Hosea
14 “O Israel, fiak tiene Jehovah Abasi fo,+ koro afo amatuak ukot ọduọ ke ndudue fo.+ 2 Mbufo ẹmen ikọ ẹfiak ẹtiene Jehovah.+ Kpukpru mbufo ẹdọhọ enye ẹte, ‘Mbọk fen ndudue+ nnyịn; nyụn̄ bọ se ifọnde, ndien nnyịn iyọnọ mfri n̄kpọkinua* nnyịn.+ 3 Assyria idinyan̄ake nnyịn.+ Nnyịn idiwatke enan̄-mbakara.+ Nnyịn idinyụn̄ ikotke se ubọk nnyịn anamde ite: “O Abasi nnyịn!” koro edi afo atua eyenakpa mbọm.’+
4 “Nyemen unana edinam akpanikọ mmọ mfep.+ Nyama mmọ ke edinyịme esịt,+ koro iyatesịt mi ọwọn̄ọrede ọkpọn̄ enye.+ 5 Nyakabade ntie nte mbara nnọ Israel.+ Enye eyesehe nte ekpon̄idịm, onyụn̄ osion̄o orụn̄ esie nte eke Lebanon. 6 N̄kọk esie ayasiaha, ndien uku esie eyebiet eke eto olive,+ ufuọn̄ esie oyonyụn̄ ebiet eke Lebanon. 7 Ndien mmọ ẹyetọn̄ọ ntak ẹdụn̄ ke mfụt esie.+ Mmọ ẹyekọri nte wheat ẹnyụn̄ ẹsehe nte vine.+ Etop esie eyebiet eke wine Lebanon.
8 “Ephraim ọyọdọhọ ete, ‘Nsan̄a nso aba ye ndisọi mbiet?’+
“Ami nyọbọrọ, nyonyụn̄ n̄kpeme enye.+ Ami mbiet eto juniper eke esehede.+ Ndien ẹyekụt mfri fo ke idem mi.”
9 Anie enyene ọniọn̄, man etịm ọfiọk mme n̄kpọ emi?+ Anie enyene ọniọn̄, man ọdiọn̄ọ mmọ?+ Koro mme usụn̄ Jehovah ẹnende,+ ndien ndinen owo ẹyesan̄a ke esịt;+ edi mme abiatibet ẹyetuak ukot ẹduọn̄ọ ke esịt.+