1 Chronicle
28 Ndien David obon kpukpru mbọn̄+ Israel ọtọkiet ke Jerusalem, kpa mbọn̄+ mme esien ye mbọn̄+ mme otu eke ẹsan̄ade utom ẹnọ edidem ye mme etubom mme tọsịn+ ye mme etubom mme ikie+ ye mme etubom kpukpru inyene+ ye ufene+ edidem ye eke nditọ+ esie, ọkọrọ ye mme adaidaha okụre+ ye n̄kpọsọn̄ owo,+ kpa kpukpru n̄kpọsọn̄ iren uko. 2 Ekem Edidem David adaha ada ke ukot esie onyụn̄ ọdọhọ ete:
“Nditọete mi ye ikọt mi, ẹkop uyo mi. Ama odu mi ke esịt+ ndibọp ufọk nduọkodudu nnọ ekebe ediomi Jehovah ye udoriukot+ nnọ Abasi nnyịn, ndien mma ntịm n̄kpọ ndibọp ufọk oro.+ 3 Edi ata Abasi ọdọhọ mi ete, ‘Idịghe afo edibọp ufọk ọnọ enyịn̄ mi;+ koro afo edide owo ekọn̄ omonyụn̄ ọduọk iyịp.’+ 4 Ndien Jehovah Abasi Israel ama emek mi osio ke ofụri ufọk ete+ mi ete ndi edidem+ Israel ke nsinsi; koro edi Judah ke enye ekemek nte adausụn̄,+ ndien ke ofụri ufọk Judah enye emek ufọk ete mi,+ ndien ke otu nditọiren ete mi,+ ami ke enye ekenyịme+ ndinịm ke edidem ofụri Israel; 5 ndien ke otu kpukpru nditọ mi (koro Jehovah ọnọde mi ediwak nditọ)+ enye emek Solomon+ eyen mi nditie ke ebekpo+ itie edidem Jehovah ke Israel.
6 “Ekem, enye ọdọhọ mi ete, ‘Solomon eyen fo edi enye emi edibọpde ufọk+ mi ye mme okụre mi; koro mmemek enye nte eyen+ mi, ndien ami nyakabade ndi ete+ esie. 7 Ndien nyanam itie edidem+ esie ọsọn̄ọ ada ke nsinsi edieke enye edisọn̄ọde ebiere ndinịm mme ewụhọ+ ye mme ubiereikpe+ mi, kpa nte edide mfịn emi.’ 8 Ndien, ke emi, ke iso ofụri Israel, kpa esop+ Jehovah, ye ke utọn̄ Abasi+ nnyịn, mbufo ẹkpeme ẹnyụn̄ ẹdụn̄ọde kpukpru mme ewụhọ Jehovah Abasi mbufo, man mbufo ẹkeme ndida eti isọn̄+ oro nnyene, ẹnyụn̄ ẹda enye ẹnọ nditọ mbufo emi ẹditienede mbufo ke edem, nte udeme ke nsinsi.
9 “Ndien afo, Solomon eyen mi, fiọk+ Abasi usọ nyụn̄ nam n̄kpọ+ esie ke ofụri esịt+ ye ofụri ukpọn̄ ke idatesịt;+ koro Jehovah odụn̄ọrede kpukpru esịt,+ enye onyụn̄ ọfiọk kpukpru ekikere esịt owo.+ Edieke afo oyomde enye, enye ayayak fi okụt enye;+ edi edieke afo ọkpọn̄de enye,+ enye oyotop fi ọduọk ke nsinsi.+ 10 Kpeme, koro ke emi Jehovah emek fi ete ọbọp ufọk nte edisana ebiet. Nyene uko nyụn̄ nam n̄kpọ.”+
11 Ndien David ọnọ Solomon eyen esie n̄wed mbuwed ubọpn̄kpọ+ eke etehe+ ye eke mme ufọk esie ye eke mme ubet ubonn̄kpọ+ esie ye eke mme ubet+ enyọn̄ ufọk esie ye eke mme n̄kịmn̄kịm esịt ubet esie ye eke ufọk okukịp+ usio-isop; 12 idem ye n̄wed mbuwed ndibọp kpukpru n̄kpọ emi ẹkewụtde enye ke odudu spirit,+ eke mme okụre+ ufọk Jehovah ye eke kpukpru ubet udia+ oro ẹkande enye ẹkụk, eke ebiet ubon n̄kpọuto ata Abasi ye eke ebiet ubon ndisana n̄kpọ;+ 13 onyụn̄ ọnọ item aban̄a otu+ mme oku ye otu nditọ Levi ye kaban̄a kpukpru utom ufọk Jehovah ye kpukpru n̄kpoduoho ndida nnam utom ke ufọk Jehovah; 14 ye kaban̄a udobi gold, gold ndida nnam kpukpru n̄kpoduoho emi ẹdade ẹnam nsio nsio utom, ye kaban̄a udobi n̄kpoduoho silver, kpukpru n̄kpoduoho+ emi ẹdade ẹnam nsio nsio utom; 15 ye udobi uwụk utuenikan̄+ gold ye mme utuenikan̄ gold mmọ, udobi nsio nsio uwụk utuenikan̄ ye mme utuenikan̄ mmọ, ye udobi uwụk utuenikan̄ silver kaban̄a uwụk utuenikan̄ kiet kiet ye mme utuenikan̄ mmọ ke nsio nsio utom uwụk utuenikan̄; 16 ye udobi gold ndida nnam okpokoro uyo emi ẹtan̄de-tan̄ ẹkọk,+ ye nsio nsio okpokoro, ye silver ndida nnam okpokoro silver; 17 ye fork ye usan+ ye osioinua emi ẹnamde ke ata gold, ye n̄kpri usan+ gold nte udobi n̄kpri usan kiet kiet edide, ye n̄kpri usan silver nte udobi nsio nsio n̄kpri usan edide; 18 ye udobi gold emi ẹdụhọrede ndida nnam itieuwa+ ufọp incense ye mbiet chariot,+ oro edi, mme cherub+ gold eke ẹtatde mba mmọ ẹfụk enyọn̄ ekebe ediomi Jehovah. 19 “Jehovah ọkọnọ ọniọn̄ ke kpukpru n̄kpọ emi ke n̄wed+ emi okotode enye ubọk esịm mi, kaban̄a ofụri utom emi ẹnyenede ndinam nte ekemde ye n̄wed mbuwed ubọpn̄kpọ emi.”+
20 Ndien David ọdọhọ Solomon eyen esie ete: “Nyene uko,+ kop odudu nyụn̄ nam n̄kpọ. Kûfehe ndịk,+ kûnyụn̄ uyak idem enyek fi,+ koro Jehovah Abasi kpa Abasi mi odude ye afo.+ Enye idikpọn̄ke+ fi tutu ẹkụre ofụri utom ufọk Jehovah emi. 21 Ndien sese afo emenyene otu mme oku+ ye nditọ Levi+ ndinam utom ufọk ata Abasi; ndien kpukpru mbon emi ẹnyịmede+ ẹnyụn̄ ẹnyenede usọ ndinam kpukpru utom+ ẹdu ye afo, ndien n̄ko mbọn̄+ ye kpukpru owo ẹyekop kpukpru se afo etịn̄de.”