Isaiah
39 Ke ini oro Merodach-baladan+ eyen Baladan edidem Babylon+ ọnọ mme leta ye enọ+ ẹsọk Hezekiah, ke enye ama okokop ete ke enye ọkọdọdọn̄ọ edi ke ama afiak okop nsọn̄idem.+ 2 Ntre Hezekiah adat esịt ye mmọ+ onyụn̄ owụt mmọ ufọk ubon n̄kpọuto esie,+ ye silver, ye gold ye aran balsam+ ye eti aran ye kpukpru n̄kpọekọn̄ esie+ ye kpukpru se idude ke ufọk ubon n̄kpọuto esie. Ndien idụhe baba n̄kpọ kiet eke Hezekiah mîkowụtke mmọ ke ufọk esie+ ye ke ofụri obio ukara esie.+
3 Ekem prọfet Isaiah edi ke ọtọ Edidem Hezekiah edibụp enye ete:+ “Nso ke mbon oro ẹkedọhọ, mmọ ẹkenyụn̄ ẹto m̀mọ̀n̄ ẹdi ẹbịne fi?” Ntre Hezekiah ọbọrọ ete: “Mmọ ẹketo anyan idụt, kpa Babylon,+ ẹdi ẹbịne mi.” 4 Ndien enye obụp ete: “Mmọ ẹkekụt nso ke ufọk fo?”+ Ntem Hezekiah ọbọrọ ete: “Mmọ ẹma ẹkụt kpukpru se idude ke ufọk mi. Idụhe baba n̄kpọ kiet eke mmen̄kowụtke mmọ ke ufọk ubon n̄kpọuto mi.” 5 Ndien Isaiah ọdọhọ Hezekiah+ ete: “Kop se Jehovah mme udịm etịn̄de mi, 6 ‘Sese! Mme usen ke ẹdi eke ẹditan̄de kpukpru se idude ke ufọk fo ye se mme ete ete fo ẹkekọde ẹbon tutu esịm mfịn emi, ẹka Babylon.’+ ‘Owo idisụhọke+ baba n̄kpọ kiet,’ ntem ke Jehovah ọdọhọ. 7 ‘Ndien ẹyetan̄ ndusụk ke otu nditọ fo emi ẹditode fi ke idem ẹwọrọ,+ emi afo edinyụn̄ obonde, ndien mmọ ẹyekabade ẹdi mme adaidaha+ ke ufọk ubọn̄ edidem Babylon.’”+
8 Ntem Hezekiah ọdọhọ Isaiah ete: “Ikọ Jehovah emi afo etịn̄de ọfọn.”+ Enye onyụn̄ ọdọhọ ete: “Koro emem ye akpanikọ+ ẹyedu ke eyo mi.”+