Ediyarade Emi Ẹnọde John

1 Ediyarade+ emi otode Jesus Christ, emi Abasi ọkọnọde enye,+ ete owụt ifịn+ esie mme n̄kpọ eke ẹditịbede ke mîbịghike.+ Ndien enye osio angel+ esie ọdọn̄ onyụn̄ ọnọ enye n̄kpọ emi ke mme idiọn̄ọ+ ete okowụt ofụn esie John,+ 2 emi eketiede ntiense aban̄a ikọ emi Abasi ọkọnọde+ ye ikọ ntiense emi Jesus Christ ọkọnọde,+ oro edi, kpukpru n̄kpọ emi enye okokụtde. 3 Owo emi okotde ntịn̄nnịm ikọ emi uyo ọwọrọ+ ye mmọ emi ẹkopde ntịn̄nnịm ikọ emi,+ ẹnyụn̄ ẹnịmde mme n̄kpọ eke ẹwetde ke esịt,+ ẹkop inemesịt+ koro ini oro ẹkenịmde emekpere.+

4 John ewet n̄wed emi ọnọ ẹsọk esop itiaba+ emi ẹdude ke Asia:*

Mbufo ẹkpekam ẹnyene mfọnido oro owo mîdotke ye emem ẹto “Enye emi odude, emi okonyụn̄ odude, emi edinyụn̄ edide,”+ ẹnyụn̄ ẹnyene ẹto spirit itiaba+ emi ẹdude ke iso ebekpo esie, 5 ẹnyụn̄ ẹnyene ẹto Jesus Christ, “Ntiense Akpanikọ,”+ “Akpan emi edide akpa ndiset ke n̄kpa,”+ ye “Andikara ndidem isọn̄.”+

Enye emi amade nnyịn,+ okonyụn̄ adade iyịp+ esie atat nnyịn anam ibọhọ mme idiọkn̄kpọ nnyịn— 6 enye ama onyụn̄ anam nnyịn idi obio ubọn̄+ ye mme oku+ inọ Abasi ye Ete esie—ih, yak ubọn̄ ye odudu ẹnyene enye ke nsinsi.+ Amen.

7 Sese! Enye ọmọn̄ asan̄a ke obubịt enyọn̄+ edi, ndien kpukpru enyịn ẹyekụt enye,+ mbon oro ẹkekịmde enye ẹyenyụn̄ ẹkụt enye;+ ndien kpukpru mme esien ke isọn̄ ẹyeyịbi idemmọ ke mfụhọ ke ntak esie.+ Ih, yak edi ntre.

8 “Ami ndi Alpha ye Omega,”+ ntem ke Jehovah Abasi ọdọhọ, “Enye emi odude, emi okonyụn̄ odude, emi edinyụn̄ edide,+ kpa Ata Ọkpọsọn̄.”+

9 Ami John, eyenete mbufo ye anditiene mbufo mbuana ke ukụt+ ye obio ubọn̄+ ye ime+ ke Jesus,+ n̄kodu ke isuo emi ekerede Patmos ke ntak emi n̄ketịn̄de mban̄a Abasi nnyụn̄ ntiede ntiense mban̄a Jesus.+ 10 N̄kodu+ ke usen Ọbọn̄+ ke odudu spirit,+ ndien n̄kop ọkpọsọn̄ uyo+ ke edem mi nte uyo obukpon̄, 11 ọdọhọde ete: “Se afo okụtde wet+ ke ikpan̄wed nọ ẹsọk mme esop itiaba,+ ke Ephesus+ ye ke Smyrna+ ye ke Pergamum+ ye ke Thyatira+ ye ke Sardis+ ye ke Philadelphia+ ye ke Laodicea.”+

12 Ekem ami n̄wọn̄ọde nte nse uyo eke etịn̄de ikọ ye ami, ndien, ke n̄wọn̄ọrede, n̄kụt uwụk utuenikan̄ itiaba emi ẹnamde ke gold,+ 13 ndien owo emi ebietde eyen owo+ odu ke ufọt uwụk utuenikan̄ oro, esịne ọfọn̄ emi esịmde enye ikpat, onyụn̄ ọbọbọ mbọbọ gold ke ikpanesịt. 14 Akan oro, ibuot esie ye idet esie ẹfia+ nte afia idet erọn̄, ye nte snow, ndien enyịn esie ebiet edemeikan̄;+ 15 ukot esie ẹnyụn̄ ẹbiet nsemnsem okpoho+ ke ini esemde ke akwa ikan̄; uyo+ esie onyụn̄ ebiet uyom ediwak mmọn̄. 16 Ndien enye akama ntantaọfiọn̄ itiaba+ ke ubọk nnasia esie, anyan edisọp akan̄kan̄+ iso iba onyụn̄ ọwọrọ enye ke inua, ndien iso esie ebiet utịn ke ini enen̄erede ayama.+ 17 Ndien ke ini n̄kụtde enye, nduọ enye ke ukot nte owo n̄kpa.

Ndien enye odori mi ubọk nnasia esie ke idem onyụn̄ ọdọhọ mi ete: “Kûfehe ndịk.+ Ami ndi Akpa+ ye Akpatre,+ 18 ye enye emi odude uwem;+ mma nnyụn̄ n̄kpa,+ edi sese! ndodu uwem ke nsinsi nsinsi,+ mmonyụn̄ nnyene ukpọhọde n̄kpa+ ye eke Udi.*+ 19 Mmọdo wet mme n̄kpọ emi afo okokụtde nịm, ye mme n̄kpọ emi ẹdude ye mme n̄kpọ emi ẹditịbede ke mmọ emi ẹma ẹkebe.+ 20 Edisana ndịben̄kpọ emi aban̄ade ntantaọfiọn̄ itiaba+ oro afo okokụtde ke ubọk nnasia mi, ye uwụk utuenikan̄ itiaba+ oro ẹnamde ke gold edi emi: Ntantaọfiọn̄ itiaba oro ẹda ẹban̄a mme angel esop itiaba: ndien uwụk utuenikan̄ itiaba oro ẹda ẹban̄a esop itiaba.+

2 “Wet nọ ẹsọk angel+ esop emi odude ke Ephesus,+ ete: Mme n̄kpọ emi ke enye emi akamade ntantaọfiọn̄ itiaba+ ke ubọk nnasia esie ọdọhọ, kpa enye emi asan̄ade ke ufọt uwụk utuenikan̄ itiaba oro ẹnamde ke gold,+ 2 ‘Mmọfiọk mme edinam fo,+ ye utom fo ye ime fo, ye nte ke afo ukemeke ndiyọ mme idiọkowo, ye nte ke afo ama odomo+ mmọ emi ẹdọhọde ẹte ke idi mme apostle+ ese, edi emi mîdịghe, ama onyụn̄ okụt ke mmọ ẹdi mme osu nsu. 3 Afo n̄ko ke eme ime,+ omonyụn̄ ọyọ ke ntak enyịn̄ mi+ unyụn̄ ukpaha mba.+ 4 Nte ededi, mmenyene emi ndida mbiom fi, nte ke ọmọkpọn̄ akpa ima emi afo ekenyenede.+

5 “‘Ke ntre ti itie emi afo ọduọde ọkpọn̄, ndien kabade esịt+ nyụn̄ nam se akanamde ke akpa. Edieke mûnamke, mmọn̄ ndi ke ọtọ fo,+ ndien nyemen uwụk utuenikan̄+ fo mfep ke itie esie, ibọhọke afo akabade esịt. 6 Edi, enyene se afo anamde ọfọn, afo amasua+ mme edinam n̄ka Nicolaus,+ emi ami n̄ko nsuade. 7 Yak owo eke enyenede utọn̄ okop se spirit+ ọdọhọde mme esop: Nyanam enye emi akande+ adia mfri eto uwem,+ emi odude ke paradise Abasi.’

8 “Nyụn̄ wet nọ ẹsọk angel+ esop emi odude ke Smyrna, ete: Mme n̄kpọ emi ke enye ọdọhọ, enye emi edide ‘Akpa ye Akpatre,’+ emi akakpade ndien afiak edidu uwem,+ 9 ‘Mmọfiọk ukụt ye unana fo—edi afo emenyene inyene+—mmonyụn̄ mfiọk ikọ isụn̄i mbon emi ẹdọhọde ke mmimọ idi mme Jew+ edi emi mîdịghe, edi ẹdide synagogue Satan.+ 10 Kûyak ndịk anam fi aban̄a ukụt emi ẹdisịmde fi.+ Sese! Devil+ ọmọn̄ otomo ndusụk mbufo ọdọn̄ ke ufọk-n̄kpọkọbi man ẹnen̄ede ẹdomo+ mbufo ẹse, man mbufo ẹkụt ukụt+ ke usen duop. Wụt idem nte anam-akpanikọ tutu esịm n̄kpa,+ ndien nyọnọ fi anyanya uwem.+ 11 Yak owo eke enyenede utọn̄ okop+ se spirit+ ọdọhọde mme esop: Tutu amama, udiana n̄kpa+ idinọmọke owo emi akande.’+

12 “Nyụn̄ wet nọ ẹsọk angel esop emi odude ke Pergamum, ete: Mme n̄kpọ emi ke enye emi enyenede anyan, edisọp akan̄kan̄ iso iba,+ ọdọhọ, 13 ‘Mmọfiọk ebiet emi afo odụn̄de, oro edi, ebiet emi ebekpo Satan odude; edi kpa ye oro afo ke osụk ọsọsọn̄ọ omụm enyịn̄ mi akama,+ unyụn̄ ukan̄ke mbuọtidem oro afo enyenede ke idem mi,+ idem ke mme usen Antipas, ntiense mi,+ kpa owo akpanikọ, emi ẹkewotde+ ke iso mbufo, ke ebiet emi Satan odụn̄de.

14 “‘Nte ededi, mmenyene n̄kpọ ifan̄ eke ndade mbiom fi, nte ke afo emenyene mbon emi ẹsọn̄ọde ẹmụm ukpepn̄kpọ Balaam+ ẹkama, emi eketemede Balak+ ete enịm nditọ Israel n̄kpọ iduọ ke iso, oro edi ndinam mmọ ẹdia mme n̄kpọ eke ẹwade ẹnọ ndem ẹnyụn̄ ẹnam use.+ 15 Kpasụk ntre, n̄ko, afo emenyene mbon emi ẹsọn̄ọde ẹmụm ukpepn̄kpọ n̄ka Nicolaus+ ẹkama. 16 Ke ntre kabade esịt.+ Edieke mûkabakede esịt, mmọn̄ ndi ke ọtọ fo iwiwa, nyonyụn̄ nda anyan akan̄kan̄ eke ọwọrọde mi ke inua+ n̄n̄wana+ ye mmọ.

17 “‘Yak owo eke enyenede utọn̄ okop se spirit ọdọhọde mme esop:+ Owo eke akande,+ nyọnọ enye ndusụk ke otu ndịbe manna,+ nyonyụn̄ nnọ enye afia ekpri itiat, ndien ẹyewet obufa enyịn̄+ ke ekpri itiat oro kpa enyịn̄ eke owo baba kiet mîfiọkke ke mîbọhọke owo emi ọbọde enye.’+

18 “Nyụn̄ wet nọ ẹsọk angel esop emi odude ke Thyatira,+ ete: Mme n̄kpọ emi ke Eyen+ Abasi ọdọhọ, kpa enye emi enyịn esie ebietde edemeikan̄,+ ukot esie onyụn̄ ebietde nsemnsem okpoho,+ 19 ‘Mmọfiọk mme edinam fo, ye ima+ ye mbuọtidem fo ye utom fo ye ime fo, ye nte ke mme edinam+ fo eke ukperedem emi ẹkan eke akpa.+

20 “‘Nte ededi, mmenyene emi ndida mbiom fi, nte ke afo amayak n̄wan oro Jezebel+ odu, emi okotde idemesie prọfet an̄wan, ndien enye ke ekpep+ onyụn̄ otụn ifịn+ mi usụn̄ man ẹnam use+ ẹnyụn̄ ẹdia mme n̄kpọ eke ẹwade ẹnọ ndem.+ 21 Ndien mma nnọ enye ini ndikabade esịt,+ edi enye inyịmeke ndikabade esịt n̄kpọn̄ use esie.+ 22 Sese! Mmọn̄ ntop enye nsịn ke nna udọn̄ọ, nnyụn̄ ntop mbon emi ẹsịnde efịbe ye enye nsịn ke akwa ukụt, ibọhọke mmọ ẹkabade esịt ẹkpọn̄ mme edinam esie. 23 Ndien nyada udọn̄ọ n̄kpa n̄wot nditọ esie, man kpukpru esop ẹfiọk ẹte ke ami ndi enye emi odụn̄ọrede ekpụt ye esịt, nyonyụn̄ nnọ mbufo owo kiet kiet nte ekemde ye mme edinam mbufo.+

24 “‘Nte ededi, ndọhọ mbufo eken emi ẹdude ke Thyatira, kpukpru mbon emi mîbọhọ ukpepn̄kpọ emi, kpa mbon oro mîkenyeneke ifiọk iban̄a “mme ntotụn̄ọ n̄kpọ Satan,”+ nte mmọ ẹdọhọde, nte: Ami ndaha ọkpọsọn̄ mfịghe en̄wen ndori mbufo ke idem.+ 25 Utu ke oro, ẹsọn̄ọ ẹmụm se mbufo ẹnyenede ẹkama+ tutu ndi. 26 Ndien owo eke akande onyụn̄ enịmde mme edinam mi tutu esịm utịt,+ nyọnọ enye odudu ndikara mme idụt,+ 27 ndien enye ayada esan̄ ukwak+ akara* mme idụt tutu mmọ ẹbomo mbai mbai nte esombat,+ kpa nte n̄kọbọde odudu nto Ete mi, 28 ndien nyọnọ enye ntantaọfiọn̄ usenubọk.+ 29 Yak owo eke enyenede utọn̄ okop se spirit+ ọdọhọde mme esop.’+

3 “Nyụn̄ wet nọ ẹsọk angel+ esop emi odude ke Sardis, ete: Mme n̄kpọ emi ke enye emi enyenede spirit itiaba+ emi ẹdide eke Abasi ye ntantaọfiọn̄ itiaba+ ọdọhọ, ‘Mmọfiọk mme edinam fo, nte ke afo emenyene enyịn̄ nte ke afo ke ododu uwem, edi afo amakpa.+ 2 Du ke ukpeme,+ nyụn̄ nam mme n̄kpọ eke ẹsụhọde emi ẹma ẹkekpere ndikpa ẹsọn̄ idem,+ koro n̄kwe nte anamde mme edinam fo ọyọhọ ọyọhọ ke iso Abasi mi.+ 3 Ke ntre, sụk ti nte akasan̄ade ọbọ+ ye nte akasan̄ade okop, ndien ka iso mụm enye kama+, nyụn̄ kabade esịt.+ Ibọhọke afo edemede,+ nyedi nte inọ,+ afo udunyụn̄ ufiọkke hour eke ndidide ndisịm fi idem.+

4 “‘Nte ededi, afo emenyene ibat ibat enyịn̄+ ke Sardis oro mîkasabakede+ ewụra mmọ, ndien mmọ ẹyesịne mfia+ ewụra ẹsan̄a ye ami, koro mmọ ẹdotde.+ 5 Owo eke akande+ eyesịne afia ewụra;+ ndinyụn̄ nsọhike enyịn̄ esie mfep ke n̄wed uwem,+ nyenyịme enyịn̄ esie ke iso Ete+ mi ye ke iso mme angel esie.+ 6 Yak owo eke enyenede utọn̄ okop se spirit+ ọdọhọde mme esop.’

7 “Nyụn̄ wet nọ ẹsọk angel+ esop emi odude ke Philadelphia, ete: Mme n̄kpọ emi ke enye emi edide edisana,+ emi edide akpanikọ,+ emi enyenede ukpọhọde David,+ emi ebererede ndien baba owo kiet iberike, onyụn̄ eberide ndien baba owo kiet iberekede, ọdọhọ ete, 8 ‘Mmọfiọk mme edinam fo+—sese! mmenịm fi ana-in̄wan̄ usụn̄ ke iso,+ emi owo ndomokiet mîkemeke ndiberi—afo emenyene esisịt odudu, afo ama onyụn̄ enịm ikọ mi unyụn̄ ukan̄ke enyịn̄ mi.+ 9 Sese! nyọnọ mmọ emi ẹtode synagogue Satan emi ẹdọhọde ke idi mme Jew+ edi mîdịghe, edi ẹsosu+—sese! nyanam mmọ ẹdi ẹdinụhọ+ fi ke ukot nnyụn̄ nnam mmọ ẹfiọk ẹte ke mmama fi. 10 Sia afo ama ọkọsọn̄ọ omụm ikọ emi aban̄ade ime+ mi akama, ami n̄ko nyekpeme+ fi ke ini idomo emi edisịmde ofụri isọn̄, man ẹdomo kpukpru mbon emi ẹdụn̄de ke isọn̄.+ 11 Ami mmọn̄ ndedi iwiwa.+ Ka iso sọn̄ọ mụm se afo enyenede kama,+ mbak owo edibọ fi anyanya fo.+

12 “‘Owo eke akande—nyanam enye edi adaha+ ke temple+ Abasi mi,+ enye idinyụn̄ iwọrọke aba do tutu amama, nyonyụn̄ n̄wet enye enyịn̄ Abasi mi ye enyịn̄ obio Abasi mi ke idem, kpa obufa Jerusalem+ emi otode Abasi mi osụhọde ke heaven edi, ọkọrọ ye obufa enyịn̄ mi oro.+ 13 Yak owo eke enyenede utọn̄ okop se spirit+ ọdọhọde mme esop.’

14 “Nyụn̄ wet nọ ẹsọk angel esop emi odude ke Laodicea,+ ete: Mme n̄kpọ emi ke Amen+ ọdọhọ, kpa anam-akpanikọ+ ye ntiense+ akpanikọ,+ ntọn̄ọ edibotn̄kpọ Abasi,+ 15 ‘Mmọfiọk mme edinam fo, nte ke afo ubịtke unyụn̄ ufiopke. Akpakam afo ebịt mîdịghe ofiop. 16 Ntre, sia afo etiede ndebe ndebe, ufiopke-fiop+ unyụn̄ ubịtke-bịt,+ ami mmọn̄ n̄kpọhi fi nsio ke inua mi. 17 Koro afo ọdọhọde ete: “Ami mmenyene inyene,+ mmonyụn̄ n̄kọ inyene ndien nnanake n̄kpọ ndomokiet,” edi afo ufiọkke ete imọ idi owo nditaha omonyụn̄ enyene mbọm, onyụn̄ ebuene, edi nnan+ onyụn̄ asan̄a iferi, 18 nteme fi nte ọbọ mi gold+ eke ẹdade ikan̄ ẹtem asana edep man afo ekpenyene n̄kpọ, onyụn̄ ọbọ mi afia ewụra edep man afo enyene se esịnede mbak mbon en̄wen ẹdikụt fi iferi ndien bụt+ anam fi, onyụn̄ edep ibọk enyịn ndida nyet ke enyịn+ man afo ekeme ndikụt usụn̄.

19 “‘Kpukpru mbon oro mmade ke nnọ nsuannọ ye ntụnọ.+ Ke ntre nyene ifịk nyụn̄ kabade esịt.+ 20 Sese! ami nda ke enyịnusụn̄+ n̄kọn̄ usụn̄. Edieke owo ekededi okopde uyo mi onyụn̄ ebererede usụn̄,+ nyodụk ufọk esie nnyụn̄ ndia udia mbubreyo ye enye ndien enye ayadia udia ye ami. 21 Nyanam owo eke akande+ osụhọde etie ye ami ke ebekpo mi,+ kpa nte ami n̄kakande nnyụn̄ nsụhọrede ntie+ ye Ete mi ke ebekpo esie.+ 22 Yak owo eke enyenede utọn̄ okop se spirit+ ọdọhọde mme esop.’”+

4 Ke mme n̄kpọ emi ẹma ẹkebe n̄kụt, ndien, sese! ana-in̄wan̄ usụn̄ ke heaven, ndien akpa uyo oro n̄kokopde eketie nte uyo obukpon̄,+ ndien enye etịn̄ ikọ ye ami, ete: “Dọk di mi,+ ndien nyowụt fi mme n̄kpọ emi ẹditịbede.”+ 2 Ke mme n̄kpọ emi ẹma ẹkebe, mma ndidu kpa idaha oro ke odudu spirit: ndien, sese! ebekpo+ odu ke itie esie ke heaven,+ owo onyụn̄ etie ke ebekpo oro.+ 3 Ndien enye emi etiede, ebiet+ itiat jasper+ ye ọsọn̄urua ndatndat itiat, akpara+ emi ebietde emerald+ onyụn̄ odu akanade ebekpo oro okụk.

4 Ebekpo edịp ye inan̄ ẹnyụn̄ ẹdu ẹkanade ebekpo+ oro ẹkụk, ndien n̄kụt mbiowo+ edịp ye inan̄+ emi ẹsịnede mfia ewụra+ ẹtiede ke mme ebekpo emi, ẹnyụn̄ ẹyara anyanya gold ke ibuot mmọ.+ 5 Ndien mme emịnen̄mịnen̄+ ye uyo ye obuma+ ẹto ke ebekpo oro ẹwọn̄ọ; utuenikan̄+ itiaba eke ẹsakde ẹnyụn̄ ẹdu ke iso ebekpo oro, ndien mmọ emi ẹda ẹban̄a spirit itiaba+ emi ẹtode Abasi. 6 Ndien se itiede nte inyan̄ emi ebietde akrasi+ odu ke iso ebekpo oro, ebiet itiat crystal.

Mme odu-uwem edibotn̄kpọ+ inan̄ oro enyịn ẹyọhọde mmọ idem ke iso ye ke edem ẹdu ke ufọt ebekpo oro ẹnyụn̄ ẹdu ẹkanade ebekpo oro. 7 Ndien akpa odu-uwem edibotn̄kpọ ebiet ekpe,+ ọyọhọ odu-uwem edibotn̄kpọ iba onyụn̄ ebiet abak ayara enan̄,+ ọyọhọ odu-uwem edibotn̄kpọ ita+ enyene iso emi ebietde iso owo, ndien ọyọhọ odu-uwem edibotn̄kpọ+ inan̄ ebiet ntrukpom eke efede.+ 8 Ndien amaedi mme odu-uwem edibotn̄kpọ inan̄+ emi, mmọ kiet kiet ẹnyene mba itiokiet,+ emi enyịn ẹyọhọde mmọ idem ke enyọn̄ ye ke esịt.+ Mmọ inyụn̄ inyeneke nduọkodudu ke uwemeyo ye ke okoneyo, mmọ ẹsụk ẹdọhọ ẹte: “Edisana, edisana, edisana Jehovah+ Abasi, kpa Ata Ọkpọsọn̄,+ emi okodude, emi onyụn̄ odude,+ emi edinyụn̄ edide.”

9 Ndien ini ekededi emi mme odu-uwem edibotn̄kpọ oro ẹnọde Enye emi etiede ke ebekpo+ ubọn̄ ye ukpono ye ekọm,+ kpa Enye emi odude uwem ke nsinsi nsinsi,+ 10 mbiowo edịp ye inan̄+ oro ẹduọn̄ọ ke isọn̄ ke iso Enye emi etiede ke ebekpo ẹnyụn̄ ẹtuak ibuot+ ẹnọ Enye emi odude uwem ke nsinsi nsinsi, ndien mmọ ẹduọn̄ọ mme anyanya mmọ ke iso ebekpo ẹnyụn̄ ẹdọhọ ẹte: 11 “Jehovah, Abasi nnyịn, afo omodot ndibọ ubọn̄+ ye ukpono+ ye odudu,+ koro afo okobotde kpukpru n̄kpọ,+ ndien ke ntak uduak+ fo ke mmọ ẹkedu, oro okonyụn̄ anam ẹbot mmọ.”+

5 Ndien n̄kụt ikpan̄wed emi ẹwetde n̄kpọ ke esịt ye ke edem,+ ẹnyụn̄ ẹdiande ufịkn̄kpọ+ itiaba, nte esịnede ke ubọk nnasia Enye emi etiede ke ebekpo.+ 2 Ndien n̄kụt ọkpọsọn̄ angel atan̄ade ke ọkpọsọn̄ uyo ete: “Anie odot nditat ikpan̄wed emi nnyụn̄ ndian̄ade mme ufịkn̄kpọ esie?” 3 Edi baba owo kiet idụhe ke heaven m̀mê ke isọn̄ m̀mê ke idakisọn̄ emi ekemede nditat ikpan̄wed emi m̀mê ndise esịt esie. 4 Ndien ntua eyet etieti sia mîdụhe baba owo kiet eke odotde nditat ikpan̄wed emi m̀mê ndise esịt esie.+ 5 Edi kiet ke otu mbiowo oro ọdọhọ mi ete: “Kûtua aba. Sese! Ekpe emi otode esien Judah,+ kpa orụn̄+ David,+ amakan+ man akpatat ikpan̄wed oro onyụn̄ adian̄ade ufịkn̄kpọ itiaba esie.”

6 Ndien n̄kụt eyenerọn̄+ nte adade ke ufọt ebekpo+ ye ke ufọt odu-uwem edibotn̄kpọ inan̄ oro ye ke ufọt mbiowo,+ nte n̄kpọ eke ẹma ẹkewot enye,+ enyene nnụk itiaba ye enyịn itiaba,+ ndien mme enyịn emi ẹda ẹban̄a spirit itiaba emi ẹtode Abasi, emi ẹnọde ẹdi ofụri isọn̄. 7 Ndien enye adaha inikiet aka ọkọbọ ikpan̄wed emi ke ubọk nnasia Enye emi etiede ke ebekpo.+ 8 Ndien ke ini enye ama ọkọbọ ikpan̄wed oro, mme odu-uwem edibotn̄kpọ inan̄ oro ye mbiowo edịp ye inan̄+ oro ẹduọn̄ọ ke iso Eyenerọn̄, owo mmọ kiet kiet akama harp+ ye usan gold, emi ọyọhọde ye incense, ndien incense+ oro ada aban̄a akam+ ndisana owo. 9 Ndien mmọ ẹkwọ obufa ikwọ,+ ẹte: “Afo omodot ndibọ ikpan̄wed emi ndinyụn̄ ndian̄ade mme ufịkn̄kpọ esie, koro ẹkewotde fi ndien afo ama ada iyịp+ fo edep+ mme owo osion̄o ke kpukpru esien ye usem ye obio ye idụt, ọnọ Abasi,+ 10 omonyụn̄ anam mmọ ẹdi obio ubọn̄+ ye mme oku+ ẹnọ Abasi nnyịn,+ ndien mmọ ẹyekara isọn̄ nte ndidem.”+

11 Ndien n̄kụt, nnyụn̄ n̄kop uyo ediwak angel emi ẹkande ebekpo ẹkụk ye eke mme odu-uwem edibotn̄kpọ ye mbiowo, ndien ibat mmọ ekedi tọsịn duop ke itie tọsịn duop+ ye mme tọsịn ke mme itie tọsịn,+ 12 mmọ ẹnyụn̄ ẹdọhọ ke ọkpọsọn̄ uyo ẹte: “Eyenerọn̄ emi ẹkewotde+ omodot ndibọ odudu ye inyene ye ọniọn̄ ye ukeme ye ukpono ye ubọn̄ ye itoro.”+

13 Ndien n̄kop kpukpru edibotn̄kpọ emi ẹdude ke heaven ye ke isọn̄+ ye ke idak isọn̄ ye ke inyan̄, ye kpukpru n̄kpọ emi ẹdude mmọ ke esịt, nte ẹdọhọde ẹte: “Itoro ye ukpono+ ye ubọn̄+ ye odudu ẹnyene Enye emi etiede ke ebekpo+ ẹnyụn̄ ẹnyene Eyenerọn̄+ ke nsinsi nsinsi.” 14 Ndien mme odu-uwem edibotn̄kpọ inan̄ oro ẹdọhọ ẹte: “Amen!” ndien mbiowo+ ẹduọn̄ọ ke isọn̄ ẹnyụn̄ ẹtuak ibuot.+

6 Ndien n̄kụt ke ini emi Eyenerọn̄+ adian̄arede kiet ke otu ufịkn̄kpọ itiaba+ oro, nnyụn̄ n̄kop kiet ke otu mme odu-uwem edibotn̄kpọ inan̄+ oro ọdọhọde ke uyo eke ebietde obuma ete: “Di!”+ 2 Ndien n̄kụt, ndien sese! afia enan̄-mbakara;+ ndien andidoro+ enye ke edem akama utịgha;+ ẹnyụn̄ ẹnọ enye anyanya,+ ndien enye ọwọrọ aka akakan+ onyụn̄ okụre edikan esie.+

3 Ndien ke ini enye adian̄arede ọyọhọ ufịkn̄kpọ iba, n̄kop ọyọhọ odu-uwem edibotn̄kpọ iba+ ọdọhọde ete: “Di!” 4 Ndien enan̄-mbakara efen ọwọrọ edi, ididuot enan̄-mbakara; ndien ẹnọ andidoro enye ke edem odudu ndisio emem mfep ke isọn̄ man mmọ ẹkpewot kiet eken; ẹnyụn̄ ẹnọ enye akwa akan̄kan̄.+

5 Ndien ke ini enye+ adian̄arede ọyọhọ ufịkn̄kpọ ita,+ n̄kop nte ọyọhọ odu-uwem edibotn̄kpọ ita ọdọhọde ete: “Di!” Ndien n̄kụt, ndien sese! obubịt enan̄-mbakara ọwọrọ edi; ndien andidoro enye ke edem akama udomon̄kpọ+ ke ubọk. 6 Ndien n̄kop uyo emi etiede nte ọwọrọ ke ufọt+ mme odu-uwem edibotn̄kpọ inan̄+ oro, ọdọhọde ete: “Udomo wheat kiet ke denarius+ kiet, ye udomo barley ita ke denarius kiet; ẹkûbiat aran olive ye wine.”+

7 Ndien ke ini enye adian̄arede ọyọhọ ufịkn̄kpọ inan̄, n̄kop uyo ọyọhọ odu-uwem edibotn̄kpọ inan̄+ ọdọhọde ete: “Di”! 8 Ndien n̄kụt, ndien, sese! ntọn̄ntọn̄ enan̄-mbakara; ndien andidoro enye ke edem ekere N̄kpa. Udi*+ onyụn̄ etiene enye ke edem. Ẹnyụn̄ ẹnọ mmọ odudu ke ubak isọn̄ kiet ke itie inan̄, ẹte, ẹda anyan akan̄kan̄+ ye akan̄+ ye udọn̄ọ n̄kpa ye ndiọi unam+ isọn̄ ẹwot mmọ.

9 Ndien ke ini enye adian̄arede ọyọhọ ufịkn̄kpọ ition, n̄kụt ke idak itieuwa+ mme ukpọn̄+ mbon oro ẹkewotde+ ke ntak ikọ Abasi ye ke ntak utom edinọ ikọ ntiense+ oro mmọ ẹkenamde. 10 Ndien mmọ ẹfiori ke ọkpọsọn̄ uyo, ẹte: “Akakan Ọbọn̄ Andikara+ emi edide edisana ye akpanikọ,+ adan̄a didie ke afo editre ndikpe ikpe+ nnyụn̄ nsio usiene iyịp+ nnyịn ke idem mme andidụn̄ isọn̄?” 11 Ndien ẹnọ mmọ kiet kiet afia+ ọfọn̄idem; ẹnyụn̄ ẹdọhọ mmọ ẹte ẹduọk odudu esisịt, tutu ekemmọ ifịn ye nditọete mmọ oro ẹdiwotde kpa nte ẹkewotde+ mmọ n̄ko, ẹkem ibat.

12 Ndien n̄kụt ke ini enye adian̄arede ọyọhọ ufịkn̄kpọ itiokiet, akwa unyekisọn̄ etịbe; utịn onyụn̄ akabade ebre nte ọfọn̄ ntuan̄a+ eke ẹdade idet ẹdọk, ndien ọfiọn̄ akabade iyịp ofụri ofụri,+ 13 mme ntantaọfiọn̄ ikpaenyọn̄ ẹnyụn̄ ẹduọn̄ọ ke isọn̄, nte n̄kịm fig ẹkịbede ẹduọn̄ọ ke ini ọkpọsọn̄ ofụm enyen̄ede eto fig. 14 Ndien ikpaenyọn̄ ebe efep nte ikpan̄wed eke ẹfụtde,+ ẹnyụn̄ ẹmen kpukpru obot ye kpukpru isuo ẹfep ke mme itie mmọ.+ 15 Ndien ndidem isọn̄ ye mme akama ikpọ itie ye mme etubom ekọn̄ ye mbon inyene ye n̄kpọsọn̄ owo ye kpukpru ifịn ye kpukpru nditọisọn̄ ẹdịp idemmọ ke abaitiat ye ke ikpọ itiat emi ẹdude ke obot.+ 16 Ndien mmọ ẹdọhọ mme obot ye ikpọ itiat ẹte: “Ẹduọn̄ọ ẹfụk nnyịn+ ẹnyụn̄ ẹdịp nnyịn man ibọhọ iso Enye emi etiede ke ebekpo+ inyụn̄ ibọhọ iyatesịt Eyenerọn̄,+ 17 koro akwa usen+ iyatesịt+ mmọ emedi, ndien anie ekeme ndida?”+

7 Ke emi ama ekebe, n̄kụt angel+ inan̄ nte ẹdade ke inụk isọn̄ mbinan̄, ẹsọn̄ọ ẹmụm ofụm+ isọn̄ mbinan̄ ẹkama, man baba ofụm okûfụme ke isọn̄ m̀mê ke inyan̄ m̀mê ke eto ekededi.+ 2 Ndien n̄kụt angel efen otode edem usiahautịn+ ọdọk edi, emi enyenede ufịkn̄kpọ odu-uwem Abasi;+ ndien enye ofiori ke ọkpọsọn̄ uyo okot angel inan̄ emi ẹkenọde odudu ndibiat isọn̄ ye inyan̄, 3 onyụn̄ ọdọhọ ete: “Ẹkûbiat isọn̄ m̀mê inyan̄ m̀mê mme eto, tutu nnyịn ifịk+ ifịn Abasi nnyịn idiọn̄ọ ke ọkpọiso.”+

4 Ndien n̄kop ibat mmọ eke ẹfịkde idiọn̄ọ, owo tọsịn ikie ye aba ye inan̄,+ emi ẹfịkde idiọn̄ọ ke kpukpru esien+ nditọ Israel:+

9 Ke n̄kpọ emi ẹma ẹkebe n̄kụt, ndien, sese! akwa otuowo,+ emi baba owo kiet mîkemeke ndibat, eke ẹtode kpukpru idụt+ ye esien ye obio+ ye usem,+ ẹdade ke iso ebekpo+ ye ke iso Eyenerọn̄, ẹsịne mfia ọfọn̄idem;+ mmọ ẹnyụn̄ ẹkama ndakeyop+ ke ubọk. 10 Ndien mmọ ẹka iso ẹfiori ke ọkpọsọn̄ uyo, ẹte: “Edinyan̄a oto Abasi nnyịn,+ emi etiede ke ebekpo,+ onyụn̄ oto Eyenerọn̄.”+

11 Ndien kpukpru mme angel+ ẹdada ẹkan ebekpo ye mbiowo+ ye mme odu-uwem edibotn̄kpọ inan̄+ oro ẹkụk, mmọ ẹnyụn̄ ẹduọn̄ọ ẹkịbi iso ke isọn̄ ke iso ebekpo ẹnyụn̄ ẹtuak ibuot ẹnọ Abasi,+ 12 ẹte: “Amen! Yak itoro ye ubọn̄ ye ọniọn̄ ye ekọm ye ukpono ye odudu+ ye ukeme ẹnyene Abasi nnyịn ke nsinsi nsinsi. Amen.”+

13 Ndien kiet ke otu mbiowo+ oro obụp mi ete: “Mbon emi ẹsịnede mfia ọfọn̄idem+ mi, mmọ ẹdedi mmanie, mmọ ẹnyụn̄ ẹto m̀mọ̀n̄?” 14 Ntre kpa idaha oro mbọrọ enye nte: “Ọbọn̄ mi, afo akam ọfiọk.” Ndien enye ọdọhọ mi ete: “Mmọ ẹdi mbon emi ẹketode akwa ukụt+ ẹwọn̄ọ, ndien mmọ ẹyet ọfọn̄idem mmọ ẹnam afia+ ke iyịp+ Eyenerọn̄. 15 Ntak edi oro mmọ ẹdade ke iso+ ebekpo Abasi; ẹnyụn̄ ẹnamde edisana utom+ ẹnọ enye uwemeyo ye okoneyo ke temple esie; ndien Enye emi etiede ke ebekpo+ ayatat tent+ esie ofụk mmọ. 16 Mmọ idikopke aba biọn̄ idinyụn̄ ikopke aba nsatitọn̄, eyo m̀mê ọkpọsọn̄ ufiop ekededi idinyụn̄ ifọpke mmọ,+ 17 koro Eyenerọn̄,+ emi odude ke ufọt ebekpo, eyekpeme+ mmọ, oyonyụn̄ ada mmọ aka obube mmọn̄+ uwem. Ndien Abasi ọyọkwọhọde kpukpru mmọn̄eyet ke enyịn mmọ efep.”+

8 Ndien ke ini enye+ adian̄arede ọyọhọ ufịkn̄kpọ itiaba,+ ndobo odu ke heaven ke n̄kpọ nte ubak hour kiet. 2 Ndien n̄kụt angel itiaba+ oro ẹdade ke iso Abasi, ẹnyụn̄ ẹnọ mmọ obukpon̄ itiaba.

3 Ndien angel efen edi edisịm onyụn̄ ada ke itieuwa,+ akama n̄kpọ ufọp incense emi ẹnamde ke gold; ẹnyụn̄ ẹnọ enye ediwak incense+ ẹte ọfọp ke itieuwa emi ẹnamde ke gold oro odude ke iso ebekpo ọkọrọ ye akam kpukpru ndisana owo. 4 Ndien nsụn̄ikan̄ incense oro oto ubọk angel emi ọdọk aka iso Abasi ye akam+ ndisana owo. 5 Edi kpa idaha oro angel oro emen n̄kpọ ufọp incense oro ọdọn̄ ndusụk ikan̄+ emi ẹdade ẹto itieuwa oro ọyọhọ, onyụn̄ an̄wan̄a enye ọduọk ke isọn̄.+ Ndien obuma+ ye uyo ye emịnen̄mịnen̄+ ye unyekisọn̄+ ẹtịbe. 6 Ndien angel itiaba emi ẹkamade obukpon̄+ itiaba+ ẹben̄e idem ndifri mmọ.

7 Ndien akpa angel efri obukpon̄ esie. Ndien edịm itiat ye ikan̄+ emi abuahade ye iyịp etịbe, ẹnyụn̄ ẹn̄wan̄a enye ẹduọk ke isọn̄; ubak isọn̄ kiet ke itie ita onyụn̄ ata ikan̄,+ ndien ubak kiet ke itie ita ke otu mme eto ata ikan̄, kpukpru awawa ikọn̄+ ẹnyụn̄ ẹta ikan̄.

8 Ndien udiana angel efri obukpon̄ esie. Ndien ẹsio n̄kpọ eke ebietde akamba obot+ emi asakde ikan̄ ẹduọk ke inyan̄.+ Ndien ubak inyan̄ kiet ke itie ita akabade iyịp;+ 9 ndien ubak kiet ke itie ita ke otu mme edibotn̄kpọ oro ẹdude ke inyan̄ emi ẹnyenede uwem* ẹkpan̄a,+ ubak kiet ke itie ita ke otu mme ubom ẹnyụn̄ ẹwụre.

10 Ndien ọyọhọ angel ita efri obukpon̄ esie. Ndien akwa ntantaọfiọn̄ emi asakde nte utuenikan̄ oto enyọn̄ ediduọ,+ ndien ọduọ odụk ubak kiet ke itie ita ke otu mme akpa ye idịm mmọn̄.+ 11 Ẹnyụn̄ ẹkot ntantaọfiọn̄ oro Etidot. Ndien ubak mmọn̄ kiet ke itie ita akabade etidot, mmọn̄ oro onyụn̄ owot ediwak owo, koro ẹnamde enye odoro.+

12 Ndien ọyọhọ angel inan̄ efri obukpon̄ esie. Ndien ẹmia ubak utịn kiet ke itie ita ye ubak ọfiọn̄ kiet ke itie ita ye ubak kiet ke itie ita ke otu mme ntantaọfiọn̄, man ubak kiet ke itie ita ke otu mmọ ekpedi ekịm,+ ubak usen kiet ke itie ita+ okûnyụn̄ enyene un̄wana, kpasụk ntre n̄ko ye okoneyo.

13 Ndien n̄kụt, nnyụn̄ n̄kop ntrukpom+ emi efede ke ufọt enyọn̄+ nte ọdọhọde ke ọkpọsọn̄ uyo ete: “Mbọm, mbọm, mbọm+ mmọ emi ẹdụn̄de ke isọn̄ ke ntak uyom obukpon̄ mme angel ita eken emi ẹyomde ndifri obukpon̄ mmọ!”+

9 Ndien ọyọhọ angel ition efri obukpon̄+ esie. Ndien n̄kụt ntantaọfiọn̄+ oro okotode enyọn̄ ediduọ ke isọn̄, ndien ẹnọ enye ukpọhọde+ obube editụn̄ọ ukpe.+ 2 Enye onyụn̄ ọkpọhọde obube editụn̄ọ ukpe oro, ndien nsụn̄ikan̄+ ọwọrọ ke obube oro ọdọk nte nsụn̄ikan̄ akwa ikan̄,+ ndien nsụn̄ikan̄ obube oro anam utịn, ọkọrọ ye ofụm, ẹkịm.+ 3 Ndien mme n̄kukun̄kpọyọriyọ+ ẹto nsụn̄ikan̄ oro ẹwọn̄ọ ẹdụk isọn̄; ndien ẹnọ mmọ odudu, kpa ukem odudu emi mme ikpeyen+ isọn̄ ẹnyenede. 4 Ndien ẹdọhọ mmọ ẹte ẹkûbiat ikọn̄ ke isọn̄ m̀mê awawa n̄kpọ m̀mê eto ekededi, ibọhọke mbon emi mînyeneke ufịkn̄kpọ Abasi ke ọkpọiso mmọ.+

5 Ndien ẹnọ mme n̄kukun̄kpọyọriyọ oro uyo ẹte, ẹkûwot mmọ, edi ẹtụhọde+ mmọ ke ọfiọn̄ ition, ndien ndutụhọ mmọ eketie nte eke ikpeyen+ ke ini enye otopde owo. 6 Ndien ke mme usen oro mme owo ẹyeyom n̄kpa+ edi idikwe, oyonyụn̄ ọdọn̄ mmọ ndikpa edi n̄kpa eyefehe ọkpọn̄ mmọ.

7 Mme n̄kukun̄kpọyọriyọ oro ẹnyụn̄ ẹbiet enan̄-mbakara+ emi ẹben̄ede mmọ idem ẹnọ ekọn̄; ndien mmọ ẹyara mme n̄kpọ eke ẹbietde mme anyanya emi ẹnamde ke gold ke ibuot, iso mmọ ẹnyụn̄ ẹbiet iso owo,+ 8 edi mmọ ẹnyene idet emi ẹbietde idet iban.+ Ndien edet mmọ ẹbiet edet ekpe;+ 9 mmọ ẹnyụn̄ ẹsịne n̄kpọ ikpanesịt+ oro ebietde n̄kpọ ikpanesịt emi ẹdade ukwak ẹnam. Ndien uyom mba mmọ ebiet uyom chariot+ ediwak enan̄-mbakara emi ẹfen̄ede ẹka ekọn̄.+ 10 N̄ko, mmọ ẹnyene isịm ye ifọt nte ikpeyen;+ odudu mmọ onyụn̄ odu ke isịm mmọ ndida mfiomo mme owo ke ọfiọn̄ ition. 11 Mmọ ẹnyene edidem emi akarade mmọ, kpa angel editụn̄ọ ukpe.+ Enyịn̄ esie ke usem Hebrew edi Abaddon,* edi ke usem Greek enye ekere Apollyon.*+

12 Nnama kiet ebe. Sese! nnama+ iba en̄wen ke ẹdi ke edem.

13 Ndien ọyọhọ angel+ itiokiet efri obukpon̄+ esie. Ndien n̄kop uyo+ kiet ọwọrọde oto mme nnụk itieuwa+ oro ẹnamde ke gold emi odude ke iso Abasi 14 ọdọhọde ọyọhọ angel itiokiet, emi akamade obukpon̄, ete: “Tat mme angel+ inan̄ oro ẹkebọpde ẹnịm+ ke akwa akpa Euphrates.”+ 15 Ndien ẹtat angel inan̄ oro, emi ẹkeben̄ede mmọ idem ẹnịm ẹnọ hour ye usen ye ọfiọn̄ ye isua, ẹte ẹwot ubak kiet ke itie ita ke otu mme owo.

16 Ndien ibat udịmekọn̄ emi ẹwatde ke enan̄-mbakara ẹdi tọsịn duop ke itie tọsịn duop utịm ikaba: ntre ke n̄kop ibat mmọ. 17 Ntem ke n̄kokụt mme enan̄-mbakara ke n̄kukụt oro, ye mme andidoro mmọ ke edem: mmọ ẹsịne mme ukwak ikpanesịt emi ẹdide ndatndat ye ata blublu nte hyacinth ye utouto nte sulphur; ndien mme ibuot enan̄-mbakara oro ẹbiet mme ibuot ekpe,+ ikan̄ ye nsụn̄ikan̄ ye sulphur+ ẹnyụn̄ ẹto mmọ ke inua ẹwọn̄ọ. 18 Ẹda mme ufen ita emi, ikan̄ ye nsụn̄ikan̄ ye sulphur emi ẹketode mmọ ke inua ẹwọn̄ọ, ẹwot ubak kiet ke itie ita ke otu mme owo. 19 Koro odudu mme enan̄-mbakara emi odude ke inua mmọ ye ke isịm mmọ; koro isịm mmọ ẹbiet urụkikọt+ ẹnyụn̄ ẹnyene ibuot, ndien mmọ ẹda emi ẹnọ mme owo unan.

20 Edi mbon eken emi owo mîkadaha mme ufen emi iwot ikakabakede esịt ikpọn̄ utom ubọk mmọ,+ man mmọ ẹkpetre ndituak ibuot nnọ mme demon+ ye edisọi mbiet oro ẹnamde ke gold ye silver+ ye okpoho ye itiat ye eto, emi mîkemeke ndikụt usụn̄ m̀mê ndikop ikọ m̀mê ndisan̄a isan̄;+ 21 mmọ ikonyụn̄ ikabakede esịt ikpọn̄ uwotowo+ mmọ ye mme edinam ubụpekpo+ mmọ ye use mmọ ye uyịpinọ mmọ.

10 Ndien n̄kụt ọkpọsọn̄ angel+ en̄wen nte otode ke heaven osụhọde edi, esịne obubịt enyọn̄,+ akpara onyụn̄ odu enye ke ibuot, ndien iso esie ebiet utịn,+ ukot+ esie onyụn̄ ebiet mme adaha eke ẹsakde ikan̄, 2 ndien ekpri ikpan̄wed emi ẹtatde-tat esịne enye ke ubọk. Enye onyụn̄ esịn ukot nnasia esie ke inyan̄, edi enịm ukot ufien esie ke obot,+ 3 ndien enye ofiori ke ọkpọsọn̄ uyo nte emi ekpe+ okụnide. Ndien ke ini enye ofioride, obuma+ itiaba ẹsioro uyo.

4 Ndien ke ini obuma itiaba oro ẹtịn̄de ikọ, nyom ndiwet; edi n̄kop uyo emi otode heaven+ nte ọdọhọde ete: “Dian ufịkn̄kpọ ke mme n̄kpọ+ oro obuma itiaba oro ẹtịn̄de, kûnyụn̄ uwet mmọ unịm.” 5 Ndien angel oro n̄kokụtde nte adade ke inyan̄ ye ke obot emenede ubọk nnasia esie ke enyọn̄,+ 6 enye onyụn̄ ọn̄wọn̄ọ ke enyịn̄ Enye emi odude uwem+ ke nsinsi nsinsi,+ emi okobotde enyọn̄ ye mme n̄kpọ emi ẹdude ke esịt ye isọn̄+ ye mme n̄kpọ emi ẹdude ke esịt ye inyan̄ ye mme n̄kpọ emi ẹdude ke esịt,+ ete: “Ubiatini+ ididụhe aba; 7 edi ke usen eke ọyọhọ angel itiaba+ oro edisiorode uyo, ke ini enye oyomde ndifri obukpon̄+ esie, adan̄aoro ke edisana ndịben̄kpọ+ Abasi nte ekemde ye eti mbụk emi enye akatan̄ade ọnọ ifịn esie kpa mme prọfet,+ edisu.”

8 Ndien uyo+ oro n̄kokopde oro otode heaven ọtọn̄ọ ntak etịn̄ ikọ ye ami ete: “Ka, kọbọ ikpan̄wed oro ẹtatde emi esịnede ke ubọk angel oro adade ke inyan̄ ye ke obot.”+ 9 Ndien ndaha mbịne angel oro n̄kọdọhọ enye nte ọnọ mi ekpri ikpan̄wed oro. Ndien enye ọdọhọ mi ete: “Bọ ta,+ ndien enye ayanam idịbi fo odoro, edi ke inua fo enye eyenịn̄e nte aranọkwọk.” 10 Ndien mbọ ekpri ikpan̄wed oro ke ubọk angel oro nnyụn̄ nta,+ enye onyụn̄ enịn̄e mi ke inua nte aranọkwọk;+ edi ke mma n̄kata mma, enye anam idịbi mi odoro. 11 Ndien mmọ ẹdọhọ mi ẹte: “Afo enyene nditọn̄ọ ntak ntịn̄ ntịn̄nnịm ikọ mban̄a mme owo ye mme idụt ye mme usem ye ediwak ndidem.”+

11 Ndien ẹnọ mi nnyanyan̄a emi etiede nte anyan eto,+ enye onyụn̄ ọdọhọ ete: “Daha ke enyọn̄ domo edisana ebiet temple+ Abasi ye itieuwa ye mbon oro ẹtuakde ibuot ke esịt. 2 Edi amaedi okụre oro odude ke an̄wa+ edisana ebiet temple, sio enye oro fep kûdomo enye, koro ẹyak enye ẹnọ mme idụt,+ ndien mmọ ẹyedịghi edisana obio+ ke ikpat ke ọfiọn̄ aba ye iba.+ 3 Ndien nyanam ntiense mi iba+ ẹsịne ọfọn̄ ntuan̄a+ ẹtịn̄ prọfesi*+ ke usen tọsịn kiet ikie iba ye ata.” 4 Eto olive iba+ ye uwụk utuenikan̄+ iba ẹda ẹban̄a mmọ ndien mmọ ẹda ke iso Ọbọn̄ isọn̄.+

5 Ndien edieke owo ekededi oyomde ndinọ mmọ unan, ikan̄ oto mmọ ke inua ọwọrọ ata mme asua mmọ;+ edieke owo ekededi edinyụn̄ oyomde ndinọ mmọ unan, ẹyewot enye kpasụk ntre. 6 Mmọ emi ẹnyene odudu ndisịri enyọn̄+ man edịm okûdep+ ke mme usen eke mmọ ẹtịn̄de prọfesi, mmọ ẹnyụn̄ ẹnyene odudu ndinam mmọn̄ akabade iyịp+ nnyụn̄ nda kpukpru orụk unọmọ nnọmọ isọn̄ nte mmọ ẹmama.

7 Ndien ke ini mmọ ẹma ẹkekụre ndinọ ikọ ntiense mmọ, idiọk unam emi okotode ke editụn̄ọ ukpe+ ọdọk, ayan̄wana ekọn̄ ye mmọ onyụn̄ akan mmọ onyụn̄ owot mmọ.+ 8 Ndien okpo mmọ ẹyebono ke akamba efak akwa obio emi ke ndamban̄a usụn̄ ẹkotde Sodom+ ye Egypt, kpa ebiet emi ẹkekọn̄de Ọbọn̄ mmọ ke eto n̄ko.+ 9 Ndien mmọ emi ẹtode nsio nsio obio ye esien ye usem ye idụt+ ẹyese okpo mmọ ke usen ita ye ubak,+ ndien mmọ idiyakke ẹbụk okpo mmọ ke udi. 10 Ndien mbon emi ẹdụn̄de ke isọn̄ ẹyedara+ ẹban̄a mmọ ẹnyụn̄ ẹnem idemmọ esịt, ẹnyụn̄ ẹnọ enọ ẹsọk kiet eken,+ koro prọfet iba emi ẹketụhọrede mbon oro ẹdụn̄de ke isọn̄.

11 Ndien ke usen ita ye ubak+ ẹma ẹkebe spirit uwem emi otode Abasi odụk mmọ idem,+ ndien mmọ ẹdaha ẹda ke ukot mmọ, akwa ndịk onyụn̄ anam mbon oro ẹkụtde mmọ. 12 Ndien mmọ ẹkop ọkpọsọn̄ uyo+ nte otode ke heaven ọdọhọ mmọ ete: “Ẹdọk ẹdi mi.”+ Mmọ ẹnyụn̄ ẹsan̄a ke obubịt enyọn̄ ẹdọk ẹdụk heaven, ndien mme asua mmọ ẹkụt mmọ. 13 Ndien kpa ke hour oro akwa unyekisọn̄ etịbe, ubak obio kiet ke itie duop+ onyụn̄ ọduọ; unyekisọn̄ oro onyụn̄ owot owo tọsịn itiaba, ndịk onyụn̄ anam mbon eken ndien mmọ ẹnọ Abasi ke heaven ubọn̄.+

14 Ọyọhọ nnama iba+ ebe. Sese! Ọyọhọ nnama ita ọmọn̄ edi iwiwa.

15 Ekem ọyọhọ angel itiaba efri obukpon̄.+ Ndien n̄kpọsọn̄ uyo ẹwọrọ ke heaven, ẹdọhọ ẹte: “Obio ubọn̄ ererimbot emi amakabade edi obio ubọn̄ Ọbọn̄+ nnyịn ye eke Christ+ esie, ndien enye ayakara nte edidem ke nsinsi nsinsi.”+

16 Ndien mbiowo+ edịp ye inan̄ emi ẹketiede ke mme ebekpo mmọ ke iso Abasi ẹduọn̄ọ ẹkịbi iso+ mmọ ke isọn̄ ẹnyụn̄ ẹtuak ibuot ẹnọ Abasi,+ 17 ẹte: “Nnyịn imọkọm fi,+ Jehovah Abasi, Ata Ọkpọsọn̄,+ Enye emi odude,+ okonyụn̄ odude, koro afo amada akwa odudu+ fo ọtọn̄ọ ndikara nte edidem.+ 18 Edi mme idụt ẹkeyat esịt, ndien iyatesịt fo ama edi, ndien ekem ini ndikpe ikpe nnọ mme akpan̄kpa, ndinyụn̄ nnọ ifịn fo kpa mme prọfet+ ye ndisana owo ye mbon oro ẹbakde enyịn̄ fo, n̄kpri ye ikpọ,+ utịp+ mmọ, ndinyụn̄ nsobo+ mbon oro ẹbiatde isọn̄.”+

19 Ekem ẹberede edisana ebiet temple Abasi oro odude ke heaven,+ ndien ẹkụt ekebe+ ediomi esie ke edisana ebiet temple esie.+ Ndien emịnen̄mịnen̄ ye uyo ye obuma ye unyekisọn̄ ye akwa edịm itiat ẹnyụn̄ ẹtịbe.

12 Ndien ẹkụt akwa idiọn̄ọ+ ke heaven, ẹnyụn̄ ẹkụt n̄wan+ emi esịnede utịn ke idem, ọfiọn̄ onyụn̄ odu enye ke idak ikpat, enye onyụn̄ ayara anyanya ntantaọfiọn̄ duopeba ke ibuot, 2 ndien enye oyomo. Enye onyụn̄ osio n̄kpo ke ntak ubiak+ emi enye okopde ye ke ntak ọkpọsọn̄ ubiak emi enye oyomde ndiman eyen.

3 Ndien ẹkụt idiọn̄ọ efen ke heaven, ndien, sese! akwa ididuot dragon,+ emi enyenede ibuot itiaba ye nnụk duop onyụn̄ ayarade anyanya itiaba ke ibuot esie; 4 isịm+ esie onyụn̄ odụri ubak kiet ke itie ita ke otu ntantaọfiọn̄+ heaven, onyụn̄ osion̄o mmọ ọduọn̄ọ ke isọn̄.+ Ndien dragon oro osụk adada ekpere n̄wan+ emi oyomde ndiman eyen+ mi, man, ke enye ama aman, ekpemen eyen esie ata.+

5 Ndien enye aman eyeneren,+ kpa erenowo, emi edidade esan̄ ukwak+ akara* kpukpru mme idụt. Ẹnyụn̄ ẹkpobi eyen esie ẹmen ẹsọk Abasi ẹkedori ke ebekpo esie.+ 6 Ndien n̄wan oro efehe aka wilderness,+ ke ebiet emi Abasi eketịmde itie ọnọ enye, man ẹkpebọk+ enye do ke usen tọsịn kiet ikie iba ye ata.+

7 Ndien ekọn̄ asiaha ke heaven: Michael+ ye mme angel esie ẹn̄wana ekọn̄ ye dragon, dragon ye mme angel esie ẹnyụn̄ ẹn̄wana 8 edi enye ikanke, ufan̄ inyụn̄ idụhe aba inọ mmọ ke heaven. 9 Ntre ẹsio akwa dragon+ oro ẹduọk, kpa akani urụkikọt,+ enye emi ẹkotde Devil+ ye Satan,+ emi adade kpukpru mme andidụn̄ isọn̄ otụn usụn̄;+ ẹsio enye ẹduọk ke isọn̄,+ ẹnyụn̄ ẹsion̄o mme angel esie ẹduọn̄ọ ye enye. 10 Ndien n̄kop ọkpọsọn̄ uyo ke heaven nte ọdọhọde, ete:

“Ke emi edinyan̄a+ ye odudu+ ye obio ubọn̄ Abasi+ nnyịn ye odudu Christ+ esie ẹmedi, koro ẹsiode andidori nditọete nnyịn ikọ ẹduọk ke isọn̄, emi odoride mmọ ikọ uwemeyo ye okoneyo ke iso Abasi nnyịn!+ 11 Ndien mmọ ẹkan enye+ ke ntak iyịp Eyenerọn̄+ ye ke ntak ikọ ntiense+ mmọ, mmọ ikamaha ukpọn̄+ mmọ idem tutu esịm n̄kpa. 12 Ntre ẹdara, mbufo mme heaven ye mbufo emi ẹdụn̄de ke esịt!+ Mbọm+ isọn̄ ye inyan̄,+ koro Devil omosụhọde etiene mbufo, enye asan̄a ye akwa iyatesịt, sia enye ọfiọkde ete ini imọ edi ibio.”+

13 Ekem ke ini dragon oro okụtde ete ke ẹma ẹsio imọ ẹduọk ke isọn̄,+ enye ọkọbọ n̄wan+ oro akamande eyeneren oro. 14 Edi ẹnọ n̄wan oro mba akwa ntrukpom+ iba, man enye ekpefe ọnyọn̄ wilderness+ ke ọtọ esie; do ke ẹkebọk+ enye ke ini kiet ye ke mme ini ye ke ubak ini+ man urụkikọt+ oro okûkụt enye.

15 Ndien urụkikọt oro otop mmọn̄+ osio ke inua esie nte akpa ebịne n̄wan oro, ndinyịni enye n̄wot ke akpa mmọn̄ oro.+ 16 Edi isọn̄ edi edin̄wam n̄wan oro,+ isọn̄ onyụn̄ atat inua esie ọn̄wọn̄ mmọn̄ oro dragon okotopde osio ke inua esie. 17 Ndien dragon ayat esịt ye n̄wan+ oro, onyụn̄ adaha aka ndin̄wana ekọn̄ ye mbon oro ẹsụhọde ke otu mfri esie, emi ẹnịmde mme ewụhọ Abasi ẹnyụn̄ ẹnyenede utom editie ntiense+ mban̄a Jesus.

13 Ndien enye atuak ada ke utan+ inyan̄.

Ndien n̄kụt idiọk unam+ ọwọrọde ke inyan̄+ oro, enyene nnụk duop+ ye ibuot itiaba,+ onyụn̄ ayara anyanya duop ke nnụk esie, edi enyịn̄ emi osụn̄ide+ Abasi ẹdu ke mme ibuot esie. 2 Ndien idiọk unam oro n̄kokụtde ebiet anawụri ekpe,+ edi ukot esie ebiet eke bear,+ inua esie onyụn̄ ebiet inua ekpe.+ Ndien dragon+ ama ayak odudu esie ye ebekpo esie ye akwa odudu edikara ọnọ idiọk unam oro.+

3 Ndien n̄kụt kiet ke otu mbuot esie etie nte n̄kpọ eke ẹnọde unan n̄kpa, edi ẹkọk unan n̄kpa+ esie, ndien ofụri isọn̄ ẹnyụn̄ ẹtiene idiọk unam oro ye n̄kpaidem. 4 Ndien mmọ ẹtuak ibuot ẹnọ dragon oro koro enye ama ọnọ idiọk unam oro odudu ukara, mmọ ẹnyụn̄ ẹtuak ibuot ẹnọ idiọk unam oro, ẹdọhọ ẹte: “Anie etie nte idiọk unam, anie onyụn̄ ekeme ndin̄wana ekọn̄ ye enye?” 5 Ndien ẹnọ enye inua eke etịn̄de ikpọ n̄kpọ+ ye ikọ isụn̄i,+ ẹnyụn̄ ẹnọ enye odudu ukara ndinam n̄kpọ ke ọfiọn̄ aba ye iba.+ 6 Ndien enye okụbọde inua esie etịn̄ ikọ isụn̄i+ adian Abasi, osụn̄i enyịn̄ esie ye ebietidụn̄ esie, onyụn̄ osụn̄i mbon emi ẹdụn̄de ke heaven.+ 7 Ndien ẹnọ+ enye odudu ẹte an̄wana ekọn̄ ye ndisana owo onyụn̄ akan mmọ,+ ẹnyụn̄ ẹnọ enye odudu ndikara kpukpru esien ye obio ye usem ye idụt. 8 Ndien kpukpru mme andidụn̄ isọn̄ ẹyetuak ibuot ẹnọ enye; owo iwetke enyịn̄ mmọ ndomokiet isịn ke n̄wed+ uwem Eyenerọn̄ emi ẹkewotde,+ toto ke editọn̄ọ ererimbot.+

9 Edieke owo ekededi enyenede utọn̄, yak enye okop.+ 10 Edieke owo ekededi enyenede ndika ntan̄mfep, enye ayaka ntan̄mfep.+ Edieke owo ekededi edikpade ke akan̄kan̄, ẹnyene ndiwot enye ke akan̄kan̄.+ Mi ke oyom ndisana owo+ ẹyọ+ ẹnyụn̄ ẹnyene mbuọtidem.

11 Ndien n̄kụt idiọk unam+ efen nte otode isọn̄+ ọwọrọ edi, enye onyụn̄ enyene nnụk iba nte eke eyenerọn̄, edi enye ọtọn̄ọ nditịn̄ ikọ nte dragon.+ 12 Enye onyụn̄ ada ofụri odudu edikara emi akpa idiọk unam+ oro ekenyenede anam n̄kpọ ke iso esie. Ndien enye anam isọn̄ ye kpukpru mme andidụn̄ ke esịt ẹtuak ibuot ẹnọ akpa idiọk unam oro, emi ẹkekọkde unan n̄kpa esie.+ 13 Enye onyụn̄ anam ikpọ idiọn̄ọ,+ tutu enye anam ikan̄ oto enyọn̄ osụhọde edisịm isọn̄ ke iso ubonowo.

14 Ndien enye ada mme andidụn̄ isọn̄ otụn usụn̄, ke ntak idiọn̄ọ emi ẹkenọde enye odudu ndinam ke iso idiọk unam oro, ke adan̄aemi enye ọdọhọde mme andidụn̄ isọn̄ ẹnam mbiet+ idiọk unam oro ekenyenede nde ofụt+ mi, edi emi ẹkenamde afiak edidu uwem. 15 Ndien ẹnọ enye odudu ndisịn mbiet idiọk unam oro ibifịk ke idem, man mbiet idiọk unam oro ekpetịn̄ ikọ onyụn̄ anam ẹwot kpukpru mbon emi mîdituakke ibuot ke usụn̄ ekededi inọ mbiet+ idiọk unam oro.

16 Enye onyụn̄ enyịk kpukpru owo,+ n̄kpri ye ikpọ, imọ ye ubuene, mme amanaisọn̄ ye ifịn, ete ẹnọ mmọ idiọn̄ọ ke ubọk nnasia m̀mê ke ọkpọiso mmọ,+ 17 ete owo baba kiet okûnyụn̄ ekeme ndidep n̄kpọ m̀mê ndinyam n̄kpọ ibọhọke owo eke enyenede idiọn̄ọ emi, kpa enyịn̄+ idiọk unam m̀mê ibat enyịn̄ esie emi.+ 18 Mi ke oyom ẹnyene ọniọn̄: Yak owo eke enyenede eti ibuot abat ibat idiọk unam emi, koro emi edide ibat owo;+ ndien ibat esie edi ikie itiokiet ye ata ye itiokiet.+

14 Ekem n̄kụt, ndien, sese! Eyenerọn̄+ ke adada ke Obot Zion,+ owo tọsịn ikie ye aba ye inan̄+ ẹnyụn̄ ẹda ye enye, kpa mmọ emi ẹwetde enyịn̄ esie ye enyịn̄ Ete+ esie ke ọkpọiso mmọ. 2 Ndien n̄kop uyom eke otode ke heaven nte uyom ediwak mmọn̄+ ye nte uyom ọkpọsọn̄ obuma; ndien uyom oro n̄kopde etie nte uyom mme ọkwọikwọ ke harp+ emi ẹbrede ikwọ ke mme harp mmọ. 3 Ndien mmọ ẹkwọ+ nte n̄kpọ eke ẹkwọde obufa ikwọ+ ke iso ebekpo ye ke iso odu-uwem edibotn̄kpọ inan̄+ ye mbiowo;+ owo baba kiet inyụn̄ ikemeke nditịm mfiọk ikwọ oro ke mîbọhọke owo tọsịn ikie ye aba ye inan̄,+ emi ẹdepde+ ẹsio ke isọn̄. 4 Mmọ emi ẹdi mbon oro mîkasabakede idem ye iban;+ ke akpanikọ, mmọ ẹtie nte iban oro akanam mîfiọkke erenowo.+ Mmọ emi ẹdi mbon oro ẹtienede Eyenerọn̄ ẹka ọtọ eke enye akaka.+ Ẹkedep+ mmọ ẹsio ke otu ubonowo nte akpa mbun̄wụm+ ẹnọ Abasi ye Eyenerọn̄, 5 owo ikonyụn̄ ikwe mmọ abian̄a ke inua;+ mmọ inyeneke ndo.+

6 Ndien n̄kụt angel efen efede ke ufọt enyọn̄,+ enye onyụn̄ enyene nsinsi eti mbụk+ nditan̄a nte etop idatesịt nnọ mbon emi ẹdụn̄de ke isọn̄, ye kpukpru mme idụt ye esien ye usem ye obio,+ 7 ọdọhọde ke ọkpọsọn̄ uyo ete: “Mbufo ẹbak Abasi+ ẹnyụn̄ ẹnọ enye ubọn̄,+ koro ekem ini ikpe esie,+ mmọdo ẹtuak ibuot ẹnọ Enye emi akanamde+ enyọn̄ ye isọn̄ ye inyan̄ ye idịm mmọn̄.”+

8 Ndien angel efen, ọyọhọ iba, etiene enye onyụn̄ ọdọhọ ete: “Enye ọmọduọ! Akwa Babylon+ ọmọduọ,+ kpa enye emi akanamde kpukpru mme idụt ẹn̄wọn̄ wine+ iyatesịt use+ esie!”

9 Ndien angel efen, ọyọhọ ita, etiene mmọ onyụn̄ ọdọhọ ke ọkpọsọn̄ uyo ete: “Edieke owo ekededi atuakde ibuot ọnọ idiọk unam+ oro ye mbiet esie,+ onyụn̄ ọbọde idiọn̄ọ ke ọkpọiso m̀mê ke ubọk esie,+ 10 enye n̄ko ọyọn̄wọn̄ wine iyatesịt Abasi oro ẹn̄wan̄ade ẹdọn̄ ke cup iyatesịt esie,+ emi owo mîbuakke n̄kpọ, ndien ẹyeda ikan̄ ye sulphur+ ẹtụhọde+ enye ke iso ndisana angel ye ke iso Eyenerọn̄. 11 Ndien nsụn̄ikan̄ ndutụhọ mmọ ọyọdọk ke nsinsi nsinsi,+ mmọ idinyụn̄ inyeneke nduọkodudu ke uwemeyo ye ke okoneyo, kpa mbon emi ẹtuakde ibuot ẹnọ idiọk unam oro ye mbiet esie, ye owo ekededi eke ọbọde idiọn̄ọ+ enyịn̄ esie. 12 Mi ke oyom ndisana owo, kpa mbon emi ẹnịmde mme ewụhọ Abasi+ ẹnyụn̄ ẹbuọtde idem+ ye Jesus, ẹyọ.”+

13 Ndien n̄kop uyo otode ke heaven ọwọrọ, ete: “Wet: Mbon oro ẹkpade+ ke Ọbọn̄+ ọtọn̄ọde ke ini emi,+ ẹkop inemesịt. Ndien spirit ọdọhọ ete, ih, yak mmọ ẹduọk odudu ke ọkpọsọn̄ utom mmọ, koro mme n̄kpọ emi mmọ ẹkenamde ẹtienede mmọ nnennen ke edem.”

14 Ekem n̄kụt, ndien, sese! afia ikpaenyọn̄, ndien owo emi ebietde eyen owo etie ke ikpaenyọn̄ oro,+ ayara anyanya gold+ ke ibuot onyụn̄ akama edisọp ofụt ukpen̄e ke ubọk esie.

15 Ndien angel efen oto edisana ebiet temple ọwọrọ, onyụn̄ ofiori ke ọkpọsọn̄ uyo ọdọhọ enye emi etiede ke ikpaenyọn̄ ete: “Sịn ofụt ukpen̄e fo kpen̄e,+ koro ekem ini ukpen̄e,+ koro mbun̄wụm isọn̄ emenen̄ede adat.”+ 16 Ndien enye emi etiede ke ikpaenyọn̄ osio ofụt ukpen̄e esie anyan ke isọn̄ onyụn̄ ekpen̄e ukpen̄e ke isọn̄.

17 Ndien angel efen oto edisana ebiet temple emi odude ke heaven+ ọwọrọ, enye n̄ko akama edisọp ofụt ukpen̄e.

18 Ndien angel efen oto itieuwa ọwọrọ, enye onyụn̄ enyene odudu ndikara ikan̄.+ Ndien enye ofiori ke ọkpọsọn̄ uyo okot enye emi akamade edisọp ofụt ukpen̄e oro, ete: “Sio edisọp ofụt fo kpok mme etuek vine isọn̄,+ koro mme grape esie ẹmedat.” 19 Ndien angel+ oro osio ofụt esie anyan ke isọn̄ okpok vine+ isọn̄, onyụn̄ otop enye ọdọn̄ ke akwa obube unyịmi wine iyatesịt Abasi.+ 20 Ndien ẹdịghi obube unyịmi wine ke edem obio,+ ndien iyịp ọwọrọ ke obube unyịmi wine oro ọdọk esịm ukpaha inua enan̄-mbakara,+ ọfiọrọ esịm furlong tọsịn kiet ikie itiokiet.+

15 Ndien n̄kụt idiọn̄ọ+ efen ke heaven, akwa ye utịbe idiọn̄ọ, angel itiaba+ emi ẹkamade ufen itiaba.+ Mmọ emi ẹdi mme akpatre ufen, koro oto mmọ iyatesịt+ Abasi esịm utịt.+

2 Ndien n̄kụt se itiede nte inyan̄ emi ebietde akrasi+ emi abuahade ye ikan̄, nnyụn̄ n̄kụt mbon oro ẹkekande+ idiọk unam oro, ye mbiet+ esie, ye ibat+ enyịn̄ esie nte ẹdade ke mben inyan̄+ oro, ẹkama mme harp+ Abasi. 3 Mmọ ẹnyụn̄ ẹkwọ ikwọ Moses+ ofụn Abasi ye ikwọ Eyenerọn̄,+ ẹte:

“Jehovah Abasi, kpa Ata Ọkpọsọn̄,+ mme utom+ fo ẹkponi ẹnyụn̄ ẹdi utịbe. Mme usụn̄ fo ẹnen ẹnyụn̄ ẹdi akpanikọ,+ nsinsi Edidem.+ 4 Anie mîdibakke fi,+ Jehovah,+ inyụn̄ inọ enyịn̄ fo ubọn̄,+ koro afo ikpọn̄-ikpọn̄ enyene nsọn̄ọnda?+ Koro kpukpru mme idụt ẹyedi ẹdituak ibuot ke iso fo,+ koro ẹyararede ndinen ewụhọ fo.”+

5 Ndien ke mme n̄kpọ emi ẹma ẹkebe n̄kụt, ẹnyụn̄ ẹberede edisana ebiet tent+ ntiense+ ke heaven,+ 6 ndien angel itiaba+ emi ẹkamade ufen itiaba+ ẹto ke edisana ebiet ẹwọn̄ọ, ẹsịne ndisana, nsemnsem linen+ ẹnyụn̄ ẹbọbọ mbọbọ gold ke ikpanesịt mmọ. 7 Ndien kiet ke otu mme odu-uwem edibotn̄kpọ inan̄+ oro ọnọ angel itiaba oro usan gold itiaba oro ẹyọhọde ye iyatesịt Abasi,+ kpa enye emi odude uwem ke nsinsi nsinsi.+ 8 Ndien nsụn̄ikan̄ ọyọhọ edisana ebiet oro ke ntak ubọn̄ Abasi+ ye ke ntak odudu esie, owo baba kiet inyụn̄ ikemeke ndidụk edisana ebiet oro tutu ufen itiaba+ oro ẹtode mme angel itiaba oro ẹkụre.

16 Ndien n̄kop ọkpọsọn̄ uyo+ nte otode ke edisana ebiet ọdọhọ angel itiaba oro ete: “Ẹka ẹken̄wan̄a usan iyatesịt+ Abasi itiaba oro ẹduọk ke isọn̄.”

2 Ndien akpa angel+ adaha akan̄wan̄a usan esie ọduọk ke isọn̄.+ Ndien ata idiọk inia+ eke abiakde owo etieti ata mme owo oro ẹkebọde idiọn̄ọ idiọk unam+ oro, ẹkenyụn̄ ẹtuakde ibuot ẹnọ mbiet+ esie.

3 Ndien ọyọhọ angel iba+ an̄wan̄a usan esie ọduọk ke inyan̄.+ Ndien enye akabade iyịp+ ebiet eke owo n̄kpa, ndien kpukpru ukpọn̄ eke ẹdude uwem ẹkpan̄a, ih, mme n̄kpọ eke ẹdude ke inyan̄.+

4 Ndien ọyọhọ angel ita+ an̄wan̄a usan esie ọduọk ke mme akpa mmọn̄+ ye ke mme idịm mmọn̄. Ndien mmọ ẹkabade iyịp.+ 5 Ndien n̄kop angel emi akarade mmọn̄ nte ọdọhọde ete: “Afo, emi odude okonyụn̄ odude,+ Enye emi enyenede nsọn̄ọnda,+ edi edinen, koro afo ọnọde mme ubiere emi,+ 6 koro mmọ ẹkeduọkde iyịp ndisana owo ye eke mme prọfet,+ ndien afo ọmọnọ mmọ iyịp+ ẹn̄wọn̄. Odot mmọ ẹn̄wọn̄.”+ 7 Ndien n̄kop itieuwa nte ọdọhọde ete: “Ih, Jehovah Abasi, Ata Ọkpọsọn̄,+ mme ubiereikpe fo ẹdi akpanikọ ye edinen.”+

8 Ndien ọyọhọ angel inan̄+ an̄wan̄a usan esie ọduọk ke utịn; ẹnyụn̄ ẹnọ utịn odudu ndida ikan̄ mfọp+ mme owo. 9 Ọkpọsọn̄ ufiop onyụn̄ ọfọp mme owo, edi mmọ ẹsụn̄i enyịn̄+ Abasi, emi enyenede odudu+ ndida mme ufen emi ndi, mmọ inyụn̄ ikabakede esịt man ẹnọ enye ubọn̄.+

10 Ndien ọyọhọ angel ition an̄wan̄a usan esie ọduọk ke ebekpo idiọk unam oro.+ Ndien obio ubọn̄ esie akabade ekịm,+ mmọ ẹnyụn̄ ẹtọn̄ọ ndita edeme mmọ ke ntak ubiak, 11 edi mmọ ẹsụn̄i+ Abasi emi odude ke heaven ke ntak ubiak mmọ ye ke ntak inia mmọ, mmọ inyụn̄ ikabakede esịt ikpọn̄ mme utom mmọ.

12 Ndien ọyọhọ angel itiokiet+ an̄wan̄a usan esie ọduọk ke akwa akpa Euphrates,+ mmọn̄ esie onyụn̄ asat,+ man ẹdiọn̄ usụn̄ ẹnọ ndidem+ emi ẹtode edem usiahautịn.

13 Ndien n̄kụt ndedehe spirit+ ita oro ẹbietde mfọt+ nte ẹwọn̄ọde ke inua dragon+ ye ke inua idiọk unam+ ye ke inua prọfet nsu.+ 14 Mmọ ẹdi spirit+ mme demon emi ẹnamde mme idiọn̄ọ,+ ndien mmọ ẹwọn̄ọ ẹka ke ọtọ ndidem+ ofụri isọn̄,+ man ẹketan̄ mmọ ẹbon ọtọkiet ẹnọ ekọn̄+ akwa usen+ Abasi Ata Ọkpọsọn̄.+

15 “Sese! Ami mmọn̄ ndi nte inọ.+ Owo emi atabade idap+ onyụn̄ ekpemede ewụra esie, mbak enye edisan̄a iferi mme owo ẹdinyụn̄ ẹkụt n̄kpọ o-bụt esie,+ okop inemesịt.”

16 Ndien ẹtan̄ mmọ ẹbon ọtọkiet ke ebiet emi ẹkotde ke usem Hebrew, ete, Har–Magedon.+

17 Ndien ọyọhọ angel itiaba an̄wan̄a usan esie ọduọk ke ofụm.+ Ndien ọkpọsọn̄ uyo+ oto edisana ebiet ọwọrọ ke ebekpo, ete: “Okụre ndien!” 18 Ndien mme emịnen̄mịnen̄ ye uyo ye mme obuma ẹtịbe, akwa unyekisọn̄+ onyụn̄ etịbe, orụk oro akanam mîdụhe toto nte owo okodu ke isọn̄,+ unyekisọn̄+ oro enen̄ede atara onyụn̄ okpon etieti. 19 Ndien akwa obio+ oro asiaha mbak ita, obio mme idụt ẹnyụn̄ ẹduọn̄ọ; Abasi onyụn̄ eti Akwa Babylon+ ete inọ enye cup wine ikan̄-ikan̄ iyatesịt imọ.+ 20 N̄ko, kpukpru isuo ẹfen̄e, owo inyụn̄ ikwe mme obot.+ 21 Ndien akwa edịm itiat+ ye kpukpru itiat emi ẹdobide n̄kpọ nte talent kiet ẹsụhọde ẹto enyọn̄ ẹditọ mme owo, mme owo oro ẹnyụn̄ ẹsụn̄i+ Abasi ke ntak ufen edịm itiat+ oro, koro ufen oro okokponde etieti.

17 Ndien kiet ke otu mme angel itiaba oro ẹkekamade usan itiaba+ oro edi edidọhọ mi ete: “Di, nyowụt fi ubiereikpe oro ẹnọde akwa akpara+ oro etiede ke enyọn̄ ediwak mmọn̄,+ 2 emi ndidem isọn̄ ẹkenamde use+ ye enye, ndien ẹnam mme andidụn̄ isọn̄ ẹn̄wọn̄ wine use esie ẹyụhọ.”+

3 Ndien enye emen mi ke odudu spirit+ aka wilderness. Ndien n̄kụt n̄wan oro etiede ke enyọn̄ ididuot idiọk unam+ oro, emi enyịn̄ oro osụn̄ide+ Abasi ẹyọhọde enye idem emi onyụn̄ enyenede ibuot itiaba+ ye nnụk duop. 4 N̄wan oro onyụn̄ esịne ọfọn̄ uduot mmọn̄ibọn̄+ ye ididuot ọfọn̄,+ ẹnyụn̄ ẹbana enye idem ke gold ye ọsọn̄urua itiat ye pearl+ enye onyụn̄ akama cup gold+ emi ọyọhọde ye mme mbubiam n̄kpọ+ ye ndedehe n̄kpọ use esie.+ 5 Ẹnyụn̄ ẹwet enyịn̄ ke ọkpọiso esie, emi edide ndịben̄kpọ,+ ẹte: “Akwa Babylon, eka mme akpara+ ye mme mbubiam n̄kpọ eke ẹdude ke isọn̄.”+ 6 Ndien n̄kụt ke n̄wan oro ama ọn̄wọn̄ iyịp+ ndisana owo ye iyịp mme ntiense Jesus+ oyụhọ.

Ke adan̄aemi n̄kụtde enye, idem akpa mi etieti.+ 7 Ntre angel oro ọdọhọ mi ete: “Ntak emi idem akpade fi? Mmọn̄ nsian fi ndịben̄kpọ emi aban̄ade n̄wan+ oro ye eke idiọk unam emi enye etiede ke esịt, emi onyụn̄ enyenede ibuot itiaba ye nnụk duop:+ 8 Idiọk unam oro afo okokụtde ama odu,+ edi idụhe aba, edi enye ọmọn̄ oto editụn̄ọ ukpe+ ọdọk edi, ndien eyebe odụk nsobo. Ndien ke ini ẹkụtde nte ke idiọk unam oro ama odu, edi idụhe aba, edi nte ke ọmọn̄ edidu, mme andidụn̄ isọn̄ ẹkop n̄kpaidem ye inemesịt, edi owo iwetke mmọ enyịn̄ isịn ke n̄wed uwem+ toto ke editọn̄ọ ererimbot.+

9 “Mi ke oyom ikike ye ọniọn̄:+ Ibuot itiaba+ oro ẹda ẹban̄a obot+ itiaba, emi n̄wan oro etiede. 10 Ndien ndidem itiaba ẹdu: ition ẹduọn̄ọ,+ kiet ke osụk ododu,+ enye eken idịghe kan̄a,+ edi enye ama edi, edidu ke ekpri ibio ini.+ 11 Ndien idiọk unam oro okodude edi mîdụhe aba,+ enye edi ọyọhọ edidem itiaita, edi ọwọrọ oto ọyọhọ itiaba, enye ebe aka nsobo.

12 “Ndien nnụk duop emi afo okokụtde ẹda ẹban̄a ndidem duop,+ emi mîbọhọ kan̄a obio ubọn̄, edi mmọ ẹbọ odudu ndikara nte ndidem ke hour kiet ye idiọk unam oro. 13 Mmọ ẹnyene ekikere kiet, ndien mmọ ẹyak odudu ye ukara mmọ ẹnọ idiọk unam oro.+ 14 Mmọ emi ẹyen̄wana ekọn̄ ye Eyenerọn̄,+ edi, sia enye edide Ọbọn̄ mbọn̄ ye Edidem ndidem,+ Eyenerọn̄ ayakan mmọ.+ N̄ko, mbon oro ẹkotde ẹnyụn̄ ẹmekde emi ẹnyụn̄ ẹnamde akpanikọ ye enye ẹyekan mmọ.”+

15 Ndien enye ọdọhọ mi ete: “Mmọn̄ oro afo okokụtde, emi akpara oro etiede, ada aban̄a mme owo ye otuowo ye mme idụt ye mme usem.+ 16 Ndien nnụk duop+ oro afo okokụtde, ye idiọk unam+ oro, mmọ ẹyesua akpara+ oro ẹnyụn̄ ẹsobo enye ẹnyụn̄ ẹnịm enye iferi, ẹnyụn̄ ẹta obụkidem esie ẹnyụn̄ ẹfọp enye ke ikan̄ ofụri ofụri.+ 17 Koro edi Abasi ekesịn emi ke esịt mmọ ete ẹnam ekikere imọ,+ oro edi, ẹnam ekikere kiet ke ndida obio ubọn̄ mmọ nnọ idiọk unam+ oro, tutu ikọ Abasi ọwọrọ osu.+ 18 Ndien n̄wan+ oro afo okokụtde ada aban̄a akwa obio oro enyenede obio ubọn̄ emi akarade ndidem isọn̄.”+

18 Ke n̄kpọ emi ẹma ẹkebe, n̄kụt angel efen nte otode heaven osụhọde ye akwa odudu;+ ubọn̄ esie onyụn̄ anam isọn̄ ayama.+ 2 Ndien enye ofiori ke ọkpọsọn̄ uyo,+ ete: “Enye ọmọduọ! Akwa Babylon ọmọduọ,+ omonyụn̄ akabade edi ebietidụn̄ mme demon ye ebiet emi idiọk ofụm+ ọyọhọde ye ebiet udịbe kpukpru ndedehe inuen eke ẹsuade!+ 3 Koro kpukpru mme idụt ẹmen̄wọn̄ wine iyatesịt use esie ẹyụhọ,+ ndidem isọn̄ ẹnyụn̄ ẹnam use+ ye enye, ndien mbonurua+ isọn̄ ẹkabade ẹnyene n̄kpọ ẹto ọkpọmiọk inem uwem unana iso o-bụt esie.”+

4 Ndien n̄kop uyo efen otode heaven ọwọrọ ete: “Mbufo ikọt mi ẹwọn̄ọ ke esịt esie,+ edieke mbufo mîyomke nditiene mbuana ke mme idiọkn̄kpọ esie,+ edieke mbufo mînyụn̄ iyomke nditiene mbọ mme ufen esie. 5 Koro mme idiọkn̄kpọ esie ẹboho ọtọkiet ẹkon̄ ẹsịm enyọn̄,+ Abasi omonyụn̄ eti mme ukwan̄ edinam esie.+ 6 Nam ye enye kpa nte enye akanamde,+ nyụn̄ nam ye enye utịm ikaba, ih, utịm ikaba, nte ekemde ye ibat mme n̄kpọ oro enye akanamde;+ ke cup+ eke enye ọkọdọn̄de mbuaha n̄kpọ dọn̄ mbuaha n̄kpọ oro utịm ikaba+ nọ enye.+ 7 Ke udomo oro enye ọnọde idemesie ubọn̄ onyụn̄ odude ọkpọmiọk inem uwem unana iso o-bụt, tụhọde enye nyụn̄ nam enye okop mfụhọ ke udomo oro n̄ko.+ Koro enye ọdọhọde ke esịt esie ete, ‘ami ndi ọbọn̄ an̄wan,+ nnyụn̄ ndịghe ebeakpa,+ ndinyụn̄ n̄kopke mfụhọ tutu amama.’+ 8 Ntak edi oro ufen+ esie edidide ke usen kiet, n̄kpa ye mfụhọ ye akan̄, ndien ẹyefọp enye ofụri ofụri ke ikan̄,+ koro Jehovah Abasi, emi ekpede ikpe esie, edide ọkpọsọn̄.+

9 “Ndien ndidem isọn̄+ emi ẹkenamde use ye enye ẹnyụn̄ ẹdude inem uwem unana iso o-bụt ẹyetuan̄a ẹnyụn̄ ẹyịbi idem ke mfụhọ ẹban̄a enye,+ ke ini mmọ ẹdade ẹse nsụn̄ikan̄+ oro ọwọrọde ke ikan̄ oro ẹfọpde enye, 10 mmọ ẹnyụn̄ ẹda nsannsan ke ntak ndịk ndutụhọ esie, ẹdọhọ ẹte,+ ‘Mbọm, mbọm, akwa obio,+ afo Babylon ọkpọsọn̄ obio, koro ubiereikpe fo ama edisịm ke hour kiet!’+

11 “N̄ko, mbonurua+ isọn̄ ke ẹtuan̄a ke ẹnyụn̄ ẹfụhọ ẹban̄a enye,+ koro owo mîdụhe aba ndidep n̄kpọurua mmọ, 12 kpa ofụri n̄kpọ+ gold ye silver ye mme ọsọn̄urua itiat ye pearl ye eti linen ye ọfọn̄ uduot mmọn̄ibọn̄ ye silk ye ididuot ọfọn̄; ye kpukpru n̄kpọ eke ẹdade eto emi osiode ufuọn̄ ẹnam ye kpukpru orụk n̄kpọ eke ẹnamde ke nnụkenen ye kpukpru orụk n̄kpọ eke ẹnamde ke ata ọsọn̄urua eto ye okpoho ye ukwak ye marble;+ 13 n̄ko ye cinnamon ye ufuọn̄n̄kpọ India ye incense ye edifuọn̄ aran ye frankincense ye wine ye aran olive ye eti ndomuyo ye wheat ye enan̄ ye erọn̄, ye enan̄-mbakara ye ukpatn̄kpọ ye ifịn ye mme ukpọn̄ owo.+ 14 Ih, eti mfri emi ukpọn̄ fo oyomde+ amadaha ọkpọn̄ fi, ndien kpukpru inem n̄kpọ ye ndiye n̄kpọ ẹmetak fi, mme owo idinyụn̄ ikwe mmọ aba tutu amama.+

15 “Mbonurua+ oro ẹbịnde mme n̄kpọ emi, emi ẹkeforode ẹto enye, ẹyeda nsannsan ke ntak ndịk ndutụhọ esie, ẹtuan̄a ẹnyụn̄ ẹfụhọ,+ 16 ẹdọhọ ẹte, ‘Mbọm, mbọm—akwa obio,+ emi esịnede eti linen ye ọfọn̄ uduot mmọn̄ibọn̄ ye ididuot ọfọn̄, onyụn̄ abanade idem uwouwo ke gold ye ọsọn̄urua itiat ye pearl,+ 17 koro ẹsobode utọ akwa inyene oro ke hour kiet!’+

“Ndien kpukpru mme etubom nsụn̄ikan̄ ye kpukpru owo eke ẹwatde inyan̄ ẹka ebiet ekededi,+ ye mme awat nsụn̄ikan̄ ye kpukpru owo eke ẹdiade ẹto inyan̄, ẹda nsannsan+ 18 ẹnyụn̄ ẹfiori nte mmọ ẹkụtde nsụn̄ikan̄ emi ọwọrọde ke ikan̄ oro ẹfọpde enye, ẹnyụn̄ ẹdọhọ ẹte, ‘Ewe obio ebiet akwa obio emi?’+ 19 Ndien mmọ ẹwobi ntọn̄ ẹduọk ke ibuot+ ẹnyụn̄ ẹfiori, ẹtuan̄a ẹnyụn̄ ẹfụhọ,+ ẹnyụn̄ ẹdọhọ ẹte, ‘Mbọm, mbọm—akwa obio, emi kpukpru mme andinyene ubom ke inyan̄+ ẹforode+ ke ntak akpakịp inyene esie, koro ẹmesobo enye ke hour kiet!’+

20 “Ẹdara ẹban̄a enye, O heaven,+ n̄ko mbufo ndisana owo+ ye mbufo mme apostle+ ye mbufo mme prọfet, koro Abasi emebiere ikpe esie onyụn̄ ọnọ enye ufen ke ntak mbufo!”+

21 Ndien ọkpọsọn̄ angel kiet emenede itiat eke etiede nte akwa itiat ukọkn̄kpọ+ ọduọk ke inyan̄+ onyụn̄ ọdọhọ ete: “Ntem ke ẹditop akwa obio Babylon ẹduọk ye akwa usọp, owo idinyụn̄ ikwe enye aba.+ 22 Owo idinyụn̄ ikopke aba uyom mme ọkwọikwọ ke harp ye mme ebre ikwọ ye mme efri ifiom ye mme efri obukpon̄ ke esịt fo,+ owo idinyụn̄ ikwe aba anamutom usọ ekededi ke esịt fo, owo idinyụn̄ ikopke aba uyom itiat ukọkn̄kpọ ke esịt fo, 23 Ndien baba un̄wana utuenikan̄ kiet idiyamake aba ke esịt fo; owo idinyụn̄ ikopke aba uyo ebendọ ye n̄wanndọ ke esịt fo;+ koro mbonurua+ fo ẹkedide mme akama ikpọ itie+ ke isọn̄, koro edinam ubụpekpo+ fo ama otụn kpukpru mme idụt usụn̄. 24 Ih, ẹma ẹkụt iyịp+ mme prọfet+ ye eke ndisana owo+ ye eke kpukpru mbon oro ẹkewotde ke isọn̄ ke esịt esie.”+

19 Ke n̄kpọ emi ẹma ẹkebe, n̄kop se ibietde ọkpọsọn̄ uyo akwa otuowo ke heaven.+ Mmọ ẹdọhọ ẹte: “Mbufo ẹtoro Jah!+ Edinyan̄a+ ye ubọn̄ ye odudu ẹnyene Abasi nnyịn,+ 2 koro mme ubiereikpe esie ẹdide akpanikọ ye edinen.+ Koro enye emebiere ikpe ọnọ akwa akpara oro akadade use esie abiat isọn̄, enye omonyụn̄ osio usiene iyịp ifịn esie ke ubọk an̄wan oro.”+ 3 Ndien kpa idaha oro mmọ ẹdọhọ ọyọhọ utịm ikaba ẹte: “Mbufo ẹtoro Jah!+ Ndien nsụn̄ikan̄ emi ọwọrọde ke esịt esie aka iso ọdọk ke nsinsi nsinsi.”+

4 Ndien mbiowo edịp ye inan̄+ ye odu-uwem edibotn̄kpọ inan̄+ oro ẹduọn̄ọ ke isọn̄ ẹnyụn̄ ẹtuak ibuot ẹnọ Abasi emi etiede+ ke ebekpo, ẹnyụn̄ ẹdọhọ ẹte: “Amen! Mbufo ẹtoro Jah!”+

5 N̄ko, uyo oto ke ebekpo ọwọrọ ete: “Ẹtoro Abasi nnyịn, kpukpru mbufo ifịn+ esie, emi ẹbakde enye, n̄kpri ye ikpọ.”+

6 Ndien n̄kop se ibietde uyo akwa otuowo ye uyom ediwak mmọn̄ ye uyom ọkpọsọn̄ obuma. Mmọ ẹdọhọ ẹte: “Mbufo ẹtoro Jah,+ koro Jehovah Abasi nnyịn, kpa Ata Ọkpọsọn̄,+ ọmọtọn̄ọ ndikara nte edidem.+ 7 Ẹyak nnyịn idara inyụn̄ ikop akwa idatesịt, ẹnyụn̄ ẹyak nnyịn inọ enye ubọn̄,+ koro ekem ini+ ndọ+ Eyenerọn̄ ndien n̄wan esie etịm idem.+ 8 Ih, ẹnyịme enye esịne nsemnsem, edisana, eti linen, koro eti linen adade aban̄a ndinen utom ndisana owo.”+

9 Ndien enye ọdọhọ mi ete: “Wet ete: Mbon oro ẹkotde+ ẹdi udia mbubreyo ndọ Eyenerọn̄+ ẹkop inemesịt.” N̄ko, enye ọdọhọ mi ete: “Emi edi ikọ akpanikọ Abasi.”+ 10 Ndien nduọ ke isọn̄ ke ukot esie nte ntuak ibuot nnọ enye.+ Edi enye ọdọhọ mi ete: “Kpeme idemfo! Kûnam!+ Ami ndi ofụn kpa nte afo ye nditọete fo emi ẹnyenede utom editie ntiense nnọ Jesus.+ Tuak ibuot nọ Abasi;+ koro uduak editịn̄ ntịn̄nnịm ikọ emi edi man ẹtie ntiense ẹnọ Jesus.”+

11 Ekem n̄kụt nte ẹbererede heaven, ndien, sese! afia enan̄-mbakara.+ Ndien andidoro enye ke edem ekere Anam-Akpanikọ+ ye Akpanikọ,+ ndien enye ekpe ikpe onyụn̄ an̄wana ekọn̄ ke edinen ido.+ 12 Enyịn esie edi edemeikan̄,+ enye onyụn̄ ayara ediwak anyanya+ ke ibuot. Enye enyene enyịn̄+ emi ẹwetde eke baba owo kiet mîfiọkke ke mîbọhọke enye ikpọn̄, 13 enye onyụn̄ esịne ewụra emi ẹsịmede iyịp,+ ndien enyịn̄ esie edi Ikọ Abasi.+ 14 N̄ko, mme udịmekọn̄ oro ẹdude ke heaven ẹdoro ke mfia enan̄-mbakara ẹtiene enye ke edem, ẹnyụn̄ ẹsịne mfia, edisana, eti linen. 15 Anyan edisọp akan̄kan̄ ọwọrọ enye ke inua,+ man enye ada ekpen̄e mme idụt, ndien enye ada esan̄ ukwak+ akara* mmọ. Enye onyụn̄ edịghi obube unyịmi wine+ iyatesịt Abasi,+ kpa Ata Ọkpọsọn̄. 16 Enye enyene enyịn̄ emi ẹwetde ke ewụra esie, oro edi ke ifụhi esie, ete, Edidem ndidem ye Ọbọn̄ mbọn̄.+

17 N̄kụt n̄ko angel kiet adade ke utịn, ndien enye ofiori ke ọkpọsọn̄ uyo ọdọhọ kpukpru mme inuen+ eke ẹfede ke ufọt enyọn̄ ete: “Ẹdi, ẹdiboho ọtọkiet man ẹdia akamba udia mbubreyo Abasi, 18 man mbufo ẹta obụk+ ndidem ye obụk mme etubom ekọn̄ ye obụk n̄kpọsọn̄ owo+ ye obụk enan̄-mbakara+ ye eke mme andidoro mmọ ke edem, ye obụk kpukpru owo, eke mme amanaisọn̄ ọkọrọ ye ifịn ye n̄kpri ye ikpọ.”

19 Ndien n̄kụt idiọk unam+ ye ndidem+ isọn̄ ye udịmekọn̄ mmọ ẹsopde idem ọtọkiet ẹte in̄wana ekọn̄+ ye andidoro ke edem enan̄-mbakara+ ye udịmekọn̄ esie. 20 Ndien ẹmụm idiọk unam+ oro, ọkọrọ ye prọfet nsu+ oro okodude ke iso esie anam mme idiọn̄ọ+ oro enye akadade abian̄a mbon emi ẹkebọde idiọn̄ọ+ idiọk unam oro ye mbon emi ẹketuakde ibuot ẹnọ mbiet+ esie. Ke adan̄aemi ẹsụk ẹdude uwem, ẹtop mmọ mbiba ẹdọn̄ ke n̄kpọdiọhọ ikan̄ eke asakde ye sulphur.+ 21 Edi ẹwot mmọ eken emi ẹsụhọde ke anyan akan̄kan̄, kpa akan̄kan̄ emi otode andidoro ke edem enan̄-mbakara+ ke inua ọwọrọ.+ Kpukpru mme inuen+ ẹnyụn̄ ẹta obụk+ mmọ ẹyụhọ.+

20 Ndien n̄kụt angel kiet otode heaven osụhọde edi ye ukpọhọde editụn̄ọ ukpe+ onyụn̄ akamade akwa n̄kpọkọbi ke ubọk. 2 Ndien enye omụm dragon+ oro, kpa akani urụkikọt,+ emi edide Devil+ ye Satan,+ onyụn̄ ọkọbi enye ke isua tọsịn kiet. 3 Enye onyụn̄ otop enye esịn ke editụn̄ọ ukpe+ onyụn̄ ekịbi ukpe oro abaha enye onyụn̄ efịk ufịkn̄kpọ, man enye okûtụn mme idụt usụn̄ aba tutu isua tọsịn kiet oro esịm utịt. Ke emi ebede, ẹnyene ndikpọhọde enye nyak ke ekpri ibio ini.+

4 Ndien n̄kụt mme ebekpo,+ mme owo ẹnyụn̄ ẹtie ke esịt, ndien ẹnọ mmọ odudu ndibiere ikpe.+ Ih, n̄kụt ukpọn̄ mbon oro ẹkedade ekụri ẹwot ke ntak ikọ ntiense oro mmọ ẹketiede ẹban̄a Jesus ye ke ntak ẹditịn̄ mban̄a Abasi, ye ukpọn̄ mbon oro mîkatuakke ibuot inọ idiọk unam+ oro m̀mê mbiet+ esie ye mbon emi mîkọbọhọ idiọn̄ọ oro ke ọkpọiso mmọ ye ke ubọk+ mmọ. Ndien mmọ ẹdidu uwem ẹnyụn̄ ẹkara nte ndidem+ ye Christ ke isua tọsịn kiet. 5 (Mme akpan̄kpa eken+ ikodụhe uwem tutu isua tọsịn kiet oro esịm utịt.)+ Emi edi akpa+ ediset ke n̄kpa. 6 Owo emi enyenede udeme ke akpa ediset ke n̄kpa okop inemesịt,+ enye onyụn̄ edi edisana;+ udiana n̄kpa+ inyeneke odudu+ ke idem mmọ emi, edi mmọ ẹyedi mme oku+ Abasi ye Christ, ẹyenyụn̄ ẹkara nte ndidem ye enye ke isua tọsịn kiet.+

7 Ndien ke ndondo oro isua tọsịn kiet esịmde utịt, ẹyekpọhọde Satan ke n̄kpọkọbi esie ẹyak, 8 ndien enye ọyọwọrọ aka nditụn mme idụt usụn̄ ke inụk isọn̄ mbinan̄, kpa Gog ye Magog, nditan̄ mmọ mbon ọtọkiet nnọ ekọn̄. Ibat mmọ emi ebiet ntan inyan̄.+ 9 Ndien mmọ ẹsuana ẹyọhọ ofụri isọn̄ ẹnyụn̄ ẹkanade itienna ndisana owo+ ye edima obio ẹkụk.+ Edi ikan̄ oto heaven osụhọde edita mmọ.+ 10 Ndien ẹtop Devil+ emi okotụnde mmọ usụn̄ ẹsịn ke n̄kpọdiọhọ ikan̄ eke asakde ye sulphur, emi idiọk unam+ ye prọfet nsu ẹma ẹkedodu;+ ẹyenyụn̄ ẹtụhọde mmọ uwemeyo ye okoneyo ke nsinsi nsinsi.

11 Ndien n̄kụt akwa afia ebekpo ye enye emi etiede ke esịt.+ Isọn̄ ye enyọn̄ ẹnyụn̄ ẹfen̄e ẹkpọn̄ iso esie,+ owo inyụn̄ ikwe aba itie inọ mmọ. 12 Ndien n̄kụt mme akpan̄kpa, ikpọ ye n̄kpri,+ nte ẹdade ke iso ebekpo, ẹnyụn̄ ẹkûbọde mme n̄wed. Edi ẹkûbọde n̄wed en̄wen; enye edi n̄wed uwem.+ Ndien ẹda mme n̄kpọ eke ẹwetde ke mme n̄wed emi ẹkpe ikpe mme akpan̄kpa nte ekemde ye mme edinam mmọ.+ 13 Ndien inyan̄ asana mme akpan̄kpa oro ẹdude ke esịt esie ayak, n̄kpa ye Udi* ẹnyụn̄ ẹsana mme akpan̄kpa+ emi ẹdude mmọ ke esịt ẹyak, ndien ẹkpe ikpe mmọ owo kiet kiet nte ekemde ye mme edinam mmọ.+ 14 Ndien ẹtop n̄kpa+ ye Udi* ẹdọn̄ ke n̄kpọdiọhọ ikan̄ oro. Emi ada aban̄a udiana n̄kpa,+ kpa n̄kpọdiọhọ ikan̄ oro.+ 15 N̄ko-n̄ko, ẹtop owo ekededi emi owo mîkwe enyịn̄ esie ke n̄wed uwem+ ẹsịn ke n̄kpọdiọhọ ikan̄ oro.+

21 Ndien n̄kụt obufa enyọn̄+ ye obufa isọn̄;+ koro akpa enyọn̄+ ye akpa isọn̄+ ẹma ẹbe ẹfep, inyan̄+ inyụn̄ idụhe aba. 2 N̄kụt n̄ko edisana obio,+ Obufa Jerusalem, nte otode Abasi osụhọde ke heaven+ edi ẹnyụn̄ ẹtịm enye idem nte n̄wanndọ+ emi ẹbanade ẹben̄e ebe esie.+ 3 Ndien n̄kop ọkpọsọn̄ uyo emi otode ebekpo nte ọdọhọde ete: “Sese! Ebietidụn̄+ Abasi omodu ye owo, enye oyonyụn̄ odụn̄+ ye mmọ, ndien mmọ ẹyedi ikọt esie.+ Abasi ke idemesie oyonyụn̄ odu ye mmọ.+ 4 Ndien enye ọyọkwọhọde kpukpru mmọn̄eyet+ ke enyịn mmọ efep, n̄kpa idinyụn̄ idụhe aba,+ mfụhọ m̀mê ntuan̄a m̀mê ubiak idinyụn̄ idụhe aba.+ N̄kani n̄kpọ ẹma ẹbe ẹfep.”+

5 Ndien Enye emi etiede ke ebekpo+ ọdọhọ ete: “Sese! Mmanam kpukpru n̄kpọ ẹdi mbufa.”+ Enye onyụn̄ ọdọhọ ete: “Wet, koro ikọ emi edi akpanikọ ye se ẹkemede ndibuọt idem.” 6 Ndien enye ọdọhọ mi ete: “Mmọ ẹsu ẹma! Ami ndi Alpha ye Omega, ntọn̄ọ ye utịt.+ Owo ekededi emi itọn̄ asatde, ami nyọnọ enye mmọn̄ emi otode obube mmọn̄ uwem ke mfọn.+ 7 Owo ekededi eke akande ayada mme n̄kpọ emi enyene, ndien ami nyedi Abasi+ esie enye oyonyụn̄ edi eyen mi.+ 8 Edi amaedi mbon esịt ndịk ye mbon unana mbuọtidem+ ye mbon oro mbubiam ido+ mmọ asabarede mmọ ye mme owotowo+ ye mbon use+ ye mme obụp ekpo ye mme okpono ndem+ ye kpukpru mme osu nsu,+ udeme mmọ edidu ke n̄kpọdiọhọ oro asakde ikan̄+ ye sulphur.+ Emi ada aban̄a udiana n̄kpa.”+

9 Ekem kiet ke otu mme angel itiaba emi ẹkenyenede eso itiaba oro ẹyọhọde ye akpatre ufen itiaba,+ edi edidọhọ mi ete: “Di mi, mmọn̄ n̄wụt fi n̄wanndọ, kpa n̄wan Eyenerọn̄.”+ 10 Ntre enye emen mi ke odudu spirit aka akwa edikon̄ obot,+ okowụt mi edisana obio+ Jerusalem emi otode Abasi osụhọde ke heaven edi+ 11 emi onyụn̄ enyenede ubọn̄ Abasi.+ Uyama esie ebiet ata ọsọn̄urua itiat, nte itiat jasper emi ayamade nte crystal.+ 12 Enye enyene akwa edikon̄ ibibene+ onyụn̄ enyene inuaotop duopeba, angel duopeba ẹnyụn̄ ẹdu ke mme inuaotop oro, ẹnyụn̄ ẹwet enyịn̄ esien nditọ Israel duopeba ke mmọ.+ 13 Ke edem usiahautịn inuaotop ita ẹdu, ke edem edere inuaotop ita, ke edem usụk inuaotop ita, ke edem usoputịn inuaotop ita.+ 14 Ibibene obio oro onyụn̄ enyene itiat idakisọn̄+ duopeba, ndien ẹwet enyịn̄ duopeba, kpa enyịn̄ mme apostle+ Eyenerọn̄ duopeba, ẹsịn ke mmọ.

15 Ndien enye emi etịn̄de ikọ ye ami akama nnyanyan̄a gold nte udomon̄kpọ,+ man enye okpodomo obio oro ye mme inuaotop esie ye ibibene esie.+ 16 Obio oro onyụn̄ ana ukem ukem ke n̄kan̄ mbinan̄, uniọn̄ esie onyụn̄ okpon ukem nte ubom esie. Ndien enye ada nnyanyan̄a oro odomo obio oro,+ furlong tọsịn duopeba; uniọn̄ ye ubom ye ukon̄ esie ẹdi ukem ukem. 17 N̄ko, enye odomo ibibene esie, cubit ikie ye aba ye inan̄, nte ekemde ye udomon̄kpọ owo, emi edide udomon̄kpọ mme angel n̄ko. 18 Ndien ẹkeda itiat jasper+ ẹbọp ibibene esie, ndien obio oro ekedi ata gold ukem nte edisana akrasi. 19 Ẹkeda kpukpru orụk ọsọn̄urua itiat+ ẹbana itiat idakisọn̄+ ibibene obio oro: akpa itiat idakisọn̄ ekedi jasper,+ ọyọhọ iba edi sapphire,+ ọyọhọ ita edi chalcedony, ọyọhọ inan̄ edi emerald,+ 20 ọyọhọ ition edi sardonyx, ọyọhọ itiokiet edi sardius, ọyọhọ itiaba edi chrysolite,+ ọyọhọ itiaita edi beryl, ọyọhọ usụkkiet edi topaz,+ ọyọhọ duop edi chrysoprase, ọyọhọ duopekiet edi hyacinth, ọyọhọ duopeba edi amethyst.+ 21 N̄ko, inuaotop duopeba ẹkedi pearl duopeba; ẹkeda pearl+ kiet kiet ẹnam inuaotop kiet kiet. Akwa efak obio oro onyụn̄ edi ata gold, nte edisana akrasi.

22 Edi n̄kekwe temple ke esịt esie,+ koro Jehovah+ Abasi Ata Ọkpọsọn̄,+ ye Eyenerọn̄ ẹdide temple esie.+ 23 Obio oro inyụn̄ iyomke utịn m̀mê ọfiọn̄ ndiyama nnọ enye, koro ubọn̄ Abasi ọnọde enye un̄wana,+ ndien utuenikan̄ esie ekedi Eyenerọn̄.+ 24 Ndien mme idụt ẹyesan̄a ke un̄wana esie,+ ndidem isọn̄ ẹyenyụn̄ ẹda ubọn̄ mmọ ẹdụk ke esịt.+ 25 Ndien owo idiberike mme inuaotop esie ke uwemeyo,+ koro okoneyo ididụhe do.+ 26 Mmọ ẹyenyụn̄ ẹda ubọn̄ ye ukpono mme idụt ẹdụk ke esịt.+ 27 Edi n̄kpọ ekededi oro mîsanake ye owo ekededi oro akade iso anam mbubiam+ n̄kpọ onyụn̄ osude nsu+ ididehedei idụk ke esịt;+ ibọhọke mbon oro ẹwetde enyịn̄ mmọ ẹsịn ke n̄wed uwem Eyenerọn̄ ẹdidụk.+

22 Ndien enye owụt mi akpa mmọn̄ uwem,+ emi asanade nte crystal, nte otode ebekpo Abasi ye eke Eyenerọn̄+ ewet 2 osụhọde ke ufọt akwa efak esie. Ndien mme eto+ uwem ẹdu ke edem akpa emi ye ke edem akpa oko ẹn̄wụm orụk mfri duopeba, ẹn̄wụm mfri mmọ ke ọfiọn̄ ke ọfiọn̄.+ Ndien ẹda mme ikọn̄ eto oro ẹkọk mme idụt udọn̄ọ.+

3 Isụn̄i idinyụn̄ idụhe aba.+ Edi ebekpo Abasi+ ye eke Eyenerọn̄+ ẹyedu ke obio oro, ifịn esie ẹyenyụn̄ ẹnam edisana utom+ ẹnọ enye; 4 ndien mmọ ẹyekụt iso esie,+ enyịn̄ esie oyonyụn̄ odu ke ọkpọiso mmọ.+ 5 N̄ko, okoneyo ididụhe aba,+ mmọ idinyụn̄ iyomke aba un̄wana utuenikan̄ m̀mê un̄wana utịn, koro Jehovah Abasi ayanam un̄wana ayama+ ọnọ mmọ, mmọ ẹyenyụn̄ ẹkara nte ndidem ke nsinsi nsinsi.+

6 Ndien enye ọdọhọ mi ete: “Ikọ emi edi akpanikọ ye se ẹkemede ndibuọt idem;+ ih, Jehovah emi edide Abasi ikọ odudu spirit+ mme prọfet+ ọkọdọn̄ angel esie ete ediwụt ifịn esie mme n̄kpọ eke ẹnyenede nditịbe ke mîbịghike.+ 7 Ndien, sese! ami mmọn̄ ndedi iwiwa.+ Owo emi anamde ikọ ntịn̄nnịm ikọ n̄wed emi okop inemesịt.”+

8 Ntre, ami John ndi andikop ye andikụt mme n̄kpọ emi. Ndien ke ini n̄kopde nnyụn̄ n̄kụtde, nduọ ke isọn̄ nte ntuak ibuot+ ke ukot angel emi okowụtde mi mme n̄kpọ emi. 9 Edi enye ọdọhọ mi ete: “Kpeme idemfo! Kûnam! Ami ndi ofụn nte afo ye nditọete fo kpa mme prọfet+ ye mmọ eke ẹnịmde ikọ n̄wed emi. Tuak ibuot nọ Abasi.”+

10 Enye ọdọhọ mi n̄ko ete: “Kûdian ufịkn̄kpọ ke ntịn̄nnịm ikọ n̄wed emi, koro ini oro ẹkenịmde emekpere.+ 11 Owo eke anamde ukwan̄ido, yak enye aka iso anam ukwan̄ido;+ owo eke edehede yak enye aka iso edehe;+ edi yak edinen owo+ aka iso anam edinen ido, ndien yak ẹnam owo eke edide edisana aka iso edi edisana.+

12 “‘Sese! Ami mmọn̄ ndedi iwiwa,+ ndien utịp+ eke nnọde odu ye ami, man nnọ owo kiet kiet nte ekemde ye utom esie.+ 13 Ami ndi Alpha ye Omega,+ akpa ye akpatre,+ ntọn̄ọ ye utịt. 14 Mbon oro ẹyetde ọfọn̄idem mmọ,+ man ẹkpenyene unen ndisịm eto uwem,+ ẹkpenyụn̄ ẹbe ke mme inuaotop ẹdụk obio, ẹkop inemesịt.+ 15 Mme ebua+ ye mme obụp ekpo+ ye mbon use+ ye mme owotowo ye mme okpono ndem ye kpukpru owo eke ẹmade nsu ẹnyụn̄ ẹsude nsu ẹdu ke edem obio.’+

16 “‘Ami, Jesus, ndọn̄ angel mi nte edisian mbufo mme n̄kpọ emi ke ufọn mme esop. Ami ndi orụn̄+ ye eyen+ David, ye nyayama ntantaọfiọn̄ usenubọk.’”+

17 Ndien spirit+ ye n̄wanndọ+ ẹka iso ẹdọhọ ẹte: “Di!” Ndien yak owo eke okopde ọdọhọ ete: “Di!”+ Yak owo eke itọn̄ asatde edi;+ yak owo eke amade edibọ mmọn̄ uwem ke mfọn.+

18 “Ami ndọhọ kpukpru owo eke ẹkopde ntịn̄nnịm ikọ n̄wed emi nte: Edieke owo ekededi adiande n̄kpọ+ ke mme n̄kpọ emi, Abasi ayadian mme ufen+ eke ẹwetde ke n̄wed emi ọnọ enye; 19 ndien edieke owo ekededi osiode n̄kpọ ke ikọ n̄wed ntịn̄nnịm ikọ emi, Abasi oyosio udeme esie efep ke eto uwem+ ye ke edisana obio oro,+ kpa mme n̄kpọ eke ẹwetde ẹban̄a ke n̄wed emi.

20 “Enye emi etịn̄de mme n̄kpọ emi ọdọhọ ete, ‘Ih; ami mmọn̄ ndedi iwiwa.’”+

“Amen! Di, Ọbọn̄ Jesus.”

21 Mfọnido Ọbọn̄ Jesus Christ oro owo mîdotke akpakam odu ye ndisana owo.+

[Mme Ikọ Idakisọn̄]