Isaiah
56 Ntem ke Jehovah ọdọhọ ete: “Mbufo ẹnịm unenikpe,+ ẹnyụn̄ ẹnam se inende.+ Koro edinyan̄a mi ekpere ndidụk ndi,+ edinen ido mi onyụn̄ ekpere ndiyarade.+ 2 Owo eke anamde emi okop inemesịt,+ eyen owo eke onyụn̄ omụmde enye akama,+ emi enịmde sabbath mbak edisabade enye,+ onyụn̄ ekpemede ubọk esie mbak edinam orụk idiọkn̄kpọ ekededi, okop inemesịt.+ 3 Yak esenowo emi adiande idem ye Jehovah okûdọhọ ete,+ ‘Jehovah ayadian̄ade mi efep ke otu ikọt esie.’+ Yak eunuch+ okûnyụn̄ ọdọhọ ete, ‘Sese! Ami ndi nsat eto.’”
4 Koro ntem ke Jehovah ọdọhọ mme eunuch emi ẹnịmde mme sabbath mi ẹnyụn̄ ẹmekde se mmade,+ ẹnyụn̄ ẹnịmde ediomi mi ẹte:+ 5 “Ami nyada n̄kpọ editi+ ye enyịn̄,+ kpa n̄kpọ eke ọfọnde akan nditọiren ye nditọiban,+ nnọ mmọ ke ufọk mi+ ye ke ibibene mi. Nyọnọ mmọ nsinsi enyịn̄+ oro owo mîdisịbeke ifep.+
6 “Ndien mbon esenidụt oro ẹdiande idem ye Jehovah man ẹnam n̄kpọ ẹnọ enye+ ẹnyụn̄ ẹma enyịn̄ Jehovah,+ man ẹkabade ẹdi mme asan̄autom esie, kpukpru mbon oro ẹnịmde sabbath mbak ẹdisabade enye, emi ẹnyụn̄ ẹnịmde ediomi mi,+ 7 ami n̄ko nyada mmọ ndi edisana obot mi+ nnyụn̄ nnam mmọ ẹdara ke esịtufọk akam mi.+ Ẹyenyịme ofụri edifọp uwa+ ye mme uwa mmọ+ ke itieuwa mi.+ Koro ẹdikot ufọk mi ufọk akam kpukpru owo.”+
8 Uyo Jehovah Akakan Ọbọn̄ Andikara, emi atan̄de mbon Israel emi ẹsuanade obon,+ edi: “Nyatan̄ mbon efen mbon nnọ enye ke ẹsiode mbon esie oro ẹma ẹketatan̄ ẹbon, ẹfep.”+
9 Kpukpru mbufo mme unam ke ikọt ye kpukpru mbufo mme unam ke akai, ẹdi ẹdidia n̄kpọ.+ 10 Mbon ukpeme esie ẹdi nnan.+ Baba owo mmọ kiet ifiọkke.+ Kpukpru mmọ ẹdi imụm ebua; mmọ ikemeke ndikpọi,+ ẹtak ke ndin̄wen̄wek, ke ndisụhọde nna nnyụn̄ mma ndide idap.+ 11 Mmọ ẹdi mme ebua ọkpọsọn̄ idiọkitọn̄;+ akanam mmọ ikopke uyụhọ.+ Mmọ n̄ko ẹdi mme ekpemerọn̄ oro mîfiọkke n̄kpọ.+ Kpukpru mmọ ẹmewọn̄ọde ẹdụk usụn̄ idemmọ, owo mmọ kiet kiet oto adan̄a esie ebịne idiọk udori esie:+ 12 “Mbufo ẹdi! Ẹyak nda ndusụk wine ndi; ẹnyụn̄ ẹyak nnyịn in̄wọn̄ ọkpọsọn̄ mmịn ikpa.+ Ndien n̄kpọn̄ eyetie kpa nte mfịn, enen̄ede okpon usen akan mfịn.”+