Ẹnọ adausụn̄ ke Muth-labben. Ikwọ David.
א [ʼAleph]
9 Ami nyotoro fi, O Jehovah, ke ofụri esịt mi;+
Nyatan̄a kpukpru utịbe utom fo.+
2 Nyadat esịt nnyụn̄ ndara ke afo,+
Nyọkwọ edinem ikwọ nnọ enyịn̄ fo, O Ata Edikon̄.+
ב [Behth]
3 Ke ini mme asua mi ẹfiakde edem,+
Mmọ ẹyetuak ukot ẹduọn̄ọ ẹnyụn̄ ẹtak ke iso fo.+
4 Koro afo ekpede ikpe mi ye ikọ mi;+
Afo emetie ke ebekpo ekpe ikpe ke edinen ido.+
ג [Gimel]
5 Afo amasua ọnọ mme idụt,+ afo omosobo idiọkowo.+
Afo ọmọsọhi enyịn̄ mmọ efep ke nsinsi nsinsi.+
6 Amaedi mme asua fo, ẹmesọhi mmọ ẹfep ke nsinsi,+
Ye mme obio emi afo okosobode.+
Owo iditịghi mmọ aba.+
ה [Heʼ]
7 Amaedi Jehovah, enye eyetie ke nsinsi,+
Ọsọn̄ọ owụk ebekpo esie kaban̄a ikpe.+
8 Ndien enye eyekpe ikpe ọnọ isọn̄ ke edinen ido;+
Enye eyekpe ikpe mme idụt nte enende.+
ו [Waw]
9 Ndien Jehovah ayakabade edi edikon̄ ebiet ubọhọ ọnọ owo ekededi emi ẹfịkde,+
Edikon̄ ebiet ubọhọ ke ini nnanenyịn.+
10 Ndien mmọ eke ẹfiọkde enyịn̄ fo ẹyebuọt idem ye afo,+
Koro afo mûdukpọn̄ke mmọ eke ẹyomde fi, O Jehovah.+
ז [Zayin]
11 Mbufo ẹkwọ edinem ikwọ ẹnọ Jehovah emi odụn̄de ke Zion;+
Ẹtịn̄ ẹban̄a mme edinam esie ke otu mme idụt.+
12 Koro, ke ini enye oyomde mme ọduọkiyịp,+ enye eyeti mbon oro ẹfịkde;+
Enye idifreke eseme mmọ.+
ח [Chehth]
13 Tua mi mbọm, O Jehovah; se ukụt mi emi otode mmọ eke ẹsuade mi,+
O afo emi emenerede mi osio ke inuaotop n̄kpa,+
14 Man ntan̄a kpukpru mme edinam fo emi ẹdotde itoro+
Ke mme inuaotop+ eyenan̄wan Zion,+
Man n̄kpadara ke edinyan̄a fo.+
ט [Tehth]
15 Mme idụt ẹmeduọn̄ọ ẹdụk obube oro mmọ ẹtịbide;+
Iyịre+ oro mmọ ẹkedịpde omomụm mmọ ukot.+
16 Ẹdiọn̄ọ Jehovah ke ubiereikpe oro enye ọnọde.+
Mme utom ubọk esie ẹkọk afia ẹmụm mme idiọkowo.+
Higgaion. Selah.
י [Yohdh]
17 Mme idiọkowo+ ẹyefiak ke Udi,+
Ọkọrọ ye kpukpru mme idụt emi ẹfrede Abasi.+
18 Koro owo mîdifreke mme ubuene kpukpru ini,+
Idotenyịn mbon nsụkidem idinyụn̄ itakke ke nsinsi.+
כ [Kaph]
19 Daha ke enyọn̄, O Jehovah! Kûyak owo okop odudu akan fi.+
Yak ẹkpe ikpe mme idụt ke iso fo.+
20 Sịn mmọ ndịk ke idem, O Jehovah,+
Man mme idụt ẹkpefiọk ẹte ke mmimọ idi owo.+ Selah.