1 Chronicle
22 Ndien David ọdọhọ ete: “Emi edi ufọk+ Jehovah ata Abasi, emi onyụn̄ edi itieuwa+ emi ẹsiwade edifọp uwa Israel.”
2 David onyụn̄ ọdọhọ ete ẹnam isenowo+ ke isọn̄ Israel ẹsop idem ọtọkiet, ndien enye enịm mmọ nte mme ọsọi itiat+ ndisọi mme itiat emi mban̄ inan̄ ẹdide ukem ukem+ man ẹda ẹbọp ufọk ata Abasi. 3 David onyụn̄ etịm ediwak ukwak ndida nnam okpukwak nnọ mme usụn̄ inuaotop ye mme ubọpn̄kpọ, n̄ko ye okpoho emi awakde ebe se ẹkemede ndidomo,+ 4 n̄ko ye mme eto cedar+ eke mînyeneke ibat; koro mbon Sidon+ ye mbon Tyre+ ẹma ẹda ata ediwak eto cedar ẹsọk David. 5 Ntem David ọdọhọ ete: “Solomon eyen mi edi eyenọwọn̄ inyụn̄ isọn̄ke idem ikem,+ ndien ufọk emi ẹdibọpde ẹnọ Jehovah oyokpon ata etieti+ onyụn̄ ọwọrọ ada ke uyai+ ke ofụri idụt. Yak ntịm n̄kpọ mbon nnọ enye.” Ntre David etịm ata ediwak n̄kpọ obon mbemiso akpade.+
6 N̄ko-n̄ko, enye okot Solomon eyen esie man eteme enye ete ọbọp ufọk ọnọ Jehovah Abasi Israel. 7 Ndien David ọdọhọ Solomon eyen esie ete: “Ama odu mi ke esịt+ ndibọp ufọk nnọ enyịn̄+ Jehovah Abasi mi. 8 Edi uyo Jehovah esịm mi, ete, ‘Afo ọmọduọk ata ediwak iyịp,+ omonyụn̄ an̄wana ikpọ ekọn̄.+ Afo udubọpke ufọk unọ enyịn̄ mi,+ koro afo ọmọduọk ediwak iyịp ke isọn̄ ke iso mi. 9 Sese! Eyeneren+ ọmọn̄ amana ọnọ fi. Enye edidi owo emi enyenede nduọkodudu, ami nyonyụn̄ nnam enye enyene nduọkodudu ọbọhọ kpukpru mme asua esie eke ẹkande enye ẹkụk;+ enye edikere Solomon,+ ndien nyọnọ Israel emem+ ye ifụre ke eyo esie. 10 Enye edibọp ufọk ọnọ enyịn̄ mi,+ enye eyedi eyen+ mi, ami nyonyụn̄ ndi ete+ esie. Ndien nyọsọn̄ọ n̄wụk ebekpo itie edidem+ esie ke Israel ke nsinsi.’
11 “Ndien, ke emi, eyen mi, Jehovah akpakam odu ye afo, kụt unen nyụn̄ bọp ufọk Jehovah Abasi fo kpa nte enye ọkọdọhọde aban̄a fi.+ 12 Jehovah akpakam ọnọ fi ọniọn̄ ye ifiọk,+ enye akpakam onyụn̄ ọnọ fi ewụhọ aban̄a Israel man afo enịm ibet Jehovah Abasi fo.+ 13 Ntem ke afo edikụt unen+ edieke afo ekpemede ndinam mme ewụhọ+ onyụn̄ enịmde mme ubiereikpe+ oro Jehovah okowụkde+ Moses aban̄a Israel. Nyene uko nyụn̄ kop odudu.+ Kûfehe ndịk,+ kûnyụn̄ uyak idem enyek fi.+ 14 Ndien, sese, ke ini ukụt+ mi, ami mma ntịm talent gold+ tọsịn ikie ye talent silver miliọn kiet, ye okpoho+ ye ukwak+ emi awakde tutu inyeneke udomo nnọ ufọk Jehovah; mmetịm n̄ko mme eto ye mme itiat, edi afo ayadian se isụhọde. 15 Ndien afo emenyene ediwak mbonutom, mme ọsọi itiat ye mme anamusọ itiat+ ye anamusọ eto ye kpukpru owo eke ẹfiọkde kpukpru orụk utom.+ 16 Usụn̄ inyụn̄ idụhe ndibat gold ye silver ye okpoho ye ukwak.+ Daha da nyụn̄ nam n̄kpọ,+ Jehovah akpakam odu ye afo.”+
17 Ndien David owụk kpukpru mbọn̄ Israel ete ẹn̄wam Solomon eyen imọ: 18 “Nte Jehovah Abasi mbufo idụhe ye mbufo,+ nte enye inyụn̄ inọhọ mbufo nduọkodudu ikanade ikụk?+ Koro enye amayak mme andidụn̄ isọn̄ emi esịn mi ke ubọk, isọn̄ emi onyụn̄ ana sụn̄ ke iso Jehovah+ ye ke iso ikọt esie. 19 Ke emi, mbufo ẹsịn esịt ye ukpọn̄+ mbufo ẹyom Jehovah Abasi mbufo,+ ẹdaha ẹda ẹnyụn̄ ẹbọp edisana ebiet+ Jehovah ata Abasi,+ man ẹmen ekebe+ ediomi Jehovah ye ndisana n̄kpoduoho ata Abasi ẹdi ufọk oro ẹbọpde ẹnọ enyịn̄+ Jehovah.”