọhọ ikọ ntiense.+ 7 Koro Abasi ikokotke nnyịn man inyene ufan̄ inọ mbubiam ido, edi man inyene edisana ido.+ 8 Ntre, ndien, owo eke ofụmide+ item emi, ifụmike owo, edi ofụmi Abasi+ emi ọnọde mbufo edisana spirit esie.+
9 Nte ededi, ufọn idụhe nnyịn ndiwet n̄kpọ nnọ mbufo mban̄a ima nditọete,+ koro Abasi ekpep+ mbufo ndima kiet eken;+ 10 ndien mbufo ke ẹnam emi ye kpukpru nditọete ke ofụri Macedonia. Edi nnyịn iteme mbufo, nditọete, ite ẹka iso ẹnam emi ata ọyọhọ ọyọhọ, 11 ẹnyụn̄ ẹdomo nditie sụn̄sụn̄+ ndinyụn̄ nse mbubehe+ mbufo nnyụn̄ nda ubọk mbufo nnam utom,+ kpa nte nnyịn ikowụkde mbufo; 12 man mbufo ẹkpesan̄a nte eyede+ ke iso mbon an̄wa+ ẹkûnyụn̄ ẹnana baba n̄kpọ kiet.+
13 Akan oro, nditọete, nnyịn iyomke mbufo ẹnana ifiọk ẹban̄a mmọ oro ẹdede+ ke n̄kpa; mbak mbufo ẹdifụhọ kpa nte mbon eken emi mînyeneke idotenyịn.+ 14 Koro edieke nnyịn inyenede mbuọtidem nte ke Jesus ama akpa onyụn̄ eset,+ ntre, n̄ko, Abasi ayanam mbon oro ẹdede ke n̄kpa ke Jesus ẹset ye enye.+ 15 Koro nnyịn ida ikọ Jehovah+ isian mbufo ite ke nnyịn mme odu-uwem emi idude isịm edidu Ọbọn̄+ idibemke mbon oro ẹdede ke n̄kpa iso ke baba usụn̄ kiet; 16 koro Ọbọn̄ oyoto heaven+ osụhọde ye ọkpọsọn̄ uyo, ye uyo etubom mme angel+ ye obukpon̄+ Abasi, ndien mbon oro ẹkpan̄ade ke Christ ẹyebem iso ẹset.+ 17 Ekem ẹyemen+ nnyịn emi idude uwem emi isụhọde, ẹdọk ye mmọ+ ke obubịt enyọn̄,+ man ikosobo+ ye Ọbọn̄ ke ikpaenyọn̄; ntem nnyịn iyodu ye Ọbọn̄ kpukpru ini.+ 18 Mmọdo ẹka iso ndida ikọ emi ndọn̄ kiet eken esịt.