Udiana John

1 Ami ebiowo+ n̄wet n̄wed emi nnọ ẹsọk n̄wan+ emi ẹmekde ye nditọ esie, emi mmade etieti,+ inyụn̄ idịghe ami ikpọn̄ mma mmọ, edi n̄ko kpukpru mbon emi ẹfiọkde akpanikọ,+ 2 ke ntak akpanikọ emi odude nnyịn ke esịt,+ emi edinyụn̄ odude ye nnyịn ke nsinsi.+ 3 Nnyịn iyenyene mfọnido oro owo mîdotke,+ mbọm ye emem, ito Abasi emi edide Ete+ ye Jesus Christ emi edide Eyen ọnọ Ete, ọkọrọ ye akpanikọ ye ima.+

4 Mmadara etieti koro mmokụt ndusụk ke otu nditọ+ fo ẹsan̄ade ke akpanikọ,+ nte nnyịn ikọbọde ewụhọ ito Ete.+ 5 Ntre mmeben̄e fi, n̄wan emi ẹmekde, idịghe nte owo emi ewetde obufa ewụhọ+ ọnọ fi, edi n̄wet enye emi nnyịn ima ikenyenyene toto ke editọn̄ọ,+ nte nnyịn ima kiet eken.+ 6 Ndien ima ọwọrọ ntem,+ ete, nnyịn ika iso isan̄a ke mme ewụhọ esie.+ Emi edi ewụhọ oro, kpa nte mbufo ẹkekopde toto ke editọn̄ọ, ẹte mbufo ẹka iso ẹsan̄a ke enye.+ 7 Koro ediwak mbon abian̄a ẹmewọn̄ọ ẹdụk ererimbot,+ kpa mmọ emi mînyịmeke ite ke Jesus Christ ama edi ke obụkidem.+ Owo emi anamde emi edi andibian̄a+ ye andibiọn̄ọ Christ.+

8 Ẹkpeme idem, mbak mbufo ẹditaba n̄kpọ emi nnyịn ikakpade utom inam, edi man mbufo ẹkpebọ ọyọhọ utịp.+ 9 Owo ekededi eke anamde n̄kpọ ebe adan̄a+ mînyụn̄ itieneke+ ukpepn̄kpọ Christ inyeneke unyịme Abasi.+ Owo emi etienede ukpepn̄kpọ emi enyene unyịme Ete ye Eyen.+ 10 Edieke owo ekededi edide ke ọtọ mbufo mînyụn̄ idaha ukpepn̄kpọ emi idi, ẹkûdedei ẹda enye ẹsịn ke ufọk+ mbufo ẹkûnyụn̄ ẹkọm enye.+ 11 Koro owo eke ọkọmde enye etiene abuana ke mme idiọk utom esie.+

12 Okposụkedi nnyenede ediwak n̄kpọ ndiwet nnọ mbufo, nyomke ndida babru ye mmọn̄n̄wed+ n̄wet, edi mmodori enyịn ndidi ke ọtọ mbufo man ndineme nneme ye mbufo iso ye iso,+ man idatesịt+ mbufo ọkpọyọhọ.+

13 Nditọ eyenete fo an̄wan, emi ẹmekde, ẹte n̄kọm fi.+