Mme Psalm
Ẹnọ adausụn̄ ke Mme Ekpon̄idịm.+ Eke David.
69 Nyan̄a mi, O Abasi, koro mmọn̄ ọmọtọ ekpere ndifụk ukpọn̄ mi.+
2 Mmobụhọ ke editụn̄ọ okpụk, emi isọn̄ mîdụhe ndida.+
Mmodụk udem,
Ndien idịm emi ewetde ọmọkpọri mi efep.+
4 Mmọ eke ẹsuade mi ke unana ntak ẹmekabade ẹwak ẹkan idet ibuot mi.+
Mbon oro ẹyomde ndiwot mi, emi ẹdide mme asua mi ke unana ntak, ẹmekabade ẹwak.+
Mmekpe isop ke se mmen̄kọbọhọ ke n̄wo.
5 O Abasi, afo ọmọfiọk ndisịme mi,
Ndudue mi inyụn̄ idịbeke fi.+
6 O kûyak bụt anam mmọ eke ẹdoride enyịn ke afo ke ntak mi,+
O Jehovah mme udịm, Akakan Ọbọn̄ Andikara.+
O kûyak mbon oro ẹyomde fi ẹdia esuene ke ntak mi,+
O Abasi Israel.+
11 Ke ini nsịnede ọfọn̄ ntuan̄a,
N̄kabade ndi ufiet nnọ mmọ.+
12 Mbon oro ẹtiede ke inuaotop ẹtọn̄ọ nditịn̄ mban̄a mi,+
Ami n̄konyụn̄ ndi ikọ ikwọ mme ọn̄wọn̄ ọkpọsọn̄ mmịn.+
13 Edi ami mma mbọn̄ akam nnọ fi, O Jehovah,+
Ke ini eke odotde, O Abasi.+
Yere mi ke uwak ima-mfọnido fo nyụn̄ wụt ke afo edi ata andinyan̄a.+
14 Nyan̄a mi sio ke okpụk mbak ndibụhọ.+
O ẹkpakam ẹnyan̄a mi ẹsio ke ubọk mbon oro ẹsuade mi+ ye ke udem.+
15 O kûyak idịm eke ewetde ọkpọri mi efep,+
Kûyak udem emen mi emen,
Kûnyụn̄ uyak obube mmọn̄ ekịbi inua esie abaha mi.+
19 Afo ọmọfiọk esuene mi ye bụt mi ye nte ẹsụhọrede mi itie.+
Kpukpru mbon oro ẹsuade mi ẹdu fi ke iso.+
20 Esuene omobụn̄ mi esịt, ndien owo ikemeke ndikọk unan emi.+
Ndori enyịn owo nditua mi mbọm, edi idụhe owo ndomokiet;+
Nnyụn̄ ndori enyịn ke mbon ndọn̄esịt, edi n̄kwe ndomokiet.+
25 Yak itienna mmọ, oro ẹbọpde ibibene ẹkanade, ana ndon;+
Yak owo ndomokiet okûdụn̄ ke mme tent mmọ.+
26 Koro mmọ ẹbịnede owo eke afo amiade,+
Ẹnyụn̄ ẹbụkde ubiak mbon oro afo ekịmde.
31 Emi n̄ko eyenem Jehovah esịt akan ayara enan̄,+
Akan enyene-nnụk abak ayara enan̄ eke asiahade ikpat.+
33 Koro Jehovah akpan̄de utọn̄ ọnọ mme ubuene,+
Ndien enye idisịnke ikọt esie emi ẹdude ke n̄kpọkọbi ke ndek.+