Deuteronomy

34 Ekem Moses oto ke unaisọn̄ desat Moab ọdọk Obot Nebo,+ aka enyọn̄ Pisgah,+ emi asakde iso ese Jericho.+ Ndien Jehovah owụt enye ofụri isọn̄ oro, Gilead tutu esịm Dan,+ 2 ye ofụri Naphtali ye isọn̄ Ephraim ye Manasseh ye ofụri isọn̄ Judah tutu esịm inyan̄ edem usoputịn,+ 3 ye Negeb+ ye Ikpehe Jordan,+ unaisọn̄ itịghede Jericho, obio eyop,+ tutu esịm Zoar.+

4 Ndien Jehovah ọdọhọ enye ete: “Emi edi isọn̄ oro n̄kọn̄wọn̄ọde nnọ Abraham ye Isaac ye Jacob, nte, ‘Nyọnọ mfri fo isọn̄ emi.’+ Mmanam fi okụt enye ke enyịn, edi udubehe uka do.”+

5 Ekem Moses asan̄autom Jehovah+ akpa do ke isọn̄ Moab ke uyo Jehovah.+ 6 Ndien enye obụk enye ke itịghede kiet, ke isọn̄ Moab, emi asakde iso ese Beth-peor,+ edi baba owo kiet ifiọkke udi esie tutu esịm mfịn emi.+ 7 Moses ekedi isua ikie ye edịp ke ini enye akpade.+ Enyịn ikekịmke enye,+ odudu esie ikonyụn̄ ikụreke.+ 8 Ndien nditọ Israel ẹtuan̄a Moses usen edịp ye duop+ ke unaisọn̄ desat Moab. Ekem usen emi mmọ ẹtuan̄ade Moses ẹkụre.

9 Ndien spirit ọniọn̄+ ọyọhọ Joshua eyen Nun ke idem, koro Moses okodoride enye ubọk;+ ndien nditọ Israel ẹkop uyo esie ẹnyụn̄ ẹnam kpa nte Jehovah eketemede Moses.+ 10 Edi baba prọfet kiet eke ebietde Moses ikadahake ida+ ke Israel, emi Jehovah ọfiọkde iso ye iso,+ 11 ke kpukpru mme idiọn̄ọ ye mme utịben̄kpọ emi Jehovah ọkọdọn̄de enye anam ke isọn̄ Egypt ke iso Pharaoh ye ke iso kpukpru ikọt esie ye ke ofụri isọn̄ esie,+ 12 ye ke ofụri ọkpọsọn̄ ubọk ye kpukpru mme enyene-uten̄e edinam emi Moses akanamde ke iso ofụri Israel.+