Mme N̄ke
28 Anamidiọk efehe ke ini owo mîbịneke enye,+ edi edinen owo ebiet abak ekpe emi enyenede uko.+
2 Ubiatibet ke obio esịn mbọn̄ esie ẹwak,+ edi owo mbufiọk emi ọdiọn̄ọde se inende ayanam ọbọn̄ ebịghi ke esịt.+
3 Ubuene emi otụkde+ mme usụhọde owo ebiet edịm emi eyetde isọn̄ efep tutu udia idụhe.
4 Mbon emi ẹkpọn̄de ibet ẹtotoro idiọkowo,+ edi mbon oro ẹnịmde ibet ẹyat esịt ye mmọ.+
5 Mbon emi ẹsịnde idem ke idiọkn̄kpọ ifiọkke edinen ikpe, edi mmọ eke ẹyomde Jehovah ẹfiọk kpukpru n̄kpọ.+
6 Ọfọn ye ubuene emi asan̄ade ke nsọn̄ọnda esie akan owo ekededi eke akwan̄ade usụn̄ esie, okposụkedi enye edide imọ owo.+
7 Eyen emi edide asian enenịm ibet,+ edi enye emi odụkde nsan̄a ye mme ama-udia esuene ete esie.+
8 Owo eke anamde inyene esie ọtọt ke ndidia udori+ ye ke ndinọ ebuọt mbọ akwa udori akam ọkọ mmọ obon ọnọ owo emi atuade mme usụhọde owo mbọm.+
9 Owo eke ọwọn̄ọrede utọn̄ man okûkop ibet+—idem akam esie edi n̄kpọ mbubiam.+
10 Owo eke anamde ndinen owo ẹtụn+ ẹdụk idiọk usụn̄ ọyọduọ odụk obube esiemmọ,+ edi mmọ eke mînyeneke ndudue ẹyeda eti n̄kpọ ẹnyene.+
11 Imọ owo okụt idemesie ke ọniọn̄,+ edi usụhọde owo emi enyenede mbufiọk ayayarade enye.+
12 Akaka uyai odu ke ini ndinen owo ẹdarade;+ edi ke ini mme idiọkowo ẹdahade ẹda, owo okpụhọ idem.+
13 Owo eke edịpde idiọkn̄kpọ esie idikwe unen,+ edi owo eke ayararede onyụn̄ ọkpọn̄de mmọ, ẹyetua enye mbọm.+
14 Owo emi enyenede mbak kpukpru ini+ okop inemesịt, edi owo eke ọsọn̄de esịt ọyọduọ odụk afanikọn̄.+
15 Nte ekpe eke okụnide ye bear emi obụmerede, ntre ke idiọk andikara emi akarade mme ubuene etie.+
16 Adausụn̄ emi mînyeneke ata mbufiọk ọyọhọ n̄ko ye akpakịp abian̄a,+ edi enye emi asuade idiọk udori+ oyodu uwem ebịghi.
17 Owo emi enyenede ubiomikpe iyịp owo* eyefehe okodụk obube.+ Yak mmọ ẹkûmụm enye.
18 Ẹyenyan̄a owo eke mînyeneke ndudue ke usụn̄ esie,+ edi owo eke usụn̄ esie akwan̄ade ọyọduọ ke mbuari.+
19 Owo eke ofụn̄de isọn̄ esiemmọ oyoyụhọ udia,+ ndien owo eke ebịnede mme n̄kpọ oro mînyeneke ufọn, oyoyụhọ ubuene.+
20 Owo eke anamde akpanikọ eyenyene ekese edidiọn̄,+ edi owo eke obụmerede oyom inyene iditreke ndidue.+
21 Ifọnke ndinam asari,+ inyụn̄ ifọnke owo ndibiat ibet ke ntak ekpri uyo.
22 Owo isịnenyịn obụmede ebịne mme ọsọn̄urua n̄kpọ,+ edi enye ifiọkke ite ke unana eyesịm imọ.
23 Owo eke asuade ọnọ owo,+ ẹyema enye ke ukperedem ẹkan nte ẹmade owo nneminua.
24 Owo eke owode ete esie ye eka esie+ onyụn̄ ọdọhọde ete: “Mbiatke ibet,”+ edi nsan̄a ye owo atahade.
25 Owo ntan̄idem edemede utọk,+ edi owo eke eberide edem ke Jehovah eyesehe.+
26 Owo eke ọbuọtde idem ke esịt esie edi ndisịme,+ edi owo eke asan̄ade ke ọniọn̄ ọyọbọhọ.+
27 Owo eke ọnọde ubuene n̄kpọ idinanake n̄kpọ,+ edi owo eke edịpde enyịn esie ọyọbọ ediwak isụn̄i.+
28 Ke ini idiọkowo adahade ada, owo edịbe;+ edi ke ini mmọ ẹbede ẹfep, ndinen owo ẹwak.+