Jonah
3 Ekem uyo Jehovah esịm Jonah ọyọhọ utịm ikaba, ete:+ 2 “Daha ke enyọn̄, ka Nineveh akwa obio, nyụn̄ ka katan̄a etop+ emi ndọn̄de fi nnọ enye.”
3 Ntre Jonah adaha aka Nineveh ke uyo Jehovah.+ Ke enyịn Abasi, Nineveh ekedi akwa obio,+ kpa obio emi adade isan̄ usen ita. 4 Ke akpatre Jonah odụk obio oro asan̄a usen kiet, onyụn̄ atan̄a, ete: “Osụk kan̄a usen aba, ndien ẹyesobo Nineveh.”+
5 Ndien mbon Nineveh ẹtọn̄ọ ndibuọt idem ye Abasi,+ mmọ ẹnyụn̄ ẹdori utreudia ẹnyụn̄ ẹsịne ọfọn̄ ntuan̄a,+ ọtọn̄ọde ke n̄kponn̄kan ke otu mmọ tutu esịm n̄kpri-n̄kan ke otu mmọ. 6 Ke ini edidem Nineveh okopde ikọ emi,+ enye osụhọde ke ebekpo esie, osio ọfọn̄ ubọn̄ ke idem onyụn̄ emen ọfọn̄ ntuan̄a esịne ndien osụhọde etie ke ntọn̄.+ 7 N̄ko-n̄ko enye anam ẹtan̄a, onyụn̄ anam ẹnọ ewụhọ ke Nineveh, ke uyo edidem ye eke ikpọ owo, ẹte:
“Yak baba owo kiet ye ufene ye enan̄ ye otuerọn̄ ẹkûtabi baba n̄kpọ kiet. Baba kiet okûdia udia. Mmọ ẹkûnyụn̄ ẹn̄wọn̄ mmọn̄.+ 8 Yak mmọ ẹsịne ọfọn̄ ntuan̄a ke idem, owo ye ufene; yak mmọ ẹnyụn̄ ẹfiori ke ọkpọsọn̄ uyo ẹkot Abasi, mmọ kiet kiet ẹnyụn̄ ẹfiak edem+ ẹkpọn̄ idiọk usụn̄ mmọ ye afai emi odude mmọ ke ubọk. 9 Koro anie ọfiọk m̀mê ata Abasi eyetre ndida nsobo ndi onyụn̄ okpụhọ ekikere*+ onyụn̄ ọwọn̄ọde ikan̄-ikan̄ iyatesịt esie efep, mbak nnyịn iditak?”+
10 Ndien ata Abasi okụt se mmọ ẹnamde,+ nte ke mmọ ẹwọn̄ọde ẹkpọn̄ idiọk usụn̄ mmọ;+ ntre ata Abasi okpụhọ ekikere*+ ke nsobo oro enye ọkọdọhọde ete ke iyosobo mmọ; inyụn̄ isoboke mmọ aba.+