Amos
3 “O nditọ Israel, ẹkop ikọ emi Jehovah etịn̄de aban̄a mbufo,+ aban̄a ofụri idụt emi ami n̄kosiode ke Egypt+ ndọk ndi, nte, 2 ‘Mbufo kpọt ke ami mfiọk+ ke otu kpukpru mme idụt isọn̄.+ Ntak edi oro ndinamde mbufo ẹnam ibat ẹban̄a kpukpru ndudue mbufo.+
3 “‘Nte owo iba ẹkeme ndisan̄a kiet ke mmọ mîkebemke iso idiomi?+ 4 Ndi ekpe ekeme ndikụni ke akai ke mînyeneke se omụmde?+ Ndi abak ekpe ekeme ndisioro uyo ke ebiet udịbe ke enye mîmụmke n̄kpọ? 5 Nte inuen ekeme ndiyịre ke afia ke isọn̄ ke ini owo mîsịnke udia?+ Nte afia ekeme ndikọhọde ke isọn̄ ke enye mîmụmke ndomo n̄kpọ kiet? 6 Edieke ẹfride nnụk ke obio, nte idem idinyekke mme owo?+ Edieke afanikọn̄ etịbede ke obio, nte idịghe Jehovah anam n̄kpọ? 7 Koro Jehovah Akakan Ọbọn̄ Andikara idinamke baba n̄kpọ kiet ibọhọke enye ayarade ndịben̄kpọ esie ọnọ mme asan̄autom esie, mme prọfet.+ 8 Ekpe omokụni!+ Anie mîdidịgheke? Jehovah Akakan Ọbọn̄ Andikara emetịn̄ ikọ! Anie mîditịn̄ke prọfesi?’*+
9 “‘Ẹtan̄a enye ke mme tọwa ufọkidụn̄ ke Ashdod ye ke mme tọwa ufọkidụn̄ isọn̄ Egypt,+ ẹnyụn̄ ẹdọhọ ẹte: “Ẹsop idem ẹn̄wana ye mme obot Samaria,+ ẹnyụn̄ ẹse ekese ndutịme emi ẹsịnde ke esịt esie ye n̄wo emi ẹwode ke esịt esie.+ 10 Mmọ inyụn̄ ifiọkke ndinam se inende,”+ uyo Jehovah edi emi, “mmọ emi ẹkọde afai+ ye mbụme ẹbon ke mme tọwa ufọkidụn̄ mmọ.”’
11 “Mmọdo ntem ke Jehovah Akakan Ọbọn̄ Andikara ọdọhọ ete, ‘Asua odu ke isọn̄ akan okụk,+ ndien enye ọyọbọ fi odudu, ẹyenyụn̄ ẹbụme mme tọwa ufọkidụn̄ fo.’+
12 “Ntem ke Jehovah ọdọhọ ete, ‘Kpa nte ekpemerọn̄ awabarede ukot iba m̀mê ubak utọn̄ osio ekpe ke inua,+ ntre ke ẹdiwabade nditọ Israel ẹda ẹdaha, mbon oro ẹtiede ke ediye n̄kpana+ ke Samaria ye ke bed mbon Damascus.’+
13 “‘Ẹkop ẹnyụn̄ ẹtan̄a+ ke ufọk Jacob,’ uyo Jehovah Akakan Ọbọn̄ Andikara edi emi, kpa Abasi mme udịm. 14 ‘Koro ke usen emi ndikotde Israel nte edinam ibat+ aban̄a nsọn̄ibuot esie, nyonyụn̄ n̄kot mme itieuwa Bethel+ ẹdinam ibat; ndien ẹyesịbe mme nnụk itieuwa ẹfep, mmọ ẹyenyụn̄ ẹduọn̄ọ ke isọn̄.+ 15 Ndien nyowụri ufọk ini etuep+ n̄kọrọ ye ufọk ini ndaeyo.’+
“‘Ndien mme ufọk nnụkenen ẹyetak,+ ediwak ufọk ẹyenyụn̄ ẹwụre,’+ uyo Jehovah edi emi.”